ཕྱི་རོལ་འཇིག་རྟེན་ཆུ་རྡུལ་འདུས་ཏེ་གྲུབ།།

སེམས་ཅན་རྣམ་ཤེས་དེ་ཡི་ཁོངས་སུ་སྦྲུམ།།

མྭེས་ནིས་ཏོ་ཡི་གྲུབ་མཐའི་སྲོལ་འབྱེད་པ།།

ནུབ་དར་མཚན་ཉིད་སྨྲ་བའི་ཕ་ཡབ་བཀུར།།

ཕྱི་དངོས་ཐོག་མར་སྐྱེས་པའི་འདུས་རྒྱུ་དང་།།

དེ་ཉིད་མཐའ་མར་འཇིག་པའི་འགག་རྐྱེན་ཏེ།།

སྣང་སྲིད་འཇིག་རྟེན་སྐྱེ་འགག་མ་ངེས་པའི།།

གང་གི་རྗེས་འབྲང་མན་ཏིའི་འདོད་ཚུལ་ལོ།།

ཕྱི་རོལ་འཇིག་རྟེན་ཆེན་པོའི་གཟུགས་རྣམ་དང་།།

རྟོགས་དཀའི་ལྐོག་གྱུར་རྣམ་ཤེས་ཕྲ་མོ་གཉིས།།

རླངས་པ་འདུས་བྲལ་གྱུར་པའི་ཆོས་ཉིད་ལས།།

བྱུང་བར་འདོད་པ་ཁིན་ཤིས་མཱིས་ནིའི་ལུགས།།

ཇི་སྙེད་དངོས་པོ་ཐམས་ཅད་གྲངས་ལས་བྱུང་།།

གྲངས་ལས་མ་བྱུང་དངོས་པོ་ལྷ་ཡིས་བསྒྲུབས།།

ཡོད་དགུ་གྲངས་སུ་བརྟེན་པའི་མཚན་ཉིད་འདི།།

ཀིལ་སི་གྲུབ་མཐའི་གཞུང་ལུགས་ཡིན་པར་ཐལ།།

གཅིག་ལས་ཀུན་འབྱུང་ཀུན་ནི་གཅིག་ལ་བརྟེན།།

ལྷ་ནི་གཅིག་ཉིད་གཅིག་ལས་ཐམས་ཅད་འབྱུང་།།

གཅིག་ཀྱང་མི་བརྟན་གཡང་གཟར་རྦབ་ཆུ་འདྲ།།

སྐྱེས་འགག་མེ་རྡུལ་བསྒྲུབས་པ་ཁིལ་ཐིའི་ལུགས།།

ཡོད་ཡོད་གཉིས་བརྟེན་མ་ཡོད་མི་སྲིད་ཅིང་།།

ཡོད་གཅིག་མེད་གཉིས་ཡོད་པ་རིགས་པས་གྲུབ།།

གཅིག་ལས་ཀུན་འབྱུང་ཀུན་ལ་རྣམ་དབྱེ་བྲལ།།

བེམ་ཤེས་འབྲེལ་འབྱུང་སྒྲུབ་པ་ནིས་ཏིའི་སྲོལ།།

ཇི་སྙེད་གཟུང་ཡུལ་ཐམས་ཅད་སེམས་ཚོར་ཡིན།།

ཤེས་ཡོན་མ་ལུས་སེམས་ཚོར་ཉིད་ལས་འབྱུང་།།

གང་ཟག་ཁོ་ནས་འགྲིག་མིན་ཡང་དག་འཇལ།།

གཞན་ཀུན་མ་ཡིན་འདི་ནི་ཀིར་ལིའི་ལུགས།།

གདོད་མར་རང་རྨོངས་ཡིན་པ་རྟོགས་བྱས་ཏེ།།

བསམ་སྤྱོད་མཛེས་པའི་རྒྱས་གྱིས་སྤྲས་གྱུར་ན།།

འཆི་བ་གཏན་འཇིག་མ་ཡིན་ཡུལ་གཞན་འཕོས།།

ར་ཐིས་ལུགས་འདི་ནུབ་ཕྱོགས་ལྷག་པར་དར།།

དབང་པོས་ཤེས་པའི་དངོས་རྣམ་འཆར་སྣང་དང་།།

ཕུགས་ཀྱི་མཚན་ཉིད་རྟོགས་པ་ཤེས་རབ་ཡིན།།

བྱ་དངོས་ཀུན་ལ་ཡག་བཙོག་བདེན་རྫུན་ཕྱེ།།

མཚན་ཉིད་གཙོ་བོར་བཀུར་མཁན་ཕོ་ལ་ཐྲོ།།

ཤེས་རབ་དོན་གཉེར་བྱེད་པ་མི་ཡི་གཤིས།།

རང་ཉིད་བཤེས་གཉེན་དད་པ་མི་ཆོས་ཏེ།།

བདེན་དོན་དེ་ལས་བཀུར་བ་ཁོ་བོའི་ངག།

གཟུགས་འདས་སྨྲ་བའི་ཁྱུ་མཆོག་ཏོ་ཏི་རྒྱལ།།