གཅིག འགྲིམ་འགྲུལ་དོན་རྐྱེན་ངོས་འཛིན་ཡི་གེ་སྟེ། འགྲིམ་འགྲུལ་དོན་རྐྱེན་ངོས་འཛིན་ཡི་གེ་ནི་སྤྱི་བདེ་ལས་ཁུངས་ཀྱིས་འགྲིམ་འགྲུལ་དོན་རྐྱེན་བྱུང་རྐྱེན་ལ་རྩད་གཅོད་གསལ་པོ་བྱས་རྗེས། དོ་བདག་པའི་ཁྲིམས་འགལ་བྱ་སྤྱོད་དང་འགྲིམ་འགྲུལ་དོན་རྐྱེན་ཕན་ཚུན་བར་གྱི་རྒྱུ་འབྲས་འབྲེལ་བ། སྒྲིག་འགལ་བྱ་སྤྱོད་ཀྱིས་འགྲིམ་འགྲུལ་དོན་རྐྱེན་ཁྲོད་ཐོན་པའི་ནུས་པ་བཅས་གཞིར་བཟུང་སྟེ། དོ་བདག་པའི་འགྲིམ་འགྲུལ་དོན་རྐྱེན་གྱི་འགན་འཁྲི་ངོས་འཛིན་བྱས་ནས་བཟོས་པའི་ཡིག་ཆ་ལ་ཟེར། འགྲིམ་འགྲུལ་དོན་རྐྱེན་ངོས་འཛིན་ཡི་གེ་ནི་འགྲིམ་འགྲུལ་ཁྲིམས་གཏུག་ཁྲོད་དཔང་རྟགས་གལ་ཆེན་ཞིག་ཡིན་ཞིང་། འགྲིམ་འགྲུལ་དོན་རྐྱེན་བྱུང་བའི་དུས་ཚོད་དང་ཕ་རོལ་པོ་སུ་ཡིན་པ་ར་སྤྲོད་བྱེད་ཐུབ་པ་དང་། དེ་མིན་འགྲིམ་འགྲུལ་དོན་རྐྱེན་གྱི་འགན་འཁུར་མི་སྣས་བཅའ་ཁྲིམས་འགན་འཁྲི་ཅི་འདྲ་ཞིག་འཁུར་དགོས་པར་ཤུགས་རྐྱེན་ཐེབས་སྲིད།

        གཉིས། སྨན་བཅོས་གྲོན་དངུལ་ཏེ། སྨན་བཅོས་གྲོན་དངུལ་ལ་དབྱེ་ན་ཞག་སྡོད་གྲོན་དངུལ།སྨན་རིན་དང་སྨན་བཅོས་གྲོན་དངུལ་སོགས་འདུ། སྨན་བཅོས་གྲོན་དངུལ་ལ་བདེན་དཔང་བྱེད་པའི་དཔང་རྟགས་གཙོ་བོ་ནི་ཞག་སྡོད་གྲོན་དངུལ་གྱི་འཛིན་ཡིག ཞག་སྡོད་གྲོན་དངུལ་གྱི་ཞིབ་ཕྲའི་ཐོ་ཡིག སྨན་བཅོས་གྲོན་དངུལ་གྱི་འཛིན་ཡིག ནད་ཐོ། (སྒོ་བསྟེན་ནད་ཐོ་དང་ཞག་སྡོད་ནད་ཐོ)བརྟག་དཔྱད་དཔང་ཡིག་བཅས་ཡོད།

        གསུམ། ལས་ཆག་གྲོན་དངུལ་ཏེ། ལས་ཆག་གྲོན་དངུལ་ཞེས་པ་ནི་འགྲིམ་འགྲུལ་དོན་རྐྱེན་ཁྲོད་ཀྱི་དོ་བདག་པར་སྨན་བཅོས་དང་རྨས་སྐྱོན་གསལ་འབྱེད། འགྲིམ་འགྲུལ་དོན་རྐྱེན་ཐག་གཅོད་སོགས་རྐྱེན་བྱས་ཏེ་ལས་ཀ་བྱེད་མ་ཐུབ་པར་ཡོང་འབབ་ཇེ་ཉུང་དུ་སོང་བ་ཞིག་ལ་ཟེར། ལས་ཆག་གྲོན་དངུལ་ལ་བདེན་དཔང་བྱེད་པའི་དཔང་རྟགས་གཙོ་བོ་ནི་བྱ་བའི་སྡེ་ཁག་གི་ལས་ཆག་བདེན་དཔང་། ལས་ཆག་བྱུང་མཁན་གྱི་གླ་ཕོགས་ཐོ་ཡིག སྨན་ཁང་གིས་བཏོན་པའི་ངལ་གསོའི་བདེན་དཔང་། གལ་ཏེ་ལས་ཆག་བྱུང་མཁན་གྱི་གླ་ཕོགས་ཁྲལ་དོན་སྡེ་ཁག་གིས་གཏན་འཁེལ་བྱས་པའི་ཁྲལ་འཇལ་ཚད་ལས་བརྒལ་ཚེ་དཔྱ་ཁྲལ་འཇལ་བའི་དཔང་ཡིག་མཁོ་འདོན་བྱེད་པ་བཅས་ཡོད། བྱ་བའི་སྡེ་ཁག་གིས་བཏོན་པའི་ལས་ཆག་བདེན་དཔང་སྟེང་གཤམ་གྱི་ནང་དོན་གསལ་པོར་བྲི་དགོས།

1. བྱ་བའི་དུས་ཚོད་འགོར་འགྱངས་བྱས་པ།

2. གནོད་འཚེ་ཕོག་མཁན་གྱི་གླ་ཕོགས་ཡོང་འབབ།

3. སྒོར་གང་དག་འཐེན་པ་དང་དེ་འཐེན་པའི་བྱེ་བྲག་གི་གྲངས་ཀ

        བཞི། ནད་གཡོག་གྲོན་དངུལ་ཏེ། ནད་གཡོག་གྲོན་དངུལ་ཞེས་པ་ནི་འགྲིམ་འགྲུལ་དོན་རྐྱེན་ཁྲོད་རྨས་སྐྱོན་ཕོག་མཁན་གྱིས་རང་མགོ་མི་ཐོན་པར་ངེས་པར་ནད་གཡོག་བྱ་དགོས་པས། ནད་གཡོག་པར་གླ་ཕོགས་སམ་ལས་ཆག་གྲོན་དངུལ་སྤྲད་པ་ལ་ཟེར། ནད་གཡོག་གྲོན་དངུལ་གྱི་དཔང་རྟགས་ལ་དབྱེ་ན་སྨན་བཅོས་སྡེ་ཁག་གིས་བཏོན་པའི་ནད་གཡོག་བྱ་དགོས་པའི་བརྟག་དཔྱད་དཔང་ཡིག ནད་གཡོག་པས་རིམ་པ་འདྲ་མཚུངས་ཀྱི་ནད་གཡོག་བྱེད་པའི་ངལ་ལས་ཀྱི་གླ་ཆའི་ཚད་གཞི་འམ་ནད་གཡོག་པའི་ཡོང་འབབ་ཇེ་ཉུང་དུ་སོང་བའི་བདེན་དཔང་། ནད་གཡོག་པར་གླ་ཕོགས་བྱིན་པའི་བདེན་དཔང་། གལ་ཏེ་ཁྱིམ་མིས་བདག་སྐྱོང་བྱས་པ་ཡིན་ན་ཁྱིམ་མིར་ལས་ཆག་བྱུང་བའི་གྲོན་དངུལ་ལྟར་བདེན་དཔང་འདོན་སྤྲོད་བྱེད་པ་བཅས་འདུ། སྨན་བཅོས་སྡེ་ཁག་གིས་བཏོན་པའི་ནད་གཡོག་བྱ་དགོས་པའི་བརྟག་དཔྱད་བདེན་དཔང་སྟེང་ནད་གཡོག་བྱས་པའི་དུས་ཚོད་དང་མི་གྲངས་གསལ་འགོད་བྱ་དགོས།

        ལྔ། འགྲིམ་འགྲུལ་གྲོན་དངུལ་ཏེ། འགྲིམ་འགྲུལ་གྲོན་དངུལ་ནི་གནོད་འཚེ་ཕོག་མཁན་དང་དེའི་དགོས་ངེས་ཀྱི་ནད་གཡོག་པས་སྨན་བཅོས་བྱས་པའམ་སྨན་ཁང་བརྗེས་ནས་སྨན་བཅོས་བྱས་པ་དང་། གནོད་འཚེ་ཕོག་མཁན་གྱི་གཉེན་ཉེ་ཡིས་འདས་མཆོད་བསྒྲུབས་པར་བཏང་བའི་དགོས་ངེས་ཀྱི་འགྲིམ་འགྲུལ་གྲོན་དངུལ་ལ་ཟེར། འགྲིམ་འགྲུལ་གྲོན་དངུལ་གྱི་དཔང་རྟགས་ནི་འགྲིམ་འགྲུལ་འཛིན་ཡིག་ཡིན།

        དྲུག སྨན་ཁང་དུ་བསྡད་པའི་ཟ་མའི་ཁ་གསབ་རོགས་དངུལ་གྱི་བདེན་དཔང་གཙོ་བོ་ནི་སྨན་ཁང་དུ་བསྡད་པའི་གྲོན་དངུལ་གྱི་འཕྲོད་འཛིན་ཡིན།

        བདུན། འཚོ་བཅུད་གྲོན་དངུལ་གྱི་དཔང་རྟགས་གཙོ་བོ་ནི་སྨན་བཅོས་སྡེ་ཁག་གིས་བྲིས་པའི་བརྟག་དཔྱད་དཔང་ཡིག་ཡིན་པས་བརྟག་དཔྱད་དཔང་ཡིག་སྟེང་འཚོ་བཅུད་ལ་ཤུགས་བསྣན་དགོས་པ་གསལ་འགོད་བྱ་དགོས།

        བརྒྱད། དབང་པོ་སྐྱོན་ཅན་གྱི་སྐྱིན་ཚབ་འཇལ་དངུལ་གྱི་དཔང་རྟགས་ལ་དབྱེ་ན། རྨས་སྐྱོན་དཔྱད་བསྡུར་གཏན་འཁེལ་གྱི་བསྡོམས་ཚིག་དང་རྨས་སྐྱོན་དཔྱད་བསྡུར་གཏན་འཁེལ་གྲོན་དངུལ་གྱི་འཕྲོད་འཛིན། ཞུ་གཏུག་དང་ལེན་བྱས་པའི་ཁྲིམས་ཁང་ཡོད་སའི་ལོ་སྔོན་མའི་འབྲེལ་ཡོད་ཀྱི་སྡོམ་རྩིས་གཞི་གྲངས་བཅས་འདུ།

        དགུ། དབང་པོ་སྐྱོན་ཅན་གྱི་རམ་འདེགས་ཡོ་བྱད་གྲོན་དངུལ་གྱི་དཔང་རྟགས་ལ་དབྱེ་ན།རྫོང་རིམ་པ་ཡན་གྱི་སྨན་ཁང་གིས་རྨས་སྐྱོན་ཕོག་མཁན་ལ་དབང་པོ་སྐྱོན་ཅན་གྱི་རམ་འདེགས་ཡོ་བྱད་དགོས་པའི་བདེན་དཔང་དང་། རང་རྒྱལ་ནས་ཐོན་པའི་ཁྱབ་གདལ་རྣམ་པའི་ཡོ་བྱད་ཀྱི་རིན་གོང་ཚད་གཞི། བཀོད་སྒྲིག་ལས་ཁུངས་ཀྱིས་བཏོན་པའི་བརྗེ་སྤོར་འཁོར་ཡུན་དང་སྲུང་སྐྱོང་གྲོན་དངུལ་གྱི་བདེན་དཔང་བཅས་འདུ།

        བཅུ། གསོ་སྐྱོང་བྱ་ཡུལ་གྱི་འཚོ་བའི་གྲོན་དངུལ་གྱི་དཔང་རྟགས་ལ་དབྱེ་ན། ཁྱིམ་ཚང་གི་གནས་ཚུལ་བདེན་དཔང་། གསོ་སྐྱོང་བྱ་ཡུལ་གྱི་ཁྱིམ་ཐོའི་དཔང་ཡིག ཞུ་གཏུག་དང་ལེན་བྱས་པའི་ཁྲིམས་ཁང་ཡོད་སའི་ལོ་སྔོན་མའི་འབྲེལ་ཡོད་ཀྱི་སྡོམ་རྩིས་གཞི་གྲངས་བཅས་འདུ།

        བཅུ་གཅིག གཤིན་པོ་དུར་འཇུག་གི་གྲོན་དངུལ་དང་ཤི་བའི་སྐྱིན་ཚབ་འཇལ་དངུལ་གྱི་དཔང་རྟགས་ལ་ཤི་བའི་བདེན་དཔང་། འདས་པོའི་ཁྱིམ་ཐོའི་དཔང་ཡིག་དང་འབྲེལ་ཡོད་ཀྱི་སྡོམ་རྩིས་གཞི་གྲངས་བཅས་ཡོད།

        བཅུ་གཉིས། རྒྱུ་ནོར་གྱོང་གུད་ཀྱི་དཔང་རྟགས་ལ་གཙོ་བོ་རླངས་འཁོར་ཞིག་གསོ་བྱས་པའི་འཛིན་ཡིག་གམ་རིན་གོང་སྡེ་ཁག་གི་གསལ་འབྱེད་མཇུག་འབྲས།

        དོ་བདག་པའི་ཞུ་གཏུག་གོ་རིམ་ཁྲོད་གོང་གསལ་གྱི་དཔང་རྟགས་དག་མཁོ་འདོན་བྱ་དགོས་ཤིང་།གལ་ཏེ་མཁོ་འདོན་བྱེད་མ་ཐུབ་ཚེ། སྐྱིན་ཚབ་གྲོན་དངུལ་སྟེར་དགོས་པའི་འདོད་ཚུལ་བཏོན་པར་ཁྲིམས་ཁང་གིས་རྒྱབ་སྐྱོར་ཐོབ་དཀའ།