སྤྱི་ཟླ་6པའི་ཚེས་22ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཐ་ཧྲི་ཀན་ཁོའུ་ཁི་ས་ལེད་རྒྱལ་ཁབ་མགྲོན་ཁང་དུ་ཨུ་ཟ་བྷེ་ཁི་སི་ཐན་གྱི་སྲིད་འཛིན་ཁ་ལི་མོ་ཧྥོ་དང་མཇལ་འཕྲད་གནང་།  རྒྱལ་ཁབ་གཉིས་ཀྱི་འགོ་གཙོས་ཀྲུང་གོ་དང་ཨུ་ཟ་བྷེ་ཁི་སི་ཐན་བར་གྱི་སྲོལ་རྒྱུན་མཛའ་འབྲེལ་དང་ཕྱོགས་གཉིས་ཀྱི་འབྲེལ་བའི་འཕེལ་རྒྱས་ཐད་ལ་གཡུར་དུ་ཟ་བའི་གྲུབ་འབྲས་ཐོབ་པར་ཚད་མཐོ་བའི་གདེང་འཇོག་གནང་བ་དང་། ཀྲུང་གོ་དང་ཨུ་ཟ་བྷེ་ཁི་སི་ཐན་བར་དུ་ཁྱོན་ཡོངས་ཀྱི་འཐབ་ཇུས་མཛའ་མཐུན་འབྲེལ་བ་བཙུགས་ཏེ་རྒྱལ་ཁབ་གཉིས་ཀྱི་མཉམ་ལས་སྔར་ལས་ཇེ་མང་དུ་ཕྱིན་པར་སྐུལ་འདེད་གཏང་རྒྱུའི་ཐག་གཅོད་གནང་། 
　　ཞི་ཅིན་ཕིང་གིས་2012ལོར་ཀྲུང་གོ་དང་ཨུ་ཟ་བྷེ་ཁི་སི་ཐན་གཉིས་ཀྱིས་ཁྱོན་ཡོངས་འཐབ་ཇུས་མཛའ་འབྲེལ་བཙུགས་པ་ནས་བཟུང་། ཕྱོགས་གཉིས་ཀྱི་མཉམ་ལས་མགྱོགས་མྱུར་སྒོས་འཕེལ་རྒྱས་སུ་འགྲོ་བའི་དུས་སྐབས་སུ་སླེབས་པ་དང་། ཆབ་སྲིད་ཡིད་ཆེས་དང་གཉིས་ཕན་མཉམ་ལས། འཐབ་ཇུས་མཐུན་སྦྱོར་བཅས་ཁྱོན་ཡོངས་ནས་ལག་བསྟར་བྱས་པར་གྲུབ་འབྲས་བཟང་པོ་ཐོབ། ཀྲུང་གོའི་ཕྱོགས་ནས་ཨུ་ཟ་བྷེ་ཁི་སི་ཐན་དང་མཉམ་དུ་མཐུན་སྦྱོར་དམ་པོ་བྱས་ཏེ་རྒྱལ་ཁབ་གཉིས་ཀྱི་འབྲེལ་བའི་འཕེལ་རྒྱས་ལ་གཡུར་དུ་ཟ་བའི་གྲུབ་འབྲས་ལོན་པར་སྐུལ་འདེད་གཏང་འདོད་པ་དང་། ཕྱོགས་གཉིས་ཀྱི་ཕན་ཚུན་གྱི་རྒྱབ་སྐྱོར་ལ་ཤུགས་སྣོན་བྱས་ཏེ་ཕྱོགས་གཉིས་ཀྱི་ཁེ་ཕན་གཙོ་བར་འགན་སྲུང་བྱ་དགོས། དེ་མིན་ཁྱོན་ཡོངས་ནས་བཟོ་ཚོང་དང་ཐོན་ནུས། ནུས་ཁུངས། ཞིང་ལས། དངུལ་རྩ། རྨང་གཞིའི་སྒྲིག་བཀོད་སོགས་ཁྱབ་ཁོངས་ཀྱི་དངོས་དོན་མཉམ་ལས་གཏིང་ཟབ་ཏུ་སྤེལ་ནས་མཉམ་དུ་རྒྱལ་ཁབ་གཉིས་ཀྱི་འཕེལ་རྒྱས་ལ་སྐུལ་འདེད་གཏང་བ་དང་། སྔར་ལས་མང་པོའི་དངོས་དོན་མཉམ་ལས་ཀྱི་གྲུབ་འབྲས་ལ་བརྟེན་ནས་ཁྱོན་ཡོངས་ཀྱི་འཐབ་ཇུས་མཛའ་མཐུན་འབྲེལ་བའི་ནང་དོན་ཕུན་སུམ་ཚོགས་པར་གཏང་དགོས་ཞེས་བསྟན།
　　ཁ་ལི་མོ་ཧྥོ་ཡིས་ཨུ་ཟ་བྷེ་ཁི་སི་ཐན་དང་ཀྲུང་གོ་ནི་ཁྱིམ་མཚེས་བཟང་པོ་དང་གྲོགས་པོ་བཟང་པོ་ཡིན། ཨུ་ཟ་བྷེ་ཁི་སི་ཐན་ཕྱོགས་ནས་ཐེ་ཝན་དང་བོད་ལྗོངས་སོགས་ཀྱི་གནད་དོན་ཐད་ཀྱི་རྩ་དོན་དང་ལངས་ཕྱོགས་ལ་རྒྱབ་སྐྱོར་བྱེདཔ་དང་ཀྲུང་གོའི་ཕྱོགས་དང་མཉམ་དུ་བཟོ་ཚོང་དམངས་འཚོ། མི་ཆོས། བདེ་འཇགས། རྨང་གཞིའི་སྒྲིག་བཀོད་སོགས་ཁྱབ་ཁོངས་ཀྱི་མཉམ་ལས་གཏིང་ཟབ་ཏུ་སྤེལ་འདོད་ཅེས་བསྟན།།