གཙོ་ངོས།>> གནས་མཇལ།>>རི་ཆུའི་རིག་གནས།

ཚེ་དབང་རྣམ་རྒྱལ། རྩོམ་སྒྲིག་པ།ཡོང་ཁུངས། སྤེལ་དུས། ༢༠༢༠ལོའི་ཟླ་བ་༠༦ཚེས་༡༥ཉིན།

༄༅།།གནས་ཆེན་མངོན་རིག་སེང་གེ་གཡུ་རྫོང་།

ཚེ་དབང་རྣམ་རྒྱལ།
        ཁམས་དཀར་མཛེས་ལི་ཐང་རྫོང་གེ་མོའི་ཁོངས་གཏོགས། ལི་ཐང་རྫོང་མཁར་ནས་ལྷོ་ནུབ་མཚམས་སུ་བར་ཐག་སྤྱི་ལེ་130ཙམ་ཡོད་པ། ས་བསོད་ནམས་ཀྱི་ཆར་པ་འབབ་སར་མངོན་རིག་སེང་གེ་གཡུ་རྫོང་ཞེས་པ་སྙན་གྲགས་ཀྱི་བ་དན་དགུང་དང་མཉམ་པའི་གནས་ཆེན་འདི་མཆིས་ཤིང་། གནས་འདི་ཉིད་གཙོ་བོར་དཀྱིལ་གྱི་གནས་ཆེན་གཙོ་བོ་དང་ཤར་གྱི་གེ་སར་གནས། ལྷོ་ཡི་གནས་ཆུང་ཆེ་མཆོག་དཔལ་དགུའི་གནས་བཅས་གནས་གསུམ་ལས་གྲུབ་པ་ཡིན། དཀྱིལ་གྱི་གནས་ཆེན་དེའི་བྱང་ཕྱོགས་སུ་སྟོད་རྫ་སྐེད་བྱེ་མ་འདབས་སྤང་དང་ནགས་ཚལ་ཡིན་པའི་རི་རྩེ་མདུང་ལྟར་རྣོ་བར་ཀྲོང་ངེ་ལངས་པའི་ཕྱིའི་སྒོ་སྲུང་རོལ་པ་སྐྱ་བཞི་ཡོད་པ་དང་ལྷོ་ཕྱོགས་སུ་བྲག་རི་སྔོ་ནག་གི་མདོག་ཅན་འདབས་སུ་སྤང་དང་ཤུག་པ། ཨ་ག་རུ། འོམ་བུ་སོགས་རྩི་ཤིང་སྣ་ཚོགས་ལས་གྲུབ་པའི་རི་ཆུང་མང་པོས་བསྐོར་བ་ཕོ་བྲང་གི་སྒོ་སྲུང་གསེར་སྒ་རྒྱལ་མཚན་དུ་གྲགས་པ་ཡོད་པ་དང་། དཀྱིལ་གནས་ཀྱི་ལྷོ་ནུབ་མཚམས་སུ་གེ་སར་གྱི་སྒྲུབ་ཕུག་དང་གྲུབ་ཆུ་ཡོད་ཅིང་། དེའི་འདབས་སུ་ད་དུང་མ་སྲུ་འབྲུག་མོའི་ཐགས་ར་བཅས་མངོན་གསལ་མཇལ་རྒྱུ་ཡོད། གེ་སར་གྱི་སྒྲུབ་ཆུ་དེ་གལ་སྲིད་ནད་པས་ཁམ་གང་བཏུངས་ན་དེ་མ་ཐག་ཏུ་ལུས་ནད་ཐམས་ཅད་ཞི་ཞེས་ཟེར་སྲོལ་ཡོད།

        དེ་ཡང་མངོན་རིག་སེང་གེ་གཡུ་རྫོང་ཞེས་པ་ནི་མངོན་རིག་ཏེ་མངོན་སུམ་དུ་མཐོང་བའམ་རིག་རྒྱུ་ཡོད་པ་དང་སེང་གེ་སྟེ་དཀྱིལ་གནས་ཀྱི་གནས་བདག་ཞིང་སྐྱོང་ཆེན་པོ་ཀུན་དགའ་གཞོན་ནུ་རྩལ་ཞེས་པ་སེང་གེའི་གདོང་ཅན་ཡིན་པ་དང་གཡུ་རྫོང་སྟེ་གནས་དེ་ཚོའི་ཆགས་ས་གཡུའི་རང་བཞིན་ཅན་གྱི་ལུང་པ་གཡུ་རྫོང་ཡིན་པས་མཚན་དེ་ནས་ཐོགས། དེང་སང་ཡང་གནས་དེ་ཚོ་ཆགས་སའི་ལུང་རྒྱུད་ལ་གཡུ་ལུང་ཞེས་པ་དང་དེར་གཡུ་རྡོ་ཡང་མང་པོ་མཐོང་རྒྱུ་ཡོད།

        གནས་ཆེན་འདི་ནི་འཕགས་པའི་ཡུལ་ནས་བྱོན་པའི་སྐྱེས་ཆེན་དམ་པ་རྣམས་ཀྱིས་ཀྱང་རྡོ་རྗེ་གདན་གྱི་བྱང་ཕྱོགས་ཁ་བའི་ལྗོངས་ན་མདོ་ཁམས་ཀྱི་གནས་ཆེན་སེང་གེ་གཡུ་རྫོང་ཞེས་པ་ཤར་ཕྱོགས་སྤང་རི་གནས་མཆོག་ཀརྨ་རུས་པའི་ཤར་སྨད་ན་ཡོད་ཅེས་གསུངས་པ་དང་རིག་འཛིན་ཀློང་གསལ་སྙིང་པོའི་གསུང་ལས་འཕགས་ཡུལ་ནས་བྱོན་པའི་ཞིང་སྐྱོང་གནས་ལས་ཀྱང་ཁྱད་པར་མངོན་རིག་གནས་འདི་བྱིན་རླབས་ཆེ་བ་དང་། ཀློང་ཆེན་དཔའ་སེང་གི་སྤྲུལ་པ་བདུད་འདུལ་ཧཱུཾ་ནག་མེ་འབར་གྱིས་ཀྱང་མདོ་ཁམས་སྒྲུབ་གནས་ཀུན་གྱི་མཆོག་གྱུར་པ། །ཤར་ཕྱོགས་གནས་མཆོག་ཀརྨ་རུས་པའི་སྨད། །ཨོ་རྒྱན་སྦས་གནས་སེང་གེ་གཡུ་རྫོང་ཞེས། །སྔོན་བྱོན་རྒྱལ་བ་རྣམས་ཀྱིས་བྱིན་གྱིས་བརླབས། །ཞེས་བསྟོད་བསྔགས་མཛད་པ་དང་རྒྱ་བོད་གྲུབ་ཆེན་མང་པོས་གནས་འདིར་སྒོམ་སྒྲུབ་མཛད་མྱོང་ཞིང་། གྲུབ་པའི་རྟགས་མཚན་སོ་སོ་མངོན་དུ་གྱུར་པ་སོགས་ལོ་རྒྱུས་གྲངས་ལས་འདས་སོ། གཞན་ཡང་གཏམ་རྒྱུད་དུ་སྔོན་གེ་དགོན་གྱི་ཕྱག་འདེབས་པ་པོ་བླ་ཆེན་རིག་འཛིན་འགག་མེད་རྡོ་རྗེས་བྱི་ལ་ཞིག་གི་སྐེ་ལ་སྟོང་སྐུད་དམར་པོ་བཏགས་ཏེ་གནས་རྐེད་ཀྱི་བྲག་ཁུང་ནང་བཏང་ནས་གནས་འདི་དང་བར་ཐག་ལེ་དབར་བརྒྱ་དང་དྲུག་ཅུ་ཙམ་ཡོད་པའི་བྲག་དཀར་གནས་མགོར་བུད་ཡོང་བའི་བཤད་སྲོལ་མཆིས་པ་དང་། དོན་ལ་མི་འཛུལ་སྐབས་ཆུ་ཚོད་བཞི་ཙམ་གྱི་ལམ་ཐག་ཡོད་པར་གོར་མ་ཆག
        གནས་འདིར་ད་དུང་བོད་ཡུལ་ལ་ཤིན་ཏུ་དཀོན་པའི་ལྷ་བྱ་གོང་མོ་དང་ཨ་ག་རུའི་ཤིང་སོགས་ཡོད་པ་དང་དགོ་བ་དང་རྣ་བ། ཤྭ་བ་མང་པོ་ཁྱུ་འདུས་བྱས་ནས་རྩེད་མཆོང་བྱེད་བཞིན་ཡོད་པ་མིག་གིས་མངོན་སུམ་དུ་མཐོང་ཐུབ། དེ་མིན་གྱི་གཅན་གཟན་དང་རི་དྭགས། བྱ་རིགས། རྩི་ཤིང་རིགས་ཡོད་པ་ནི་བརྗོད་ཀྱིས་མི་ལང་ངོ། མདོར་ན་གནས་འདི་ཉིད་མཐོང་ཐོས་དྲན་རེག་གྲོལ་བའི་བྱིན་རླབས་ཅན་ཡིན་པས་དེ་ལ་ཕྱག་མཆོད་སོགས་དགེ་བ་གང་བྱས་ཀྱང་དུང་ཕྱུར་འགྱུར་བ་དང་གནས་འདིའི་རྩེ་བར་མཐའ་གསུམ་ལ་བསྐོར་བ་གང་བྱས་ཀྱང་མ་ཎི་དུང་ཕྱུར་གྱི་ཕན་ཡོན་ཡོད། འདིར་ཐུན་གཅིག་གཅོད་ཐུབ་ན་ལུས་ངག་ཡིད་གསུམ་གྱི་སྒྲིབ་པ་དག་པ་དང་ནད་ཐམས་ཅད་ཞི་ཞེས་གནས་འདིའི་གནས་ཡིག་ཏུ་བཀོད་ཡོད་ལ་ཕོ་ནད་དང་མཁྲིས་ནད་ཅན་གྱིས་གནས་འདིར་བརྐྱང་ཕྱག་གིས་མཐའ་སྐོར་རེ་བྱེད་ཐུབ་ན་དེ་མ་ཐག་ཏུ་ནད་ཐམས་ཅད་ཞི་བ་ཀུན་གྱིས་ཁས་ལེན་པ་དང་སྟོད་ཕྱོགས་ཀྱི་མི་རྣམས་ཀྱིས་ཀྱང་ལྷ་ས་མཇལ་བ་དང་ཁམས་ཀྱི་མངོན་རིག་སེང་གེ་གཡུ་རྫོང་མཇལ་བ་གཉིས་ལ་ཁྱད་མེད་ཅེས་བཤད།

        ད་སྐབས་ལྷ་ཡུལ་ས་ལ་འཕོས་འདྲའི་གནས་འདི་ནི་ཡུལ་སྐོར་ལྗོངས་རྒྱུ་བྱེད་སའི་གནས་མཆོག་ཅིག་ཏུ་གྱུར་ཡོད་པ་དང་རྒྱལ་ཕྱི་ནང་ནས་ཕེབས་པའི་ཡུལ་སྐོར་ལྗོངས་རྒྱུ་བ་མང་པོ་ཇི་ལྟར་པདྨའི་ཚལ་ལ་བུང་བའི་ཚོགས་རྣམས་འདུས་བ་ཇི་བཞིན་ཉམས་དགའ་བའི་མཛེས་ལྗོངས་ལ་ཉམས་རོལ་དང་མཇལ་ཕྱག་ཞུ་བར་ཕེབས་བཞིན་ཡོད། །  

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1