ཨོ་རྒྱན་བསྟན་འཛིན། རང་ཉིད་དགའ་མོས་ཡོད་པའི་ལས་དོན་སྒྲུབ་པ།

        འགའ་རེས་ཁོང་གི་གླུ་སྐད་ཀྱིས་སེམས་ལྷོད་ཐུབ་ཀྱི་འདུག་ཟེར་ལ། འགའ་རེས་ཁོང་གི་གླུ་སྐད་ཀྱིས་མིག་ནས་མཆིལ་མ་བཏོན་གྱི་འདུག་ཟེར།

        ང་ཚོ་ལ་ཡངས་ཤིང་ཆེ་བའི་མཁའ་དབྱིངས་ཤིག་མེད་ཀྱང་།

        ང་ཚོ་ལ་ལྡོག་ཏུ་མེད་པའི་འཕུར་སེམས་ཤིག་ཡོད་མྱངས།

        ང་ཚོ་ལ་བདེ་ཞིང་སྙོམས་པའི་ལམ་བུ་ཞིག་མེད་ཀྱང་།

        ང་ཚོ་ལ་མདུན་དུ་སྐྱོད་པའི་ཕུགས་བསམ་ཞིག་ཡོད་མྱངས།

        ཉི་མ་ནུབ་རི་ལ་བཞུད་པའི་སྐབས་ཤིག །ང་རང་ཁྲེང་ཏུའུ་གྲོང་ཁྱེར་ཁོན་ཀྲའེ་སྲང་ལམ་གྱི་དབྱི་ཏིང་ཁ་ཧྥེ་ཁང་ནས་བརྒྱུད་ཅིང་། དེ་ནས་སྙན་ཞིང་འཇེབས་པའི་བོད་གཞས་ཤིག་རྣ་ལམ་དུ་ཐོས་བྱུང་བས། མུ་མཐུད་དུ་མདུན་ཕྱོགས་ལ་འགྲོ་མཚམས་བཞག་ནས་རྐུབ་སྟེགས་སྟོང་པ་ཞིག་ཉུག་སྟེ་སེམས་ལྷོད་ལ་ཕབ་ནས་བསྡད། ཨོ་རྒྱན་བསྟན་འཛིན་གྱིས་གར་སྟེགས་ཐོག་ཏུ་རོལ་ཆ་དཀྲོལ་ཞོར་ཁོའི་ཆེད་བསྒྲིགས་གསར་པའི་ནང་གི《ལག་ལེན་གསེར་གྱི་ཐིགས་པ》ཞེས་པའི་གླུ་དབྱངས་དེ་ལེན་བཞིན། སྙན་ཞིང་འཇེབས་ལ་ཡིད་སེམས་དབང་མེད་དུ་འཕྲོད་པའི་སྐད་གདངས་དང་བག་གྲོ་བའི་ཉམས་འགྱུར་ལས་ཁོའི་བཅོས་མིན་གྱི་སེམས་ཀྱི་རི་མོ་ཕྱིར་མངོན་གྱི་འདུག །དེ་ནི་ངས་ཨོ་རྒྱན་བསྟན་འཛིན་ཐེངས་དང་པོ་མཐོང་བ་ཡིན།

གླུ་པ་ཨོ་རྒྱན་བསྟན་འཛིན།

ཕུགས་འདུན་སྙེག །གླུ་པ་དཀྱུས་མ་ཞིག་ནས་ཆེད་བསྒྲིགས་བཟོ་སྐྲུན་པ་རུ་གྱུར།

        ལོ་ཡི་འཁོར་མོ་དེ་2013ལོར་ཡར་འདེད་ན། ལས་གནས་ལ་ཞུགས་ནས་ལོ་ཕྱེད་ཙམ་འགོར་བའི་ཨོ་རྒྱན་བསྟན་འཛིན་ཁོང་ཉིན་ལྟར་མུན་ནག་གི་རྒྱ་རུ་ཚུད་པ་ལྟར་གྱུར་ཡོད་ཅིང་། ཆུང་ནས་གླུ་གཞས་ལ་བརྩེ་བ་ཟབ་པའི་ན་གཞོན་རེ་བ་ཅན་དེ་ད་ལྟ་རང་གི་ཕུགས་འདུན་དང་རྒྱང་ཐག་ཇེ་རིང་དུ་འགྱུར་བཞིན་པ་འདོད། སྤྱིར་ཁོས་ཕུགས་འདུན་དེ་གཏན་ནས་དོར་མྱོང་མེད་རུང་། སྐབས་དེ་སེམས་པ་དངངས་སྐྲག་གིས་ཁེངས་ཡོད། ཁོས་གླུ་གཞས་ལ་དུང་པའི་མི་མང་པོ་ཞིག་ཁྲེང་ཏུའུ་ལ་འགྲོ་བཞིན་ཡོད་པ་ཐོས་རྗེས། སེམས་སུ་རེ་བས་ཁེངས་ཤིང་། དེ་མ་ཐག་ལས་གནས་ནས་ཕྱིར་བུད་པའི་རེ་ཞུ་ཡི་གེ་སྤྲད་ནས། ཁེ་རྐྱང་གིས་ཁྲེང་ཏུའུ་གྲོང་ཁྱེར་དུ་སོང་ནས་རང་ཉིད་ཀྱི་ཕུགས་འདུན་ལ་རེ་སྙེག་བྱས།

        ཕུགས་འདུན་ནི་མཛེས་སྡུག་ལྡན་ཡང་། མངོན་སུམ་ནི་དཀའ་སྡུག་གིས་བཅིངས། ཕུགས་འདུན་གྱི་ལམ་དུ་རྒྱུན་འཁྱོངས་བྱེད་པ་ནི་ཨོ་རྒྱན་བསྟན་འཛིན་གྱིས་སྔོན་ཆོད་སེམས་སུ་འཆར་བ་ལྟ་བུའི་ལས་སླ་མོ་ཞིག་མིན་ཏེ། ཁྲེང་ཏུའུ་ལ་སླེབས་པའི་ལོ་དང་པོ་ལ། མི་གཞན་པས་ངོ་སྤྲོད་བྱས་པ་བརྒྱུད་ཁོང་གཉན་ཆེན་ཐང་ལྷ་སྒྱུ་རྩལ་ཚོགས་པའི་ནང་ཞུགས། དུས་རྒྱུན་ཆང་ཁང་དུ་གླུ་གཞས་བླངས་ཤིང་། སྐབས་འགར་མགྲོན་པོ་ལ་ཆང་བཀྱག་དགོས་ཀྱི་ཡོད། ལོ་དེའི་རིང་རང་ལ་ཐོབ་རྒྱུ་ཞིག་ཕར་ཞོར། ད་དུང་ཕོ་ཁ་ལའང་རྨས་སྐྱོན་ཆེན་པོ་ཐེབས་གྲབས་བྱུང་། ལོ་སར་སྐབས། ཨོ་རྒྱན་བསྟན་འཛིན་ཁྱིམ་ལ་ལོག་པའི་སྤོབས་པ་ཞན་ཞིང་། རང་ལ་རེ་བ་ཆེ་བའི་དྲིན་ཆེན་ཕ་མ་དང་ངོ་ཇི་ལྟར་ཐུག་དགོས་ཤེས་ཀྱི་མེད།

2019ལོར་ཨོ་རྒྱན་བསྟན་འཛིན་གྱིས་ཕ་ཡུལ་དུ་གནས་སྐོར་བྱེད་བཞིན་པ།

        མ་སི་ལའོ་ཡིས། རོལ་མོ་བས་ངེས་པར་དུ་རོལ་དབྱངས་གསར་གཏོད་བྱེད་དགོས། རི་མོ་བས་ངེས་པར་དུ་རི་མོ་འབྲི་དགོས། སྙན་ངག་པས་ངེས་པར་དུ་སྙན་ངག་འབྲི་དགོས། མི་ཞིག་ཁོ་རང་འགྱུར་ཐུབ་པའི་མི་དེ་ལ་འགྱུར་དགོས་ན། ངེས་པར་དུ་རང་ཉིད་ངོ་མ་ལ་གདོང་གཏུགས་དགོས་ཞེས་གསུངས་མྱངས། ངས་བསམ་ན་མུ་མཐུད་དུ་འདི་འདྲ་བྱས་ན། ངའི་རོལ་དབྱངས་ཀྱི་ཕུགས་འདུན་རྩ་མེད་འགྱུར་བར་འདོད། དེ་བས་ངས་སྒྱུ་རྩལ་ཚོགས་པ་ནས་ཕྱིར་བུད་རྒྱུའི་སེམས་ཐག་བཅད་པ་ཡིན། སྐབས་དེ་ཏག་ཏག་ངའི་གྲོགས་པོ་ཞིག་གིས《བསོད་ལྷ》ཞེས་པའི་གློག་བརྙན་ཞིག་ཕབ་རྒྱུ་གྲ་སྒྲིག་བྱེད་བཞིན་ཡོད་ལ། ཁོས་ང་ལ་ཁོའི་གློག་བརྙན་དེའི་བརྗོད་དོན་མཚོན་བྱེད་ཀྱི་གླུ་དབྱངས་ཤིག་རྩོམ་དགོས་ཟེར། སྐབས་དེར་ངས་ཕྱིར་བཤོལ་བྱས་པ་ཡིན། དེ་དུས་ངས་ད་དུང་གླུ་གཞས་གསར་གཏོད་བྱེད་མྱོང་མེད། རེད་དེ་ཁོས་རྒྱུན་འཁྱོངས་མཐའ་གཅིག་ཏུ་བྱས་རྐྱེན། ང་ལ་སྤོབས་པ་ཆེན་པོ་བྱིན་བྱུང་བས། ད་གཟོད་ངའི་སྒྱུ་རྩལ་གསར་གཏོད་ཀྱི་མྱུ་གུ་འབུས་པ་རེད་ལ། ད་གཟོད་དེང་དུས་རང་སྒེར་གྱིས་ཆེད་བསྒྲིགས་བཏོན་ཐུབ་པ་བྱུང་བ་རེད་ཅེས་ཨོ་རྒྱན་བསྟན་འཛིན་གྱིས་ལབས་བྱུང་།

ཨོ་རྒྱན་བསྟན་འཛིན་2021ཁྲེང་ཏུའུ་དབྱིན་ཐེ་ལོ་སར་རོལ་དབྱངས་དགོང་ཚོགས་སུ་ཞུགས་པ།

ཕུགས་འདུན་གྲུབ། ཕུགས་འདུན་བརྟན་པོར་སྲུང་ནས་རོལ་མོའི་བདེ་སྐྱིད་ལོངས་སུ་སྤྱོད།

        2023ལོ་ནི་རྦད་དེ་གླུ་གཞས་སྒྱུ་རྩལ་གྱི་ལམ་ལ་ཞུགས་པའི་ལོ་བཅུ་པ་དེ་རེད། གར་སྟེགས་ཐོག་གཞོན་ཤ་ཆགས་པའི་ན་ཆུང་དེ་དེང་དུས་ལང་ཚོར་དར་ལ་བབས་པའི་གླུ་གཞས་སྒྱུ་རྩལ་པ་ཞིག་ཏུ་གྱུར་ཟིན་པ་དང་། བགྲང་བྱ་བདུན་རིང་གྲ་སྒྲིག་བྱས་པའི་ཆེད་བསྒྲིགས《དབུལ་པོའི་ལམ》འགྲེམ་སྤེལ་བྱས་ཤིང་། ཕུགས་འདུན་ལ་སྙེག་མཁན་ཞིག་ནས་ཕུགས་འདུན་གྲུབ་མཁན་ཞིག་ཏུ་གྱུར་ཡོད་ལ། ལོ་ན་སུམ་ཅུ་ལ་སོན་པའི་ཕོ་སར་ཁོང་གི་འཚོ་བ་དེ་སྔར་ལས་ཀྱང་གཏན་ཁེལ་དུ་གྱུར་ཡོད། འོན་ཀྱང་ཨོ་རྒྱན་བསྟན་འཛིན་གྱིས་ཕྱི་རོལ་ཡུལ་གྱི་འཇིག་རྟེན་ལ་ཡ་མཚན་དང་དོགས་སེམས་ཀྱི་བསམ་པ་བཅངས་བཞིན་ཡོད་ལ། འདི་ཡོངས་ཀྱི་རྒྱབ་ལོགས་ཀྱི་རྟེན་ས་ནི་ཁོའི་གཡོ་འགུལ་མེད་པའི་ཕུགས་འདུན་དེ་ཡིན། ཨོ་རྒྱན་བསྟན་འཛིན་རང་ཉིད་ལ་ཅི་ཞིག་དགོས་པ་དང་། དེའི་ཆེད་དུ་འབད་འབུངས་ག་འདྲ་དགོས་པ་སེམས་ལ་གསལ་པོ་ཤེས་ཀྱི་ཡོད་ལ། གལ་སྲིད་དམིགས་འབེན་གཏན་པོ་མེད་ཚེ། ཁོས་རང་ཉིད་ལ་གདེང་ཚོད་མེད་པ་དེ་སྦས་གསང་བྱེད་མི་སྲིད། འོན་ཀྱང་། ཕུགས་འདུན་གང་འདྲ་ཞིག་མངོན་འགྱུར་ཡོང་དགོས་ན། དེར་བརྒྱུད་པའི་ལམ་ཐག་སླ་མོ་ཞིག་མེད་ལ། སྔོན་ལ་ནོར་འཁྲུལ་ཤོར་བ་དག་མུ་མཐུད་དུ་དག་བཅོས་བྱས་ཏེ་རིམ་བཞིན་ཇེ་ལེགས་དང་ཇེ་གསལ་གཏང་དགོས།

ཨོ་རྒྱན་བསྟན་འཛིན་གྱི་མི་སྒེར་ཆེད་བསྒྲིགས 《དབུལ་པོའི་ལམ》ཕབ་ལེན་གྱི་བརྙན་པར།

        ཨོ་རྒྱན་བསྟན་འཛིན་གྱིས། བགྲང་བྱ་བཅུའི་རིང་། ངས་ཉིན་རེའི་འཁྲབ་སྟོན་དེ་སློབ་ཐུན་གཅིག་ལ་རྩིས་ཤིང་། སློབ་ཁྲིད་གྲོལ་རྗེས་བསྐྱར་སྦྱོང་དང་ཁ་གསབ་བྱེད་ཀྱི་ཡོད་ལ། སློབ་ཐུན་རྗེས་མའི་སྐབས་དག་བཅོས་ཀྱང་བྱེད་ཀྱི་ཡོད། གཞན་ཡང་ད་དུང་དུས་རྒྱུན་གླུ་གཞས་རིགས་འདྲ་མིན་དང་རོལ་མོའི་ལུགས་འདྲ་མིན་ལ་རོལ་མྱོང་བྱེད་ཀྱི་ཡོད། རོལ་མོ་ལ་མ་གཞི་ནས་རྣ་ལ་སྙན་ཞིང་སེམས་ལ་བདེ་བ་སྟེར་བའི་ཁྱད་ཆོས་ལྡན། ང་ཚོས་རོལ་དབྱངས་ཀྱིས་བསྩལ་བའི་མཛེས་སྡུག་ལྡན་པའི་ཚོར་བ་ལ་རོལ་མྱོང་བྱེད་དགོས་པ་ལས། རོལ་དབྱངས་བརྩམས་ཆོས་དེ་སྲོལ་རྒྱུན་དང་དེང་རབས་སོགས་སུ་དབྱེ་ནས་རྩོད་གླེང་བྱེད་མི་རུང་། འཁྲབ་སྟོན་པ་ཞིག་ལ་ཆ་མཚོན་ན། རང་གི་ཁྱད་ཆོས་དེ་འབུར་དུ་སྟོན་དགོས་ལ། རང་ཉིད་ལ་ཁྱད་ཆོས་ཅི་འདྲ་ཞིག་ཡོད་ན་དེའི་ཕྱོགས་ལ་ནུས་པ་ཕྱུང་དགོས། མེ་ཏོག་མཉམ་བཞད་དང་མཁས་བརྒྱ་འགྲན་གླེང་གི་རྣམ་པ་ཞིག་བྱུང་ན་དེ་བས་མི་ལེགས་སམ་ཞེས་ལབས་བྱུང་།

གསར་འགོད་པ་ཡ་མཚན་སྐྱེས་ནས་ཁོང་ལ་བགྲང་བྱ་བཅུའི་རིང་དོན་དག་ཅིག་ཁོ་ན་རྒྱུན་འཁྱོངས་བྱས་ཏེ། འདས་ཟིན་པའི་དཀའ་ངལ་དང་ངལ་དུབ་ལ་ཕྱི་བལྟས་བྱེད་དུས། དུས་ཀྱི་འཁོར་འགྲོས་དང་འགྲོགས་ནས་ཚང་མ་ཡལ་ཟིན་པ་འདྲ་ཞིག་ཨེ་རེད་ཅེས་འདྲི་སྐབས། ཁོང་གིས་སེམས་ཐག་ཆོད་མོའི་ངང་ནས་རང་གིས་འདོད་མོས་དང་དགའ་བ་ཡོད་པའི་ལས་དོན་དེ་སྒྲུབ་དུས། དཀའ་ཁག་དེ་དག་ལ་ཅི་ཡང་རྩི་བཞིན་མེད། ཕུགས་འདུན་ཡོད་ནས་ཕུགས་འདུན་གྱི་ཆེད་དུ་འཚོ་ན། དེ་ནི་སྤྲོ་འོས་པ་ཞིག་རེད་ཅེས་ལབས་བྱུང་། །

༼ངེད་གསར་འགོད་པ་ཚུལ་ཁྲིམས་བཟང་པོ་དང་དོན་གྲུབ་ཆོས་སྒྲོན་གྱིས་བྲིས། འཇིགས་མེད་ཀྱིས་བརྙན་དང་པར་བླངས།༽

2020ལོར་ཨོ་རྒྱན་བསྟན་འཛིན་གྱིས་རྡོའི་སྐེ་རྒྱན་བཟོ་བཞིན་པ།