རབ་དཀར་ལྷག་བསམ་གངས་རིའི་དཔལ་འཛིན་སྟོན་མཚན་ཟླ་དཀར་རྒྱས་པའི་གཟིས།།
ཕྱོགས་དུས་ཀུན་རྨོངས་སྨག་ཆེན་འཇོམས་ཤིང་ཤེས་བྱའི་ཕ་མཐའ་རབ་བསལ་བའི། །
ངོ་མཚར་སྟོང་གི་རིག་པའི་འཕྲུལ་མངའ་ལེགས་བཤད་རྒྱ་མཚོ་འཁྱིལ་བའི་རླབས། །
བློ་གསལ་གཞོན་ནུའི་མིག་གི་བདུད་རྩིར་འཛད་མེད་ལོངས་སྤྱོད་རྒྱན་དུ་བསྟབས།།
དཔྱིད་ཀྱི་དཔལ་ཡོན་ལང་ཚོའི་འཇོ་སྒེག་དྲི་གཞོན་དལ་བུའི་ཆིབས་བསྒྱུར་ནས། །
རི་ཀླུང་ཐང་གསུམ་བདེ་དྲོད་འབར་བའི་སྨུག་རླངས་སྨིན་སྒྱུའི་ཆུ་བོ་གཡོས། །
མཐོ་སྒང་གོ་ལའི་གནམ་སའི་མཐོངས་ཕྱེས་དབང་གཞུའི་གཞལ་ཚོན་གྱིས་འཁྱུད་པའི།།
སོ་ནམ་རྒད་པོའི་གདོང་གི་འཛུམ་ཟེར་དཔྱིད་འགོའི་མེ་ཏོག་སྐར་ཚོམ་བཀྲམ། །
དགུན་གསུམ་གངས་ཀྱི་བཙན་རྫོང་རལ་བའི་སྲིད་པའི་གོས་དཀར་མཐའ་ནས་ཞིག །
གཞོམ་མེད་གྲང་ངར་མཚོན་ཆའི་འཁོར་ལོ་གནམ་སའི་བར་ནས་དབྱིངས་སུ་ཡལ། །
རྟ་ནོར་ལུགས་གསུམ་ཐང་དུ་བཀྲམ་པའི་ན་ཆུང་འབྲོག་མོའི་དགོད་སྒྲ་བཅས། །
འབྲོག་པ་རྒན་མོའི་བེའུ་ལུགས་རེའུ་གསུམ་བཙས་པའི་སྒོ་ཕྱུགས་བདག་སྐྱོང་བྱེད།།
རྒྱལ་དོན་ཇུས་བཟང་གཏམ་གྱིས་སྙད་པའི་སྐྱ་རེངས་གསར་པའི་ཕོ་ཉ་ལས། །
སྒྲོག་འགྲེལ་ལེགས་བཤད་ཐོས་འཛིན་དཔལ་གྱི་བདུད་རྩིར་ཟེག་མའི་འདོད་པ་འཇོ།།
འཕེལ་རྒྱས་ལམ་ནས་བོད་འབྲེལ་རོགས་སྐྱོར་བརྟན་བརླིང་རྒྱུན་འཁྱོངས་དོན་འཁྱོལ་གྱིས།།
ཞིང་འབྲོག་དམངས་ཡོངས་སྤྲོ་སེམས་འཁོལ་བའི་མཛའ་བརྩེའི་མེ་ཏོག་ལན་བརྒྱར་འཐོར།།
དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱིས།།
དགོངས་དོན་སྙིང་པོ་ལག་ཏུ་བསྟར་བའི་འཕེལ་རྒྱས་གོམ་སྟབས་ལེགས་བསྒྱུར་ནས།།
དངོས་པོའི་སྟོབས་ཞུགས་ཚན་རྩལ་རིག་པས་གནམ་སའི་ཁྱོན་ལ་དབང་བསྒྱུར་ཏེ།།
སྦས་དོན་གསང་བའི་ཤེས་བྱ་མ་ལུས་མཁྱེན་པའི་དཔལ་ཡོན་སྙིང་ནས་བཞད། །
ཕྲ་ཕུང་རྡུལ་གྱིས་བསགས་པའི་རག་ལུས་མངལ་གྱི་ཆུ་འཛིན་གྲོལ་མ་ཐག །
རྣམ་རིག་གསལ་བའི་ཤེས་བྱའི་སྒྲོན་མེ་རིག་པའི་བུ་ཆུང་འཛུམ་དཀར་འཕྲོ། །
གསར་གཏོད་ལམ་ནས་རྣམ་དཔྱོད་འཕྲུལ་དང་ཤེས་རབ་རྩལ་གྱིས་མིག་སྒྲུབ་ནས།།
དཔལ་མཛངས་རིག་པའི་སྙིང་སྟོབས་ཆེར་འབར་ཤེས་བྱའི་བུད་ཤིང་མ་ལུས་སྲེག།
དེ་སྐད་གངས་ལྗོངས་རིག་པའི་དགའ་ཚལ་རྣམ་དཔྱོད་གཟི་འོད་སྟོང་འཕྲོ་བའི།།
ཤེས་བྱའི་སྦུབས་འབྱེད་རིག་པའི་ཉི་གཞོན་འདོད་ཡོན་རོལ་པའི་རྒྱ་མཚོ་ལས།།
བཅུ་ཕྲག་རིག་པའི་ནོར་གླིང་འཇུག་པའི་བློ་གསལ་ན་གཞོན་ཕོ་མོ་ལ།།
གཞལ་མེད་རིན་ཆེན་སྟོང་གི་བང་མཛོད་མཆོད་སྤྲིན་རྒྱ་མཚོ་སྐྱེས་སུ་འབུལ།།
