གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
སྐྱབས་རྒྱལ་བ་རྒྱ་མཚོའི་དཀྱིལ་འཁོར་ལ། །
རྩེ་གཅིག་སྙིང་གིས་གསོལ་བ་འདེབས། །
སྟོང་རིགས་དྲུག་འཁོར་བའི་སེམས་ཅན་རྣམས། །
ས་བདེ་ཆེན་ལམ་སྣ་འདྲེན་དུ་གསོལ། །
ས་འདི་ས་ངོ་མ་ཤེས་ན། །
གླིང་བྱང་ཕུ་སྤེན་ལུང་ཕྱུག་མོ་རེད། །
ང་དང་ང་ངོ་མ་ཤེས་ན། །
ཤར་ཁྲ་བོ་གླིང་གི་ས་ཆ་ན། །
རྗེ་མི་འགྱུར་གདོང་གི་འབུམ་པ་ལ། །
བློན་མི་འགྱུར་ཚ་ཞང་འདན་མ་སྲིད། །
ཕོ་ཡིན་ན་ཨ་ནུ་དེ་འདྲ་ཡིན། །
ཆུ་ཕ་རིའི་བག་མ་ཚུར་འོང་མ། །
ཤར་དར་བཟའ་གཡུ་སྒྲོན་ཡིན་པས་ཟེར། །
ཉོན་དང་འདྲ་མ་ཚིག་གསུམ་ཡོད། །
ཇག་ཕར་འགྲོ་དཔོན་བློན་བདུན་པོའི་ནང་། །
རྗེ་བཙན་པོ་ཁྲི་དཔོན་རྒྱ་ཚ་ཡོད། །
བློན་འབྲལ་མེད་ཆོས་ལུ་དར་འཕེན་ཡོད། །
དཔའ་འགྲན་མེད་སེང་སྟག་ཨ་དོམ་ཡོད། །
མི་ཆུང་རྟ་ཆུང་ཇག་འགྲོས་ཅན། །
གདོང་མི་འགྱུར་སྣང་ངུ་གཡུ་སྟག་ཡིན། །
བློན་ཨ་འབར་བུ་ཡི་འཕེན་སྟག་ཡོད། །
ཨ་ཁུ་ཁྲོ་ཐུང་སྟག་རྒྱལ་ཡོད། །
བྱ་ངང་བ་མཚོ་ལ་གཏད་པ་འདྲ། །
མཚོ་སྔོན་མོ་ཨེ་འཁྱིལ་མི་ཤེས་དོ། །
ལུག་གཡང་དཀར་མཐོ་གསུམ་འགྲིམ་པ་འདྲ། །
སྒང་རྩི་ཐོག་ཨེ་བཀྲ་མི་ཤེས་དོ། །
བྱ་ཁུ་བྱུག་འབྲས་ལ་བལྟས་པ་འདྲ། །
འབྲུ་དཀར་མོ་ཨེ་སྨིན་མི་ཤེས་ཏེ། །
ཁྱོད་དར་བཟའ་གླིང་ལ་གཏད་པ་འདྲ། །
དཔོན་གཡུ་སྟག་སྒང་ཁའི་དར་ལྕེ་རེད། །
ཕ་སྤྱི་དཔོན་མ་བཤོལ་ཤོར་ལེ་ཡིན། །
གདོང་ཞལ་ལུས་མ་བཤོལ་ཤོར་ལེ་ཡིན། །
བཤོལ་དེ་བྱས་མ་ཚད་མཉམ་ཆས་ཡོད། །
གླིང་ལྷ་སྡེས་མ་བཤོལ་ཤོར་བ་ཡིན། །
གར་འགྲོ་ཧོར་སེར་སྟེང་ལ་འགྲོ། །
དགྲ་མ་ཐུབ་ཆམ་ལ་ཨེ་ཕབ་བསམ། །
གནའ་མི་བོད་ཀྱི་གཏམ་དཔེ་ལ། །
ར་རྩིད་འུར་རྡོ་འཕེན་བྱེད་རྒྱུ། །
ཡུན་རིང་ན་རང་གི་མགོ་ལ་ཕོག །
བུ་སྣང་ངུ་ཕར་འགྲོ་ཇག་ལ་ཆས། །
ཚུར་ཡོང་རྟིང་མ་ཅི་འདྲ་བསམ། །
ཕོ་གསར་ཇག་ལ་ཕར་འགྲོ་དང་། །
ཁྱོད་ཚུར་འོང་འཕྲད་པ་འོས་མ་བྱུང་། །
བཤོལ་བསམ་ན་བུ་མོ་ཚུར་ལ་ཤོག །
ཕོ་གསར་ཇག་ལ་ཕར་འགྲོ་དེ། །
ཁྱོད་བུ་མོའི་བཤོལ་བཏབ་མི་ཉན་ཡང་། །
རྗེས་འགྱོད་མེད་བྱེད་ན་ཚུར་ལ་ཤོག །
ཚིག་གསུམ་གྱིས་བཤོལ་འདེབས་ཅིས་མི་སྒྲོགས། །
གླིང་ཚོ་ཆེན་མདུན་ནས་མ་བཤོལ་བའི། །
ཁྱོད་བུ་མོའི་ངོ་ལ་མི་ལྟ་སྟེ། །
གཟོད་ཕར་ལམ་འགྱོད་པ་མེད་ངེས་ཡིན། །
ངས་བལྟས་ན་ཉན་ལེ་མི་ཡོང་བསམ། །
དེ་རིང་ཐོད་པའི་བཀོད་བཞག་རེད། །
སྣང་ངུ་སྐུ་ཁམས་མ་བཟང་ན། །
གཏམ་མི་ཚེ་གླིང་ལེ་ཐོན་ནས་གདའ། །
ད་ལོ་དགུང་ལོ་བཅུ་གསུམ་རེད། །
རང་སྐག་སྟེང་གི་ཇག་འགྲོ་འདི། །
ཡིན་བསམ་འདན་མའི་ཡིད་ལ་མེད། །
མི་འགྲོ་མི་ཕོད་ཤ་ཚའི་གཏམ། །
ཕོ་གསར་མཚང་ལ་མི་འཕྲོད་དོ། །
ཕོ་རྡོ་འཁྱོག་ཆག་གྲུམ་ཡོང་འདོད་འདྲ། །
སྔ་དྲོ་ཁ་ཕོ་ཐག་ཐག་འདི། །
ཉི་མ་རྒས་ཀྱི་དགོང་ཁ་ལ། །
ཆེ་ན་མགོ་སྐེ་དགྲ་ལ་ཤོར། །
ཆུང་ན་དམའ་འབབ་རང་གིས་ཉོ། །
ལས་འདྲ་འགྲིག་ཡིད་ལ་མི་ཡོང་དོ། །
དེ་སྟེ་སྣང་ངུའི་ཐུགས་འདོད་རེད། །
བཤོལ་བསམ་ན་བུ་མོ་ཚུར་ལ་ཤོག །
གླུ་གོ་ན་རྣ་བའི་བདུད་རྩི་ལ། །
མ་གོ་གླུ་ཡི་འགྲེལ་བ་ཞུ། །
ཁྱོད་དར་བཟའི་ཡིད་ལ་དེ་ལྟར་ཞོག །
