ཉི་མ་ནི་རྒྱན་ཆ་ཞིག་སྟེ།

སྒེའུ་ཁུང་ལས་མཐོང་བའི་གསེར་གྱི་སྡེར་མ་ཞིག

ཉི་མ་ནི་གཏན་ཚིགས་ཤིག་སྟེ།

རླུང་གི་གཡོར་གྲུ་ལ་རྒོལ་བའི་གསེར་གྱི་རི་རབ་ཅིག

ཉི་མའི་ཤ་དང་རུས་པ།

ཁྲག་གི་ཁུགས་སོ་རེ་རེར།

ཚེ་སྲོག་གི་རྒྱུ་བ་མ་འགག་པའི་སེམས་ཅན་ག་ཚོད་ཡོད་དམ།

དེ་དག་གི་རེ་བའི་མིག་ཟུང་གཏད་ས་ཁྱོད་ཁོ་ན་ཡིན་ནམ།

བར་ཐག་ནི་གནམ་ས་ལྟ་བུ་སྟེ།

བར་ཐག་ནི་འདི་ཕྱི་ལྟ་བུ་སྟེ།

གནམ་སའི་བཀར་ཤིང་ལྟ་བུ།

འདི་ཕྱིའི་ཟམ་པ་ལྟ་བུ།

ཉི་འོད་ཁོ་ན་ལགས་པས་དེ་ལ་དུངས་པ་ཡོད།

ཉི་འོད་ཁོ་ན་ལགས་པས་དེ་ལ་ཞེན་ཆགས་ཆེ།

ཁྱེད་ཀྱིས་ང་ལ་གནང་བའི་འོད་ཀྱི་ཟེར་མ་རེ་རེས།

ཞེ་སྨྲེང་བའི་མཚོ་མོ་སྐེམ་པར་མཛད་ཅིང་།

ལུས་ཉོབ་པའི་ངལ་བ་སེལ་བར་མཛད།

དཔྱིད་གསུམ་གྱི་རླུང་བུ་དལ་གྱིས་ལྡང་དུས།

ཁྱེད་ཀྱིས་གཡང་ཟོག་གི་ཚེ་སྲོག་ལ་རེ་བའི་དྲོད་ཁོལ་སྟེར།

དབྱར་གསུམ་གྱི་ལང་ཚོ་མངོན་པར་གསལ་དུས།

ཁྱེད་ཀྱིས་མེ་ཏོག་གི་མཛེས་སྡུག་གླིང་ལ་ཁྱབ་པར་བྱེད།

སྟོན་མཇུག་གི་སྡོང་ལོ་ས་རུ་འཐོར་ན།

ཁྱེད་ནི་ས་རྡུལ་ཕྱགས་པའི་ཨ་མྱེས་རྒན་པོ་ལྟར་དུ།

རླུང་དང་འགྲོགས་ཏེ་ཡུལ་ཀུན་བདར་བར་གནང་།

དགུན་གསུམ་གྱི་ཙག་རླུང་ཧྲིལ་གྱིས་མཆེད་དུས།

ཁྱེད་ནི་དྲིན་གྱི་མ་མ་སྟེ།

ལུས་སེམས་ཧྲིལ་བོ་དགའ་བདེས་ཁྱབ་བྱེད་ཅིག

ཉི་འོད་ནི་ཁྱེད་ཀྱི་ཡོད་ཚད་དེ།

གླིང་ཀུན་གསལ་བར་བྱེད་པའི་ལམ་སྟོན་གྱི་སྒྲོན་མེ་ལྟ་བུའམ།

ལྗང་མྱུག་གི་ས་བོན་ལ་སྟོབས་ཤུགས་སྩོལ་བའི་དངོས་གྲུབ་ཀྱི་བདག་པོ་ལགས།

ཀྱེ། འོད་གསལ་གྱི་ཉི་མ་ལགས།

ངས་ཉམ་ཆུང་གི་ལག་ཟུང་མཐོ་རུ་བཏེགས་ཏེ།

ཁྱེད་ལ་སྤོབས་པ་ཆེན་པོས་འབོད་འདོད།

ཀྱེ། ཉི་མ་ལགས།

ཁྱེད་ཀྱི་འོད་ངོགས་རེ་རེར།

འབྲོག་སྦྲ་ནག་ཅན་གྱི་རེ་བ་དང་ཡིད་སྨོན་གྱི་མིག་ཟུང་བགྲད་ཡོད།

ཁྱེད་ཀྱིས་གནང་བའི་དྲོད་ཀྱི་ཁུག་སོ་རེ་རེར།

རོང་ཤིང་སྒོ་ཅན་གྱི་དགའ་བདེའི་རྨི་ལམ་ཉལ་ཡོད།

ཁ་བའི་འདབ་མ་བརྩེགས་པའི་གནས་རི་སྟེ།

གངས་དཀར་ཏི་སེ།   གནོད་སྦྱིན་གངས་བཟང་།

རོང་བཙན་ཁ་བ་དཀར་པོ།    ཤར་དུང་རི།

གྱ་གྱུར་རིང་དུ་འབབ་པའི་གཙང་བོ་སྟེ།

མ་ཕམ་གཡུ་མཚོ།     ཡར་འབྲོག་གཡུ་མཚོ།

དྭངས་ར་གཡུ་མཚོ།     ཁྲི་ཤོར་རྒྱལ་མོ།

མདོར་ན་རྫ་འདབས་ཀྱི་འབྲོང་དང་།

རི་འདབས་ཀྱི་རྟ་ནོར་ལུག་གསུམ།

ཆུ་ལ་གནས་པའི་གསེར་ཉ་སོགས།

ཁྱེད་ཀྱི་མ་བསྐྱངས་པ་གཅིག་ཀྱང་མི་འདུག་ལགས།

རི་མོ་བས་པིར་གྱིས་བྲིས་པ་དེ་ཁྱེད་ཀྱི་བྱིན་རླབས་ཡིན་ལ།

སྙན་ངག་པས་སྙུ་གུས་བྲིས་པ་དེའང་ཁྱེད་ཀྱི་གཟི་དཔལ་ཡིན།

མཐོ་བ་གནམ་དུ་བསྒྲེང་བའི་དར་ཆེན་དང་།

དམའ་བ་ཐང་དུ་བརྡབས་པའི་ཕུར་ཆེན་ཚུན་ཆད།

ཁྱེད་ཀྱི་བྱམས་བརྩེ་དང་འབྲལ་ཐབས་གཏན་ནས་མེད།

ཁྱེད་ཀྱི་དར་རྒུད་མཚོན་པའི་ཉི་འཛིན་གྱི་ཉིན་མོ་རེ་རེས།

ཁྱེད་ཀྱི་ངོ་གདོང་སྒྲིབ་པའི་སྤྲིན་ནག་གི་རྔམ་ཁ་རེ་རེས།

ང་དང་ངའི་འཇིག་རྟེན་གྱི་མཛེས་སྡུག་མ་ལུས།

ང་དང་ངའི་ནམ་མཁའ་ཡི་དྭངས་གཙང་མ་ལུས།

གློ་བུར་གློ་བུར་དུ སྐད་ཅིག་སྐད་ཅིག་ཏུ།

འཇོམས་པར་བྱས།

འཇིག་པར་བྱས།

ངང་ཐུང་གི་འཇིགས་པ་རེ་རེ་དང་།

གློ་རྡེག་གི་འགྱུར་བ་རེ་རེ་ཡིས།

ཁྱེད་ཉིད་མི་རྟག་པ་ཡིན་ཚུལ་ངོ་སྤྲོད་བྱས་ཤིང་།

རང་ཉིད་ལ་སོས་དལ་བག་ཕེབས་ཀྱི་དུས་ཚིགས་ཉུང་བའི་དྲན་སྐུལ་གནང་།

ཉི་འོད་ཟགས་པའི་འོད་ཀློང་གི་བར་གསེང་རེ་རེར།

རྡུལ་ཕྲ་རབ་ཀྱི་གྲངས་དང་མཉམ་པའི་སྲོག་ལྡན་མང་དུ་འཚོ།

དེ་དག་གི་རེ་བའི་མིག་ཞགས་ཀྱིས་ཁྱེད་ཉིད་འཚོ་ཚུལ་བསམ་ན།

གསོན་པར་ཕྱོགས་པའི་ལམ་ག་དེ་ཇི་འདྲའི་མཛེས་པ་ལ་ཨང་།

སྙིང་ནས་བརྩེ་བའི་ཁྲི་གདུགས་ཀྱི་ཉི་མ་ལགས།

སྐྱེས་པའི་རྟ་གོང་ནས་སྟག་ཤ་རའི་སྐྱ་རྩལ་ངོམ་པར་ཁྱེད་ཉིད་མཁོ་ལ།

སྐྱེས་མའི་སྦྲ་འདབས་ནས་སྨན་མཛངས་མའི་བློ་རྩལ་ངོམ་པར་ཁྱེད་ཉིད་མཁོ།

རླབས་ཆེ་བའི་ཁྲི་གདུགས་ཀྱི་ཉི་མ་ལགས།

དྲིན་ཆེ་བའི་རྟ་བདུན་གྱི་དབང་བོ་ལགས།

བྱིས་པས་དཔུང་རྡང་བསྒྲིགས་དུས་ཤེད་ཀྱིས་འབོད་ས་དེ་ཁྱེད་ཉིད་ཡིན་ལ།

རྒན་པས་མ་ཎི་བགྲང་དུས་སྐྱིད་ལ་རེ་བ་བཅོལ་སའང་ཁྱེད་ཉིད་ཅི་ལ་མིན།