བོད་ཀྱི་ལྷ་མོའི་ཟློས་གར་ནི་འཛམ་གླིང་གི་དངོས་མིན་ཤུལ་བཞག་རིག་གནས་ཀྱི་གྲས་ཡིན་ལ། དགེ་སྡིག་གསལ་བར་ཕྱེས་པའི་ངག་རྒྱུན་དང་གཏམ་རྒྱུད་དག་གཞིར་བཟུང་སྟེ་རྣ་བར་སྙན་ཞིང་འཇེབས་པའི་གླུ་སྒྲ་དང་ཡང་ཞིང་སྐྱེན་པའི་བྲོ་གར་ལ་བརྟེན་ནས་འཛམ་གླིང་དུ་གྲགས། དེ་ལ་བོད་ཀྱི་རིག་གནས་འགྱུར་རྡོ་གསོན་པོ་ཞེས་ཀྱང་བཤད་སྲོལ་ཡོད། པར་རིས་ནི་ཕོ་བྲང་ནོར་བུ་གླིང་གར་ལྷ་མོའི་ཟློས་གར་འཁྲབ་བཞིན་པ་དེར་འཁྲབ་སྟོན་པའི་ལུས་ཟོར་ཡང་ཞིང་ཉམས་འགྱུར་ཕྱུག་པའི་རྣམ་པ་དེ་ཡིན།
དཔལ་འབྱོར་འཛམ་གླིང་ཅན་དུ་ཁ་ཕྱོགས་པའི་དེང་སང་ཀྲུང་ཧྭ་ཤེས་རིག་གི་ཁྱད་ཆོས་བླ་ལྷག་ཏུ་ལྡན་པའི་གྲངས་ཉུང་མི་རིགས་ཀྱི་ཟློས་གར་རིག་གནས་འདི་ལ་ས་གནས་ཀྱི་ཟློས་གར་རྒྱུན་འཛིན་པ་སྟེ་དམངས་ཁྲོད་ཀྱི་ཟློས་གར་ཚོགས་པ་དང་ཆེད་ལས་ཀྱི་ཟློས་གར་ཚོགས་པར་བོད་ལྗོངས་ཀྱིས་རྒྱབ་སྐྱོར་ཤུགས་ཆེར་བྱེད་ཀྱི་ཡོད། ད་ལྟའི་དམངས་ཁྲོད་ཟློས་གར་ཚོགས་པ་དེ་དངོས་མིན་ཤུལ་བཞག་རིག་གནས་སྲུང་སྐྱོབ་ཀྱི་ལས་ཀ་མགོ་རྩོམ་པའི་སྐབས་སུ་ཚོགས་པ་40མི་ལོངས་པ་ཙམ་ནས་ཚོགས་པ་140ལྷག་ཏུ་འཕེལ་ཡོད།
པར་རིས་ནི་ཕོ་བྲང་ནོར་བུ་གླིང་གར་ལྷ་མོའི་ཟློས་གར་འཁྲབ་སྐབས་གར་མཁན་མཛེས་མས་མི་སེམས་འགུལ་བའི་གྲེ་འགྱུར་མངོན་པའི་ཚུལ་ཡིན།
ཉེ་བའི་ལོ་ཤས་རིང་བོད་ཀྱི་ལྷ་མོའི་ཟློས་གར་ལ་སྲུང་སྐྱོབ་དང་རྒྱུན་འཛིན་བྱས་ཡོད་པ་མ་ཟད་ཟློས་གར་འཁྲབ་གཞུང་གསར་པ་སྐོར་ཞིག་ཀྱང་བྱུང་ཡོད་པས་སྐྱེ་ཕོ་མོ་རྒན་དར་གཞོན་གསུམ་གང་ཡིན་རུང་དེ་ལ་དགའ་བསུ་དང་དོ་སྣང་བྱེད་ཀྱི་ཡོད། པར་རིས་ཁྲོད་ན་གཞོན་ལྟད་མོ་བ་རྣམས་ཀྱི་མིག་དབང་ལྷ་མོའི་ཟློས་གར་གྱིས་ཡོངས་སུ་འཕྲོག་ཡོད།
བོད་རིགས་བགྲོས་སོང་ཞིག་གིས་ལྷ་མོའི་ཟློས་གར་གྱི་གཏམ་རྒྱུད་མི་ཀུན་གྱིས་མཁྱེན་གྱི་ཡོད་ཅེས་གསུངས། ན་གཞོན་རྣམས་ཀྱིས་རྒན་རབས་པ་ཚོ་ནང་བཞིན་གནའ་བོའི་གདངས་དབྱངས་རེ་རེ་བཞིན་དུ་གོ་བ་ལེན་པར་དཀའ་ནའང་འཁྲན་སྟོན་པ་རེ་རེའི་སྣང་བརྙན་ཡིད་ལ་གསལ་ལེར་ཡིན་ཞིང་བྱིས་པ་རྣམས་ཀྱིས་ཟློས་གར་ལ་ལྟད་མོ་བལྟ་བ་ནི་ཕྱིའི་ཆ་བྱད་རྣམས་ལ་རོལ་མྱོང་བྱེད་པ་ཙམ་ཡིན།
སྐབས་འདིའི་བོད་ཀྱི་ལྷ་མོའི་ཟློས་གར་འཁྲབ་སྟོན་ནི་བོད་ལྗོངས་ཀྱི་ཟློས་གར་སྲུང་སྐྱོབ་བྱས་པའི་གྲུབ་འབྲས་མངོན་པར་མཚོན་པ་དང་། བོད་རང་སྐྱོང་ལྗོངས་ཀྱི་ས་ཁུལ་ཡོངས་ཀྱི་ལྷ་མོའི་ཟློས་གར་འཁྲབ་རྩལ་བརྗེ་རེས་བྱེད་པར་གར་སྟེགས་ཤིག་བསྐྲུན་ནས་ཟློས་གར་སྒྱུ་རྩལ་གྱི་མཛེས་པ་མངོན་པ་ཞིག་ཀྱང་ཡིན། པར་རིས་ནི་ཕོ་བྲང་ནོར་བུ་གླིང་གར་ལྷ་མོའི་ཟློས་གར་འཁྲབ་སྐབས་གཟབ་ཆོས་སྤྲས་པའི་གར་མཁན་མ་འཇོ་སྒེག་ཉམས་ཀྱིས་ཕྱུག་པའི་ཚུལ་ཡིན།
སྲོལ་རྒྱུན་གྱི་འགྲོ་ལུགས་ལྟར་ཐེངས་འདིའི་ཟློས་གར་སྒོ་འབྱེད་འཁྲབ་སྟོན་ལའང་ཆུ་ཤུར་ཞལ་རོང་འབྲོང་རྩེ་དང་སྙེ་མོ་ཐ་རོང་ལྷ་མོ་ཚོགས་པ་གཉིས་བདམས་ཡོད། པར་རིས་ནི་ཕོ་བྲང་ནོར་བུ་གླིང་གར་ལྷ་མོའི་ཟློས་གར་འཁྲབ་སྐབས་གཞོན་ནུ་མས་རྒན་རབས་ལ་ཕྱག་ཟུང་ཐལ་མོ་སྦྱར་ནས་གུས་པ་མཚོན་པའི་ཚུལ་ཡིན།
གཞན་ཡང་ལྷ་སའི་ཞོལ་གྱི་ལྷ་མོའི་ཚོགས་པ་དང་། བོད་ལྗོངས་གདངས་རྙིང་ཟློས་གར་ཚོགས་པ། མལ་ཏྲོ་གོང་དཀར་ཕྱེ་མར་ཁ་ཟློས་གར་ཚོགས་པ། གཞིས་ཀ་རྩེ་ངམ་རིང་ཆིག་བོ་ཟློས་གར་ཚོགས་པ། གཞིས་ཀ་རྩེ་སྣམ་གླིང་ཁོང་འུ་ཟློས་གར་ཚོགས་པ། ལྷོ་ཁ་གྲ་ནང་ར་འགྲིན་སྒང་ཟློས་གར་ཚོགས་པ། ལྷོ་ཁ་སྣེ་གདོང་ཤར་གོ་ཟློས་གར་ཚོགས་བཅས་དམངས་ཁྲོད་ཟློས་གར་ཚོགས་པ་བདུན་གྱིས་རང་གི་འཇོན་ཐང་ལྟར་རྣམ་ཐར་ཆེན་མོ་བརྒྱད་འཁྲབ་སྟོན་བྱས། པར་རིས་ནི་ཕོ་བྲང་ནོར་བུ་གླིང་གར་ལྷ་མོའི་ཟློས་གར་འཁྲབ་སྐབས་འབྲོག་པའི་གར་གྱི་ལྡེམ་མྱུར་སྟོན་པ་དེ་ཡིན།
ཤེས་རྟོགས་བྱུང་བ་ལྟར་ན་བོད་རང་སྐྱོང་ལྗོངས་ཀྱི་ས་ཁུལ་སོ་སོ་ནས་འོས་སྦྱོར་དང་ཆེད་མཁས་པས་ཞིབ་བཤེར་བྱས་པའི་དམངས་ཁྲོད་ཀྱི་སྒྱུ་རྩལ་པ་རྣམས་ཟླ་8པའི་ཚེས་26ཉིན་མང་ཚོགས་སྒྱུ་རྩལ་ཁང་གི་ལྗོངས་དངོས་མིན་ཤུལ་བཞག་རིག་གནས་སྲུང་སྐྱོབ་ལྟེ་གནས་ཀྱི་གར་སྟེགས་སྟེང་ནས་སྐབས་གསུམ་པའི་བོད་ཀྱི་ལྷ་མོའི་ཟློས་གར་འགུགས་དབྱངས་འགྲན་སྡུར་དང་བྱ་དགའ་སྤྲོད་པའི་བྱ་འགུལ་སྤེལ་རྒྱུ་རེད། པར་རིས་ནི་ཕོ་བྲང་ནོར་བུ་གླིང་གར་ལྷ་མོའི་ཟློས་གར་འཁྲབ་སྐབས་ཆུང་མས་གཡག་རྒོད་ཀྱིས་རྡུང་བའི་འབྲོག་པ་སྐྱོར་བའི་ཚུལ་ཡིན།
ཟླ་9པའི་ཚེས་7ནས་ཚེས་9ཉིན་གྱི་དགུང་མོར་ལྗོངས་ཟློས་གར་ཚོགས་པས་གྲ་སྒྲིག་བྱས་པའི་«སྣང་ས་འོད་འབུམ»དེ་ལྗོངས་ཟློས་གར་སྒྱུ་རྩལ་ལྟེ་གནས་སུ་འཁྲབ་སྟོན་བྱེད་རྒྱུ་རེད། སྐབས་དེར་བོད་ཀྱི་ཟློས་གར་སྒྱུ་རྩལ་འགྲེམས་སྟོན་ཚོམས་ཆེན་ཡང་ལྟད་མོ་བ་རྣམས་ལ་སྒོ་འབྱེད་རྒྱུ་ཡིན། པར་རིས་ནི་ཕོ་བྲང་ནོར་བུ་གླིང་གར་ལྷ་མོའི་ཟློས་གར་འཁྲབ་སྐབས་གཡག་རྒོད་བག་ལྷོད་ངང་ངལ་གསོ་བའི་ཚུལ་ཡིན།
