རྒྱལ་ཡོངས་སུ་ཏོག་དབྱིབས་ནད་དུག་གསར་པའི་གློ་ཚད་འགོས་ཁྱབ་དུ་འགྲོ་བཞིན་པའི་སྐབས་སུ་དཀར་མཛེས་ཁུལ་སྲིད་གྲོས་ཀྱི་ཨུ་ཡོན་མཁན་པོ་འཇམ་དབྱངས་ལགས་ཀྱིས་ནད་ཡམས་འདི་མགྱོགས་མྱུར་ངང་འགོག་སྲུང་གང་ལེགས་ཐུབ་པའི་ཆེད་དུ་གནོད་ཐེབས་ས་ཁུལ་མང་པོར་ཁ་ཚ་དགོས་གཏུགས་ཀྱི་མཁོ་བའི་ནད་པ་མྱུར་སྐྱོབ་རླངས་འཁོར་དང་ཁ་ཐུམ། མིག་སྲུལ་ཤེལ། སྨན་སྤྱོད་ལུས་སྲུང་གྱོན་ཆས། དུག་སེལ་སྨན་རྫས། རས་གུར། དབྱང་དབུགས་བཟོ་ཆས་སོགས་དམངས་སྒོར་ཁྲི་ཉིས་བརྒྱ་དང་གྱ་ལྔ༼2850000༽རི་བའི་སྨན་སྤྱོད་དངོས་རྫས་འབོར་ཆེན་ཉོ་སྒྲུབ་དང་བསྡུ་རུབ་དོན་འཁྱོལ་མཛད་ནས་ཝུའུ་ཧན་གྲོང་ཁྱེར་གྱི་ལྟེ་བའི་སྨན་ཁང་དང་། ཝུའུ་ཧན་གྲོང་ཁྱེར་སྨན་ཁང་གསུམ་པ། ཝུའུ་ཧན་གྲོང་ཁྱེར་ཚན་རྩལ་སློབ་ཆེན་གྱི་ཁོངས་གཏོགས་ཐན་ཡུའུ་སྨན་ཁང་། ཧུའུ་པེ་ཞིང་ཆེན་ཀྲུང་ལུགས་སྨན་ཁང་། ཧུའུ་པེ་ཧྲི་ཡན་དང་། རང་ཁུལ་སོགས་སུ་ཞལ་འདེབས་རོགས་སྐྱོར་གནང་ཡོད་པ་རེད།
སྤྱི་ཚེས26ཉིན་ཁྲེང་ཏུའུ་ཆང་ལས་གྲོང་ཁྱེར་རྒྱ་གྲམ་དམར་པོའི་རིམས་འགོག་ལས་དོན་ལ་ཆེད་དམིགས་ཀྱིས་དམངས་སྒོར་ཁྲི་བཅུ༼10000༽ཡི་ཞལ་འདེབས་རོགས་སྐྱོར་གནང་བ་དང་། རང་ཁུལ་གྱི་རྟའུ་རྫོང་ལ། མྱུར་སྐྱོབ་རླངས་འཁོར་གཅིག་དང་། ཁ་ཐུམ་ཁྲི་ལྔ༼50000༽ དུག་སེལ་སྨན་ཐུམ་ཏུན་གཅིག་ལྷག ༼རིལ་ཐུམ1000000༽ འཁྲུད་མི་དགོས་པའི་དུག་སེལ་སྨན་རྫས་ཤེལ་དམ1500། ལུས་སྲུང་གྱོན་ཆས500། མིག་སྲུང་ཤེལ200། རས་གུར5བཅས་ཁྱོན་དམངས་སྒོར་ཁྲི་དྲུག་ཅུ་རེ་གསུམ༼630302༽ལྷག་རི་བའི་དངོས་རྫས་ཞལ་འདེབས་རོགས་སྐྱོར་གནང་། ཉག་རོང་རྫོང་ལ། ཁ་ཐུམ་ཁྲི་གཉིས༼20000༽དང་། དུག་སེལ་སྨན་ཐུམ་ཁྲི་ཉི་ཤུ༼200000༽། འཁྲུད་མི་དགོས་པའི་དུག་སེལ་སྨན་རྫས་ཤེལ་དམ་ལྔ་བརྒྱ500། ལུས་སྲུང་གྱོན་ཆས་བརྒྱ༼100༽། མིག་སྲུང་ཤེལ་བརྒྱ༼100༽། རས་གུར་ལྔ༼5༽བཅས་དམངས་སྒོར་ཁྲི་བཅུ་བདུན༼171316༽ལྷག་རི་བའི་དངོས་རྫས་ཞལ་འདེབས་གནང་ཡོད་པ་རེད།
