ཉེ་ཆར། 《ཡོ་རོབ་ཀྱི་ནད་ཡམས་རིག་པའི་དུས་དེབ》ཐོག་སྤེལ་བའི་ཞིབ་འཇུག་ལས་མངོན་པར་གཞིགས་ན། ཁོ་ཧྥེ་འོས་འཚམ་འཐུང་ན་ཚེ་ཐག་ཇེ་རིང་དུ་གཏོང་བ་དང་འབྲེལ་བ་ཡོད། ཞིབ་འཇུག་འདིའི་ངོས་ནས་བརྗོད་ན། ཉིན་ལྟར་ཁོ་ཧྥེ་ཕོར་བ་གཉིས་འཐུང་ན་སྔོན་དཔག་ཚེ་ཚད་ལོ་གཉིས་ཇེ་རིང་དུ་གཏོང་ཐུབ།
ཟླ5ཚེས4ཉིན། གོང་གི་ཞིབ་འཇུག་དེ་《ཡོ་རོབ་ཀྱི་ནད་ཡམས་རིག་པའི་དུས་དེབ》སྟེང་བཏོན་པ་རེད།
ཞིབ་འཇུག་རྣམ་གྲངས40ནང་གི་ཚོད་ལྟ་བྱ་ཡུལ་མི་ས་ཡ་གསུམ་འབུ་བརྒྱད་ཁྲི་ལྔ་སྟོང་གཉིས་དྲུག་བརྒྱ་ལྔ་བཅུ་ང་གཅིག་དང་། དེ་བཞིན་ཤི་རྐྱེན་རིགས་འབུམ་བཞི་ཁྲི་ལྔ་ལྷག་ལ་དབྱེ་ཞིབ་བྱས་པ་བརྒྱུད་དེ། ཞིབ་འཇུག་མི་སྣས་ཤེས་རྟོགས་བྱུང་བར། ན་ཚོད་དང་། ལུས་ཀྱི་ལྗིད་ཚད། ཆང་འཐུང་བ། ཐ་མག་འཐེན་པ། ཁོ་ཧྥེ་ནང་གི་ཁོ་ཧྥེན་འདུས་ཚད་སོགས་ཀྱི་རྒྱུ་རྐྱེན་ལ་བསམ་བློ་མི་གཏོང་བའི་གནས་ཚུལ་འོག ཁོ་ཧྥེ་འཐུང་བ་ནི་རྒྱུ་རྐྱེན་ཧྲིལ་པོའི་ཤི་ཚད་དང་ལྡོག་ཕྱོགས་ཀྱི་འབྲེལ་བ་ཡོད། དེ་ལས་གཞན། ཞིབ་འཇུག་དེས་ད་དུང་ཁོ་ཧྥེ་འཐུང་བ་དང་ཤི་ཚད་ཀྱི་ས་ཁུལ་གྱི་ཧེ་བག་དེ་ཡོ་རོབ་དང་ཨེ་ཤེ་ཡར་ཨ་རི་ལས་ལྷག་པའི་ལྡོག་ཕྱོགས་ཀྱི་འབྲེལ་བ་མངོན་ཡོད་པ་བསྟན་པ་རེད།
ཞིབ་འཇུག་མི་སྣས་བསྟན་དོན། ཁོ་ཧྥེ་མི་འཐུང་བའི་མི་དང་བསྡུར་ན། ཁོ་ཧྥེ་འོས་འཚམ་འཐུང་བ་སྟེ། དཔེར་ན་ཉིན་རེར་ཕོར་བ2ནས4འཐུང་ན། རྒྱུ་རྐྱེན་ཧྲིལ་པོ་དང་དམིགས་བསལ་རྒྱུ་རྐྱེན་གྱི་ཤི་ཚད་ཇེ་དམའ་རུ་གཏོང་བར་ཕན་པ་ཡོད།
སྔོན་དཔག་ཚེ་ཚད་ཇེ་མཐོར་གཏོང་བ་ལས་གཞན། ཁོ་ཧྥེ་འཐུང་ན་སྐྲན་ནད་དང་སྙིང་གི་ཁྲག་རྩའི་ནད། གཅིན་པ་མངར་འགྱུར་གྱི་ནད། དབུགས་ལམ་གྱི་ནད་སོགས་ཀྱི་ཉེན་ཁ་ཇེ་ཆུང་དུ་གཏོང་ཐུབ།
འོས་འཚམ་གྱི་ཁོ་ཧྥེ་འཐུང་ན་སྔོན་དཔག་ཚེ་ཚད་ཇེ་མཐོར་གཏོང་ཐུབ་བམ། ཧྥ་རན་སིའི་རྒྱལ་ཁབ་བདེ་ཐང་དང་གསོ་རིག་ཞིབ་འཇུག་ཁང་གི་ཞིབ་འཇུག་འགན་འཛིན་པ་AstridNehligཡིས《གཟའ་ཉི་མའི་ཐའེ་ཝུའུ་ཧྲིའི་ཚགས་པར》སྟེང་བརྗོད་དོན། “དེ་རྩིས་རྒྱག་རྒྱུ་དཀའ་ལས་ཁག་པོ་ཞིག་རེད། ཁོ་ཧྥེ་ཡིས་བློ་རྩེ་གཅིག་ཏུ་བཏོད་པའི་ནུས་པ་དང་བསམ་གཞིགས་ཀྱི་ཚོར་སྐྱེན་རང་བཞིན་མཐོ་རུ་གཏོང་ཐུབ་པ་ནི་དེའི་ནང་གི་རྒྱུ་རྐྱེན་ཁ་ཤས་ཙམ་རེད།”ཅེས་ཟེར།
དོན་དངོས་ཐོག《2015ལོ་ནས2020ལོའི་བར་གྱི་ཨ་རིའི་གྲོང་མིའི་བཟའ་བཅའི་ཕྱོགས་སྟོན》ཞེས་པའི་ནང་། ཉིན་རེར་ཀ་ར་དང་འོ་མ་མི་བསྲེས་པའི་ཁོ་ཧྥེ་ཕོར་བ་3་ནས་5་བར་འཐུང་རྒྱུ་དེ་བདེ་ཐང་གི་འཚོ་བ་སྐྱེལ་སྟངས་ཀྱི་ཆ་ཤས་ཤིག་ཏུ་གྱུར་ཡོད་པར་བསྟན། ཀྲུང་གོ་འཚོ་བཅུད་སློབ་ཚོགས་ཀྱི《བཟའ་བཅའ་དང་བདེ་ཐང་སྟེ། ཚན་རིག་དང་མཐུན་པའི་དཔང་རྟགས་ཀྱི་ཐུན་མོང་ངོས་འཛིན》ནང་ཁོ་ཧྥེ་(ཉིན་རེར་ཁོ་ཧྥེ་ཕོར་བ3ནས4འཐུང་བ།)འོས་འཚམ་ངང་འཐུང་ན་གཅིན་པ་མངར་འགྱུར་གྱི་ནད་ཀྱི་ཉེན་ཁ་ཆུང་དུ་འགྲོ་སྲིད་ཅེས་བསྟན་ཡོད། རྒྱལ་སྤྱིའི་གཅིན་པ་མངར་འགྱུར་ནད་ཀྱི་མནའ་འབྲེལ་དང་ཨ་རིའི་གཅིན་པ་མངར་འགྱུར་ནད་ཀྱི་མཐུན་ཚོགས་སོགས་ལས་ཁུངས་ཀྱིས་གཅིན་པ་མངར་འགྱུར་ནད་པས་འོས་འཚམ་གྱི་སྒོ་ནས་ཁོ་ཧྥེ་འཐུང་ཆོག་པ་དང་། ཁོ་ཧྥེ་རྐྱང་པ་ནི་བདེ་ཐང་ཟས་རིགས་ཀྱི་ཆ་ཤས་ཤིག་བྱས་ཆོག་པར་འདོད། ད་དུང་བདེན་དཔང་ཁག་ཅིག་ལས་ཁོ་ཧྥེས་སྐྲན་ནད་ཀྱི་ཉེན་ཁ་ཇེ་ཆུང་དུ་གཏོང་ཐུབ་པ་དཔེར་ན། ནུ་མའི་སྐྲན་ནད་དང་བུ་སྣོད་ནང་སྐྱིའི་སྐྲན་ནད། མཆིན་པའི་སྐྲན་ནད་སོགས་ལྟ་བུའོ།
དེ་མ་ཟད་ལུས་རྩལ་གྱི་འཚོ་བཅུད་ཆེད་མཁས་པས་ཁོ་ཧྥེ་འཐུང་ན་ལུས་རྩལ་ལ་སྐུལ་འདེད་ཀྱི་ནུས་པ་ཐོན་པའི་ངོས་འཛིན་བྱེད་བཞིན་ཡོད་དེ། ལུས་ཕུང་སྦྱོང་བརྡར་མ་བྱས་གོང་གི་ཆུ་ཚོད་ཕྱེད་ཀའི་ནང་དུ་ཁོ་ཧྥེ་ཕོར་བ་གང་འཐུང་ན། མི་རྣམས་ཀྱིས་འགུལ་སྐྱོད་ཁྲོད་བློ་རྩེ་གཅིག་ཏུ་སྒྲིམ་ནས་འགུལ་སྐྱོད་ཀྱི་ཐེག་ཤུགས་ཇེ་མཐོར་གཏོང་བར་རོགས་རམ་བྱེད་ཐུབ་པ་དང་། ལུས་སྦྱོང་ལ་ཕན་པ་ཡོད་པར་བསྟན་པ་རེད།
འོ་ན། ཉིན་རེར་ཁོ་ཧྥེ་ག་ཚོད་འཐུང་ན་ཆོག་གམ་ཞེ་ན།《ཁོ་ཧྥེ་དང་བདེ་ཐང་གི་འབྲེལ་ཡོད་ཚན་རིག་གི་ཐུན་མོང་ངོས་འཛིན》ནང་བསྟན་པའི་བསམ་འཆར་ལྟར་ན། བདེ་ཐང་གི་མི་དར་མས་ཉིན་རེར་ཕོར་བ3ནས5འཐུང་བ་ནི་འོས་འཚམ་ཡིན་ཏེ། ཉིན་རེར་ཁོ་ཧྥེན་ཧའོ་ཁེ210ནས་400ལས་བརྒལ་མི་རུང་།
