གངས་རིའི་བུ་མོ།
ཚེ་ནི་རིག་བྱེད་དབྱངས་ཀྱི་བདག་མོ་མ། །
དབང་ལྔའི་མེ་ཏོག་འཛུམ་པའི་མཛེས་ལྡན་མ། །
ལྷ་བཅས་ཚངས་པའི་དབྱངས་ཀྱི་ཟིལ་གནོན་མ། །
མོ་ཁྱོད་བདག་ཡིད་འགུགས་པའི་ལྕགས་ཀྱུ་མ། །
གཟུགས་བྱད་པདྨའི་སྡོང་པོ་ལྡེམས་སེ་ལྡེམ། །
བཞིན་འཛུམ་ཟླ་བའི་དཀྱིལ་འཁོར་འཁོར་སེ་འཁོར། །
ཐགས་བཟང་སེའུ་འབྲུ་སུམ་ཅུ་འགྲིགས་སེ་འགྲིག།
ཟུར་མིག་བྱམས་བརྩེའི་འོད་རླབས་འཁྱུགས་སེ་འཁྱུག།
ལྕང་ལོ་གཡུ་ཡི་རལ་པ་ཉིལ་ལེ་ཉིལ། །
མྱོས་བུམ་ཆོས་དུམ་དཀར་པོ་ལྟིར་རེ་ལྟིར། །
མིག་དག་ཨུཏྤལ་སྔོན་མོ་ལྷབས་སེ་ལྷབ། །
འཕོངས་ཤ་གླང་ཆེན་འགྲོས་ཀྱིས་འགྱིང་ངེ་འགྱིང་། །
ཨེ་མ་ཁྱོད་ཀྱི་སྒེག་ཆོས་མ་ལུས་པ། །
ལྟ་བས་མི་ངོམས་གཟུགས་སུ་ཕབ་ན་ཡང་། །
དབང་མདའ་ཉི་མའི་སྨྱུག་གོག་ཕྲ་མོ་དེས། །
མ་འཇོན་འཕགས་ཡུལ་མཁན་པོ་འཚོལ་ལ་རེམས། །
ཁྱོད་ནི་མི་ཡི་རིགས་སམ་ལྷ་ཡི་འཕྲུལ། །
སེམས་པ་རྣམ་རྟོག་ཟུང་གི་ངལ་བའི་རྒྱུ། །
ལན་གཅིག་རིས་ལ་བལྟས་ཀྱང་དབང་རྩ་འདར། །
ཡུན་རིང་མི་ཚེར་འགྲོགས་ན་འཇིག་པའི་གནས། །
ཉམས་ལྡན་ལུས་འདི་མཐོང་ཚེ་ཏཱ་རེ་མ། །
སྙན་མོའི་གསུང་ལ་ཉན་ཚེ་མཚོ་བྱུང་མ། །
རུམ་ཕུང་དྲོན་མོ་བསྙེགས་ན་ཡིད་བཞིན་ནོར། །
བསམ་ཞིང་བསམས་ན་དང་བའི་དད་པ་འཁྲུངས། །
ཧ་ཧ་འདོད་གཏམ་མ་ཡིན་སྙིང་གི་ཁྲག །
ཁྲག་ལམ་སྦྲིག་ནས་དུངས་པ་ངང་གིས་འཕྱུར། །
འཕྱུར་བའི་བརྩེ་སེམས་གསེར་སྦྲམ་ཐིག་ལེ་མ། །
མ་དེའི་པདྨའི་གདོང་ལ་འཕུར་ནས་ཐལ། །
གངས་རིའི་སུལ་ནས་ཀ་ཁ་རིང་ནས་འཁྱམས། །
གངས་རིའི་བུ་མོ་ཁྱོད་ཀྱི་དབྱངས་རྟ་དེས། །
གངས་ཀྱི་འདབས་ནས་ཀ་ཁ་དར་ལ་བརྒྱུས། །
གངས་ཀྱི་བླ་སྲོག་དབྱངས་རྟའི་ཀློང་ནས་བསྙོར། །
གང་དེ《མེས་པོའི་གཟི་བརྗིད》བླ་ལྷག་སྟེ། །
གཟི་ལ་བརྗིད་པའི་ལས་ཤིག་མ་བརྩམས་ན། །
གཟི་ཡི་དོས་ཡར་?་ཞིག་འགེལ་དོགས་པས། །
ལས་འདི་ཁྱོད་ལ་བཅོལ་ཡོད་སྲས་མོ་ལགས། །
《གངས་རིའི་བུ་མོ》འགྱུར་ཁུགས་སྟོང་ལྡན་མ། །
གངས་རིའི་བུ་མོའི་གྲལ་ནས་གདེངས་ཀ་ཅན། །
གངས་རིའི་ལྗོངས་ཀྱི་ཡོན་ཏན་མ་ལུས་པ། །
གངས་རིའི་རྩེ་ནས་ངོམ་འདི་ཨེ་མ་མཚར། །
ལུས་བྱད་ཆ་རྫོགས་ཀུན་ཡིད་རྐུ་མཛད་མ། །
ངག་དབང་དྭངས་མོ་དབྱངས་ཀྱི་རྗེས་འགྲོ་མ། །
ཡིད་ཁམས་དེས་པ་མཛངས་མའི་གཤིས་འཛིན་མ། །
སྲིད་ཞིའི་སྙིང་གི་གླང་པོ་འགུགས་མཛད་མ། །
རོལ་སྒེག་ཉམས་ཀྱིས་འགྱིང་བའི་སྨིན་ལེགས་མ། །
མཁའ་ཉལ་ལྷ་ཡིས་མཐོང་ན་བར་མར་འཕོས། །
བསླབ་གསུམ་བཙུན་པས་རིག་ན་སྡོམ་པ་ཤོར། །
སྨྱོན་པ་ང་ཡིས་མཐོང་ན་རྨི་ལམ་འཁྲུགས། །
དེའི་ཚེ་ཁམས་ཀྱི་བུ་མོའི་སྒེག་ཆོས་ལ། །
མ་དགའ་མ་དད་དག་ནི་སྐྱེངས་པའི་གནས། །
དགའ་ཞིང་དུངས་པ་དག་ནི་མཁས་པ་སྟེ། །
མཛེས་པའི་ཆོས་ལ་མཁས་རྣམས་རྒྱལ་གྱུར་ཅིག །
2014.4.20ཉིན་ཀོང་པོར་བྲིས།
ཤིས་ཚིག་མེ་ཏོག་ཕྲེང་མཛེས།
ལྷུང་ལྷུང་ཉང་ཆུའི་གཡོ་རླབས་ཤིག་ཤིག་གིས། །
གནམ་ལྕགས་འབར་བའི་དབུ་འཕང་བསྟོད་པའི་ས། །
ས་དེ་དྭགས་ཡུལ་ཀོང་པོ་མཛེས་པའི་ཁམས། །
ཁམས་དེར་ལྷགས་ན་ཕ་ཡུལ་བརྗེད་སོང་ཟེར། །
ཟེར་སྒྲོས་ལུས་ཀྱིས་ཚོར་བའི་ཞིང་ཁམས་དེར། །
སྟོད་ཀྱི་མངའ་རིས་སྨད་ཀྱི་སྒང་དྲུག་བར། །
ཞིང་དང་འབྲོག་ལས་ཤེས་བྱ་ཡོད་དོ་ཀུན། །
ཚན་རིག་རྩལ་ལས་འཁྲུང་སའི་གནས་ཤིག་ཡོད། །
གནས་དེར་བོད་ལྗོངས་ཞིང་འབྲོག་སློབ་ཆེན་ཞེས། །
གྲགས་པ་གླིང་ལ་ཁྱབ་པ་འུད་སྒྲོག་ཙམ། །
འོན་ཏེ་ཞིང་དང་འབྲོག་པས་ཐོས་པ་ན། །
སངས་རྒྱས་བྱམས་སེམས་དག་ཀྱང་དམན་སར་འགོད། །
ཞིང་དེར་རྒྱ་བོད་བཤེས་གཉེན་བརྒྱ་ཕྲག་འགའ། །
གནས་དེར་སྣོད་ལྡན་སློབ་མ་ཁྲི་སྟོང་འགའ། །
བརྒྱ་ཕྲག་སྟོང་ཚོ་མང་པོ་མང་པོ་ནས། །
ཕྱོགས་བཏུས་རྩོམ་དེབ་འཁྲུངས་ཚེ་ཡིད་རེ་དགའ། །
དགའ་བའི་ས་ལ་ལས་ཤིག་བཀོལ་བ་སྟེ། །
ཤིས་ཚིག་འགོ་བརྗོད་འབྲི་རྒྱུའི་ནན་སྐུལ་བྱས། །
དེ་བས་དབང་མདའ་ཉི་མར་འབོད་པ་དེས། །
མ་ཤེས་ཤེས་ཁུལ་འཁྲབས་ནས་འདི་ལྟ་སྟེ། །
གང་ཞིག་མཁས་པའི་གོ་འཕང་འདོད་པ་ན། །
ན་བའི་ཚེ་ན་སྨན་པ་སྟེན་བཞིན་དུ། །
མཁས་འདོད་སེམས་ཀྱི་ནད་པ་ཉམ་ཐག་པ། །
ཇི་སྲིད་རིག་པའི་རྩི་དང་འབྲལ་མི་བྱ། །
ནམ་ཞིག་མཁས་པའི་མིང་ལ་མངའ་བརྙེས་ཀྱང་། །
རྩོམ་པའི་ལས་སུ་བླུན་པོའི་རྟགས་ཐོན་ན། །
འཆད་རྩོད་ལུང་རིགས་སྒྲ་ཡིས་གནམ་འགེང་པའི། །
དགུན་གྱི་སྐམ་འབྲུག་གྲགས་པའི་རྗེས་སུ་བྱེད། །
ཆེ་བ་འཇིག་རྟེན་ཁམས་ལ་མཐའ་མེད་དང་། །
ཆུང་བ་ཕྲ་རབ་རྡུལ་ལ་གཏིང་མེད་སོགས། །
ཡོད་ཚད་རྩོམ་པའི་རིས་སུ་ཕབ་གྱུར་ན། །
གོ་ལའི་མགོ་རྟིང་བསློགས་ཀྱང་ཅི་ལ་ཕངས། །
2015.9.20ལ་ལྷ་སའི་སྐྱིད་ཆུའི་ཁ་ནས་
ཤར་མར་བྲིས་ཏེ་བསྐུར།
ཆུང་འདྲིས་བདེ་ཆེན་དབང་མོར་
བསྐུར་བའི་སེམས་འཕྲིན།
དག་སྣང་འབྱམས་པ་ཀུན་ཁྱབ་མཐའ་མེད་པར། །
ཚོར་རྟོག་རྣོ་ན་དབྱངས་ཀྱི་སྒེག་མོ་མཆོག །
སྐབས་གསུམ་དབང་པོའི་རུམ་ནས་འགུགས་ཐུབ་པའི། །
ཐ་སྙད་ཚད་གྲུབ་འཇོག་ལ་མཁས་པ་རེམས། །
མཁས་པའི་གསུང་འདི་རྒྱལ་བའི་བཀའ་དང་བཅས། །
རྗེས་སུ་དཔོག་པའི་ཤེས་པ་མ་མཆིས་ཀྱང་། །
ལུས་སེམས་སྡུག་གི་རྒྱ་མཚོར་ལྷུང་བ་ན། །
ངས་ནི་བཞེད་དོན་འདི་སྣང་རྫུན་དུ་སྤྱུགས། །
ཡོད་ཚད་དག་པར་རློམ་པའི་བྱིས་བློ་དང་། །
ཐམས་ཅད་རྩེད་མོར་མཚར་བའི་གཉུག་གཤིས་ཀྱིས། །
རྣམ་རྟོག་ཞོ་འཐུང་གཅེས་ལོ་ཁྲིད་ལ་ནས། །
བཅུ་ཟུང་ལོ་ཡི་འཁོར་མོ་རྒྱབ་ཏུ་བསྐྱུར། །
སྐྱེས་ནས་རྒ་བའི་འགྲུལ་བཞུད་རིང་མོ་རུ། །
མི་ཡི་རྒྱབ་ལ་མིང་དང་མཚན་མ་ཞིག །
འཇོག་པའི་ཆོས་ལ་དག་སྣང་བློ་སྦྱོང་གི །
ཉམས་ལེན་གསེར་གྱི་བཙོ་སྦྱང་ཆུང་ནས་བསླབས། །
བསླབ་གསུམ་བཙུན་པའི་གྲལ་ལ་མ་ཞུགས་ཀྱང་། །
སྣང་བ་བློ་ཡི་སྦྱོང་བ་མི་དམན་པས། །
རྟོག་དཔྱོད་བློ་གྲོས་ཕྲ་མོའི་ཁབ་མིག་ནས། །
ཚོར་འགྱུས་སྙན་ངག་བྲིས་པ་ཉུང་ཚོད་མིན། །
སྙན་ངག་དབྱངས་རྟ་སྟོང་གི་དགེ་རྩའི་མཐུས། །
ཚེ་སྔོན་ལས་ཀྱིས་སྤྲུལ་པའི་རོལ་བ་ཅན། །
སྙིང་སྡུག་བདེ་ཆེན་དབང་མོ་སྒེག་འཆང་མ། །
བདག་གི་སྨྱུག་གུའི་རྩེ་ལ་དལ་གྱིས་བབས། །
དེ་ཚེ་མདོངས་མཐའ་ཅན་དང་འབྲུག་གི་སྒྲ། །
རྒྱ་མཚོར་སྐྱེས་དང་སྣང་བྱེད་ཉི་མའི་དཔལ། །
དགའ་བའི་དཔལ་གྱིས་ཉིན་མཚན་དུས་དྲུག་ཀུན། །
བྱང་ཁོག་མཚོ་མོ་མ་སྐྱོམ་སུ་ཡིས་བསྙོན། །
འོན་ཏེ་འཇིག་རྟེན་ཆོས་ཀྱི་རྩེད་དགའ་ལས། །
འདུ་འབྲལ་འཁོར་ལོ་ཆེ་ལ་རིས་མེད་པས། །
བྱ་མོ་ཁྲ་ཡིས་འཛིན་པའི་དོ་ཟླ་རུ། །
སྙིང་ཐུབ་སྙིང་གི་དགའ་མ་རྒྱང་ལ་ཆས། །
རྒྱང་རིང་དབུས་ལམ་རིང་མོའི་གཤར་ཤུལ་ན། །
འཁྲེང་སེམས་ཀོང་ཡུལ་མཐིལ་ནས་?ག་པོར་གྲིལ། །
ཁེར་བགྲོད་ལུས་སེམས་གཉིས་ལ་ཟླ་མེད་ཚེ། །
སྨྲེང་བ་དག་སྣང་བརྗེས་ནས་མཐའ་ལ་བསྒོམས། །
དག་སྣང་སྙན་ངག་རྩོམ་པའི་གཞི་ཡིན་པ། །
བདེན་ཏུ་ཆེ་སྟེ་ཚོར་རྟོག་དྲག་པོ་ལས། །
དྲན་པའི་གདུང་བ་འབྲི་བར་མ་ནུས་ཏེ། །
བརྩེ་བ་མགྲིན་པར་བཏེགས་ནས་ལེན་ན་འདོད། །
སེམས་པ་མེ་རུ་འབར་བའི་འདོད་པ་དང་། །
དྲན་གདུང་ཆུ་བཞིན་འཁོལ་བའི་སྐྱོ་བ་ཡིས། །
སྣང་བ་རིས་སུ་ཕབ་ཀྱང་མ་འཚེངས་ཏེ། །
དག་སྣང་མཐའ་མེད་ཀློང་ནས་ཡང་སྣང་བསྒོམས། །
སྣང་བ་འཁྲུལ་མེད་ཅིག་གི་དགུ་རིམ་དུ། །
ཆུང་འདྲིས་མེ་ཏོག་མ་དེ་འཛུམ་གྱིས་བཞད། །
བཞད་ཁ་ཟེའུ་འབྲུ་དགོད་པའི་ལོངས་སྤྱོད་ལ། །
གཡོ་ཅན་དུག་སྦྲང་བབས་ཚེ་སྙིང་རེ་ན། །
ཀྱི་ཧུད་སྐྱབས་མགོན་སྐྱབས་ཀྱི་དམ་པ་ཆེ། །
སྣང་བ་ཚོར་རྟོག་ཟུང་ལ་སྡུག་ཆེ་བས། །
ཆུང་འདྲིས་ལས་འཕྲོ་མ་དེ་དྲན་པ་ཡི། །
སྐྱོ་བ་མཐའ་ནས་དྭངས་པའི་བློ་ཞིག་སྩོལད། །
2014ལོའི་ཟླ5པར་ཀོང་ཡུལ་དུ་བྲིས།
