བལྟས་ན་སྐྱིད་སྐྱིད་འདྲ་བའི་བརྩེ་དུང་དེ།།
ཡང་ཡང་བཙལ་ཡང་མཐའ་མའི་དུས་ཤིག་མེད།།
དགའ་བ་གཅིག་གིས་དགའ་བ་གཞན་ཞིག་འདྲེན།།
ལྷད་མེད་བརྩེ་བ་ཟེར་ཡང་འགྱུར་ལྡོག་ཆེ།།
ཕར་བལྟས་དགའ་དགོད་གཉིས་ཀྱི་འཛུམ་མདངས་ཀྱིས།།
དཔུང་བ་མཉམ་གཤིབ་གཅིག་ལག་གཅིག་གིས་འཇུས།།
ལང་ཚོའི་ཟིལ་ཤུགས་མངོན་པའི་ཚུལ་སྣང་ཡང་།།
དོན་ལ་ཅི་སྐྱིད་རང་རང་སེམས་ན་ཡོད།།
ཨ་མས་བཀག་ཀྱང་མི་ཁོག་བུ་མོའི་འདོད།།
ཡོད་ཚད་བློས་བཏང་དགའ་བ་བུ་ཡི་འདོད།།
བརྩེ་བ་འོ་ཆུ་བཞིན་དུ་མཐུན་ན་ཡང་།།
མཐའ་མར་ཐམས་ཅད་སྐད་ཅིག་ཚོར་བ་ཙམ།།
ང་ཡི་འཇིག་རྟེན་ཁྱོད་ཀྱི་མངའ་ཐང་ལ།།
བདེ་སྐྱིད་མེ་ཏོག་བཞད་ཅིང་དྲི་ཞིམ་འཐུལ།།
ཚེ་གཅིག་འདུན་མ་འདི་ལྟར་བཞག་ན་ཡང་།།
དགྲ་མི་ནང་བཞིན་འབྲལ་བ་མང་པོ་མཐོང་།།
དགའ་བ་སེམས་ལ་མ་ཤོང་ཁ་ནས་འདོན།།
དུངས་པ་སྙིང་ནས་རྒྱས་ཏེ་དམ་དུ་འཁྱུད།།
གཅེས་པ་སྙིང་གི་རྩེ་ལ་སོང་ན་ཡང་།།
བྲལ་བའི་དུས་ན་ཡོད་ཚད་འཇའ་ལྟར་ཡལ།།
བརྩེ་དུང་ཁ་ནས་བརྗོད་ན་སྙན་ཚོར་དང་།།
བརྩེ་དུང་དོན་ལ་བརྩོན་ན་སྐྱིད་ཉམས་འཆར།།
བརྩེ་དུང་དོན་དུ་ཤི་ཡང་དོན་ལྡན་འདོད།།
བརྩེ་དུང་སང་གྲོལ་གནང་གྲོལ་མ་ཤེས་སོ།།
གཟུགས་མཛེས་ཁ་དོག་བཀྲ་བའི་བུ་མོ་ཡིས།།
ཕོ་གྱོད་མོ་གྱོད་སྣ་ནས་དྲངས་པ་ཡོད།།
འབྱོར་ལྡན་འདོད་རྩེ་ཆེ་བའི་ཕོ་གསར་གྱིས།།
ཕྱི་གྱོད་ནང་གྱོད་སྡེ་གཉིས་གཏུག་པ་ཡོད།།
མཛེས་དང་མི་མཛེས་སོ་སོའི་མཐོང་སྣང་དང་།།
རྒ་བར་མི་འགྱུར་མཛེས་མ་ཡོད་རེ་སྐན།།
མཛེས་མར་དུངས་པས་དཔའ་བོའི་རལ་གྲི་ཡང་།།
ས་ལ་ལྷུང་ཞིང་མཁས་པའི་རང་ཉམས་འཆོར།།
ལས་དབང་ཟེར་ནས་ལས་ཐག་སྦྲེལ་ན་ཡང་།།
དོན་ལ་རྒྱུ་འབྲས་བདེན་པ་མ་བརྩི ས་ན།།
ཁ་པར་འཕྲིན་ཕྲན་སྐུད་ལམ་ཕྲ་མོ་འདིས།།
ཁྱི མ་ཚང་སྟོང་གི་ཁྱི མ་ཁ་བརླག་ཉེན་ཡོད།།
རང་བཞིན་བཟང་དང་བསམ་པ་དཀར་པོ་ཡིས།།
ལས་མཐུན་བུ་མོ་གྲོགས་སུ་འགུགས་པ་དང་།།
འཇིག་རྟེན་རྒྱུ་འབྲས་བདེན་པ་མ་བརླག་པར།།
མཛའ་བརྩེའི་ཁྱི མ་གཞི་བསྐྱངས་ན་འཇིག་རྟེན་རྒྱན།།
འདོད་བདེའི་གཤིས་ལ་ཕོ་མོ་མཚུངས་ན་ཡང་།།
ཕན་ཚུན་བསམ་ཤེས་འགྲོགས་ལ་མཁས་པ་ནི།།
བརྩེ་དུང་ཡུན་རིང་བརྟན་པའི་གནད་ཡིན་ཞིང་།།
ཁྱི མ་ཚང་འཁོར་བ་བདེ་བའི་གཞི་མ་ཡིན།།
བྱུང་ན་འཇིག་རྟེན་སྐྱིད་ཀྱི་དྭངས་མ་དང་།།
ཉེས་ན་སྡུག་གི་སྣ་འདྲེན་བརྩེ་དུང་འདི།།
ཐབས་ལ་མཁས་པས་ཐབས་ཀྱིས་སྐྱོང་བ་དང་།།
སྡིག་པར་མི་འགྱུར་དགེ་བ་ཉིས་འཛོམས་དགོས།།
འདོད་པས་སྤྱད་པས་མི་ངོམས་འདོད་སེམས་སྤོངས།།
དགའ་བ་ཚད་མེད་མཛེས་མར་དགའ་བ་སྤོངས།།
རྒྱུད་འཇམ་སེམས་མཐུན་བུ་མོ་གྲོགས་སུ་བསྟེན།།
བརྩེ་བའི་རྟི ང་མ་འགྱུར་མེད་སྙི ང་ལ་ཆོངས།།
འཇིག་རྟེན་མཐུན་འཇུག་འཇིག་རྟེན་དོན་ཆེན་ཡིན།།
ཡང་ཡང་དགའ་བའི་མཐའ་མར་ཁྱི མ་སོ་ཟུངས།།
སྐྲ་དཀར་གཉེར་མའི་དུས་ཀྱང་བརྩེ་སེམས་ཟུངས།།
འཇིག་རྟེན་འཁོར་བའི་གནས་ཀྱི་རྒྱན་དེ་ཡིན།།
སྔོན་ཚེ་ལྷ་སྣང་སྟོབས་དང་བློ་གྲོས་མའི།།
ལྷད་མེད་བརྩེ་བ་མགྲིན་སྔོན་རྟོགས་བརྗོད་གསལ།།
མི་ཆོས་ལེགས་སྤྱད་མི་ཡི་མཆོག་རབ་དང་།།
ལྷ་ཆོས་ལ་ཉེ་མགོན་པོ་ཀླུ་སྒྲུབ་གསུངས།།
རང་གིས་མྱོང་སྣང་དཔྱད་ཅིང་མཐོང་ཐོས་བསགས།།
རང་གི་དོན་དང་གཞན་གྱི་དོན་ལ་ཡང་།།
རང་རང་འདུན་མ་ལེགས་པོ་འདོད་པས་ན།།
རང་བཞིན་རྗེན་པོར་བྲིས་ལ་ཉེས་པ་ཅི།།
