༄༅།། ལོ་སར་ཐེངས་རེར།

རུས་པ། རྩོམ་སྒྲིག་པ།ཚེ་དཔལ།ཡོང་ཁུངས།མཚོན་སྔོན་བོད་ཡིག་གསར་འགྱུར། སྤེལ་དུས། 03-29


ལོ་སར་ཐེངས་རེར།

ཨ་ཕ་ལྷག་ཏུ་དྲན་འོངས།

ཨ་མ་ཡོད་པས་ཐབ་ཀ་དྲོ་ནའང་།

གོམས་པའི་དབང་གིས།

ཚ་ཐབ་སྟེང་གི་ཨ་ཕའི་ཆང་སྐད་ཐན་ཐུན་དེར་ཡུལ་གྱིས་བསྐལ་པས།

རླུང་གྲང་མོ་ཞིག་གིས་མཆིན་སྙིང་སིལ་བར་བཟོས་འགྲོ།

ལྷག་ཏུ་འགྱོད་ཚ་བ་ནི།

ང་དང་ཨ་ཕའི་བོད་ཡུལ་གནས་སྐོར་གྱི་ཁ་དན།

མི་རྟག་པའི་དབྱིངས་སུ་བཏབ་སོང་བ་དེ་ཡིན་འདུག

ལོ་སར་ཐེངས་རེར།

ཨ་ཕ་ཞེ་ནས་དྲན་འོངས།

ཨ་མ་ཡོད་པས་ཕ་ཡུལ་རྟག་ནའང་།

གོམས་པའི་དབང་གིས།

ཁྱམས་སུ་ཉི་མར་ལྡེ་བཞིན་བུ་ལ་སྒུག་པའི་མིག་ཟུང་དེར་ལས་ཀྱིས་བསྐལ་པས།

ངག་མི་འཁྲོལ་བའི་སྨྲེང་བ་ཞིག་གིས་མིག་ཆུའི་ཟིལ་བ་གཏོར་འགྲོ།

ལྷག་ཏུ་རེ་ཆད་པ་ནི།

ཁོ་ལ་ཧུའུ་ཀྲུའུ་རྟགས་ཅན་གྱི་ཆང་དཀར་དམ་བེ་གང་།

ལོ་སར་གྱི་ལེགས་སྐྱེས་སུ་གདེག་མ་ནུས་པ་དེ་ཡིན་འདུག

ལོ་སར་ཐེངས་རེར།

ཨ་ཕ་ངང་གིས་དྲན་འོངས།

ཨ་མ་ཡོད་པས་གཞིས་དྲི་ཞིམ་ནའང་།

གོམས་པའི་དབང་གིས།

གསུང་རབ་ལ་རྡུལ་སྤྲུགས་གཏོང་བའི་རྒྱབ་གཟུགས་དེར་གཏན་དུ་བསྐལ་པས།

དོན་ལྔ་སྣོད་དྲུག་ལ་གཉན་ཚད་རྒྱས་ནས་ཉིན་ཞག་ཁ་ཤས་འདས།

ལྷག་ཏུ་རེ་ཕངས་པ་ནི།

གསོན་ཐོག་ཏུ་སྐེ་འཇུ་ཐེངས་ཤིག་མ་བྱས།

བཞུད་ཁ་མར་ཁ་ཆེམས་ཚིག་གཅིག་ཀྱང་མ་ཐོས་པ་དེ་ཡིན་འདུག

ལོ་སར་ཐེངས་རེར།

ཨ་ཕའི་ནམ་མཁའ་རླུང་གིས་ཁུར་ཤུལ་དུ།

འཇག་རྩྭ་སྐམ་པོ་ཞིག་གིས་ངུ་ངག་འབྱིན་བཞིན་པ་དེ་རང་ཉིད་ཡིན་འདུག

གདུང་བ་ལྕི་མོ་ཞིག་གི་རྡོག་ཁྲེས་འདེགས་མཁན་དེ་རང་ཉིད་ཡིན་འདུག

ལོ་སར་ཐེངས་རེར།

བུ་ཡི་མིག་ཟུང་ལས་རང་ཉིད་མཐོང་ཐེངས་རེར།

བུ་ལ་འོ་ཞིག་བྱས་ནས་མིག་ཆུ་ཁོག་ཏུ་མིད།


དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1