ང་ཡི་རྟ་ཁ་འཁྲིད་པའི་མི།

 

                                                   བོད་གཞུག་སྐྱིད། (ཟི་ལིང)

 

 

འཚོ་བ་ནི་རབ་མེད་ཀྱི་གཙང་པོ་དེ་ཨེ་ཡིན

ལང་ཚོའི་འགྱུར་ཁུགས་ལ་སྟངས་སྟབས་སྣ་ཚོགས་ཤིག་མཆིས་སྲིད

མདུན་བསྐྱོད་ཀྱི་གོམ་འགྲོས་དལ་དྲགས་དུས

ང་ལ་ཕྱི་མིག་བལྟ་བའི་གོམས་གཤིས་ཤིག་གིས་མནར་འོང

ལམ་བར་ནས་མཚམས་རེར་ན་ཟུག་གིས་གཙེས་ཆོག་པར་ཞུ

 

རྩྭ་ཐང་ནི་དབྱར་གྱི་འཇོ་སྒེག་མནབས་པའི་བུད་མེད་ཅིག་ཡིན་སྲིད

ཨ་མ་ལྟ་བུའི་བྲང་གཞུང་ཡངས་པའི་མུ་མེད་ཀྱི་ཞིང་ཁམས་དེ་ཡིན་སྲིད

རབ་མེད་ཀྱི་གཙང་པོའི་དྭངས་ཤ་དང་སྙན་འཇེབས་ཀྱི་སྒྲ་དབྱངས་མ་ལུས

རྟ་གོང་གི་བུ་དང་བུ་མོའི་རྣམ་ཤེས་ལ་འཁྱིལ་ནས་བཞུར

 

སྣུམ་ཚོན་རི་མོ་ལྟ་བུའི་མོ་ལོ་བཅུ་དྲུག་གི་དབྱར་ལྗོངས་སུ

ང་ཁྱོད་དང་ལྷན་དུ་རྩྭ་ཐང་ནས་བསྡད་མྱོང

རྟ་ཕོས་མགོ་བོ་གུག་གུག་བྱེད་དུས

ཁྱོད་ཀྱིས་ང་ཡི་རྟ་ཁ་འཁྲིད་མྱོང་ཨང

 

ལྗང་མདོག་གི་མི་ཡུལ་ཐམས་ཅད

ལྷད་མེད་ཀྱི་བྱིས་བློའི་བར་ན་མཛེས་ཤིང་སྡུག

མཐོན་པོའི་རི་དང་དམའ་མོའི་སྤང

གཟར་མོའི་གཡང་དང་བདེ་མོའི་ཐང

འབྲི་མར་གྱི་ཁུད་དུ་གཅུད་པའི་རྩམ་པ་སྣུམ་པོ

བདག་གི་དྲན་ངོགས་ནས་ཡལ་རྒྱུ་མི་འདུག་ཨང

 

ཉ་མོ་ལྕགས་ཀྱུས་བསླུས་པ་ལྟ་བུའི་འཁོར་རྒྱུག་རིགས་ཤིག་ལས

ད་ནི་རྩྭ་ཐང་ལ་ལོག་ཐབས་མི་འདུག

  གྲུ་བཞི་གླིང་བཞིའི་སྒོ་གླེགས་ཀྱི་ཧྲག་བར་རེ་ནས

  ད་ནི་རྟ་ཕོ་ལ་ཞོན་ས་མི་འདུག་ཨང

 

  རྩམ་པ་ནི་ང་ལ་མཚོན་ན་ཕྱེ་ཐུག་ལྟ་བུའི་ཁ་ཟས་རིགས་དེ་མིན་ཡང

  འཁྲེང་ཞེན་དེ་ཡིད་ཀྱི་ཞིང་ཁམས་སྣུམ་པོ་རིགས་ཤིག་ལ་སྨོན་པ་དང་འདྲ

 

  ན་ཚོད་སྨིན་སྟངས་ནི་གཏམ་རྒྱུད་ཀྱི་བྱུང་བ་མང་བའི་གོ་རིམ་དེ་ཡིན་སྲིད

  གྱེས་བྲལ་དང་སྐྱེ་འཆིའི་ལོ་ཟླ་སེམས་ཀྱིས་མྱོང་བའི་འགྱུར་ལྡོག་རིགས་ཤིག་ཡིན་སྲིད

 

  མཛེས་པ་དང་དྭངས་གཙང་གིས་གཏམས་པའི་དུས་ཚིགས་རིགས་ཤིག་སྟེ

  འགྱུར་མེད་ཀྱི་དྲན་པའི་ཀློང་གི་གཡུ་ཆུང་དྲུག་དཀར་དང་འདྲ

 

                                                                   2017.4. 18