མི་རིགས་ཀྱི་གསོ་རིག་འཕེལ་རྒྱས་མགྱོགས་སུ་བཏང་སྟེ། ཁུལ་ཡོངས་ཀྱི་གཞི་རིམ་སྨན་བཅོས་ལས་ཁུངས་ཀྱི་མི་རིགས་སྨན་བཅོས་ཞབས་ཞུའི་ནུས་པ་དང་ཆུ་ཚད་མཐོར་བཏང་ནས། གཞི་རིམ་མང་ཚོགས་ཀྱི་མི་རིགས་སྨན་བཅོས་ཞབས་ཞུའི་དགོས་མཁོ་སྔར་ལས་ལེགས་པར་སྐོང་ཞིང་། རྒྱ་ཆེའི་མི་དམངས་མང་ཚོགས་ཀྱི་བདེ་ཐང་གི་ཆུ་ཚད་མཐོར་བཏང་སྟེ། མི་རིགས་སྨན་བཅོས་ཀྱི་ཐུན་མིན་ཕན་ཡོན་གྱིས་མི་དམངས་མང་ཚོགས་ཀྱི་བདེ་ཐང་འགན་ལེན་ཁྲོད་ཕན་ནུས་གང་ལེགས་འདོན་ཆེད། རྔ་བ་ཁུལ་མི་རིགས་སྨན་པ་གསོ་སྦྱོང་འཛིན་གྲྭ་ནི། ཟླ8པའི་ཚེས7ཉིན་མཛོད་དགེ་རྫོང་བོད་སྨན་ཁང་དུ་བདེ་བླག་ངང་བསྡུས།
རྫོང་མི་དམངས་སྲིད་གཞུང་གི་རྫོང་དཔོན་གཞོན་པ་དབྱི་ཆང་དང་། རྔ་བ་ཁུལ་འཕྲོད་བསྟེན་བདེ་ཐང་ཨུ་ལྷན་གྱི་ཀྲུང་བོད་ཆའང་གསུམ་གསོ་རིག་ཚན་ཁག མཛོད་དགེ་རྫོང་འཕྲོད་བསྟེན་བདེ་ཐང་ཅུས། མཛོད་དགེ་རྫོང་བོད་སྨན་ཁང་བཅས་ཀྱི་འབྲེལ་ཡོད་འགན་འཁུར་བ་གསོ་སྦྱོང་འཛིན་གྲྭའི་མགོ་རྩོམ་མཛད་སྒོར་ཞུགས། སི་ཁྲོན་དང་ཀན་སུའུ། མཚོ་སྔོན་བཅས་ཞིང་ཆེན་གསུམ་ནས་ཡོང་བའི་བོད་ལུགས་སྨན་པའི་རྐང་འཛིན་པ་བསྡོམས་པའི་མི152མགོ་རྩོམ་མཛད་སྒོར་ཞུགས།
མགོ་རྩོམ་མཛད་སྒོར་དབྱི་ཆང་གིས་རྫོང་ཨུ་དང་རྫོང་སྲིད་གཞུང་གི་ཚབ་བྱས་ཏེ་ཐེངས་འདིའི་གསོ་སྦྱོང་དུ་སླེབས་པའི་འགོ་ཁྲིད་དང་ཆེད་མཁས་པ། སློབ་མ་བཅས་ལ་སྤྲོ་སེམས་འཁོལ་བའི་ངང་དགའ་བསུ་ཞུས་པ་དང་སྦྲགས། བོད་སྨན་གྱི་ཐུན་མིན་ལེགས་ཆ་དང་ཕན་ཡོན་ལ་གདེང་འཇོག་གང་ལེགས་གནང་བར་མ་ཟད། བོད་སྨན་འཕེལ་རྒྱས་ཐད་རེ་སྒུག་གསར་བ་དང་བླང་བྱ་གསར་བ་བཏོན།
ཐེངས་འདིའི་གསོ་སྦྱོང་ཁྲོད་རྒྱལ་ཁབ་རིམ་པའི་བོད་སྨན་ཆེད་མཁས་པ་ཨ་ཁུ་བསྟན་ཁོའི་བུ་སློབ་ངོ་མ་རིམ་པ་གཉིས་པའི་བོད་ལུགས་གསོ་རིག་འབུམ་རམས་པ། རྒྱལ་ཁབ་ཀྱི་དམིགས་བསལ་ཕོགས་དངུལ་ལོངས་སྤྱོད་མཁན། སི་ཁྲོན་ཞིང་ཆེན་སྐབས་གསུམ་པའི་ཀྲུང་ལུགས་སྨན་པ་གྲགས་ཅན་བཅུའི་གྲས། རྒྱལ་ཡོངས་ཀྱི་གཞི་རིམ་ཀྲུང་ལུགས་གསོ་རིག་ཆེད་མཁས་པ་གྲགས་ཅན་བཅས་ཀྱི་མཚན་སྙན་བཞེས་པའི་དགེ་རྒན་ཆེན་མོ་འཚོ་བྱེད་ཐོགས་མེད་ལགས་གདན་དྲངས་ཏེ། སློབ་མ་རྣམས་ལ་ཨ་ཁུ་བསྟན་ཁོའི་རིག་གཞུང་དགོངས་པ་སློབ་ཁྲིད་གནང་བར་མ་ཟད། རྩ་རྒྱུད་ཀྱི་སྡོང་འགྲེམས་མྱ་ངན་མེད་པའི་ལྗོན་ཤིང་དང་བོད་སྨན་གྱི་ཐུན་མིན་སྨན་བཅོས་ལག་རྩལ་ལེགས་པར་ཁྲིད།
