ཞི་ཅིན་ཕིང་མ་ཏེ་རིར་ཕེབས་འབྱོར་ཟིན་ནས་སི་ཕེན་རྒྱལ་ལྡན་རྒྱལ་ཁབ་ལ་རྒྱལ་དོན་འཚམས་འདྲི་གནང་འགོ་ཚུགས་པ།

            ཀྲུང་དབྱང་རླུང་འཕྲིན་ལས་ཁུངས་ནས་སྤེལ་བའི་གནས་ཚུལ། ས་གནས་དེ་གའི་དུས་ཚོད་སྤྱི་ཟླ་11པའི་ཚེས་27ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་མ་ཏེ་རིར་ཕེབས་འབྱོར་ཟིན་ནས་སི་ཕེན་རྒྱལ་ལྡན་རྒྱལ་ཁབ་ལ་རྒྱལ་དོན་འཚམས་འདྲི་གནང་འགོ་ཚུགས་ཡོད་པ་རེད།
            ཞི་ཅིན་ཕིང་ཕེབས་བཞུགས་གནང་སའི་ཆེད་གཏོང་གནམ་གྲུ་སི་ཕེན་གྱི་མཁའ་ཁོངས་སུ་འབྱོར་སྐབས། སི་ཕེན་མཁའ་དམག་གི་དམག་འཐབ་གནམ་གྲུ་གཉིས་བར་སྣང་དུ་འཕུར་ནས་སྲུང་སྐྱེལ་ཞུས་ཡོད་པ་རེད། ས་གནས་དེ་གའི་དུས་ཚོད་ཕྱི་དྲོའི་ཆུ་ཚོད་བཞི་པ་དང་སྐར་མ་ལྔ་ཙམ་ལ་ཆེད་གཏོང་གནམ་གྲུ་མ་ཏེ་རི་པ་ལ་ཧ་སེ་རྒྱལ་སྤྱིའི་གནམ་ཐང་དུ་འབྱོར་ཡོད་པ་དང་། ཞི་ཅིན་ཕིང་དང་སྐུ་ཟླ་ཕེང་ལི་ཡོན་རྣམ་གཉིས་ལ་སི་ཕེན་སྲིད་གཞུང་གི་མཐོ་རིམ་དཔོན་རིགས་ནས་སྤྲོ་སེམས་རབ་ཏུ་འཁོལ་བའི་ངང་ནས་དགའ་བསུ་ཞུས་ཤིང་། སི་ཕེན་གྱིས་བྱིས་པས་ཞི་ཅིན་ཕིང་སྟངས་དཔྱལ་ལ་མེ་ཏོག་ཕུལ་བ་དང་། གུས་ལུགས་དམག་གིས་རུ་སྟར་བསྒྲིགས་ཏེ་ཕེབས་ལམ་གཡས་གཡོན་གཉིས་ནས་བསྐྱོད་ཡོད་པ་རེད།
            ཞི་ཅིན་ཕིང་གིས་ཀྲུང་གོའི་སྲིད་གཞུང་དང་མི་དམངས་ཀྱི་ཚབ་ཞུས་ནས། སི་ཕེན་སྲིད་གཞུང་དང་མི་དམངས་ལ་ལྷག་བསམ་ཟོལ་མེད་ཀྱིས་འཚམས་འདྲི་དང་སྨོན་འདུན་ཞུས་པ་དང་། ཞི་ཅིན་ཕིང་གིས། ཀྲུང་གོ་དང་སི་ཕེན་བར་གྱི་འགྲོ་འོང་གི་ལོ་རྒྱུས་རིང་པོ་ཡོད་ཅིང་། ལོ་ངོ་༢༠༠༠གོང་དུ། གནའ་བོའི་སྐམ་སའི་དར་གོས་ལམ་བུས་གནའ་བོའི་གྲོང་ཁྱེར་ཁྲང་ཨན་དང་སི་ཕེན་གྱི་ཐ་ལ་ཀེ་ན་གྲོང་ཁྱེར་མཉམ་དུ་སྦྲེལ་ཡོད་པ་དང་། ལོ་ངོ་400གོང་དུ། ཕྱོགས་གཉིས་པོས་མཚོ་ཐོག་དར་གོས་ལམ་བུ་བརྒྱུད་ནས་ཉོ་ཚོང་འགྲོ་འོང་མང་པོ་བྱས་ཡོད། སྤྱི་ལོ་1973ལོར། རྒྱལ་ཁབ་གཉིས་པོའི་བར་ཕྱི་འབྲེལ་འབྲེལ་བ་བཙུགས་པ་དང་།
            སྤྱི་ལོ་2005ལོར། རྒྱལ་ཁབ་གཉིས་པོས་ཁྱོན་ཡོངས་འཐབ་ཇུས་རོགས་ཟླའི་འབྲེལ་བ་བཙུགས་ནས། རྒྱལ་ཁབ་གཉིས་པོའི་འབྲེལ་བ་གོང་འཕེལ་གྱི་དུས་རིམ་གསར་པར་བསྐྱོད་ཡོད། མིག་སྔར། རྒྱལ་ཁབ་གཉིས་པོའི་འབྲེལ་བ་བསྒྱུར་བཅོས་གོང་འཕེལ་གྱི་གལ་ཆེའི་དུས་མཚམས་སུ་གནས་ཤིང་། ཕྱོགས་གཉིས་འབྲེལ་བ་གཏིང་ཟབ་ཏུ་གཏོང་རྒྱུ་དང་། སྲོལ་རྒྱུན་མཛའ་གྲོགས་སྲ་བརྟན་གཏོང་རྒྱུ། དངོས་སྒྲུབ་མཉམ་ལས་རྒྱ་སྐྱེད་གཏོང་རྒྱུ། ཐུན་མོང་གོང་འཕེལ་གཏོང་རྒྱུ་བཅས་རྒྱལ་ཁབ་གཉིས་པོ་དང་རྒྱལ་ཁབ་གཉིས་པོའི་མི་དམངས་ཀྱི་ཁེ་ཕན་དང་འཚམ་ཡོད་ལ། འཛམ་གླིང་ཞི་བདེ་དང་། བརྟན་ལྷིང་། དར་རྒྱས་བཅས་ལའང་ཕན་ཐོགས་ཡོད་པ་ཞིག་ཡིན་ཞེས་བསྟན་གནང་བ་དང་།
            ཞི་ཅིན་ཕིང་གིས། འཚམས་འདྲི་ཞུ་རིང་། ངོས་ནས་རྒྱལ་པོ་ཧྥེ་ལེ་ཕེ་ཁྲི་ཐོག་དྲུག་པ་དང་དབུ་བཞུགས་བློན་ཆེན་སང་ཆེ་སི་སོགས་སི་ཕེན་གྱི་འགོ་ཁྲིད་མི་སྣ་དང་ཕྱོགས་གཉིས་འབྲེལ་བ་དང་ཐུན་མོང་ཐོག་སེམས་འཁུར་བྱེད་པའི་གནད་དོན་ཐད་དགོངས་འཆར་བརྗེ་རེས་རྒྱ་ཆེ་གཏིང་ཟབ་ཞུས་ནས། ཀྲུང་གོ་དང་སི་ཕེན་བར་གྱི་ཁྱོན་ཡོངས་འཐབ་ཐུས་རོགས་ཟླའི་འབྲེལ་བའི་དུས་རབས་ཀྱི་རྒྱང་སྐྱོད་ལམ་བུ་གསར་པ་འབྱེད་རྒྱུའི་རེ་སྒུག་ཞུ་བཞིན་ཡོད་ཅེས་བསྟན་གནང་ཡོད་པ་རེད།
            སི་ཕེན་ལ་རྒྱལ་དོན་འཚམས་འདྲི་གནང་མཇུག་འགྲིལ་རྗེས། ཞི་ཅིན་ཕིང་གིས་ཨ་ཀེན་ཐིན་དང་། ཕ་ན་མ། ཕོར་ཐིའུ་ཀལ་བཅས་ལ་རྒྱལ་དོན་འཚམས་འདྲི་གནང་རྒྱུ་དང་། ཨ་ཀེན་ཐིན་གྱི་པུ་དབྱི་ནོ་སི་ཨེ་རི་སིར་འཚོགས་རྒྱུའི་རྒྱལ་ཁབ་ཉི་ཤུ་ཚོགས་པའི་འགོ་ཁྲིད་པའི་དབུ་ཚོགས་ཐེངས་བཅུ་གསུམ་པར་ཕེབས་ཞུགས་གནང་རྒྱུ་ཡིན་པ་རེད།