ཉེ་ལམ། ངེད་གངས་ལྗོངས་ཉི་གཞོན་གྱི་གསར་འགོད་ཚན་ཆུང་སྨན་ཤོད་ཕྱོགས་སུ་ཕྱིན་ཞིང་། ཆུ་བོ་གསེར་ལྡན་གྱི་འགྲམ་ནས་ཆུ་ཚོད་གཉིས་ཙམ་སོང་རྗེས་སྨན་ཤོད་ལ་སླེབས། སྤྱིར་སྨན་ཤོད་ནི་སྡེ་དགེའི་མངའ་ཁོངས་སུ་གཏོགས་པའི་ཡུལ་ཤོག་གསུམ་ཙམ་གྱི་སྤྱི་མིང་ལ་ཟེར་ཞིང་། ཕྱིའི་ཆགས་ཚུལ་སོགས་བོད་ཀྱི་ལུང་པ་གཞན་དག་དང་བསྡུར་ནས་མི་འདྲ་ས་གང་ཡང་མི་འདུག འོན་ཀྱང་ས་གནས་དེ་གའི་མི་རྣམས་ཀྱིས་སྲོལ་རྒྱུན་རིག་གནས་དང་བཟོ་རིག་པའི་ཉིང་བཅུད་འཛིན་སྐྱོང་སྤེལ་གསུམ་ལེགས་པོ་བྱས་ནས་བོད་ཀྱི་བཟོ་རིག་པ་འཛམ་གླིང་གི་གར་སྟེགས་ལ་བཏེགས་པས། འཛམ་གླིང་གི་སྨན་ཤོད། ཀྲུང་གོ་ཡི་འབྲུག་ཡུལ་ཞེས་གྲགས་པ་རེད།
སྟབས་ལེགས་པ་ཞིག་ལ་སྐབས་དེ་དུས་སྨན་ཤོད་ལུང་པའི་སྐྱ་སེར་ཡོངས་རྫོགས་ལྷན་དུ་འཛོམས་ནས་དབྱར་སྐྱིད་ལ་རོལ་བཞིན་འདུག་ལ། ཆུང་ལོ་གསུམ་བྱིས་པ་ཡན་དང་ཆེ་རྒན་རྒོན་མགོ་དཀར་མན་གྱིས་ལུས་ལ་བོད་གོས་གྱོན་ཞིང་མཛེས་པའི་རྒྱན་གྱིས་སྤྲས་པ་དང་། ལོ་ཚོད་དར་ལ་བབ་པའི་ཕོ་མོ་མང་པོ་ཞིག་གིས་ཕྲུག་དང་འབུ་རས་དོར་ཁྲ། རྡོག་རྩག་སོགས་གྱོན་ནས་སྔར་ལུགས་ལྟར་སྡེ་དགེའི་བྲོ་ཆེན་འཁྲབ་བཞིན་འདུག སྡེ་དགེའི་བྲོ་ཆེན་གྱི་རྒྱུན་འཛིན་ཆེས་ལེགས་པའི་ས་ཆ་ནི་སྨན་ཤོད་ཡིན་པ་བཤད་མ་དགོས་ལ། སྨན་ཤོད་ལུང་པའི་རྒན་དར་གཞོན་གསུམ་ཡོངས་རྫོགས་བྲོ་ཆེན་ལ་དགའ་ཞིང་ལྷན་འཛོམས་ཡོད་ཙ་ན། བྲོ་ཆེན་ནི་མེད་ཐབས་མེད་པའི་འཚོ་བའི་ཡ་གྱལ་ཞིག་གམ་གྲུབ་ཆ་གལ་ཆེན་ཞིག་ལ་ངོས་འཛིན་བཞིན་ཡོད། མདའ་མ་གྲོང་རྡལ་གྱི་ཏང་ཨུའི་ཧྲུའུ་ཅི་ལི་ཞིན་ཚའེ་ཡིས། སྟངས་སྟབས་ཀྱི་ཉམས་འགྱུར་གྱིས་ཕྱུག་ཅིང་། ཐུན་མོང་མིན་པའི་ཡུལ་སྲོལ་གོམས་གཤིས་དང་ས་གནས་དེ་གའི་ལུགས་སྲོལ་དང་འཚོ་བའི་སྣང་བརྙན་སོགས་མཚོན་པའི་སྡེ་དགེའི་བྲོ་ཆེན་འདི་འཛིན་སྐྱོང་སྤེལ་བྱ་ཆེད། མདའ་མ་གྲོང་རྡལ་གྱིས་དམངས་སྒོར་ཁྲི་53འགྲོ་གྲོན་བཏང་ནས་དམངས་ཁྲོད་ཀྱི་སྒྱུ་རྩལ་པ་རྩ་འཛུགས་དང་། དེ་ལས་དགེ་རྒན་བཞི་བདམས་ནས་གྲོང་པ་7གྱི་མི་གྲངས་100ལ་བྲོ་ཚིག་དང་རྡོག་བྲོ་སོགས་བསླབས་ཤིང་། ལོ་རེའི་སྤྱི་ཟླ་7པའི་ནང་བྲོ་ཆེན་དུས་སྟོན་སྤེལ་བཞིན་ཡོད་ཅེས་ངོ་སྤྲོད་བྱས་བྱུང་།
