ཉེ་ལམ། ཞིན་ཧྭ་གསར་ལམ་ཁག་ཏུ་གནས་ཚུལ་བཀོད་པ་ལྟར་ན། སྤྱི་ཟླ་7པའི་ཚེས་1ནས་ཚེས་15ཡི་བར། ནང་སོག་རྩྭ་ཐང་གི་ས་མུའུ་ཁྲི་3334.6ལ་འབུ་འུར་བའི་གནོད་འཚེ་ཐེབས་ཡོད་ཅིང་། དེ་ལས་ས་མུའུ་ཁྲི་1473.6ལ་གནོད་འཚེ་ཚབས་ཆེན་ཐེབས་ཡོད། འོན་ཀྱང་ཞིང་འབྲོག་ལས་ཐིང་གི་ལས་བཟོ་བས། ད་ལོའི་འབུ་འུར་བའི་གནོད་འཚེ་ནི་ཁ་ཐོར་གྱི་རྣམ་པ་ཞིག་རེད། སྤྱིའི་ཆ་ནས་གནོད་འཚེ་ཆེན་པོ་མི་ཡོང་བའི་སྔོན་དཔག་བྱེད་བཞིན་ཡོད་ཅེས་བཤད།
གནོད་འཚེ་ཐེབས་ཁུལ་ནི་རྩྭ་ཐང་གཅིག་པུ་མིན་པར། ཞིང་ནང་གི་ལོ་ཏོག་དང་ཐ་ན་སྒོ་འགྲམ་གྱི་སྔོ་ཚལ་ལྡུམ་ར་སོགས་ཀྱང་རེད། ད་རུང་ས་གནས་མི་དམངས་ཀྱི་རྒྱུན་ལྡན་འཚོ་བར་འགོག་རྐྱེན་ཆེན་པོ་ཐེབས་བཞིན་ཡོད། ས་གནས་སྡོད་དམངས་ཤིག་གིས་གསར་འགོད་པར། འབུ་འུར་བས་རྩྭ་ཐང་གི་རྩྭ་གཅོད་པར་མ་ཟད། ཞིང་ནང་གི་ལོ་ཏོག་ཀྱང་འཇོམས་པར་བྱེད། ངེད་ཚང་གི་ས་མུའུ་5ལ་འབུ་འུར་བས་གནོད་འཚེ་ཐེབས་སོང་ཞེས་བཤད། །
