སྐྱེས་སྐར་ལ་ཕུལ་བའི་སྙིང་གཏམ།
--བློས་ཐུབ་ཀྱི་གྲོགས་མོDMJལ།
བྱ་མདོ་བདེ་སྐྱིད་སྒྲོལ་མ། (མཚོ་ལྷོ)
ལོ་དེ་དག་ནི
ཕྱིར་དྲན་གྱི་སྙིང་ཁ་ན་མཛེས་སྡུག་གིས་འཁྱིལ་བའི་མཚེའུ་ཞིག་རེད
སྙིང་གཏམ་གྱི་ཕྱི་ནང་དུ་འོད་ཀྱིས་བྱུགས་པའི
ངས་ཁྱོད་ཀྱི་གསང་བ་མཐོང་ཞིང
བདག་གི་མཛའ་བརྩེ་བསླེ་ཕོད་པའི
རང་དབང་གི གས་ཆག་མེད་པའི
མེ་ལོང་སྒོར་སྒོར་ཞིག་རེད
མདོར་དྲིལ་ན
ལོ་དེ་དག་ནི་དེ་རིང་ལྟ་བུའི་ཁྱོད་ཀྱི་འཁྲུངས་སྐར་ལ
རྟེན་འབྲེལ་ཞུ་ཆེད་དུ་ཆགས་པའི
སེམས་པ་གཉིས་ཀྱི་སྦྲེལ་ཐག་ཏུ་འོ་ཞོ་ལྟར་ཆགས་པ་ཞིག་དང
ལྷག་བསམ་དང་ཕྱི་ཐག་ལ་བཙེམ་པའི
སྲ་བརྟན་གྱི་ལྷན་པ་ཞིག
བདག་གིས་ད་དུང་ཡང
བློས་བསླངས་དང་འཆར་ཡན་གྱིས་བསམ་གཞིག་གི་ལྗོན་རྩེར་བཏེགས་པའི
ས་རྡུལ་འཇགས་ཤིང་བཙའ་ཡིས་མ་ཟིན་པའི
མེ་ལོང་དེའི་ངོས་ནས་སེམས་པའི་ཕར་ཚུར་ལ་བྱབ་ཁྲུས་ཤིག་བྱ་འདོད
འོན་ཏེ
མེ་ལོང་གི་གྲུ་ཁ་གང་རུང་ནས་གས་ཁ་ཤོར་ཞིང
སྔར་ནས་ཆག་ཧྲུག་ཏུ་གྱུར
བདག་གིས་མེ་ལོང་ངོས་ཀྱི་རང་ཉིད་ཀྱི་གྲིབ་གཟུགས་དང
ཕ་རོལ་བའི་རེག་བྱ་བཙལ་ནས
གང་སར་ལག་སྙོབ་བྱས སྤར་འབྲད་བཏང་རུང
ངའི་མིག་གིས་ཅི་ཡང་མཐོང་མ་བྱུང་ལ
ངའི་ལག་པར་གང་ཡང་ཐོབ་མ་སོང
མིག་ཟུང་ཞར་སོང་བས་ཡིན་ནམ
ལག་པ་འཁོབ་སོང་བས་ཡིན
ལན་འདི་ངས་སྐྱེ་བ་ག་ཙམ་ལ་འཚོལ་དགོས་ཨང
གང་ལྟར
ཕྱིར་དྲན་ནི་སྨག་གིས་བཟུང་བའི་རྩྭ་ཐང་གི་མཚན་མོ་ཞིག་དང་འདྲ་ལ
ཕྱིར་དྲན་ནི་སྦྲ་ནག་གི་གོང་ཁ་ནས་བླངས་པའི་འགག་མེད་ཀྱི་རྫི་གླུ་ཞིག་དང་ཡང་འདྲ
བདག་གིས་མི་ཡུལ་གྱི་འདས་མ་ད་གསུམ་དང
དགའ་སྐྱོ་ཆགས་སྡང་གི་གཏམ་རྒྱུད་འདི་དག
ཡིད་ཀྱི་ཡོལ་གོའི་ནང་ལ་ཧུར་གྱིས་བསྐྱིལ་ནས
སེམས་ཀྱི་རྩིག་ལྡེབས་ངོས་སུ་རྩིད་སྐུད་ཀྱིས་གཙག་ངེས
འཚོ་བ་ནི་སྐྱིད་ཀྱིས་གཏམས་པའི་གཙང་པོ་ཞིག་ཡིན་ཆོག་ལ
ལས་དབང་ནི་གཙང་པོའི་ནང་རླུང་གིས་ལྷབ་ལྷུབ་བསྐྱོད་པའི
གཡོར་གྲུ་དམར་པོ་ཞིག
རྦ་རླབས་ཀྱིས་རྡེག་ནས་སོ་སོར་འཐོར་སོང་བའི་ཆག་གྲུམ་དང་འདྲ་བར
གཏན་དུ་སྒྲིག་ཐབས་མི་འདུག
རང་ཉིད་ཀྱི་རྡོག་སྒྲ་ཁོ་ན་ནི་རང་ཉིད་གསོན་པའི་མཚོན་རྟགས་དང
སྔ་དྲོར་འཕུར་ལྡིང་གི་གར་སྟབས་བསྒྱུར་ཡང
ཕྱི་དྲོར་ཙད་ཀྱི་དབང་འོག་ནས་ཚེ་སྲོག་ལྕེབ་ཚུལ་ནི
མེ་ཏོག་གི་འདབ་མར་འཁེན་པའི་ཕྱེ་ལེབ་ཀྱི་ཚེ་ཚད་ཡིན་ལ
མི་ཟེར་བའི་དབུགས་ཀྱི་ལྒང་བུ་འདིའང་དེ་དག་ལས་མ་འདས
དེ་བས་ན
གྲོགས་ཁྱོད་ངའི་འཚོ་བའི་ནང་སྐྱེས་པ་འདིའང
ང་རང་འཇིག་རྟེན་འདིར་ཁེར་རྐྱང་མིན་པའི་བདེན་དཔང་ཞིག་རེད
