རྫ་ཆུ་དང་ངོམ་ཆུ་འདྲེས་མཚམས་སུ།

 

ཟླ་ཆུ་རྒྱུག་པའི་གྲོང་ཚོ་ཞིག་ཆགས་ཡོད།

 

ཟླ་ཆུའི་འགྲམ་ནས་སྐྱིད་ཆུ་དྲན་ན།

 

དེ་ནི།  ཕ་ཡུལ་ནས་ཕ་ཡུལ་དྲན་པ་ནང་བཞིན།

 

གངས་རིའི་ཞབས་ལ་ཞེན་པའི་བརྩེ་བ་དགོས་ངེས་དེ་ཡིན།

 

 

 

ཟླ་ཆུའི་མདོ་ལ་བྲིས་པའི་གྲོང་ཚོ་དེ།

 

ཆུ་བོའི་རླབས་རིས་དང་འདྲ་བས།

 

དུས་ཚོད་ཀྱི་དཀྱིལ་དུ་ལན་མང་གཡོས་མྱོང་།

 

ཆུ་ངོགས་གཉིས་སུ་བཀར་བའི་གྲོང་ཚོ།

 

རི་བོས་བསྐོར་བའི་བར་གསེང་ན།

 

རླུང་རྩེའི་ནང་གི་བྱ་བྱིའུ་ལྟར།

 

ཁོད་ཡངས་པའི་ནམ་མཁའ་དང་གྱེས་ཕྱག་ཞུས་ཡོད།

 

 

 

ཟླ་ཆུའི་ངོགས་སུ།  སྐྱིད་ཆུ་དྲན་པ་དེ།

 

སྐྱིད་ཆུའི་ངོགས་ནས་ཕ་ཡུལ་དྲན་པ་ལྟར།

 

མིག་གིས་མཐོང་ཡང་ལག་པས་འཇུ་མི་ཐུབ་པའི་ཐ་སྙད་ཅིག

 

ཟླ་ཆུའི་ནང་དུ་གྲོང་ཚོ་དེའི་ངོ་རིས་བྲིས་ཡོད།

 

ངོ་རིས་དེ།  ཟླ་ཆུའི་རླབས་རིས་ལ་བཅོལ་ཡོད།

 

གང་ལྟར།  ཆུ་བོ་དེ་གྲོང་ཚོའི་འཕེལ་འགྲིབ་དབུས་སུ་རྒྱུག

 

 

 

ཡང་འཇུག་དང་སྔོན་འཇུག་ཁས་མི་ལེན་པའི་གྲོང་ཚོ།

 

ཐོན་མི་ཟེར་བ་སྔ་ས་ནས་ཟླ་ཆུའི་གཞུང་ལ་བསྐྱུར་ཟིན་པས།

 

ཆབ་མདོ་ཞེས་པའི་མིང་བྱང་གི་མགོ་ཁུངས་ཤེས་མཁན།

 

མཁའ་ལ་འཕྱུར་བའི་ཟླ་ཆུའི་ཟེགས་མ་གཅིག་པུ།

 

 

 

སྐྲ་གཞུག་དམར་པོ་དེ་དམར་མདངས་ཆེ་བས།

 

ངས།  ཁྱེད་ཀྱི་མགོ་བོ་མ་མཐོང་།

 

མཐའ་བཞི་རི་བོ་དེ་དབུ་རྨོག་མཐོ་བས།

 

ངས།  ཁྱེད་ཀྱི་ཁ་ངོ་མ་རིག

 

ཟླ་ཆུ།  ངས་ཁྱེད་ལ་འཕྲིན་པ་ཞིག་བསྐུར་ཡོད།

 

རྫ་ཆུ།  ངས་ཁྱེད་ལ་རེ་བ་ཞིག་བཅོལ་ཡོད།

 

ཆུ་སྣ་འཛོམས་ས་རུ་ཁ་ཆད་ཅིག་ཡོད།

 

ང་དང་ཆབ་མདོར་ཁ་ཆད་ཅིག་ཡོད།

 

མ་ཡིག་གི་མེ་སོན་འཚོལ་བའི་ཁ་ཆད་ཅིག་ཡོད།

 

 

2017.4.13ཉིན་བཅོས།