མུན་པ་དག་ཀོ་སྐྱི་ལེན་ལེན་བྱ
༢༠༡༧.༡༡.༡༩
[ཕྲན་དཔྱད།/སྒྲེན་པོ།（ཟི་ལིང）]སྙན་ངག་ནི་སྐད་ཆར་འཁེན་ཡོད་ཅིང་། སྐད་ཆའི་བབ་དང་མཐོང་སྣེ་ག་འདྲ་ཞིག་ནས་འགྲེང་སྟེ་སེམས་ལ་བསགས་ཡུན་རིང་བའི་སེམས་ངོ་རྗེན་པ་དེ་བཤམ་རྒྱུ་ནི། སྙན་ངག་པ་རང་རང་གི་ཚོར་བའི་འགྱུ་སྟངས་དང་ཐ་སྙད་ཀྱི་སྡེབ་སྒྲིག་ལ་འབྲེལ་བ་ངེས་ཅན་ཡོད། སྙན་ངག་གི་སྐད་ཆ་ནི་བརྩེ་དུངས་དང་ཆགས་སྡང་གིས་རྨང་ནས་བྲན་ཡོད་པ་ཞིག་ཡིན་དགོས་ཤིང་། སྙན་ངག་པས་སྐད་ཆའི་འབྲེལ་ཟམ་ལ་བརྟེན་ནས་རང་གི་སེམས་ངོ་ཇི་བཞིན་ཀློག་པ་པོར་རིས་སུ་སྟོན་པ་ཙམ་ཞིག་ཡིན་ན། དེ་ལྟ་བུའི་སྙན་ངག་གིས་སྒྱུ་རྩལ་རྩོམ་རིག་གི་འོས་འགན་འགྲུབ་མེད། སྙན་ངག་གིས་ཀློག་པ་པོའི་དབང་བོ་དང་སེམས་ཁམས་ལ་ཟུག་གཟེར་དང་ཟ་འཕྲུག་སློང་བ། དབུགས་ངལ་གསོ་བ། འུ་ཅག་གི་རྒྱུན་གོམས་སུ་སོང་བའི་མཐོང་ལུགས་དང་ཐོས་ལུགས། མྱོང་ལུགས། ལྟ་ལུགས། དཔྱོད་ལུགས་སོགས་ཀྱི་ཁམས་དར་ཅིག་རྦད་དེ་ཅམ་གྱིས་བསྐྱུར་ནས། མཐོང་སྣེ་ཡན་གར་བ་ཞིག་དང་ཡང་ན་བཤད་ཕྱོགས་གསར་བ་ཞིག་གི་ལམ་ནས་ཕྱི་རོལ་ཁམས་ཀྱི་བྱ་དངོས་དང་སྙན་ངག་པའི་སེམས་ཀྱི་མངའ་ཐང་ཚོར་དུ་བཅུག་པ་ཡིན་ན། དེ་ལྟ་བུའི་སྙན་ངག་གིས་ད་གཟོད་སྒྱུ་རྩལ་རྩོམ་རིག་གིས་བསྩལ་བའི་འོས་འགན་ཡོངས་འགྲུབ་བྱས་ཟིན། དེ་ལྟ་བུའི་སྙན་ངག་ལ་ད་གཟོད་གསར་རྩོམ་མམ་གསར་གཏོད་ཀྱི་ཆ་ངེས་ཅན་ཡོད། རང་ལས་ལོགས་སུ་གནས་པའི་མི་ཞིག་ལ་སྐད་ཆ་ཞིག་བཤད་ནས་ཡིད་ཆེས་སུ་འཇུག་རྒྱུ་དང་ཡང་ན་སྐད་ཆ་བཤད་ཕྱོགས་བསྒྱུར་ནས་ཚོར་སྣང་གསར་བ་ཞིག་སྟེར་རྒྱུ་གཉིས་ནི་རྦད་དེ་ཁ་ཁ་སོ་སོ་ཡིན། ཡིད་ཆེས་སུ་འཇུག་རྒྱུའི་རྨང་རྟེན་ནི་བཤད་སྟོབས་དང་གཏན་ཚིགས་ཀྱི་གྲ་ཞིབ་མིན་ལ་འབྲེལ་ཡོད་ཅིང་། ཚོར་སྣང་གསར་བ་ཞིག་སྟེར་རྒྱུའི་གཞི་རྩ་ནི་སེམས་ཁོང་གི་ཆགས་སྡང་གཡོ་སྟངས་ལ་འབྲེལ་ནས་ཡོད། དེ་བཞིན་དུ་མི་གཞན་ཞིག་ལ་ཡིད་ཆེས་སུ་འཇུག་རྒྱུ་དང་མི་གཞན་ཞིག་ལ་ཚོར་སྣང་གི་ཁམས་གསར་བ་ཞིག་སྟེར་རྒྱུའི་སྐད་ཆ་གཉིས་ཀྱང་གཏན་ནས་མི་འདྲ། སྔ་མ་ནི་གཏན་ཚིགས་དང་བརྡ་དོན་གྱི་སྐད་ཆ་ཡིན་ལ། ཕྱི་མ་ནི་ཆགས་སྡང་གིས་རྨང་ནས་བྲན་པའི་མི་བུ་སྒེར་བ་ཞིག་གི་སྐད་ཆ་ཡིན་དགོས། སྙན་ངག་གི་སྐད་ཆས་ང་ཚོར་དུས་དང་རྣམ་པ་ཀུན་ཏུ་ཟུག་གཟེར་སློང་བ་དང་ངར་ལྡུད་ཐུབ། གཏན་ཚིགས་ཀྱི་སྐད་ཆར་བརྡ་སྤྲོད་པའི་ཆོས་ཉིད་དང་ཚིག་མཛོད་ཡོད་ནའང་། འགྲོ་མིའི་སེམས་རྒྱུད་ཀྱི་འདོད་རྩེ་དང་སྤྲོ་དགའ། མཛེས་ཚོར་ལ་བརྡ་སྤྲོད་པའི་ཆོས་ཉིད་གཏན་ཆགས་པ་ཞིག་ཡོད་མི་སྲིད། དེའི་རྒྱུ་མཚན་ག་རེ་རེད་ཟེར་ན། འགྲོ་མིའི་ཆགས་སྡང་གི་སྐད་ཆ་ཐམས་ཅད་ནི་འུ་ཅག་གི་སེམས་ཀྱི་ཁོང་གསེང་ན་འགྱུ་བ་མི་བརྟན་པའི་སྤྲིན་ཚོམ་ཞིག་དང་འདྲ་བར། གར་འགྲོ་གར་གཏད་མེད་པར་ཡམ་ཡོམ་འཕྱོ་ཞིང་ལྡེམ་བཞིན་ཡོད་པས་ཡིན། སྐད་ཆ་འདི་གཉིས་ལ་དབྱེ་བ་ཡོད་པས་ན། གཞི་ནས་ཆོས་ལུགས་དང་མཚན་ཉིད་རིག་པ། མི་ཆོས་ཀུན་སྤྱོད་སོགས་བརྡ་དོན་སྨྱན་བྱེད་ཡིན་པའི་གཏན་ཚིགས་ཀྱི་སྐད་ཆ་ཞིག་དང་། སྙན་ངག་དང་བརྩམས་སྒྲུང་། ཟློས་གར་འཁྲབ་གཞུང་སོགས་ཆགས་སྡང་འབྱར་རྩི་ཡིན་པའི་སྒྱུ་རྩལ་རྩོམ་རིག་གི་སྐད་ཆ་གཉིས་དགར་དགོས་བྱུང་བ་རེད།
བོད་ལྗོངས་སློབ་ཆེན་གྱི་སློབ་དཔོན་ཆེན་མོ་ལྷག་པ་ཆོས་འཕེལ་ལགས་ཀྱིས“རྩོམ་རིག་ནི་སྐད་དང་ཡི་གེར་བརྟེན་པ་གང་ཞིག རྩོམ་པ་པོས་སྤྱི་ཚོགས་ཀྱི་འཚོ་བར་མཛེས་དཔྱོད་ཀྱིས་དཔྱད་དེ་ཐོབ་པའི་མྱོང་བ་གཟུགས་བརྙན་གྱི་ལམ་ནས་མངོན་མཚོན་བྱེད་པ་ཞིག་ལ་འདོད”ཅེས་པ་ནི་སྡོམ་ཚིག་གནད་དུ་ཐིངས་པ་ཞིག་རེད་འདོད་ཅིང་། སྤྱི་ཚོགས་ཀྱི་འཚོ་བར་མཛེས་དཔྱོད་ཀྱིས་དཔྱད་དེ་ཐོབ་པའི་མྱོང་བ་ཞེས་པའི་ཚིག་ཟུར་ལ། རྩོམ་རིག་སྒྱུ་རྩལ་ནི་གཅིག་ནས་སྐད་ཆ་དང་ཡི་གེར་འཁེན་ཡོད་པ་དང་། གཉིས་ནས་མཛེས་དཔྱོད་ཀྱི་ཁམས་གསར་བ་ཞིག་བསྐྲུན་ཡོད་པ། གསུམ་ནས་ཡིད་བརྙན་དང་སྣང་བརྙན་གྱི་ལམ་ནས་མངོན་མཚོན་བྱས་ཡོད་པ། བཞི་ནས་འཚོ་བར་དཔྱད་དེ་ཐོབ་པས་ན་གསར་གཏོད་ཀྱི་ཆ་ངེས་ཅན་ལྡན་པ་བཅས་རྩོམ་རིག་སྒྱུ་རྩལ་ལ་ཡོད་འོས་པའི་ཁྱད་ཆོས་རྣམས་གསལ་ལེར་བསྟན་ཡོད་སྙམ། དེ་ལྟར་ཡིན་ན། སྙན་ངག་ཀྱང་གོང་གསལ་མཐའ་སྡོམ་དེ་ལས་མ་འདས་སྙམ།
འདིར་སྔོན་གླེང་གི་སྐོར་རེ་ཞིག་བཞག་ནས་རྨ་འོད་ལགས་ཀྱི《 ས་རུབ་ཁའི་སྙན་ངག》ཅེས་པ་འདི་ལ་རང་གི་ཀློག་སྟངས་དབང་བཙན་པར་བྱས་ཏེ་ཕྲན་དཔྱད་ལྟ་བུ་ཞིག་བགྱིས་ན། སྙན་ངག་པས་དེང་མའི་འཚོ་བ་རོལ་སྟངས་དང་ད་ལྟའི་འཚོ་བ་རོལ་ཕྱོགས་གཉིས་བསྡུར་བའི་ཚུལ་གྱིས་བྲིས་ཏེ། ང་ཚོའི་ཀུན་གཞིའི་ཟབ་ས་ན་བག་ལ་ཞ་ཡུན་རིང་བའི་འཚོ་བ་ཞིག་ལ་དྲན་གསོ་བྱེད་ཀྱིན་ཡོད་པ་འདྲ། དེང་མའི་འཚོ་བ་སྲོག་ཏུ་བྱས་པའི་ས་རུབ་ཁར་དགོང་བསང་གཏོང་བ་དང་། གྲིབ་སོ་གུག་རྗེས་ཀྱི་འབྲོག་ཐང་ལ་སྔར་མེད་ལྷིང་འཇགས་ཀྱི་ཁམས་གསར་བ་ཞིག་བསྐྲུན་པའི་མོད་ལ། ཕུ་ཆུའི་ལྷུང་སྒྲ་སྔར་ལས་གསལ་ལྷང་ལྷང་དུ་འཕོས་པ། ད་དུང་མཁའ་དབུགས་གཙང་སིང་ངེ་བས་བརྒྱན་པ་བཅས་ཀྱི་འཚོ་བའི་བརྙན་རིས་ཤིག་དང་། དུག་རླངས་ཕོག་པ་དང་འདྲ་བའི་མཁའ་དབུགས་བཙོག་པ་དང་དེང་གི་འཁྲུག་ཟིང་གི་འཚོ་བ། དབང་རྩ་ར་རོས་ཟིན་པ། ཁྲུས་རྒྱག་པ་དང་སྔུར་བ་འཐེན་རྒྱུ་ལས་ཕྱི་རོལ་ཁམས་ཀྱི་མཚན་སྨག་རིམ་གྱིས་འཐིབས་པའི་མོད་ལ་མུན་ནག་གི་མདུན་ནས་གྲིབ་མ་མགྱོགས་མོར་འགྲོ་བཞིན་པའི་སྣང་ཚུལ་གྱིས་མཚོན་པའི། དེང་མའི་རང་བྱུང་ཁམས་དང་ཉེ་བར་བཅར་བའི་ལྟ་ལུགས་གོམས་ལུགས་མང་པོ་ཞིག་དང་རྒྱང་བཀྱེད་ཚར་བར་དོགས་ཚོམ་དང་ཞེ་བློ་བདེ་བོ་མེད་པའི་གནད་ལྟ་བུ་ཞིག སྙན་ངག་གི་ཟ་ཟུར་གང་རུང་ལས་མཐོང་བར་མ་ཟད། སྙན་ངག་པ་ས་རུབ་ལ་ཉེ་དུས་དགོང་བསང་བཏང་བ་ན། བསང་མེ་དམར་པོ་དེས་མུན་པ་བརྔོས་ནས་འོད་ཟེར་འཐག་བཞིན་པའི་འཚོ་བའི་འདྲ་རིས་དེ་ལ་ཡིད་འཁྲེང་བའང་ཞོར་ལ་རྟོགས་ཐུབ། དེ་མིན་ད་དུང་དེང་གི་དུས་སུ། ས་རུབ་ལ་ཉེ་དུས། ཡུལ་མི་ཚོ། འོད་དང་མུན་པར་རྒྱང་བཀྱེད་དེ། ཡིག་ཚོགས་སྨྲེང་བའི་འཚེར་སྐད་ཀྱང་མུན་པའི་རྨིག་འོག་ནས་ལན་གྲངས་དུ་མར་མཆེད་འོང་ནའང་། རང་ཉིད་ཀྱི་སྔར་འདྲིས་སྔར་གོམས་ཀྱི་འཚོ་བ་དང་རང་ཉིད་སྔ་ས་ནས་བཏང་ཚར་བའི་ཡུལ་མི་ཚོས། འཛེམ་ཟོན་ཅི་ཡང་མེད་པར་སྔུར་བ་འཐེན་རྐྱང་དང་ཁྲུས་རྒྱག་ཞོར། རང་ཉིད་ཀྱི་ཕུང་བོར་དང་དོད་བྱེད་པ་ལས་རྣམ་ཤེས་ཀྱི་གཟུངས་འཛིན་བོར་དང་འབོར་བཞིན་པ་ལ་སྣང་དོགས་ཅི་ཡང་མེད་པ་མཐོང་བས། ན་ཟུག་གིས་གཟིར་བའི་སྙན་ངག་པས། ས་རུབ་ལ་ཉེ་དུས། རང་ཉིད་ཁོ་ནས་རང་གི་ནང་སེམས་ཡང་ནས་ཡང་དུ་བརྡར་ནས། འོད་ཟེར་བདས་པའི་མུན་ནག་གི་རྩིག་གྱང་འདི་ཉིད་ཀོ་བའི་ཕྱི་ཤུན་གྱི་སྐྱི་མོའམ་པགས་པ་སྲ་མོ་བཞིན་དགོག་ན་འདོད་པར། ང་རང་ངོས་ནས་གདུང་སེམས་མཉམ་བསྐྱེད་ཡོད།
སྙན་ངག་འདིའི་སྐད་ཆར་དབྱངས་འགྲོས་ཀྱིས་བརྒྱན་ཡོད་པར་མ་ཟད། རྩོམ་ནང་དུ་ཐོན་པའི་ཡིད་བརྙན་རྣམས་ཀྱིས་རི་མོའི་ཁམས་ཆེན་པོ་ཞིག་བསྐྲུན་ནས་སྙན་ངག་གི་བར་སྟོང་གླགས་ཡངས་པོར་ཕྱེས་ཡོད། སྙན་ངག་པས་གསར་རྩོམ་བྱེད་སྐབས་ཐ་སྙད་ཀྱིས་སྟོང་བའམ་ཡང་ན་སྨྲ་བསམ་བརྗོད་འདས་ཀྱི་ཚད་ལ་སླེབས་ན། ཚུལ་བབ་དེ་ལས་འགོང་ཐབས་ནི་ཅིས་ཀྱང་སྙན་ངག་གི་སྐད་ཆར་རོལ་དབྱངས་ཀྱི་སྲོག་ཞུགས་རྒྱུ་དང་སྙན་ངག་གི་ཁམས་ལ་རི་མོའི་འདག་ཞལ་བྱུག་རྒྱུ་དེ་ཡིན། ཐབས་འདི་གཉིས་ལས་སྙན་ངག་ནི་རོལ་དབྱངས་དང་རི་མོ། སྐད་ཆ་བཅས་གཞི་གཅིག་ཏུ་བསྲེས་པ་ལས་གྲུབ་པའི་སྒྱུ་རྩལ་རིགས་ཤིག་ཡིན་པ་མངོན་པར་བསྟན་ཡོད། སྙན་ངག་པ་རྨ་འོད་ཀྱིས་ཀྱང་རང་གི་ཚོར་བའི་འཕྱོ་འཇགས་དང་བསྟུན་ནས་ཚིག་དང་ཐ་སྙད་ཀྱི་སྲད་བུར་རོལ་དབྱངས་ཞུགས་ཡོད་པ། སྙན་ངག་གི་ནང་ཐོན་པའི་ཚིག་སྣ་ཐུང་ངུ་དག་གིས། ང་ཚོར་དབུགས་འཚུབ་བཞིན་པ་ལྟ་བུའི་བྲེལ་སྣང་གི་ཚོར་བ་ཞིག་སྟེར་བར་མ་ཟད། ད་དུང“ས་རུབ་ལ་ཉེ་དུས/ཉི་མ་དེ་གྲིབ་མའི/ཕུབ་ལྟ་བུར་གྱུར་རྗེས/རི་བོ་དག་མུན་པའི/སྒོ་སྲུང་དུ་འགྲེངས་རྗེས/ཆུ་དང་ཆུ་ཕྲན་འཇམ་ལྷུང་ལྷུང་གིས/སྒོ་ཐེམ་དུ་འབབ་པ་དྲན”ཞེས་པའི་བརྙན་མིག་ཏུ་དྲངས་པ་ནང་བཞིན་རི་མོའི་ཁམས་ཤིག་ཀྱང་བསྐྲུན་ཡོད་དོ།།
