དུས་ཚོད་གཙང་བོ་དང་འདྲ་ཡང་།

མི་རྣམས་ལ་གླེན་རྟགས་ལུང་པ་གང་སྟེར་ཡོད།

ཁྱོད་ཀྱིས་ཁ་སང་དང་དེ་རིང་།

དེ་རིང་སང་ཉིན་ཞེས་ཤ་ཐང་ཆད་རག་བར་དུ།

རང་ཉིད་ལ་འཆར་གཞི་དང་ལས་ཀ་མང་པོ་བཞག

འོན་ཀྱང་།

དུས་ཚོད་ལ་འདས་པ་དང་མ་འོང་པ་མེད།

དུས་ཚོད་ལ་མཐོ་དམན་དང་སྙིང་རྗེ་མེད།

དུས་ཚོད་ལ་ཆུང་མ་དང་བུ་ཕྲུག་མེད།

དུས་ཚོད་ཀྱི་ང་ཚོ་གཅིག་ཀྱང་ངོ་མི་ཤེས།

ཡིན་ཡང་དུས་ཚོད་ལ་ཧམ་པ་ཧ་ཅང་ཆེ།

ཐ་ན་མི་རེ་རེའི་ཕུགས་བསམ་དང་ལང་ཚོ་ཁྱེར་བར་ཡང་

དགོངས་དག་དང་བཟོད་གསོལ་ཅི་ཡང་མེད།

དུས་ཚོད་ལ་འཆར་གཞི་ཅི་ཡང་མེད་ཀྱང་།

དབྱེ་བ་གང་ཡང་མེད་ཀྱང་།

སྐྱེ་བོ་དག་དུས་ཚོད་ལ་ཧ་ཅང་དགའ།

དུས་ཚོད་གཙང་བོ་དང་འདྲ་ཡང་།

མི་རྣམས་ལ་གླེན་རྟགས་ལུང་པ་གང་སྟེར་ཡོད།

ལག་མཐིལ་གྱི་རི་མོ་དེ་དག

མི་ལ་ལས།

འཁོར་བ་ཁབ་ཀྱི་རྩེ་མོ་དང་།

རྡུལ་ཕྲ་རབ་ཀྱི་ངོས་གཅིག་ཏུ་བལྟ།

ཡིན་ཡང་།

གྲོང་ཁྱེར་གྱི་ཁང་བརྩེག་ལྟར།

གཅིག་ཐོག་ལ་གཉིས་བཟོ་མི་ཆོག་པ་དེ་འཁོར་བ་ཡིན་ལ།

བརྒྱ་ནས་བརྒྱད་ཕྲི་མི་ཆོག་པ་དེ་ཡང་འཁོར་བ་ཡིན།

ལས་ཉོན་རྩྭ་སྒྱེ་གང་ས་ལ་ཟེགས་རྗེས།

རླན་གཤེར་གྱིས་ཡོངས་སུ་ཁེབས་པའི་རི་ཐང་།

ཟླུམ་པོ་དང་གྲི་བཞིར་མ་ངེས་པའི་དབྱིབས་དང་།

དམར་པོ་དང་སེར་བོར་མི་གཏོགས་པའི་ཁ་དོག་དེ་དག

ངས་བསམ་ན།

འཁོར་བ་ནི་དེ་ལྟ་བུའི་བསམ་ལ་མི་བསམ་སར་དོད་པའི།

མི་སོ་སོའི་ལག་མཐུལ་གྱི་རི་མོ་དག་རེད་སྙམ།