ཉི་འོད་འཐུ་བའི་མི་ཚོགས་ཤིག་སྔ་མོ་ནས་ལམ་ལ་ཞུགས་སོང་།

གོར་མོ་རྡོ་ལ་རྐང་རྗེས་དོད་པ།

སུ་ཡི་སེམས་ཀྱི་མུན་པ་ཡིན།

ཆར་ཞོད་ཆེ་བའི་ཕྱི་དྲོ་འདིར།

མི་ཚོགས་སྔར་བཞིན་འདུར་བཞིན་འདུག

འཚོ་བ་ལ་མཐའ་མེད་པས།

གསོན་པ་ལ་སྙིང་བོ་འཚོལ་བཞིན་འདུག

ཕྱི་བལྟས་ཙམ་ཡང་མེད་པའི་མི་ཚོགས་ཤིག་ལམ་ལ་ཞུགས་རྗེས།

ཆར་གདུགས་མེད་པའི་མགོ་རྗེན་དག

གོམ་ཆུང་གང་ལ་བསྒྱུར་ཞིང་ཕྱོགས།

ཕྱི་དྲོའི་སྨན་ཐུན་འདི་འཐུང་རྗེས།

ངས་སྔར་བཞིན་རང་གིས་རང་ལ་གསོན་པའི་སྙིང་བོ་བཤད།

ལས་ཀྱི་བཀོད་པ་བྲིས།

མི་ཚེ་ནི་སྙེ་མ་ཞིག་དང་དུས་ཚོད་ནི་ནས་འབྲུ་བཞིན།

མི་སེམས་ཀྱི་སྤྲིན་པ་སྐབས་རེར་འཁྲུགས་ནས་ཆར་འབབ་ལ།

ལན་རེར་དྲོ་ན་བསིལ་སྦྱིན།

གལ་སྲིད་འཇིག་རྟེན་ནས་གནམ་ངོ་གཡའ་དག་པ་ལས།

གནམ་འཐིབས་ཆར་མ་བབས་ན།

དྲོད་ཀྱི་རྣང་ཞིང་ལ་འབྲུ་རིགས་ཀྱི་སོན་འབུས་པ་མེད་ལ།

བདེ་སྐྱིད་ཀྱི་རྫིང་བུར་འཚོ་གནས་ཀྱི་ལྟག་ཆུ་ཆད་ངེས།

འོན་ཀྱང་།

འཚོ་བ་ལ་སྙིང་བོ་ཡོད་པས།

རང་སེམས་ཀྱི་བདེ་སྡུག་གླུ་རུ་ལོངས་དང་།

ས་ཆུ་མེ་རླུང་གིས་བསྐྱེད་པའི་དུས་བཞིའི་འགྱུར་བག་གིས།

སྐྱེ་རྒ་ན་འཆི་ལ་དགའ་སྡང་སྐྱོ་འཇིགས་ཀྱི་རི་མོ་བབས།

རང་གི་མིག་གིས་རང་ཉིད་མི་རིག་པ་བཞིན།

རི་མོ་འདི་ཁྱེད་ཀྱིས་བྲིས་ནས་ཡུན་རིང་འགོར།

སྤྲིན་པ་མཁའ་ནས་ཡལ་ན་ཆར་ཆུ་དཀོན་པ་ལྟར།

ཚ་གདུག་ཆེ་བའི་དབྱར་གཞུང་འདིར།

སུས་ཁྱེད་ལ་དྲན་གདུང་གི་ཆར་བ་དབབ།

རེ་བ་དང་རེ་ཆད་ཁྲོད་ལམ་ལ་ལངས་ཤིང་།

རྒྱལ་ཁ་དང་ཕམ་ཁའི་ཁྲོད་རང་ཉིད་བཙལ།

ཉི་ཤར་དང་ཉི་ནུབ་རེ་རེར།

ཉི་ཟླའི་འཆར་ནུབ་ལས་རང་བྱུང་གི་དུས་ཚིགས་སུ།

སེམས་ཀྱི་རི་མོ་བྲི།

མི་སེམས་ལ་ཅི་ཡང་ཤོང་།

དགའ་བའི་རི་མོ།

སྐྱོ་བའི་རི་མོ།

ཆགས་པའི་རི་མོ།

སྡང་བའི་རི་མོ།

ཡོད་ཚད་སེམས་སུ་བཅུག་ནས་རྒྱང་ལ་ཆས།

རྒྱང་རིང་ན།

སྲིད་པའི་ཐབ་རྡོ་བཙུགས་པའི་ཕ་མེས་ཚོའི།

དམར་སྨུག་གི་ངོ་གདོང་ལས་རེ་སྒུག་གི་མིག་ཟུང་རིག་རིག་འགུལ།

ཆར་པས་རྐང་རྗེས་ཁུར་ནས་རླུང་ལ་བརྫུས།

སྐྱི་བསིལ་རླུང་གིས་ང་ལ་སྡོང་གྲོགས་མཛད།

ཆར་བ་ནམ་ཞིག་ལ་བབས་པ་མ་ཤེས་ཀྱང་།

གནམ་གཤིས་ལགས། ཆར་མ་བབས་སྔོན་ལ་འབྲུག་སྒྲ་ལྡིར་ལ།

རླུང་མ་ལྡང་བའི་གོང་ལ་སྤྲིན་པ་འཁྲིུགས་ཤིག

དུས་ཚོད་ཀྱིས་ང་རང་ཇེ་མཐུག་ཏུ་བཏང་བས།

འགྲུལ་བཞུད་ཀྱི་ཉི་འོད་མ་གཏོགས་ཅི་ཡང་མཐོང་གིན་མི་འདུག

ཚེ་སྲོག་གི་དྲག་ཆར་མ་ཐང་བའི་སྔ་རོལ་དུ།

ཕུགས་བསམ་གྱི་ཤྭ་འོད་གང་སར་རྒྱུག་ཆོག

ཉིན་མཚན་མང་པོར།

ལོ་ཟླའི་ཆར་ཆུས་ང་ཡི་ནང་སེམས་སྦངས་པར་བྱས་ལ།

དོན་ཉི་ཚེ་བ་དག་རིང་དུ་གཡུག་རྗེས།

ངས་མི་ཚེའི་གླེགས་བམ་གཟབ་ནན་གྱིས་བཀླགས།

མཇུག་མཐར་ལེའུ་གཅིག་ལས་ལྷག་མི་འདུག

བཀླགས་ནས་མཚམས་འདིར་སླེབས་དུས།

ང་རང་དབང་མེད་པར་གྲང་འདར་ཞིག་བརྒྱབ།

དེ་དང་མཉམ་དུ་རང་གི་གྱོན་གོས་ཧ་ཅང་སྲབ་སྣང་ཞིག་སྐྱེས།

དུས་ཀྱི་བརྡ་ལན་ཅི་ཞིག་ཡིན་མིན་བཤད་དཀའ་ཡང་།

ངས་དགོངས་དག་ཞུ་རྒྱུ་ལས་མི་འདུག་ཨང་།