རང་ལ་དབང་བའི་སྲིད་པའི་རྫ་སྒང་ནས།།
འོད་ཀྱི་གཤོག་ཟུང་བསྐུམ་འདང་མེད་མོད་ཀྱང་།།
སྣང་བའི་རྒྱལ་ཁམས་མུན་པས་ཐོལ་གྱིས་བཅོམ།།
འཛུམ་གྱི་མེ་ཏོག་སད་ཀྱིས་རྡུལ་དུ་བཏང་།།
འཇའ་ཡི་ལག་པ་མཁའ་ལ་ཡལ་བའི་སྐབས།།
མི་འདོད་མིག་གིས་ཅེར་ཡང་ཕན་པ་མེད།།
སྣང་བའི་ཁུ་ཚུར་འཕྱར་ཡང་དཀྱེལ་ཡངས་མེད།།
རང་བློ་བསྡུས་ཏེ་རང་ལ་ཚ་འདྲི་དང་།།
རང་སེམས་བཀུག་སྟེ་རང་ལ་བསྐོར་བརྒྱབ་ཚེ།།
རང་སྣང་སྒྲིབ་པའི་མི་ཡུལ་ལྐོག་གྱུར་པ།།
རང་ལོ་ཉི་ཤུའི་ཡུན་གྱི་ཟས་རིན་ཡིན།།
བལྟས་པས་མི་ངོམས་སེམས་ཀྱི་རི་མོ་ནི།།
ཕྲ་མོའི་སྐུད་པས་བཏགས་པའི་སྡོམ་རྒྱ་ཡིན།།
དུས་ཀྱི་དཀྱོག་མཚམས་ལོ་ཟླའི་ཧྲག་བར་ན།།
འཇའ་ཡི་མི་དང་རླུང་གི་སྐད་ཆ་ཡོད།།
ཟས་ཀྱི་དྲི་དང་ཤ་ཡི་དྲོད་འཁྱིལ་བའི།།
མི་ཁྱིམ་ཕལ་བའི་གཞིས་ཀ་རེ་རེ་ནི།།
མུན་པའི་འོབས་ཀྱི་ཁྲག་ཐིགས་རྡོག་རེ་ཡིན།།
ཕུབ་མས་བཀབ་པའི་ཆུ་དོང་རེ་རེ་ཡིན།།
མུན་པ་བཀླགས་པའི་མཚན་མོ་རེ་རེ་དང་།།
ཟླ་འོད་བཙལ་བའི་ཞག་མ་རེ་རེ་ལ།།
སྨྲ་བསམ་ཐ་སྙད་མང་པོ་ང་དང་བཀྱེད།།
བརྗོད་འདས་བུ་ག་རེ་རེས་གམ་ནས་འཕྱས།།
ཁྲེས་པོ་གང་ཞིག་མལ་དུ་བསྐྱལ་བ་དང་།།
འགན་འཁུར་ཅི་ཞིག་གཏན་དུ་གྲུབ་པ་ལྟར།།
རང་སེམས་དེའུ་འབུར་སྟེང་ནས་སྐད་ཅིག་ལ།།
སྣང་བ་ཡན་པོར་བོར་ཏེ་ངལ་གསོས་ཚེ།།
མི་ཁོམ་སེམས་ལ་གང་དྲན་འདི་དྲན་མེད།།
བལྟས་ན་མི་མཐོང་སེམས་ཀྱི་རི་རྐེད་ན།།
སེང་གེས་འཕར་བ་བཀུར་བའི་གོ་ལྡོག་ཡོད།།
སྐེ་ན་ལྕགས་ཐག་མེད་པའི་ཁྱི་དག་ཀྱང་།།
ཟས་ཀྱི་ལྷག་མར་རེ་བ་སུ་ཡིས་ལན།།
མཆོག་དང་དམན་གྱི་ངོ་བོ་འདྲེས་པ་དང་།།
རྩ་དང་རྩེ་མོ་འཆོལ་བའི་འཁོར་བ་ནི།།
རོ་དང་འཆི་བ་སྒོམ་པའི་རླུང་བུ་ཡིན།།
མཐུད་དང་མདུད་མཚམས་མེད་པའི་ཨ་ལོང་ཡིན།།
བལྟས་པ་ཙམ་གྱིས་ཤིན་ཏུ་ཞི་བ་དང་།།
མ་གཞིར་ཟང་ཟིང་རབ་ཏུ་ཆེ་བ་ཡི།།
མི་ཡུལ་ཁམས་ཀྱི་ནམ་སྨད་རེ་རེ་ལ།།
ངས་ནི་སྲིད་རྩེར་སྙེག་པའི་རྡོག་ལམ་བཙལ།།
ཁང་རྩེག་རེ་རེར་བལྟས་ཤིང་ངུ་འབོད་བྱས།།
བཤད་ན་སེམས་ཀྱང་སྒམ་ལ་བསྡུ་ཐུབ་ཅིང་།།
བླངས་ན་ག་ས་ག་ནས་བཞུད་འགྲོ་བའི།།
མ་རུང་སྲིད་ཀྱི་ཆོ་ལོ་འདི་དག་ནི།།
ལོ་བརྒྱར་གུ་ཡངས་མེད་པའི་ཉེས་ཅན་ཡིན།།
ང་ནི་སྨྲེང་ཞིང་སྐྱོ་བའི་ཤུགས་རིང་ཡིན།།
