ངོ་གདོང་ནི་ཉི་མའི་དཀྱིལ་འཁོར་དང་འདྲ་བོ་འདུག

དེ་ལས་འཕྲོས་པའི་འོད་ཟེར་གྱིས།

སེམས་ཀྱི་མུན་པ་དང་ལུས་ཀྱི་བ་སྤུ་གྱེན་དུ་ཞོགས་འགྲོ།

ཁེར་རྐྱང་གི་མཚན་མོ་དང་རྒུད་པ་ལྷན་དུ་སྤུངས་ཡོང་ 

སྐེ་དཀྲིས་དང་ཁ་དུམ་བར་གྱི་མིག་མདངས་དེ།

སྡིག་སྒྲིབ་འཁུར་བའི་རྔོན་ཁྱི་ཞིག་དང་འདྲ།

ལྡབ་ལྡིབ་ངང་། དལ་མོར་བཀྲོལ་བའི་ངག་གི་རྒྱུད་སྐུད་འདི།

རྨོངས་སྐྱོ་འཕྱུར་བའི་ཤ་འོད་དང་འདྲ་བར།

རྦབ་ཏུ་འདྲིལ་ཚེ། ཕ་བོང་དང་བྲག་?། རྡེའུ་ཡང་འཁུར་འགྲོ།

ཧ་ཅང་སྒྱིད་ལུག་གིས་འགུལ་བའི་མིག་འབྲས་ཟུང་ནི།

འཁོར་བའི་སྐྱོ་ཤས་ལྡོག་པའི་རྣལ་འབྱོར་བ་ཞིག་དང་འདྲ་བར།

ངེས་འབྱུང་གིས་སྐུལ་ནས།  གཟུགས་སམ་སྒྲའམ་དྲིའམ་རོའམ་རེག་བྱའམ།

ཡོད་ཚད་རང་ངོས་ན་མེད་པའི་སྟོང་བ་ཉིད་དུ་གྱུར་ཡོད།

དེ་ག་ཙམ་གྱིས།  ང་རང་ཕྱིར་དྲན་གྱི་མེ་ལོང་ངོས་སུ་སྟོབས་ཀྱིས་འཚང་ནས།

རབ་རིབ་ནས་མག་མོག་ཏུ་གྱུར་བའི་དྲན་པའི་ས་རྡུལ་ཕྱིས་རྗེས།

པགས་སྩོག་གྱོན་པའི་ཁྱོད་ལ་སྒུག་ནས་བསྡད།

དུས་ཚོད་ཀྱི་ལག་པས་ས་ལ་བརྡབས་ནས་ཆག་གྲུམ་ཤོར་བའི།

མེ་ལོང་གི་ཆག་རོ་དག་གུང་བསྒྲིགས་རྗེས།

ཡང་བསྐྱར་ཁྱོད་ལ་སྒུག  ཁྱོད་ལ་སྒུག

གས་ཆག་གི་སྲུབས་ནས།  

ཁྱོད་རང་མངོན་ཆུང་གིས་འཛུམ་ཡོང་བར་སྒུག

སྒུག་སྒུག་རྗེས། མེ་ལོང་ཡང་སིལ་བུར་འཐོར་ཞིང་།

ཁྱོད་ཀྱང་ལོ་ཟླ་དང་ན་ཚོད་ཀྱིས་གཙབ་ཧྲུལ་ཏུ་གཏོང་།

མཚན་མོ་དེར། རོལ་དབྱངས་ཀྱི་རྒྱུད་སྐུད་འདར་བའི།

ཆང་ཁང་ནད་པ་དེ་རུ། མིག་གི་སྐོམ་གདུང་སེལ་བྱེད་ལ་འཐུང་བའི།

ཝུ་ཆང་གི་བཟི་ཁ་དེ་ཁྱོད་མ་རེད། ཆང་རག་གི་ཝུ་བ་དེའང་ཁྱོད་མ་རེད།

ཉིན་དེར། ནང་གི་བཀྲེས་སྐོམ་གྱིས་དེད་ཅིང་ཕྱི་ཡི་རྐྱེན་ལ་བཏགས་པའི།

བག་ལ་ཞ་བའི་དཔེ་ཁང་དེ་རུ། ཕན་ཚུན་སྟེས་དབང་གིས་ཕྲད་པའི།

དཔེ་དེབ་ཁྲོད་ཀྱི་ཡིག་འབྲུ་རེ་རེ་ཁྱོད་མ་རེད།

ཡིག་འབྲུའི་གསེང་གི་དབྱངས་དང་ང་རོ། ན་རོ་དག་ཀྱང་ཁྱོད་མ་རེད།

མི་ལོ་མང་བོའི་སྔོན་གྱི་ཁྱོད། ནམ་ཟླ་དབྱར་གཞུང་ཞིག་ལ།

ཟིལ་བ་ཁྲོམ་མེའི་རྩྭ་ལྗོངས་ཀྱི་གསེབ་ཏུ་བབས་ནས།

མགོ་ལྕོག་ལྡེམ་པའི་མེ་ཏོག་གི་ཚལ་དུ་ཡིབ་ནས།

རྫི་གླུ་དང་ཆུ་བོའི་འཇམ་ཤ་ཁུར་བའི།

ང་ཡི་གསེར་ཆེན།  ང་ཡི་གཡུ་སྦྲང་།

2016.1.29