གངས་ཅན་རིག་པའི་རྣམ་དཔྱོད་འཕྲུལ་མངའ་དེང་རབས་ཚན་རྩལ་མཉམ་འདྲེས་ཀྱི། །
ལྟ་དཔྱོད་ཡངས་པའི་ཐུགས་ཀྱི་དཔལ་བེའུ་རབ་འབྱམས་གཙུག་ལག་སྟོང་འཁྱིལ་བའི། །
ཤེས་བྱའི་གན་མཛོད་ལེགས་བཤད་རྒྱ་མཚོའི་སྙིང་པོའི་བཅུད་འཛིན་ཡོངས་འདུའི་ལྗོན།།
ཐོས་བརྩོན་ཤེས་ལྡན་བློ་གྲོས་དཔལ་མངའ་རིག་པའི་ནོར་གླིང་དགའ་བས་འཇུག །
རྒྱལ་དོན་ཇུས་བཟང་གཏམ་གྱིས་བསྙད་པའི་བསྒྲོགས་འབྲེལ་གསལ་བའི་མེ་ལོང་སྦྱིན། །
བརྡ་སྤྲོད་གཞུང་གི་འབབ་ལྡན་དགའ་མས་དག་བྱེད་ཀླུང་གིས་བདུད་རྩིར་སྤྲོ། །
ཚངས་སྲས་བུ་མོའི་ངག་གི་རོལ་མཚོ་སྙན་ཚིག་རྒྱ་མཚོའི་རླབས་ཕྲེང་འཐོར། །
སྡེབ་ལེགས་མེ་ཏོག་གསར་པའི་བཞིན་རས་ཡིད་འཕྲོག་མཛེས་དགའི་འཛུམ་འདི་རྨད། །
ས་ལའི་མཛེས་རྒྱན་ནགས་ཀླུང་སྟུག་པོའི་ས་འཛིན་ཕྲེང་བས་མཐའ་ནས་སྐོར། །
ཀུན་དགའི་སྐྱེད་ཚལ་མེ་ཏོག་འཛུམ་དཀར་ལྗང་མདོག་གཡུ་ལོའི་རྒྱན་དུ་སྤུད། །
མདུད་བརྒྱ་གྲོལ་བའི་གཙང་པོའི་ཞགས་པ་རི་རབ་མཐའ་ནས་འབྱམས་སུ་ཀླས། །
མཐོ་སྒང་འཇིག་རྟེན་མཐོང་བ་ཀུན་སྨོན་མཛེས་པའི་ཞལ་སྐྱིན་སྤྱན་དུ་བསྟར། །
ཁྱད་ལྡན་མཁས་པའི་ལང་ཚོ་སྐྲུན་པའི་ཡོན་ཏན་ནོར་གྱིས་བང་མཛོད་གཏམ། །
ཡན་ལག་བརྒྱད་ཀྱི་རིག་གཞུང་སྲོང་བའི་ཉམས་མྱོང་ཚད་ཀྱིས་གཏན་ལ་དབབ།།
འཁྲབ་གཞུང་རིག་པའི་ཉམས་ཀྱི་སྒྱུ་རྩལ་གླིང་བཞིའི་ཁྱོན་ལ་མངའ་དབང་བསྒྱུར།།
སྦས་དོན་གསང་བའི་ཤེས་བྱའི་དཀྱིལ་འཁོར་མ་ལུས་མཁྱེན་པའི་ཀློང་དུ་ཟླུམ།།
གསར་གཏོད་རིག་པའི་བློ་གྲོས་ཉི་མ་དུས་སུ་འཆར་བའི་འོད་བརྒྱའི་གཟིས། །
རྨོངས་པའི་མུན་ནག་དྲུང་ནས་འབྱིན་པའི་རྣམ་དཔྱོད་པདྨའི་འདབ་བརྒྱ་གྲོལ།།
རིག་པའི་སྲང་ལ་དངོས་པོའི་དཔལ་ཡོན་ཚར་དུ་མངར་བའི་ཟེའུ་ཕྲེང་བསྟར།།
ཤེས་བྱའི་སྐྱེད་ཚལ་ཇི་དགར་འཇུག་པའི་རྐང་དྲུག་གཞོན་ནུའི་ལང་ཚོ་བརྟས།།
བོད་འབྲེལ་རོགས་སྐྱོར་བརྩེ་བས་རྒྱུན་བསྲིང་ཕྱག་གིས་པདྨོ་ཁ་འབྱེད་པའི། །
ཐོན་ལས་གསར་པའི་འཕེལ་རྒྱས་ལམ་ནས་ཐབས་ཀྱི་ཆུ་ཀླུང་འབུམ་ཕྲག་འགྱེད། །
ཚོགས་ཆེན་ཉི་ཤུའི་དགོངས་དོན་གཅིག་དྲིལ་ཐོས་བརྩོན་རིག་པའི་རྒྱན་སྤྲོས་ཏེ། །
སྐབས་གསུམ་པ་ཡང་ཡིད་དབང་འཕྲོག་སྟེ་རྣམ་ཤེས་མཐོ་སྒང་ལྷུང་ཞེས་གྲགས།།
