གངས་ཅན་མཁས་པའི་ཁྱུ་མཆོག་མདོ་སྔགས་ཀྱི་གཞུང་ལུགས་རབ་འབྱམས་སྨྲ་བ་ལ་ལྗགས་ཀྱི་འདབ་མ་རབ་ཏུ་ཡངས་པའི་དགེ་བའི་བཤེས་གཉེན་ཆེན་པོ་རྗེ་བཙུན་ཤེས་རབ་རྒྱ་མཚོ་མཆོག་ནི། མདོ་ཁམས་སྨད་ཀྱི་ཆར་གཏོགས་བཀྲ་ཤིས་པའི་དགེ་མཚན་རྣམ་པར་བཀྲ་བའི་གནས་རྡོ་སྦིས་གསེར་སྨུག་ལྗོངས་ཞེས་གྲགས་པའི་ཡུལ་གྱི་ཁོངས་གཏོགས། ས་ལ་དགེ་བཅུ་ཚང་བ་དང་དེར་གནས་པའི་སྐྱེ་བོ་རྣམས་ཀྱང་དད་ལྡན་ཡ་རབས་ཀྱི་ལུགས་ལས་མི་འགོངས་པ་ཤ་སྟག་ཡིན་པ་ཧོར་གྲོ་བ་ཞེས་འབོད་པའི་གྲོང་སྡེ་དེར་རིགས་རུས་ཕུན་སུམ་ཚོགས་པའི་དར་གྱི་རིགས་ཡབ་ལྷ་ལུང་སྐྱབས་དང་། ཡུམ་ལྷ་ལུང་སྐྱིད་གཉིས་ཀྱི་སྲས་སུ་རབ་བྱུང་བཅོ་ལྔ་བའི་ཤིང་ཕོ་སྤྲེལ་གྱི་ལོའི་（སྤྱི་ལོ་1884ལོ།）ས་ག་ཟླ་བའི་ཡར་ངོའི་རྒྱལ་བ་གཉིས་པའི་སྐྱ་རེངས་དང་པོ་ཤར་བ་དང་དུས་གཅིག་ཏུ་ངོ་མཚར་བའི་ལྟས་མང་པོ་དང་བཅས་ཏེ་སྐུ་བལྟམས།
        དགུང་ལོ་ལྔ་བའི་ཚེ་སྒོ་མང་དགེ་བཤེས་ལྷ་རམས་པ་ནོར་བུ་རིན་པོ་ཆེའི་དྲུང་ནས་རབ་ཏུ་བྱུང་ཞིང་དགེ་ཚུལ་གྱི་སྡོམ་པ་ལེགས་པར་བཞེས་ཏེ་དགེ་ལྡན་འཕེལ་རྒྱས་གླིང་（རྡོ་སྦིས་གྲྭ་ཚང་།）གི་ཆོས་སྒོར་ཞུགས་ནས་ཡེ་གེ་སྦྱོར་ཀློག་ལ་འབུངས་བ་ལེགས་པར་མཛད།
            དགུང་ལོ་བཅུ་དྲུག་གི་སྟོན་ཁར་ཆོས་སྡེ་ཆེན་པོ་བླ་བྲང་བཀྲ་ཤིས་འཁྱིལ་གྱི་ཆོས་གྲྭར་ཞུགས་ཏེ་སློབ་གཉེར་ལ་ཉིན་མཚན་སྦྲེལ་བའི་བརྩོན་པ་ཆེན་པོ་གནང་ཞིང་། སྐབས་དེར་བསེ་བསྡུས་གྲྭ་དང་བློ་རྟགས་མཐའ་དཔྱོད་གཉིས། འགྲེལ་བ་དོན་གསལ། རྒྱན་འཇུག་གཉིས་དང་བཅས་ཚོགས་རྒྱུགས་སུ་ཕུལ་བ་དང་། དེའི་དགུན་ཆོས་ཆེན་མོར་དམིགས་བསལ་གྱིས་འཛིན་གྲྭ་གོང་དུ་སྤར་བ་སོགས་ཀྱིས་གྲྭ་རྒན་གཞོན་ཀུན་ངོ་མཚར་བའི་དོན་མང་པོ་བྱུང་། ཨ་ཁུ་གོང་ཐང་བློ་གྲོས་དང་ཀུན་མཁྱེན་འཇམ་དབྱངས་བཞད་པ་སྐུ་ཕྲེང་བཞི་པ་བསྐལ་བཟང་ཐུབ་བསྟན་དབང་ཕྱུག་སོགས་སྡེ་སྣོད་འཛིན་པའི་བླ་མ་དུ་མར་བསྟེན་པ་དང་། ཁྱད་པར་དུ་ཨ་ཁུ་གོང་ཐང་བློ་གྲོས་ཚང་གི་མདུན་ནས་དགེ་སློང་གི་སྡོམ་པ་ཡང་དག་པར་མནོས་ལ། རྗེ་བཙུན་ཤེས་རབ་རྒྱ་མཚོ་ཁོང་ནི་སྐུ་ཚེ་འདིར་སྡོམ་གསུམ་གྱི་བཅས་མཚམས་ཕྲ་རགས་གང་གི་ཐད་ལ་ཉེས་ལྟུང་གི་དྲི་མས་གཞར་ཡང་མ་གོས་པའི་ཚུལ་ཁྲིམས་ཀྱི་ཕུང་པོ་མཐར་ཕྱིན་པར་མཛད་པའི་འདུལ་བ་འཛིན་པ་ཆེན་པོ་ཞིག་ཡིན་ནོ། །
        དགུང་ལོ་ཉེར་གཅིག་གི་ཚེ། ཁོང་ལྷ་སར་ཕེབས་ཏེ་འབྲས་སྤུངས་སྒོ་མང་གྲྭ་ཚང་གི་ཆོས་སྒོར་ཞུགས་ཤིང་མདོ་སྔགས་རིག་གནས་ཡོངས་སུ་རྫོགས་པའི་མཁས་པའི་དབང་པོ་མཆོག་གྲུབ་དཀར་པོ་དང་། བླ་མ་འབུལ་སྡུད་རིན་པོ་ཆེ་བློ་བཟང་ཡེ་ཤེས་བསྟན་པའི་རྒྱལ་མཚན་དཔལ་བཟང་པོ་སོགས་དགེ་བའི་བཤེས་གཉེན་བཅུ་ཕྲག་གསུམ་ལྷག་སྤྱི་བོའི་ཅོད་པན་དུ་བསྟེན་ཏེ་རིག་པའི་གནས་མཐའ་དག་དང་མདོ་སྔགས་ཀྱི་གཞུང་ལུགས་རྒྱ་མཚོ་ལྟ་བུ་ལ་ཐོས་བསམ་མཐར་ཕྱིན་པར་མཛད་ནས་འཆད་རྩོད་རྩོམ་གསུམ་དང་། མཁས་བཙུན་བཟང་གསུམ་གྱི་ཡོན་ཏན་ལ་མངའ་བརྙེས་ཤིང་སྒོ་ཐམས་ཅད་ནས་འགྲན་པའི་ཟླ་དང་བྲལ་བའི་མཁས་པའི་གོ་འཕང་མཐོན་པོར་གཤེགས།
        དེའི་ཚེ་ཁོང་གིས་ལེགས་བཤད་སྙིང་པོ་སོགས་ཉིན་རེར་ཤོག་གུ་མདའ་ཚད་མ་བདུན་རེ་ཆག་མེད་དུ་བློ་འཛིན་གནང་ནས་གཞུང་པོ་ཏི་མང་པོ་ཐུགས་ལ་བྱང་བར་མཛད། ཀློག་ཆོད་ནི། སྒྲ་དག་གསལ་གསུམ་གྱི་སྒོ་ནས་ཉིན་རེར་བཀའ་འགྱུར་པོ་ཏི་གཉིས་རེ་གསུངས་གྲུབ་པར་མ་ཟད་དེའི་ཚིག་དོན་ལ་བརྟག་གཞིགས་མཛད་པ་སོགས་ཁྱད་ཆོས་གཞན་ལ་མེད་པ་ཤིན་ཏུ་མང་།
        དགུང་ལོ་སོ་གསུམ་གྱི་སྟེང་དམིགས་གསལ་གྱིས་ལྷ་རམས་པ་འཕར་མའི་མིང་བཏགས་བྱུང་བ་དང་། ནོར་བུ་གླིང་གའི་རྩོད་རྒྱུགས་ཚེ་ཨང་དང་པོ་བྱུང་བ། རྩེ་གཟིམ་ཆུང་དུ་ཚོགས་ལངས་དམིགས་བསལ་ཅན་གནང་བ་སོགས་ཡ་མཚན་པའི་མཛད་བཟང་མང་པོ་གྲུབ། དེ་ལོའི་སྨོན་ལམ་ཉི་ཤུ་བཞིའི་ཉིན་ནོར་བུ་གླིང་གར་གཞུང་གི་སྐུ་དྲག་སེར་སྐྱ་ཚང་འཛོམས་ཀྱི་དབུས་སུ་རྩེ་དྲུང་ཡིག་ཆེན་མོ་ཆོས་དར་ལགས་ནས་ལྷ་རམས་པའི་དམ་བཅའ་ཨང་གྲངས་ཀྱི་རིམ་པ་སྒྲིག་སྐབས། རིག་པའི་གནས་ལྔ་ལ་མཁས་པའི་ཨང་དང་པོ་ནི་འབྲས་སྤུངས་སྒོ་མང་ཀླུ་འབུམ་དགེ་བཤེས་ཤེས་རབ་རྒྱ་མཚོའོ་ཞེས་མཚན་སྙན་མེ་ཏོག་གི་ཕྲེང་བ་དགུང་དུ་འཐོར་བས་དེར་བཞུགས་ཚོགས་པ་ཀུན་གྱིས་ངོ་མཚར་བ་དང་རྗེས་སུ་ཡི་རངས་ཚད་མེད་བྱས།
        དགུང་ལོ་སོ་བཞི་བར། བུ་སྟོན་ཐམས་ཅད་མཁྱེན་པ་རིན་ཆེན་གྲུབ་ཀྱི་གསུང་འབུམ་པར་གཞི་གསར་བཞེངས་ཀྱི་ཞུ་དག་མཛད། ལོ་དྲུག་ཙམ་གྱིས་གསུང་འབུམ་པོ་ཏི་ཉེར་དགུའི་ཞུ་དག་ལེགས་པར་གྲུབ། དེའི་རྗེས་སུ་ཡང་བཀའ་འགྱུར་རོ་ཅོག་གི་པར་གཞི་གསར་བཞེངས་ཀྱི་ཞུ་དག་མཛད་དེ་ལོ་བརྒྱད་ཙམ་གྱིས་པར་གཞི་གསར་བཞེངས་ལེགས་གྲུབ་བྱུང་། གཞན་ཡང་རྩེའི་རིག་གནས་སློབ་གྲྭ་ཆེན་མོར། སྔོན་མཁས་པའི་དབང་པོ་སྡེ་སྲིད་སངས་རྒྱས་རྒྱ་མཚོ་མཆོག་གིས་སྡེབ་སྦྱོར་བསྒྲིགས་པ་དེར་ཞུ་དག་དང་འབྲེལ་བར་སྡེབ་སྦྱོར་གསར་སྒྲིག་ཀྱང་མཛད། སེར་འབྲས་དགེ་གསུམ་དང་རྒྱུད་གྲྭ་སྟོད་སྨད་ཀྱི་དགེ་བའི་བཤེས་གཉེན་དྲག་གྲས་རྣམས་ནོར་གླིང་དུ་གཞུང་པོ་ཏི་ལྔ་དང་སྔགས་ཀྱི་རྩོད་རྒྱུགས་ཚེ། བདེ་ཡངས་མཚན་དཔྱད་པ་གཞན་ཞིག་དང་། རྗེ་ཤེས་རབ་རྒྱ་མཚོ་ཁོང་རྣམ་གཉིས་ཀྱིས་རྩོད་པའི་དཔང་པོ་མཛད་འཕྲིན་ངོ་མཚར་བ་མང་པོ་བྱུང་།
        ཁོང་རིན་པོ་ཆེ་ནི་སྐུ་ན་ཆེས་ཕྲ་བའི་དུས་ནས་ཤེས་རབ་ཀྱི་ཀློང་བརྡོལ་བས་དགུང་ལོ་བཅོ་ལྔའི་སྟེང་ནས་ལྗགས་རྩོམ་གནང་བའང་ཡོད། ཁོང་གིས་བསྟན་འགྲོ་སྤྱིའི་དོན་ལ་དམིགས་ནས་བསྟན་བཅོས་གང་མང་ཞིག་བརྩམས་མོད། བསྟན་པ་འཕེལ་འགྲིབ་དང་དུས་ཀྱི་འགྱུར་བའི་དབང་གིས་གསུང་རྩོམ་གྱི་མ་ཕྱི་པུ་ཏི་བཅུ་ཕྲག་ལྷག་མེད་བརླག་ཏུ་གྱུར་ལ། ད་ལྟ་ཡོད་པ་རྣམས་མཚོ་སྔོན་མི་རིགས་དཔེ་སྐྲུན་ཁང་གིས་སྡུད་གང་ཐུབ་ཀྱིས་དཔེ་སྐྲུན་བྱས་ཡོད།
        རྗེ་བཙུན་ཤེས་རབ་རྒྱ་མཚོ་ཁོང་གིས་སྐུ་ཚེ་འདིར་སྲས་ཀྱི་ཐུ་བོ་དགེ་བའི་བཤེས་གཉེན་ལྷ་རམས་པ་སྐལ་བཟང་རྒྱ་མཚོ་དང་ དགེ་བཤེས་གཞོང་པ་ཚུལ་ཁྲིམས་སོགས་སྡེ་སྣོད་འཛིན་པའི་བུ་སློབ་བགྲང་གིས་མི་ལང་བ་བསྐྱངས་པ་དང་། དེ་ལས་གཞན་པའི་སྐྱ་སེར་སློབ་གཉེར་ལ་འདུན་པ་དྲག་པ་གང་མང་མང་ལ་སྒྲ་སྙན་ངག་སུམ་རྟགས་དག་གསུམ་སོགས་ཁྲིད་ནས་བསྐྱེད་བསྲིངས་པས་བོད་མི་རིགས་ཀྱི་རིག་གནས་མི་ཉམས་གོང་སྤེལ་གྱི་འཕྲིན་ལས་རྒྱ་ཆེན་པོ་སྤེལ།
        དགུང་ལོ་ང་ལྔ་ཕེབས་ཚེ། སྐབས་དེའི་གོ་མིན་ཏང་གིས་གདན་དྲངས་པ་ལྟར་རྒྱ་ནག་ཏུ་ཕེབས་ནས་ལུགས་གཉིས་ཀྱི་བྱ་བ་མང་པོ་མཛད་པ་དང་ཁྱད་པར་དུ་རྒྱལ་ཁབ་གསར་བ་དབུ་བརྙེས་རྗེས་མི་དམངས་སྲིད་གཞུང་གི་བཀའ་ལྟར་རྒྱལ་གཅེས་ཆོས་གཅེས་ཀྱི་སློབ་སྟོན་བསྟན་འགྲོ་སྤྱི་ལ་ཕན་པའི་ལྷག་བསམ་རྣམ་པར་དག་པའི་སྒོ་ནས་རྣམ་པར་དཀར་བའི་མཛད་བཟང་གི་གྲུ་ཆར་བསྙིལ་བར་མཛད།
        དགུང་ལོ་དོན་གསུམ་གྱི་ཚེ། རྒྱ་གར་དང་། བལ་བོའི་རྒྱལ་ཁབ་གཉིས་ཀྱིས་གདན་ཞུས་ལྟར། སངས་རྒྱས་བཅོམ་ལྡན་འདས་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱའི་རྗེས་དྲན་ཚོགས་ཆེན་དུ་ཞུགས། གཞན་ཡང་དེའི་སྔོན་གཞུག་ཏུ་འབར་མ་དང་། ཅན་པུའུ་ཀྲེ། སིང་གྷ་ལ། རོས་ཏན་སོགས་ཆོས་ལྡན་རྒྱལ་ཁབ་དེ་དག་ཏུ་ཕེབས་ནས་དེ་གའི་ཆོས་པ་རྣམས་ལ་བཀའ་ཆོས་མང་དུ་གསུངས་ཤིང་བསྟན་པ་སྤྱི་དང་འགྲོ་བ་ཡོངས་ལ་ཕན་པའི་མཛད་འཕྲིན་རྒྱ་ཆེན་པོ་མཛད་དོ། །
        ལུང་རྟོགས་ཀྱི་ཡོན་ཏན་མཐའ་དག་ལ་དབང་འབྱོར་བའི་སེམས་དཔའ་ཆེན་པོ་འདི་ཉིད་ནི་རབ་བྱུང་བཅུ་དྲུག་པའི་ས་ཕོ་སྤྲེལ་གྱི་ལོ་དབྱུ་གུ་ཟླ་བའི་ཡར་ངོའི་དགའ་བ་གསུམ་པའི་ཉིན་（སྤྱི་ལོ་1968པའི་ཟླ་བ་11པའི་ཚེས་1ཉིན།）ཞིང་འདིའི་གདུལ་བྱ་རྣམས་རྟག་འཛིན་གྱི་འཆིང་བ་དམ་པོ་གཅོད་པར་བསྐུལ་ཕྱིར་དགོངས་པ་ཆོས་དབྱིངས་སུ་ཐིམ་པའི་ཚུལ་བསྟན་ཏོ། །
        མཁྱེན་བརྩེ་ནུས་གསུམ་གྱི་བདག་ཉིད་ཆེན་པོ་རྗེ་བཙུན་ཤེས་རབས་རྒྱ་མཚོས་སྐུ་ཚེ་གང་པོར་འཛམ་གླིང་གི་ཞི་བདེ་དང་། མེས་རྒྱལ་གྱི་དར་རྒྱས། སེམས་ཅན་གྱི་བདེ་སྐྱིད་བཅས་ཀྱི་དོན་དུ་རྨད་བྱུང་གི་མཛད་རྗེས་ནམ་མཁའ་དང་མཉམ་པ་མིག་མཐོང་ལག་ཟིན་དུ་ཡོད་པ་ནི་གཟུར་གནས་རྣམ་པར་དཔྱོད་པའི་མིག་དཀྱུས་རིང་པོར་གྱུར་པ་རྣམས་ཀྱི་བློ་ངོར་སྒྲིབ་བྲལ་གསུབ་མེད་དུ་ལྷང་ངེར་ཡོད། །