གཙོ་ངོས།>> གསར་འགྱུར།>>སི་ཁྲོན་བོད་ཁུལ།

རྩོམ་སྒྲིག་པ།ཡོང་ཁུངས།ཀྲུང་གོའི་བོད་ལྗོངས་དྲ་བ། སྤེལ་དུས། ༢༠༢༠ལོའི་ཟླ་བ་༠༣ཚེས་༡༦ཉིན།

ལི་ཐང་རྫོང་གིས་ཀྲུང་གོའི་ནོར་ནག་ཁུ་ལུ་ཡི་མ་བཅོས་རྒྱུ་ཆའི་ཐོན་སྐྱེད་རྟེན་གཞི་དེ་རྒྱལ་ཁབ་ཀྱི་རྩེར་སོན་ཁོངས་མིང་གི་གྲས་སུ་ཐོ་འགོད་བྱས།


          ཀྲུང་གོའི་བོད་ལྗོངས་དྲ་བའི་འཕྲིན། ཟླ་3པའི་ཚེས་12ཉིན་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་གྱི་ལི་ཐང་རྫོང་ཞིང་འབྲོག་གྲོང་གསེབ་དང་ཚན་རྩལ་ཅུས་ནས་རྒྱུས་ལོན་བྱུང་བ་ལྟར་ན། ལི་ཐང་རྫོང་གིས་ཀྲུང་གོའི་ནོར་ནག་ཁུ་ལུ་ཡི་མ་བཅོས་རྒྱུ་ཆའི་ཐོན་སྐྱེད་རྟེན་གཞི་དེ་ཉིད་རྒྱལ་ཁབ་ཀྱི་རྩེར་སོན་ཁོངས་མིང་གི་གྲས་སུ་ཐོ་འགོད་བྱས་ཏེ་དཔང་ཡིག་ཐོབ་པ་དང་། གནས་ཚུལ་འདི་ནི་རྫོང་འདིར་ཀྲུང་གོ་ཕྱུགས་ལས་ཐོན་རྫས་འཁོར་རྒྱུག་མཐུན་ཚོགས་ཀྱིས་ལི་ཐང་རྫོང་ལ་“ཀྲུང་གོའི་ནོར་ནག་ཁུ་ལུའི་མ་བཅོས་རྒྱུ་ཆའི་ཐོན་སྐྱེད་རྟེན་གཞི”ཞེས་པའི་མཚན་སྙན་གནང་རྗེས་ཀྱི་བཀྲ་ཤིས་པའི་བྱ་བ་གཞན་ཞིག་རེད།

“.net ”ཁོངས་མིང་དཔང་ཡིག

“ཀྲུང་གོའི”ཁོངས་མིང་དཔང་ཡིག
          ལི་ཐང་རྫོང་ནི་མདོ་དབུས་མཐོ་སྒང་གི་ཤར་ལྷོའི་མཚམས་སུ་གནས་པ་དང་ཆ་སྙོམས་མཚོ་འཕགས་སྨི་4300ཟིན་ཞིང་། རྒྱལ་ཡོངས་ཀྱི་འབྲོག་ལས་རྐྱང་པའི་ས་ཁུལ་120དང་། སི་ཁྲོན་ཞིང་ཆེན་གྱི་10། དཀར་མཛེས་ཁུལ་བཅས་ཀྱི་རྫོང་5བཅས་ཀྱི་ཁྲོད་དུ་འདུས། དེ་དང་ཆབས་ཅིག་ལི་ཐང་རྫོང་ནི་སི་ཁྲོན་ཞིང་ཆེན་རྩྭ་ཐང་འབྲོག་ལས་རྐྱང་པའི་གཙོ་གནད་རྫོང་ཞིག་ཀྱང་ཡིན། 2019ལོའི་ལོ་མཇུག་ཏུ་ནོར་ནག་ཁྲི་18.2ཡོད་པ་དང་། བཤས་ཁོངས་སུ་གཏོང་བའི་གྲངས་ཀ་ཁྲི་5.5ལྷག་ཙམ་ཟིན་པར་འབྲོག་ལས་ཀྱི་ཐོན་སྐྱེད་རིན་ཐང་སྒོར་དུང་ཕྱུར་4.58ཟིན་ཡོད་ཅིང་། དེས་ཞིང་ལས་ཀྱི་སྤྱིའི་ཐོན་སྐྱེད་རིན་ཐང་གི་69%བཟུང་ཡོད་ལ། ཞིང་འབྲོག་མང་ཚོགས་ཀྱི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་11918ཟིན་པ་བཅས་འབྲོག་ལས་ཀྱི་བསྐྲུན་ཚད་ཕྱེད་ཀ་ཡན་ཟིན་ཡོད།

ལི་ཐང་ནས་ཡར་སྐྱེས་ནོར་ནག་གི་ཁུ་ལུར་ཐོག་མའི་ལས་སྣོན་བྱེད་བཞིན་པ། 
          སྲོལ་རྒྱུན་གྱི་འབྲོག་ལས་དེ་དེང་རབས་ཀྱི་རྩྭ་ཐང་འབྲོག་ལས་ཕྱོགས་སུ་སྐུལ་འདེད་ནུས་ལྡན་གཏོང་ཆེད། ལི་ཐང་རྫོང་གིས་ཐོན་ལས་གཉེར་སྐྱོང་མཁན་སྐྱེད་སྲིང་ཤུགས་ཆེན་བྱས་ནས་ཐོན་རྫས་བྲིན་ཚོང་གི་ལམ་སྲོལ་བཙུགས་ཤིང་། 2017ལོའི་ཟླ་9པའི་ཚེས་13ཉིན། ནང་འདྲེན་བྱས་པའི་ལི་ཐང་རྫོང་ཡར་སྐྱེས་ནོར་ནག་ཁུ་ལུ་ལས་སྣོན་ཚད་ཡོད་འགན་འཁྲི་ཀུང་སི་ལས་གཉེར་བྱེད་འགོ་ཚུགས་པ་དང་། ཀུང་སིས་ནོར་ནག་གི་ཁུ་ལུའི་ལས་སྣོན་ཐོན་སྐྱེད་ལ་རྒྱབ་སྐྱོར་ཡང་བྱས་པ་རེད། སྔོན་ཆད། ནོར་ནག་ལས་ལྷུང་བའི་ཁུ་ལུ་དེ་དག་རྩྭ་ཟ་སྐབས་རྒྱུན་པར་ལྟོ་བར་ཟ་བཞིན་ཡོད་པས་གནད་དོན་རབ་དང་རིམ་པ་ཐོན་གྱིན་ཡོད། འདི་ནི་འབྲོག་པ་རྣམས་ཀྱིས་ནམ་ཡང་མགོ་ན་བའི་གནད་དོན་ཞིག་རེད། ད་ཆ་ནོར་ནག་གི་ཁུ་ལུ་ལས་སྣོན་ཁེ་ལས་ཡོད་པས་བེད་མེད་དུ་གྱུར་བའི་ཁུ་ལུ་དེ་“རིན་པོ་ཆེ”ལྟ་བུར་གྱུར་པ་དང་། རྩྭ་ཐང་དུ་“ཁུ་ལུ་གང་སར་འཕུར་ནས་མཁའ་དབུགས་སྦག་ཙོག་བཟོ་བའི”ཁོར་ཡུག་ངན་པར་འགྱུར་ལྡོག་བཏང་ཡོད། ཀུང་སིས་ལོ་རེ་བཞིན་ནོར་ནག་གི་ཁུ་ལུ་སྒོར་ཁྲི་700ལྷག་ཙམ་ཉོ་སྒྲུབ་བྱས་ནས་མི་82ཀྱི་ལས་ཞུགས་ཐག་གཅོད་བྱས་ཤིང་། ཞིང་འབྲོག་པའི་ལས་ཞུགས་འབབ་འཕར་གྱི་ཐབས་ལམ་རྒྱ་ཆེར་བཏང་ནས་མང་ཚོགས་ལ་རིན་མེད་ངང་འཁལ་འཐག་རྩལ་ནུས་གསོ་སྦྱོང་བྱས་ཏེ། གསོ་སྦྱོང་བྱེད་མཁན་མི་200ལྷག་ཡོད་པ་རེད། 
          རྒྱུས་ལོན་བྱུང་བ་ལྟར་ན། ལི་ཐང་རྫོང་ལ་2019ལོའི་ཟླ་7པར་ནོར་ནག་གི་ཁུ་ལུའི་མ་བཅོས་རྒྱུ་ཆའི་ཐོན་སྐྱེད་རྟེན་གཞི་ཞེས་པའི་ཆོག་མཆན་སྤྲད་རྗེས། དཀར་མཛེས་ཁུལ་དང་སི་ཁྲོན་ཞིང་ཆེན། ཐ་ན་རྒྱལ་ཡོངས་ཀྱི་འབྲོག་ལས་ཐོན་རྫས་ཁྲོམ་ར་ནས་ལི་ཐང་གི་མཚན་སྙན་ཀུན་ལ་གྲགས་ཡོད་ཅིང་། འདི་དག་གིས་ཀྲུང་གོའི་ནོར་ནག་གི་ཁུ་ལུ་ནས་སྤུས་ལེགས་རྒྱུ་ཆའི་ཐོན་སྐྱེད་ལ་དགེ་མཚན་ལྡན་པའི་དཔེ་སྟོན་ནུས་པ་འདོན་སྤེལ་བྱས་ཡོད། 
          “ཁོངས་མིང་ཐོ་འགོད་བྱས་རྗེས། ལི་ཐང་རྫོང་གི་ནོར་ནག་ཁུ་ལུའི་ཐོན་སྐྱེད་རྟེན་གཞིའི་ཟོང་རྟགས་སྔར་བས་སྐད་གྲགས་ཆོད་པར་ཕན་ཐོགས་ཡོད་པ་དང་། ཟོང་རྟགས་ཀྱི་སྣང་བརྙན་དང་ཟོང་རྟགས་ཀྱི་སྤུས་ཚད་ལ་འགན་ལེན་བཅས་བྱས་ནས། ལི་ཐང་གི་ཞིང་འབྲོག་མང་ཚོགས་ཀྱི་ཕྱུགས་རིགས་གསོ་ཚགས་ཀྱི་བརྩོན་སེམས་ཆེ་རུ་བསྐྱེད་ཐུབ། དེ་ལྟར་འབྲོག་ལས་ཐོན་ལས་ཅན་དང་ལེགས་བསྡུས་ཞིབ་གཉེར་ཅན་གྱི་ཕྱོགས་སུ་འཕེལ་རྒྱས་འགྲོ་རྒྱུར་སྐུལ་ཁྲིད་བྱས་ཏེ་འབྲོག་པའི་ཡོང་སྒོ་འཕར་བར་སྐུལ་འདེད་བཏང་བ་རེད།”ཅེས་ལི་ཐང་རྫོང་ཞིང་འབྲོག་གྲོང་གསེབ་དང་ཚན་རྩལ་ཅུས་ཀྱི་ཅུས་ཀྲང་དབང་ལྡན་གྱིས་དེ་ལྟར་གསུངས། 
39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1