2017ལོའི་སྤྱི་ཟླ་བདུན་པའི་ཚེས་གཅིག་ཉིན་ཏེ་ལུགས་རྙིང་གི་ཟླ་དྲུག་པའི་ཚེས་8ཉིན་ལ་མདོ་སྨད་ཙོང་ཁའི་རི་རྒྱུད་ཀྱི་གཤོག་འདབ་སྒོ་མེ་རིའི་ཉག་ཁར་དྲི་བཟང་གིས་ཡོངས་སུ་ཁྱབ་ཅིང་། བསང་དུ་ལང་ལོང་ཙོང་ཁའི་རི་རྒྱུད་ཀྱི་མཁའ་དབྱིངས་སུ་མཆེད་དེ་བདག་པོ་གང་ཞིག་གི་མདུན་བསུ་ལ་ཕེབས་པ་ལྟ་བུའི་བཀྲ་ཤིས་པའི་རྟགས་དང་མཚན་མའི་ཁྲོད་ལབ་ཙེ་བསྟོད་པའི་ཆོ་གའི་མཛད་རིམ་སྤེལ། འདི་ནི་རྨ་གཡང་ཕྱུག་མོའི་ངོགས་སུ་བབ་ཀྱིས་ཆགས་པའི་ཡུལ་ཁྲི་ཀས་གཙོ་གཉེར་མཛད་ཅིང་། ལོ་རེར་དུས་གཏན་དུ་བསྟོད་སྲོལ་ཆགས་པའི་ཙོང་ཁ་ལབ་ཙེ་ཆེན་པོ་རྒྱས་བསྟོད་ཀྱི་མཛད་སྒོ་སྤེལ་བའི་ཉིན་མོ་རེད།
ལབ་ཙེ་འདི་ནི་ཟི་ལིང་དང་ཁྲི་ཀ་བར་གྱི་གཞུང་ལམ་རྙིང་བ་སྟེ། ཞིང་ཆེན་གྱི་ཡུལ་སྐོར་ལམ་ཐིག་རྒྱུད་གྱི་སྒོ་མེ་རིའི་ཉག་ཁར་བཙུགས་ཡོད་ཅིང་། སྔ་མོ་ནས་སྒོ་མེ་རི་སྟེ་ཙོང་ཁའི་རི་རྒྱུད་འདིའི་ཕར་རྒྱབ་དང་ཚར་ལོགས་ཀྱི་ཡུལ་མི་གཙོས་ཕར་འགྲོ་ཚུར་འོང་གི་བོད་མི་ཚོས་མཆོད་བསྟོད་བྱེད་སའི་ལབ་ཙེ་ཆུང་ཆུང་ཞིག་ཡིན་འདུག ཕྱིས་སྲིད་པའི་ལྷ་ཚོགས་ཀུན་འདུས་ཀྱི་ལབ་ཙེ་ཞེས་མཚན་རྒྱས་པ་དང་ནང་གི་རྟེན་རྒྱས་པ། བཀོད་པ་རྒྱས་པ་ལ་སོགས་རྒྱས་བཞེངས་གནང་བས་ད་ཆ་བོད་རྒྱ་སོག་གསུམ་གྱི་དད་ལྡན་དག་གི་ཆོས་སྐྱོང་སྲུང་མ་དང་ཡུལ་ལྷ་གཞི་བདག་ལ་བསང་མཆོད་སྐྱབས་རེ་ཞུ་ས་ཉག་ཅིག་ཏུ་གྱུར་ཡོད།
ལབ་ཙེ་ཆེན་མོ་འདིའི་མཐོ་ཚད་ལ་སྨི་40ཡན་ཡོད་ཅིང་། ལབ་ཙེ་དགུ་དཀྱུས་གཅིག་ཏུ་སྤུངས་ནས་ཕོ་བྲང་གི་རྣམ་པར་གྲུབ་ཡོད་པ་དང་དེའི་ཤར་དུ་རིམ་པར་ལབ་ཙེ་མ་བུ་བཅུ་གསུམ་ཡོད། ཁམས་གསུམ་གྱི་མཚོན་བྱེད་དུ་ཐོག་བརྩེགས་རིམ་པ་གསུམ་བྱས་ནས་བཞེངས། རྨང་སྟེགས་ཀྱི་རྒྱ་ཁྱོན་ལ་སྤྱི་ཁྲེ་30དང་ཞེང་ལ་སྤྱི་ཁྲེ་60ཡོད་པ་དང་། བརྩེགས་རིམ་དང་པོ་དང་གཉིས་པའི་ནང་རྨ་རྒྱལ་སྦོམ་ར་གཙོ་བྱས་པའི་སྲིད་པ་ཆགས་པའི་ལྷ་དགུ་དང་བླ་མ་ཡི་དམ་ཆོས་སྐྱོང་སྲུང་མ་བཅས་དང་། ལྷག་པར་དགྲ་ལྷ་བཅུ་གསུམ་ལ་སོགས་མདོ་ཁམས་ཀྱི་དྲེག་ཆེ་དགུའི་ལྡེབས་རིས་དང་ཐང་ག་སོགས་ཡོད། 2014ལོར་ལབ་ཙེ་སྤྱིའི་བཀོད་པ་དང་རྟེན་བཞེངས་སོགས་ཡོངས་སུ་གྲུབ་ཅིང་། 2016ལོའི་ལོ་ཟླ་བཞི་བར་འཛམ་གླིང་ཅི་ཉི་སི་ཟིན་ཐོའི་འདྲི་རྩད་པེ་ཅིང་ཚད་ཡོད་ཀུང་སིས་ཅི་ཉི་སི་ཟིན་ཐོ་བསྐྲུན་པའི་ལབ་ཙེ་ཆེས་ཆེན་པོ་ཞེས་པའི་མཚན་སྙན་གནང་།
