དུས་ཚོད་ཀྱི་གྲོག་ཆུ་མི་ཚེའི་གཤོང་བུར་སྨྱོ་བ་ལྟར་རྒྱུག་བཞིན་འདུག
འཁོར་བའི་?་དང་ཤིང་དག་རང་ས་རང་མལ་ན་ཧད་དེ་ལུས་འདུག
མིག་མེད་གྲོག་མའི་ཚོགས་ལམ་བར་ན་ང་རྒྱལ་ངང་བཞུགས་འདུག
བདག་དང་ཁད་ཉེ་བའི་ཚིག་སྒྲུབ་ལ་རྨ་ཁ་ཆགས་ནས་ལྟ་ས་དང་ཉན་ས་མི་འདུག
ཁྲོན་ནང་གི་ཟླ་གཟུགས་ལ་མངོན་སུམ་གྱི་ང་རྒྱལ་འགོས་ནས་དཔེ་སྲིད་ས་མི་འདུག
ཞེན་ཆགས་ཀྱི་གཙང་པོས་ན་ཟུག་ཁུར་ཏེ་དུས་བཞི་གཅོད་ཀྱིན་འདུག
ཁྲུང་ཁྲུང་གི་གཤོག་པ་མི་སེམས་ཀྱི་མཁའ་དབྱིངས་སུ་བག་ཡངས་ངང་ལྡིང་གིན་འདུག
ན་ཆུང་གིས་བཞག་པའི་རྐང་རྗེས་ཀྱི་ནགས་ཚལ་རྫུབས་ཇེ་མཐུག་ཏུ་འགྲོ་བཞིན་འདུག
མི་རབས་སྔ་མའི་ལྷད་མེད་པའི་ལོ་རྒྱུས་ཀྱི་རྐང་ཟོམ་བདག་མེད་དུ་བསྐྱུར་འདུག
དབྱངས་གསལ་གྱི་ཅོང་སྒྲ་གྲགས་དུས་མི་རྣམས་ཀྱི་མིག་ལ་འོད་ཟེར་གྱི་མུ་ཏིག་བཏགས་འདུག
ཉམས་པ་མེད་པའི་དྲན་པའི་ཁུད་དུ་ལོ་ཟླའི་རི་མོ་གཡུང་དྲུང་བཞིན་བརྟན་འདུག
དུར་ཁྲོད་ལྟ་བུའི་ང་རང་གི་སྣང་ངོར་བདེན་པས་སྟོང་བའི་མཁར་གྱང་སྲ་མོ་བསླངས་འདུག
བརྩེ་བའི་སྟོང་སྐུད་ལམ་ཕྱེད་ནས་ཆད་གྲབས་བྱེད་དུས་དཀོན་མཆོག་མདུན་ན་འདུག
གར་སྟེགས་ཀྱི་ཐོག་ཏུ་ང་ཚོ་ཚང་མས་གཅིག་གིས་གཅིག་ལ་ངོ་མི་ཤེས་ཁུལ་བྱེད་ཀྱིན་འདུག
བདེ་སྐྱིད་ཀྱི་ནས་ཆང་འཐུང་གིན་འཐུང་གིན་རང་གི་སྙིང་ལ་གྲིས་གཙག་བཞིན་འདུག
ཡིག་དྲུག་གི་དབྱངས་རྟ་ཡང་རྩ་བ་ཕྲ་བའི་སྡོང་རྐང་བཞིན་རླུང་ཁ་ན་སྐྱོད་ཀྱིན་འདུག
གངས་རི་དཀར་པོ་འཁྲུལ་ཤེས་སུ་བསྒོམས་པས་ཤེས་རབ་ཀྱི་མིག་ཀྱང་མོག་མོག་པོར་གནས་འདུག
ལག་པ་འགུལ་ཡང་ཁ་ཡིས་བཤད་པ་མང་བས་གཏིང་ནས་ཡི་ག་ལོག་མཁན་མང་པོ་འདུག
བརྩེ་བ་ཁྲ་ཁྲའི་ནང་ན་ཅི་ཆ་མི་འཚལ་བའི་དངོས་ཟོག་ལྟ་བུའི་སེམས་བྱུང་དུ་མ་བཅས་འདུག
བྲག་ལ་བརྐོས་ཀྱང་དུས་ཀྱིས་བསུབ་པའི་ད་ལྟའི་འཚོ་བར་ཡིད་རྟོན་མེད་པ་མེ་ལོང་ངོས་ན་གསལ་འདུག
རླུང་ལྡང་བྱུང་།
རླུང་ལྡང་བྱུང་།
རླུང་ལྡང་དུས་ཏག་ཏག་སྟོན་དཀྱིལ་རེད།
རླུང་གིས་ས་ཆེན་པོའི་ངོ་གདོང་ལ་བྱིལ་བྱིལ་བྱེད་ཀྱིན།
གཉིད་མ་ཁུག་པའི་མཚན་མོ་མང་པོ་ཁྱེར་བྱུང་།
སྟོན་དུས།
ཆུ་འགྲམ་གྱི་རྡེའུ་དག་ཉི་འོད་ཀྱིས་བསླུས་ཤིང་།
གདོད་མའི་ཚང་ཚིང་ལྷིང་འཇགས་ཀྱི་མངལ་དུ་གཟིམས།
རླུང་ལྡང་བྱུང་། རླུང་ལྡང་གིན།
ཤ་ཁྲག་གིས་ངོམ་པའི་རུས་པར་ན་ཟུག་སྟེར།
རླུང་ལྡང་བྱུང་།
ཡུལ་རྒྱལ་ཐང་ནས་རླུང་ལྡང་བྱུང་།
རླུང་ལྡང་ཐེངས་གཅིག་གིས་སྙན་ངག་པ་ལྷ་སར་ཁུར་ན་ཨང་།
ཤི་ཡང་རོ་གོག་འཇོག་སའི་ལྷ་ས།
སྟོན་གྱི་ནམ་མཁའ་ནི་དྭངས་གསལ་གྱི་མཚེའུ་དང་འདྲ།
ཡིན་ན་ཡང་། རླུང་ལྡང་མཚམས་མ་ཆད།
ཡང་ཞིང་གཡོ་བའི་རླུང་གིས།
སྔོ་ཞིང་བསངས་བའི་ནམ་མཁའི་མཛེས་ཞལ་ལ་བྱབས་ཁྲུས་བྱས།
རླུང་གིས་ཁ་ཕྱོགས་ཡོད་ཚད་བཙོན་དུ་བཙུད་ཅིང་།
མཚན་མོ་འགྲིམ་པའི་འུག་པར་ལམ་སྣེ་གཏོད།
རླུང་ལྡང་བྱུང་།
རླུང་ལྡང་དུས་ཏག་ཏག་སྟོན་དཀྱིལ་རེད།
སྲིད་པའི་?་རྒན་ཞིག་ལ་གཤེ་བ།
ཡུན་རིང་མོར།
ས་གཞིས་དོན་མེད་པར་ཁྱོད་འཁུར་དགོས་དོན་ཅི་རེད།
ཁྱོད་ལ་སྐྱེ་བ་སྔ་ཕྱི་ནི་མེད།
བུ་ལོན་བདའ་ས་ག་པར་ཡོད།
རྐང་ལག་མེད་ན་དེའི་ཚོད་ཀྱིས་གཉོམ་ཆུང་ངང་འདུག་དགོས།
ཁྱོད་ཀྱིས་ཉམ་ཆུང་རྩྭ་ཕྲན་གྱི་གཉའ་ནས་གནོན་དགོས་དོན་ཅི་ཡིན།
རྩྭ་ཕྲན་ནི་བྱིས་པ་ཤ་ཚ་པོ་ཞིག་རེད།
ཁྱོད་གཟུགས་བོངས་ཆེ་ཡང་རི་བོ་དང་འགྲན་ནུས་མིན།
ཁྱོད་ལྗིད་ཆེ་ཡང་ས་ཆེན་པོས་ངལ་བར་འཛེམ་མེད་དུ་ཁུར་བ་མ་ཡིན་ནམ།
ངས་ཁྱོད་ལ་གླེན་པ་ཞེས་བོས་ཚེ་ཁྱོད་ལ་ཉན་བྱེད་རྣ་ཅོག་ནི་མེད།
དབྱུག་རྡུང་ཞིག་བྱས་ཀྱང་ཚོར་བ་མེད།
ཁ་ཆར་བུ་ཡུག་ལ་ཁྱོད་མི་སྐྲག
མཐོ་བ་ནམ་མཁའི་ཉི་མ་ལ་ཡང་ཁྱོད་མི་སྐྲག
ཐ་ན།
མུན་ནག་ལ་ཡང་ཁྱོད་མི་སྐྲག
ཡིན་ན་ཡང་།
གནམ་ལྕགས་ཐོག་མདའི་མདུན་དུ།
རྡོ་རྒན་ཁྱོད།
གཉའ་ཞུམ་ཞིང་སྒྱིད་པ་འདར་འདར་བྱེད།
