ལོ་རེའི་དཔྱིད་ཟླ་ལྔ་པ་ནས་དྲུག་པའི་བར། མདོ་དབུས་མཐོ་སྒང་གི་ས་ཆ་སོ་སོར་དབྱར་རྩྭ་དགུན་འབུ་རྐོ་བའི་དུས་ཚིགས་ཁྱད་པར་བ་ཞིག་ཡིན་ལ་མི་མང་པོ་རི་མགོ་རུ་རང་ཉིད་དང་། ཁྱིམ་ཚང་བཅས་ཀྱི་ཁ་རྒྱབ་ཀྱི་དོན་དུ་ནངས་སྔ་ལངས་དང་དགོང་ཕྱི་ཉལ་བྱས་ཏེ་དབྱར་རྩྭ་བརྐོ་བའི་ངལ་རྩོལ་ལ་གཞོལ་བཞིན་ཡོད། རང་རེ་སི་ཁྲོན་ཞིང་ཆེན་དཀར་མཛེས་ཁུལ་བྲག་མགོ་རྫོང་གཙང་སྨད་ཡུལ་ཚོའང་དེ་ལས་མ་འདས། སྐབས་འདིར་ས་ཆ་གཞན་ནས་མི་མང་པོས་ཞོར་ལས་འཚོལ་བར་གཙང་སྨད་པའི་ས་རུ་ཡོང་བ་དང་། དབྱར་རྩྭ་ཉོ་མཁན་གྱི་ཚོང་པའང་མང་ཐག་ཆོད་པ་ཞིག་ཡོད། ས་འདིའི་མི་དང་གཞན་སྡེ་ནས་འོང་བའི་མི་ཐམས་ཅད་ལྷན་ཅིག་ཏུ་འདུས་སྡོད་བྱེད་པས་མི་གྲངས་ཀྱི་ཆ་ནས་དེ་སྔོན་ལས་ལྡབ་འགྱུར་གྱིས་ཇེ་མང་རེད། འབྲོག་པ་རྒན་གཞོན་ཚོས་མ་བགྲོས་རང་མཐུན་གྱི་ཚུལ་དུ་དབྱར་རྩྭ་དགུན་འབུ་ནི་འཚོ་བའི་རྒྱབ་རྟེན་ལྟ་བུ་ཞིག་ཡིན་ལ། འདི་ཡོད་ན་ཟས་ཡོད་དང་འདི་མེད་ན་ཟས་མེད་ཀྱི་དཔེ་ལྟར་ཡིན་གཤིས་རྒས་གཞོན་དང་སྐྱེ་བོ་ཕོ་མོ་མེད་པར་རང་ཚོད་ཀྱིས་འབད་འབུངས་བྱས་ཏེ་དབྱར་རྩྭ་བརྐོ་བའི་ལས་ལ་འབད་དགོས་ཞེས་བཤད་པ་ནི་དངོས་གནས་བདེན་པ་རེད་འདུག འབྲོག་པ་མང་པོའི་ཁ་རྒྱབ་གསོ་སྤྱད་དང་བུ་ཕྲུག་ལ་སློབ་ཡོན་སྤྲོད་བྱེད་ཀྱང་མང་ཆེ་བ་འདི་ཡིན་པར་ངེས།
དེ་ལྟར་དབྱར་རྩྭ་བརྐོ་བའི་དུས་ཚོད་འདིར་སླེབས་སྐབས་བདག་དང་བྲག་མགོ་རྫོང་གཙང་སྨད་ཡུལ་ཤོག་གི་ལས་གྲོགས་རྣམས་ཡང་དོན་དག་གཞན་པ་ཁ་ཤས་ལའང་བསམ་བློ་མི་གཏོང་རང་གཏོང་དུ་ཆགས་སོང་། འབྲོག་པ་མང་ཚོགས་ཀྱི་བསམ་བློའི་གོ་རྟོགས་དང་འཕྲོད་བསྟེན་རྒྱུན་ཤེས། རིག་གནས་རྒྱབ་ལྗོངས་དང་བདག་སྲུང་འདུ་ཤེས་སོགས་ཅུང་དམན་པས། དབྱར་རྩྭ་བརྐོ་བའི་ས་གནས་དེར་དངོས་སུ་སོང་ནས་བསམ་བློའི་མཛུབ་སྟོན་དང་རྒྱུན་ཤེས་ངོ་སྤྲོད། བདེ་འཇགས་དོ་དམ་དང་ཁོར་ཡུག་གཙང་སྦྲ་སོགས་ཀྱི་སྐོར་ནས་དྲིལ་བསྒྲགས་དང་འབོད་སྐུལ་རེ་གཏོང་ཐུབ་ན་ཧ་ཅང་བཟང་སྙམ་ལ། གཞན་ཡང་སྐབས་དེར་མང་ཚོགས་ཀྱིས་ཏང་གི་བཀའ་དྲིན་ངོ་ཤེས་ཤིང་འབྲོག་པ་མང་ཚོགས་ཀྱི་ཕྱོགས་བསྡུས་བྱང་ཚད་མཐོར་འདེགས་གཏོང་ཆེད་དང། སྤྱི་ཁྱབ་ཧྲུའུ་ཅི་ཞི་ཅིན་ཕིང་སི་ཁྲོན་ལ་ཕེབས་ནས་གནང་བའི་དགོངས་དོན་དྲིལ་བསྒྲགས་དང་དབུལ་སྐྱོར་གནད་འཁེལ་གྱི་སྲིད་ཇུས་ངོ་སྤྲོད། སློབ་སྦྱོང་དང་གྲོས་བསྡུར། རྟོག་ཞིབ་བཅས་ཀྱི་བྱེད་སྒོ་རབ་དང་རིམ་པ་ཞིག་སྤེལ་ཐུབ་ན་དེ་ལས་ཀྱང་ཕུན་སུམ་ཚོགས་ཤིང་གཅིག་གོ་གཉིས་ཆོད་རེད་སྙམ་ཞོར་དབྱར་རྩྭ་བརྐོ་བའི་ས་གནས་སུ་བྱ་བ་འདི་དག་བསྒྲུབ་པར་བློ་ཐག་བཅད་དེ་ཕྱིན་པ་ཡིན།
དབྱར་རྩྭ་བརྐོ་སའི་ས་གནས་དེ་དག་ནི་ཡུལ་ཚོ་དང་ལེ་བར་བཞི་བཅུ་ལྷག་ཡོད་ལ་འགྲིམ་འགྲུལ་སྟབས་མི་བདེ་བས་རྟ་ལ་ཞོན་ཏེ་ཕྱིན་དགོས། དམིགས་གཏད་ས་གནས་སུ་སླེབས་པར་ཉིན་གཉིས་ཙམ་དགོས། ལམ་བར་དུ་ལྷགས་རླུང་དང་ཁ་བས་རབ་ཏུ་གཙེས་ནའང་། ཏང་གི་དགོངས་དོན་དྲིལ་བསྒྲགས་དང་འབྲོག་པ་མང་ཚོགས་ཀྱི་ཆེད་དུ་ཡིན་སྙམ་པའི་དཔའ་སྤོབས་ཤིག་གིས་བདག་གིས་བསྟུད་མར་མདུན་དུ་བསྐྱོད་པའི་གོམ་མཚམས་མ་བཞག་པར་མདུན་ནས་མདུན་དུ་ཆས་པ་ཡིན། ཕྱི་དྲོའི་དུས་ཚོད་བདུན་པ་ཡར་མར་ལ་ཁེལ་དུས་འབྲོག་པའི་ཁྱིམ་ཚང་ཞིག་ལ་གནས་ཚང་གཡར་ཏེ་དེར་ནུབ་གཅིག་བསྡད་པ་ཡིན་ལ། ཐ་ན་ནུབ་ཇའི་ཁ་བརྡ་ཚུན་ཆོད་ཀྱང་ཏང་གི་དགོངས་དོན་དང་ཏང་གི་བཀའ་དྲིན་སོགས་གལ་པོ་ཆེ་ལ་ནན་ཏན་གྱིས་ཚུལ་དུ་བཤད་པ་ཡིན་ཞིང་ཁྱིམ་ཚང་དེའི་ཁྱིམ་མི་ཚང་མས་སྤྲོ་བའི་དགོད་སྒྲ་དང་རེ་བའི་འཛུམ་མདངས་ལ་ཆད་པ་མེད་པ་ཞིག་ཏུ་གྱུར།
ཞོགས་པའི་སྐྱ་རེངས་དང་ལྷན་དུ་མལ་ལས་ལངས་ཤིང་ཡང་བསྐྱར་ལམ་དུ་ཆས་པ་ཡིན་ལ་དགོང་ཕྱི་དྲོའི་ས་སྲོད་ཀྱི་མཚམས་སུ་དངོས་སུ་སླེབས་ཤིང་ས་དེར་ཡོད་པའི་གཞི་རིམ་འགོ་ཁྲིད་དག་དང་ལྷན་དུ་ཁ་སང་དེ་རིང་གི་གནས་ཚུལ་ལ་རྒྱུས་ལོན་དང་། སང་ཉིན་གྱི་བྱ་ེད་སྒོ་སྤེལ་སྟངས། དུས་ཚོད་སྒྲིག་སྟངས་སོགས་ཀྱི་ཐད་ནས་ཁ་ཐུག་གྲོས་བསྡུར་བྱས། དབྱར་རྩྭ་རྐོ་མཁན་གྱི་མི་རྣམས་ལ་མཚན་མོར་དུས་ཚོད་ཕུད་ནས་བདེ་འཇགས་དང་འཕྲོད་བསྟེན། དགོངས་དོན་སོགས་ཀྱི་སྐོར་ངོ་སྤྲོད་དང་། དེ་མིན་གཞན་དག་ཁོམ་པོ་ཡོད་མཁན་གྱི་ཡུལ་འཁོར་དག་ལ་དུས་ཚོད་ཡོད་རྒུ་བཏོན་ནས་དྲིལ་བསྒྲགས་བྱས། སྐབས་རེར་རང་ཉིད་དངོས་སུ་དབྱར་རྩྭ་རྐོ་སའི་ཡུལ་དངོས་སུ་ཕྱིན་ཏེ་ཇ་ཐོག་གི་དུས་ཚོད་དག་ཀྱང་ཆུད་ཟོས་སུ་མི་གཏོང་བར་རང་ཅག་གིས་ཏང་གི་ཚོགས་ཆེན་བཅུ་དགུ་པའི་སྟེང་དུ་གནང་བའི་འདུ་ཤེས་བཞི་སོགས་དགོངས་དོན་གཙོ་བོ་དང་དམངས་འཚོའི་འཚོ་བ་གཉིས་མཉམ་འདྲེས་བྱས་ནས་བཤད། དེ་ལས་གཞན་རྒྱུན་འཁྱོངས་གསུམ་དང་དགག་བྱ་གསུམ་སོགས་གོ་སླ་བའི་དཔེ་དང་སྦྱར་ནས་ངོ་སྤྲོད་དཔྱིས་ཕྱིན་པ་ཞིག་བྱས།
དབྱར་རྩྭ་རྐོ་སྐབས་དོགས་ཟོན་བྱེད་དགོས་སའི་དོན་དག་རྣམས་ཞིབ་མོ་དང་གསལ་པོར་བཤད་པ་དང་། ནག་ཆུང་སྲན་མ་ཡང་དྲིལ་བྱས་པ་ཡིན། དཔེར་ན། སྤྱི་ཁྱབ་ཧྲུའུ་ཅི་ཞི་ཅིན་ཕིང་ད་ཐེངས་སི་ཁྲོན་ལ་ཕེབས་ནས་གལ་ཆེའི་གསུང་བཤད་གནང་བ་ནི་ཏང་དང་རྒྱལ་ཁབ་ཀྱི་སྤྱིའི་འཕེལ་རྒྱས་ལ་དགོངས་ནས་སི་ཁྲོན་གྱི་རྩ་བའི་གནས་ཚུལ་ལ་རྒྱུས་ལོན་དང་ཏང་གི་འཚོགས་ཆེན་བཅོ་བརྒྱད་པ་ནས་བཟུང་སི་ཁྲོན་ཞིང་ཆེན་གྱི་སྲིད་འབྱོར་རིག་གསུམ་གཙོས་སྤྱི་ཚོགས་འཛུགས་སྐྲུན། སྐྱེ་ཁམས་དཔལ་ཡོན་གྱི་འཛུགས་སྐྲུན་དང་ཏང་གི་འཛུགས་སྐྲུན་བཅས་ལ་བྱས་རྗེས་མི་དམན་པ་བཞག་པར་གཟེངས་བསྟོད་དང་ཁས་ལེན་བྱས་པ་རེད། ད་དུང་གོམ་གང་མདུན་སྤོས་ཀྱིས་ཚུལ་དུ་སི་ཁྲོན་གྱི་ལས་དོན་ཇི་ལྟར་ཡག་པོར་བསྒྲུབ་པ་དང་སི་ཁྲོན་དེང་རབས་ཅན་གྱི་སྤྱི་ཚོགས་སུ་བགྲོད་པའི་ཐབས་ལམ་སྐོར་ནས་བློ་སྒོ་འབྱེད་པའི་གསུང་བཤད་གལ་ཆེན་གནང་བ་རེད། དེ་ལས་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་དང་རྒྱབ་ཁབ་ཀྱིས་སི་ཁྲོན་མི་དམངས་ལ་བཅངས་པའི་ཐུགས་ཁུར་དང་བརྩེ་སེམས་མཚོན་ཐུབ།
སྤྱིའི་ཆ་ནས་ད་ཐེངས་བདག་གིས་དཀའ་བ་དང་དུ་བླང་། ངལ་བ་ཁྱད་དུ་བསད་ནས་འབྲོག་པ་མི་དམངས་ཀྱི་བདེ་སྡུག་ལ་བསམ་བློ་བཏང་ནས་བྱ་བ་འདི་མ་བསྐུལ་དང་བླང་གིས་ཚུལ་དུ་བསྒྲུབས་པ་ཡིན་ལ། སྒོས་སུ་རང་རེའི་རླབས་ཆེན་མེས་རྒྱལ་ལ་ཞབས་འདེགས་དང་བྱ་བ་སྒྲུབ་པའི་མི་བུ་ཞིག་ཡིན་པས། མི་དམངས་ལ་ཞབས་ཕྱི་སྒྲུབ་པ་ནི་ང་ཚོའི་ཕྲག་སྟེང་དུ་བབས་པའི་འོས་འགན་ཉག་གཅིག་ཡིན་པས་དེར་ད་དུང་མུ་མཐུད་དུ་འབད་པ་བྱ་རྒྱུའི་དམ་བཅས་པ་ཡིན།
དགའ་འོས་པ་ཞིག་ལ། ད་ཐེངས་བདག་གིས་བྱ་བ་འདིར་དོན་འབྲས་ངེས་ཅན་ཞིག་སྨིན་པ་ཕར་བལྟས་ཚུར་གཟིགས་དང་ཟུར་བལྟས་ལེབ་མཐོང་གི་དཔེ་རུ་སོང་ཡོད་ལ། དེ་སྔོན་དང་མི་འདྲ་བར། མང་ཚོགས་ཀྱིས་འཕྲོད་བསྟེན་འདུ་ཤེས་ལ་ཡང་དག་པའི་ངོས་ཟིན་དང་ཏང་གི་མཛད་འཕྲིན་ལ་རྒྱབ་སྐྱོར། ཀྲུང་གོའི་སྲིད་ཇུས་ལ་མཐེ་བོང་བསྒྲེངས་ཏེ་མ་འོངས་པར་རང་དང་རང་གི་བུ་རབས་ཚ་རྒྱུད་ཀྱིས་ཀྱང་ཀྲུང་གོའི་ཕུགས་འདུན་གསར་པ་མངོན་འགྱུར་ཡོང་བར་ལུ་གུ་རྒྱུད་ལྟར་འབད་པ་བྱེད་ངེས་ཞེས་བཤད་བྱུང་། །
