སོ་ནམ་པ་དང་ཉེར་འབྲེལ་བའི།།
སོ་ནམ་བྱ་བའི་བཤད་པ་ཞིག།
སོ་ནམ་མཁན་པོའི་ངག་རྒྱུན་ལྟར།།
སོ་ནམ་བུ་ཡིས་ཆེད་དུ་གླེང་།།
དེ་ལ་སོ་ནམ་གྱི་ལས་ལ་བརྩོན་པའི་ཞིང་པ་རྣམས་ཀྱིས་དཔྱིད་ཀར་ལྷོ་བྱང་ཟོར་ཐོང་འཛོམས་དུས་ལོ་ལྷའི་ཕྱོགས་སུ་རྨོད་གཉའ་གཅོག་ནས་ལོ་འབྲས་ལེགས་པའི་རྟགས་རྟེན་གྱི་སྒོ་དབྱེ་ཞིང་། སོ་ནམ་སྐར་འཛིན་བྱེད་མི་ཡང་ཕ་མ་གཉིས་འཛོམས་ཤིང་དབང་པོར་སྐྱོན་མེད་པ། མིང་པྲ་ལེགས་ལ་ལོ་དེའི་ལས་སྣེ་ཡིན་པ་ཞིག་གིས་བྱེད་པ་ཡིན། དེ་ནས་ས་ཁུལ་སོ་སོའི་ཡུལ་བབ་དང་། ས་ཆུ་བཟང་ངན། སོན་འབྲུ་ལྕི་ཡང་། གནམ་གཤིས་དྲོ་གྲང་བཅས་ལ་གཞིགས་ནས་སྔ་ཕྱི་འདེབས་ཚོད་མ་ནོར་བར་བྱས་ཏེ། ཞིང་ལ་ས་བོན་འདེབས་ཉིན་ཐོང་མཁན་དང་སོ་ནམ་ལས་སྣེ་གང་རུང་གིས་གོས་རྒྱན་གཟབ་འཆོར་སྤྲས་པའི་ཐོག་ཞིང་ནང་ནས་བསང་དང་ཕྱེ་མར་སྐྱེམས་ཕུད་ཀྱིས་བཀྲ་ཤིས་ཞལ་བསྲོའི་དགེ་མཚན་སྔོན་དུ་འགྲོ་བས་ཐོག་མར་གནམ་ལོའི་ལོ་བདག་གམ་ལོ་ལྷ་གནས་པའི་ཕྱོགས་སུ་ས་བོན་མཆོད་ནས་འདི་ལྟར་བརྗོད་དེ། འོ་ལྷ་གསོལ་ལོ།། ལྷ་རྒྱལ་ལོ།། དེ་རིང་གནམ་ལ་བརྩིས་པའི་སྐར་མ་ཡག།ས་ལ་བརྩིས་པའི་དུས་ཚོད་བཟང་།བར་ལ་བརྩིས་པའི་ལ་ཉེ་ཡག།དེ་རིང་བཟང་གསུམ་འཛོམས་པའི་ཉི་མ།བཀྲ་ཤིས་དགེ་བའི་ཉི་མ།དོན་ཀུན་འགྲུབ་པའི་ཉི་མ་འདི་ལ།གནམ་ཨ་སྔོན་གྱིས་ཕྲག་དོག་མ་བྱེད།ས་དོང་མོས་གདུག་རྩུབ་མ་ཁོལ།བདེ་གཤེགས་རིན་ཆེན་མེ་ཏོག།རྒྱལ་བ་ཤཱཀྱ་ཐུབ་པ།བྱང་སེམས་ས་ཡི་སྙིང་པོ།ལྷ་མོ་ཆེན་མོ་དཔལ་མོ།བཅོམ་ལྡན་ནོར་རྒྱུན་ལྷ་མོ།ས་ཡི་ལྷ་མོ་བརྟན་མ་ལ་སོགས་པ་རྣམས་ཀྱི་སྔོན་སྨོན་ཐུགས་བསྐྱེད་རྣམ་པར་དག་པའི་བདེན་མཐུ་དང་།སྟོད་ཀྱི་རྒྱ་གར་རྒྱལ་པོ།སྨད་ཀྱི་རྒྱ་ནག་རྒྱལ་པོ།སྤུར་རྒྱལ་བོད་ཀྱི་རྒྱལ་པོ།ཨ་གར་ཧོར་གྱི་རྒྱལ་པོ།ཐེ་ལེ་མོན་གྱི་རྒྱལ་པོ།ཞིང་ལྷ་ཚངས་པ་དཀར་པོ།ཞིང་མུ་མོ་སྨན་ཕྱུག་མོ།འབྲས་བདག་རྒྱ་བཟའ་ཨན་ཆུང་།སྟོད་ཀྱི་མངའ་རིས་སྐོར་གསུམ།བར་གྱི་དབུས་གཙང་རུ་བཞི།སྨད་ཀྱི་མདོ་ཁམས་སྒང་དྲུག།ཡར་ལུང་ཟོར་ཐང་ཕྱུག་མོ།གོ་འཇོ་ཨ་དཀར་ནག།འདན་མ་ཆུ་ཉིན་སྲིབ།ཅེས་དང་།དམིགས་བསལ་དབོན་སྟོད་ཕྱོགས་ལྟ་བུ་ཡིན་ན།བརྒྱ་ཡ་ཆེ་ལྟེམ།སྟོང་ཀྱི་ལེ་ལྟེམ་ཟེར་བ་ལྟ་བུ་གང་འོས་སྦྱར་ཏེ།དེ་རྣམས་ཀྱི་ལོ་གཡང་དང་འབྲུ་གཡང་ཐམས་ཅད་སྟེང་ནམ་མཁའི་ཁམས་ནས་ཆ་ལ་ལ་དང་ཆི་ལི་ལི།བར་སྣང་ཁམས་ནས་ཉལ་ལ་ལ་དང་ཉི་ལི་ལི་བྱས་ཏེ།རྒྱ་ཞིང་ཁྲ་མོ་འདི་ཡི་ནང་ལ་ཁྲ་སྒ་ར་ར།ངང་གྱི་ལི་ལི་བྱས་ནས་ཕོབས་ཤིག།མྱུར་དུ་ཕོབས་ཤིག།གཡང་ཕྱི་ལ་མ་འགྲོ་ནང་དུ་ཤོག་ཅིག།བརྒྱ་ཡར་འགྲོ་ཚོས་ཨ་རྫི་ཟེར་ནས་ཁ་གདང་།སྟོང་ཕྱིར་འོང་གིས་དེ་འདྲ་ཟེར་ནས་མིག་གྱེར་བ་ཞིག་སྐྱེ་བར་ཤོག།ཅེས་སོགས་སྔར་སྲོལ་རྟེན་འབྲེལ་གང་ལེགས་བྱེད།
དམིགས་བསལ་ཡུངས་མ་འདེབས་དུས།ཧོ།ཧོ།ཧོ།ཡུངས་ཡག།ཡུངས་ཡག།ཕ་རིའི་རི་ནས་རྫ་ཉིལ།ཚུར་རིའི་རི་ནས་ཡུངས་ཉིལ།རྫ་ཡུངས་གཉིས་པོ་ཁ་སྤྲོད།དཀར་ལུ་རེ་ལ་ཟངས་དཀར་ཙམ།དམར་ལུ་རེ་ལ་ཟངས་དམར་ཙམ།ཨ་འཇོལ་རེ་ལ་རྐྱན་བུ་ཙམ།ཁ་ཤོ་རེ་ལ་རྟ་སྒ་ཙམ།བརྒྱ་ཡར་འགྲོ་ཚོས་ཁུར་རྒྱུ།སྟོང་ཕྱིར་འོང་ལ་སྦྱིན་རྒྱུ།ཡུངས་ཞིང་ཡུངས་ཀྱིས་གང་བ་ཞིག་སྐྱེ་བར་ཤོག་ཟེར་ནས་སྨོན་ལམ་འདེབས་ཤིང་།ཡུངས་མ་འདེབས་མཁན་གྱིས་འདེབས་མ་ཚར་བར་དུ་གཞན་ལ་ཁ་གྲགས་སྲོལ་མི་འདུག།
ཞིང་རྨོད་སྐབས་ཐོང་མཁན་གྱིས་ཐོག་མར་གནམ་ལོའི་ཕྱོགས་སུ་གཏད་ནས་རྨོད་གཉའ་བཅས་ཤིང་།དེ་ནས་གནམ་ལོའི་ཕྱོགས་གཙང་སར་ཐོང་བཙུགས་པ་དང་ལྷན་དུ།བླ་མ་ལ་སྐྱབས་སུ་མཆིའོ།།སངས་རྒྱས་ལ་སྐྱབས་སུ་མཆིའོ།།ཆོས་ལ་སྐྱབས་སུ་མཆིའོ།།དགེ་འདུན་ལ་སྐྱབས་སུ་མཆིའོ།།ཞེས་སྐྱབས་འགྲོ་སྔོན་དུ་འགྲོ་བའི་སྒོ་ནས།འོ་བློ་ལམ་དུ་སོང་།ལམ་ཆོས་སུ་སོང་།མུ་རྙིང་པ་ལ་ཐང་གསར་པ་མ་རྒྱབ་པའི་གོང་ནས།དཀར་གྱི་རོ་མ་མངར།དམར་གྱི་ཁྲག་མ་དོར།བསམ་པ་མ་ངན།སྦྱོར་བ་མ་རྩུབ།གནམ་ལྕགས་ཀྱི་ཐོང་པ།རྩེ་རུའི་དགུ་པ།ལྷ་ཤིང་སྟག་པ་རང་འགུགས་འདི།ས་ལ་བཙུག་ན་ས་གས།རྡོ་ལ་བཙུག་ན་རྡོ་གས།ས་རྡོ་གཉིས་པོ་ཁ་ལོ་དང་ཡ་ལོ་བསྒྱུར།ཞིང་རྨོ་རུས་ལ་མ་མནར།སྣ་ཁྲིད་གད་ལ་མ་འཕེན།གསེར་སེར་པོའི་གཉའ་ཤིང་མ་ཆག།ཤིང་ཙནྡན་གྱི་ཐང་ཤིང་མ་ཆག།དུང་དཀར་པོའི་བེ་སོ་མ་གྲུམ།དར་དཀར་པོའི་འཐེན་ཐག་མ་ཆད།རྡོ་རུལ་གཡའ་མ་ཐུ་ལུ་ལུ།ཉིན་ཁའི་ཞིང་རྣམས་ལ་ལ་དེད།སྲིབ་ཁའི་ཞིང་རྣམས་ཐུར་ལ་དེད།ཉིན་ཞིང་དང་སྲིབ་ཞིང་གི་ཁྱད་པར་མེད་པ།ད་ལྟར་ནས་ཤོག་སྐྱ་དྲིལ་འདྲ་བྱས་ནས་རྨོ།མི་མཛོ་ཁལ་བཞི།གཉའ་ར་ཐང་བརྒྱད།ལྷ་དང་བླ་མ།ཆོས་དང་སངས་རྒྱས་རྣམས་ལ་གཏད་པ་ཡིན་སོགས་བརྗོད།དེ་ནས་མཚམས་སུ་ཨ་རྒ་ལོ་ལོ་དང་གཡང་རྭ་བ་སྒོ་བཞིས་བསྲུང་རྒྱུ་སོགས་བསྟོད་དབྱངས་མང་པོ་བརྗོད་ཞོར་དུ་རྨོ་ཞིང་།ཁ་རེ་བསྐོར་དུས་མ་ཎི་པད་དབྱངས་རེ་བྱེད་པས་རྨོས་མཛོ་རྣམས་ཀྱིས་ཨོཾ་མ་ཎི་ཟེར་ཡོང་དུས་ནས་རང་ཤུགས་ཀྱིས་ཁ་ཕྱིར་བསྐོར་ཡོང་བ་ཡིན་འདུག།
ཞིང་རྨོད་མཚམས་བཞག་ནས་གཉའ་བཀྲོལ་ཞོར་དུ།ཨ་རྒ་ཕ་ལོའི་སྒྲིབ་པ་དག།ལྕག་ཚན་དུ་རྒྱབ་ས་རྡོས་ཁུར།མ་ཎི་དུ་འདོན་མི་མཛོ་བཞི་ཡི་ཕྱེད་མ་ཡིན།འབུ་ནག་པ་རའི་ལུས་མ་ལེན།བྱ་ནག་ལྕམ་ཁྲའི་ལུས་མ་ལེན།བྱེའུ་ནག་མཆིལ་པའི་ལུས་མ་ལེན།སྤྱང་མོ་ནུ་དགུའི་ལུས་མ་ལེན།ཁྱི་མོ་ཚང་མའི་ལུས་མ་ལེན།ནག་མོ་སྦྲུམ་མའི་ལུས་མ་ལེན།འདི་ནས་ཚེ་འཕོས་མ་ཐག་ཏུ་གནས་མཆོག་པོ་ཏ་ལ་ཡི་ཞིང་ཁམས་སུ།འཕགས་མཆོག་སྤྱན་རས་གཟིགས་ཀྱི་དྲུང་དུ་སྐྱེ་བར་ཤོག།ༀ་མ་ཎི་པདྨེ་ཧཱུྃ་སོགས་བསྔོ་བ་དང་སྨོན་ལམ་གང་ཤེས་བརྗོད།
སྟོན་ཁར་ལོ་ཏོག་བརྡུང་དུས་གཡུལ་ཁ་ལ་བམ་ཆག་རྣམས་རྩེ་སྤྲོད་ཀྱིས་གཡུལ་ཤོད་ཆེ་ཆུང་ལྟར་བམ་ཆག་ཕྲེང་བསྒྲིགས་ཏེ་བརྡུང་མི་རྣམས་ཚོ་བསྒོས་ཀྱིས་གཡས་གཡོན་བྱས་ནས་རྡུང་ཞིང་།དེའི་ཚེ་ན་ཨ་ལ་ཡེ་དང་སྦྲགས་ནས།གཡུལ་ཁ་བཀྲ་ཤིས་ར་བ་ཡིན།།བརྡུང་ས་རྒྱ་ཚའི་ཕོ་བྲང་ཡིན།།བརྡུང་མི་བུ་ཚ་བུ་མོ་ཡིན།།བརྡུང་རྒྱུ་འབྲུ་རིགས་སྣ་ལྔ་ཡིན།།གཡུག་སྐོར་ཙནྡན་སྡོང་པོ་ཡིན།།གཡུག་མདའ་མདའ་སྨྱུག་སིལ་མ་ཡིན།།དཔུང་ལྷུ་གསེར་གྱི་རྡོ་རྗེ་ཡིན།།གཡུག་རྒྱུན་འབྲོང་རྒྱུན་མཉེད་མ་ཡིན།།ཕྱག་མ་རྨ་བྱ་ལྡེམ་ལྡེམ་ཡིན།།སྙེ་མ་བུ་ཆུང་ལོ་བརྒྱད་ཙམ།།གྲ་མ་བྱ་ཆེན་གཤོག་པ་ཙམ།།ནས་འབྲུ་ཁྱུང་གི་སྒོ་ང་ཙམ།།ཞེས་ཟེར།ཡང་གཡུག་མདའ་མདའ་སྨྱུག་གཤིན་པོ་ཡིན།།ཞེས་ཀྱང་ཟེར།
སྐྱོན་མེད་ཞིང་ས་དགེ་བ་ལ།།
ས་བོན་གྲུང་པོ་ལེགས་བཏབ་སྟེ།།
ཆུ་ལུད་དྲོད་གཤེར་གྱིས་བསྐྱངས་པས།།
ལོ་འབྲས་ཕུན་སུམ་ཚོགས་གྱུར་ཅིག།
