ཟླ་6པའི་ཚེས་11ཉིན། 2016ལོའི་ཀྲུང་གོའི་ཕྱི་སྡོད་སྤུན་ཟླའི་དུང་དཀར་ལུང་པའི་ཀྲུང་གོ་དང་ཧྥན་རན་སིའི་བར་སྣང་ཐག་ལེབ་མཐར་ཐུག་གི་འགྲན་རྩོད་དུང་དཀར་ལུང་པའི་ཡུལ་ལྗོངས་ཁུལ་དུ་སྤེལ་འགོ་ཚུགས། དཀར་མཛེས་ཁུལ་ཨུའི་རྒྱུན་ཨུ། དྲིལ་བསྒྲགས་པུའུ་ཡི་པུའུ་ཀྲང་བྱམས་ལོས་འགྲན་རྩོད་བྱེད་སྒོ་དངོས་སུ་ཚུགས་པ་ཁྱབ་བསྒྲགས་བྱས། དཀར་མཛེས་ཁུལ་མི་དམངས་སྲིད་གཞུང་གི་ཁུལ་དཔོན་གཞོན་པ་ཀ་ཉིང་དང་དཀར་མཛེས་ཁུལ་མི་དམངས་སྲིད་གཞུང་གི་དྲུང་ཡིག་ཆེན་མོ་གཞོན་པ་ཉིག་ཆིན་ཡོན་འགོ་ཚུགས་མཛད་སྒོར་ཞུགས། དུང་དཀར་ལུང་པའི་དོ་དམ་ཅུས་ཀྱི་ཅུས་ཀྲང་ཐན་ཀྲི་ཆོན་གྱིས་འགོ་ཚུགས་མཛད་སྒོའི་ཐོག་ཤིས་ཚིག་ཕུལ། ཧྥ་རན་སིའི་ཁྲེན་ཏུའུ་བཅའ་སྡོད་གཞུང་ཚབ་ཁང་དང་ཀྲུང་གོའི་ཕྱི་སྡོད་སྤུན་ཟླའི་གྲོང་སོགས་ཀྱི་འབྲེལ་ཡོད་སྡེ་ཚན་ཁག་གི་འགན་ཁུར་བ་བྱེད་སྒོར་ཞུགས།
    ཐེངས་འདེའི་མཐོ་དབྱིངས་འགྲན་རྩོད་ཀྱི་ལམ་ཐིག་ཧ་ལམ་སྨི་820ཡོད་ལ། ཐག་ལེབ་ནི་མཚོ་ངོས་གྱི་མཐོ་ཚད་སྨི་3600ཡོད་པའི་དུང་དཀར་ལུང་པའི་ཁྱག་རོམ་ཐོག་ཏུ་འཐེན་ཡོད། དེ་ནི་མིག་སྔར་གོ་ལ་ཧྲིལ་པོའི་ཐོག་ཏུ་སྤེལ་པའི་མཐོ་དབྱིངས་ཐག་ལེབ་འགྲན་བསྡུར་ཁྲོད་དཀའ་ཚད་ཆེས་ཆེ་བ་དང་ཚད་གཞི་ཆེས་མཐོ་བའི་འགྲན་བསྡུར་ཞིག་ཡིན།

    བྱེད་སྒོ་འདི་ནི་གོ་ལ་ཧྲིལ་པོར་ཐད་གཏོང་བྱས་ཤིང་། ཐེངས་འདིའི་འགྲན་བསྡུར་གྱི་གནས་ཚུལ་དྲིལ་བསྒྲགས་ཡག་པོ་བྱ་ཆེད། གཙོ་སྒྲུབ་ལས་ཁུངས་ཕྱོགས་ནས་ཧྥན་རན་སིའི་རྒྱལ་ཁབ་བརྙན་འཕྲིན་ཁང་དང་། དབྱིན་ཇིའི་BBCསོགས་རྩ་འཛུགས་བྱས་ནས་སོ་སོས་ཐེངས་དེའི་བྱེད་སྒོར་ཆེད་དོན་གནས་ཚུལ་སྤེལ་བ་དང་། རྒྱལ་ནང་གི་མི་དམངས་དྲ་བ་དང་ཤིན་ཧྭ་གསར་འགྱུར་ཁང་། ཀྲུང་གོ་དྲ་བ་སོགས་གཙོ་བྱས་པའི་རྒྱལ་ཡོངས་ཀྱི་སྨྱན་སྦྱོར་སྡེ་ཚན་ཁག་16གདན་འདྲེན་བྱས་ནས་ཐེངས་དེའི་འགྲན་རྩོད་ཐད་གཏོང་བྱས།

        ཟླ་6པའི་ཚེས་12ཉིན་གྱི་སྔ་དྲོར་ཆུ་ཚོད་11ཐོག ཐེངས་དེའི་འགྲན་རྩོད་ནང་ཞུགས་པའི་ཧྥ་རན་སིའི་འགྲན་ཞུགས་པ་Nathan PAULINདང་Lucas MILLIARDགཉིས་ཀྱི་ཐག་ལེབ་ཐོག་ཏུ་འགྲོ་བའི་འགྲན་རྩོད་བྱེད་འགོ་བརྩམས། འགྲན་རྩོད་སྤེལ་པའི་གཞུང་ཕྱོགས་ཀྱི་འཛམ་གླིང་ཅི་ཉི་སིའི་ཟིན་ཐོ་བསྐྲུན་པའི་འགྲན་རྩོད་ཁྲོད་དུ། ཧྥན་རན་སིའི་འགྲན་ཞུགས་པ་Lucas MILLIARDཡིས་རྒྱལ་ཁའི་འགྲན་རྩོད་ལས་འགན་ལེགས་པར་འགྲུབ། Lucasཡིས་སྐར་མ་1དང་སྐར་ཆ་59ཡི་གྲུབ་འབྲས་ཐོབ་ཏེ། ཆེས་མགྱོགས་པའི་མྱུར་ཚད་ཀྱིས་སྨི་100ཅན་གྱི་ཐག་ལེབ་ཐོག་ཏུ་འགྲོ་བའི་འགྲན་རྩོད་ལེགས་གྲུབ་བྱུང་། རྒྱུས་ལོན་བྱུང་བ་ལྟར་ན། འདི་ནི་དཀར་མཛེས་བོད་རིགས་རང་སྐྱོང་ཁུལ་གྱི་ས་ཁོངས་ནས་ཐེངས་དང་པོར་ཅི་ཉི་སིའི་འཛམ་གླིང་ཟིན་ཐོ་བསྐྲུན་པ་རེད།།