དབྱར་ཁའི་ཉི་མ་ཞིག་ལ་དཔེ་བླངས་ཚེ
ཆར་བ་མཚམས་མེད་དུ་འབབ་པ་མི་རྟག་པའི་ངོས་གཅིག་ཡིན
སྨུག་པ་གློ་བུར་དུ་དྭངས་པ་མི་རྟག་པའི་ངོས་གཉིས་ཡིན
ཉི་འོད་དང་སྔོ་རྩྭའི་བར་ན་རྟག་བརྟན་གྱི་དམ་བཅའ་ཡོད་མི་སྲིད
གྲོག་མོ་དང་གྲམ་པའི་ནང་དུ་བཞུར་བའི
ཆུ་ཕྲན་དང་ཆུ་མིག་འདི་དག་ལ
རྟག་བརྟན་གྱི་བཞུར་རྒྱུན་ཡོད་མི་སྲིད
ཁ་སང་ཁྱོད་ཀྱི་འཛུམ་མདངས
ཚངས་མགུར་གྱི་དབྱངས་ཀྱིས་ཁྱེར་ཏེ
ངའི་ནང་སེམས་ཀྱི་ཟབ་སར་སེན་འབྲད་མང་པོ་བྱས་པ་བཞིན
དེ་རིང་ངའི་སེམས་ངལ
ཚངས་མགུར་གྱི་ཚིག་གིས་བསྐྱོར་ཏེ
ཁྱོད་ཀྱི་འདས་གྲོངས་ཀྱི་ཞིང་སར་དངན་པ་གྲངས་མེད་བཏང
གལ་ཏེ་གོམ་ཐག་འདིའི་བར་ཐག་ཅུང་ཐུང་བས་མིན་ཚེ
ངས་ཁྱོད་ཀྱི་འགྲུལ་བཞུད་ལ་སེམས་བདེ་མོས་རྟེན་འབྲེལ་ཞུ་སྲིད
ཡིན་ཡང
ཡིན་ཡང་འཇིག་རྟེན་ནི་ཕངས་སེམས་ཤིག་གོ
མི་རྟག་པ་ནི་ནམ་མཁའ་དང་ས་གཞི་ཡིན་པས
འུ་ཚོའི་ཚེ་སྲོག་གི་བལ་སྐུད་ཕྲ་མོ་འདི
ཇ་ཡུན་གཅིག་གི་འཆར་ཡན་བཞིན
གར་ཡོད་གར་མེད
ད་དྲན་ད་བརྗེད
ཁ་དོག་སྣ་ལྔའི་གློག་འོད་འཁྱུག་པ་བཞིན་རེད་ཨང
དགུན་ཁའི་གྲང་རླུང་དང་ཁངས་ཡུག་གིས
ང་ཚོ་ལ་གནོད་འཚེ་གང་ཡང་བྱ་མི་ཐུབ
དུས་རབས་དང་ལོ་ཟླ་ག་ཚོད་ཅིག་ལ
ང་ཚོས་དྲོ་འཁྱག་གཉིས་པོ་ལྗིབས་ཏེ་གླུ་ལེན་ཞིང
ང་ཚོས་བདེ་སྡུག་གཉིས་པོ་གཤིབ་སྟེ་བྲོ་འཁྲབ་ངེས
སེམས་པའི་ཕྱི་ནང་གི་འཚོ་བའི་ན་ཟུག་འདི་ཚོའང
ཡིད་ཀྱི་དྲན་ངོས་ཀྱི་སྐྱེ་འཆིའི་ཐ་སྙད་འདི་དག་ཀྱང
དུས་ཚོད་ཀྱི་གོས་དང་རས་ཀྱིས་ཕྱིས་ཏེ་འགྲོ་སྲིད
ཆེས་སྙི་སའི་སྙིང་ཁུད་དུ་འབྱར་བའི
རིགས་དང་བག་ཆགས་ཀྱི་ནོར་བུ་འདི་ཉིད
དོན་དུའང་ཡིད་བཞིན་གྱི་ནོར་བུ་ཞིག་གོ
ད་ལྟ་ངས་ཁྱོད་ཀྱི་མིང་ཡིག་ཤོག་བུར་ཕབ་སྟེ
ཡི་གེ་རེ་རེའི་སྐྱེ་མཆེད་ལ་བསམ་བློ་བཏང
ཁྱོད་ཀྱིས་མི་ཡུལ་ཁམས་ཀྱི་ཁ་བའི་ནང་བཞག་པའི
རྐང་རྗེས་ཀྱི་དྲི་མ་སྣ་ལམ་དུ་ཡོང་བར་རེ
ད་ནི་ངས་ཅི་ཞིག་ནུས་སམ
ང་ཚོ་བོད་པ་རྣམས་ཀྱི་ཆེས་མཐའ་མཇུག་གི་སེམས་དང
སྡུག་བསྔལ་གྱི་ཁེན་སའམ་བཅོལ་ས་ནི
མ་ཎི་ཡིག་དྲུག་འདི་ཉིད་ཡིན་འོས་སོ
2017.12.14མདོ་སྨད་ཐེམ་ཆེན་དུ།
