སྲ་མཁྲེགས་རྭ་ཟུང་ཟངས་ཀྱི་ན་རོས་མཁའ་ཡི་རྒྱུ་སྐར་རྩེ་ལ་ལེན།།

གཡའ་སྤང་བྲག་རིའི་ཚལ་ལས་སྦྱངས་པའི་རྨིག་བཞིའི་རྩལ་གྱིས་གོར་མ་གཅོག །

བུ་ཡུག་འཚུབ་མས་ཁ་ཤུ་འདེབས་པ་ཁུ་རྩིད་ནག་པོའི་རྒྱུན་གྱིས་འགོག །

འཕར་སྤྱང་ལྟོགས་པས་ཉིན་མཚན་བྲེལ་བ་སྟངས་ཀ་ཙམ་གྱིས་ཟིལ་གྱིས་གནོན།།

ཤིང་དམར་བྱུགས་པའི་འཁྲི་ཤིང་འཁྱོག་པོས་སྣ་ཤ་ཚ་འཐེན་བྱས་ན་ཡང་།།

གཡག་སྒ་རྫོབ་པོའི་གོང་རྨེད་གོང་ཐག་སྔ་གཞུག་ཀུན་ཏུ་དཔྱངས་ན་ཡང་།།

ཁྱིམ་གཞི་སྨུག་པོའི་རེ་སྦྲ་ནག་པོ་རིང་བའི་ས་ལ་འགེལ་ཉིན་མོ།།

ངལ་དུབ་རྐང་འགྲོས་སྐྱོ་བས་རྔུབ་བཞིན་རེ་བའི་ཡུལ་ལ་རྣམ་པར་ལྡོག །

གནམ་གྱི་རྨུ་ཐག་ས་ལ་དཀྲི་ཉིན་བཙན་པོའི་འགྲོ་རོགས་ཁྱེད་ཡིན་ལ།།

རེ་སྦྲ་ནག་པོ་ཐགས་སུ་འཐག་ཉིན་རྒྱུ་སྤུན་འཐམ་འཁྱུད་ཁྱེད་ཡིན་ནོ།།

དགའ་སྤྲོའི་གནམ་ས་ཆ་ལང་རྡེབ་ཉིན་ཞལ་གྱི་འཛུམ་མདངས་ཁྱེད་ཡིན་ལ།།

མེད་མུག་མུ་ཏོའི་ཁ་ལྕེ་བསྲད་ཉིན་འཚོ་བའི་ཁ་ཞག་ཁྱེད་ཡིན་ནོ།།

གཞོན་པའི་རྨི་ལམ་སེམས་ཀྱིས་འཚོལ་ཉིན་བྱང་ཐང་རིང་མོ་ཁྱེད་ཀྱིས་བརྒལ།།

རྒས་པའི་རྣམ་ཤེས་ཁྱིམ་ནས་ཡལ་ཉིན་དུར་ཐང་སྐྱ་མོར་ཁྱེད་ཀྱིས་བསྐྱལ།།

གདོང་དམར་པ་ཡི་སྐྱིད་སྡུག་མཐའ་དག་ཁྱེད་ཀྱི་ཁུར་དུ་བབས་ན་ཡང་།།

ལེ་བདའ་ནག་པོའི་འཁང་ར་མེད་ལ་ཨུ་ཚུགས་སྲ་མོའི་ཕྱིར་ལྡོག་བྲལ།།

བྱང་གི་ཚྭ་ཁུ་ལྷོ་ལ་དབོར་དུས་དཔག་ཚད་གནམ་སའི་རྒྱ་ཁྱོན་བརྒལ།།

དབང་ཕྱོགས་ཚོང་ཟོང་ཆུ་ལྟར་འདྲེན་ཚེ་ཧུར་སྒྲ་དྲག་པོས་རི་ལུང་གཤགས།།

རིང་བའི་བཤུལ་ལམ་སྟོབས་ཀྱིས་བརྒལ་ཏེ་རྒྱབ་ལ་རྨ་ཡི་ཕྲ་བྱུང་ཡང་།།

བདག་པོས་བཀོད་འདོམས་གནང་བ་དེ་སྲིད་ཁྱེད་ཀྱི་ཤུགས་ལ་ཉམས་པ་མེད།།

དཔུང་བའི་ཤ་རྒོད་འཁྲུག་པ་དག་གིས་སྒང་ལ་ཕྲུ་མ་འདེབས་ཉིན་མོ།།

ཞེ་སྡང་སྨིན་མ་གཟེངས་པ་རྣམས་ཀྱིས་རཀྟའི་མཆོད་པ་བཤམས་ཉིན་མོ།།

སོ་ཚིས་སྣུམ་པོའི་ལོངས་སྤྱོད་དུ་མ་ཁྱེད་ཀྱིས་དྲངས་ཤིང་ཁྱེད་ཀྱིས་བསྩལ།།

དེས་ན་རྒྱལ་ཁའི་དགའ་བ་ཐོབ་པའི་ཆ་ཤས་ཤིག་ནི་ཁྱེད་མིན་ནམ།།

ཞགས་པའི་འཕྲུལ་འཁོར་སྐེ་ལ་བཏབ་ནས་གཤིན་རྗེ་དམར་པོའི་ཞལ་དུ་བསྟབས།།

དཔྱིད་དུ་འཇོ་བའི་ཁུ་རྩིད་འབལ་ནས་སྐྱེད་ཀའི་རུ་མ་སྣོད་ལ་བཅུག །

འོ་སྐོལ་འདྲིས་པར་བགྲང་རིང་ལོ་ཟླར་ཁྱེད་ཀྱིས་ང་ཚོ་མ་བསྐྱུར་ཏེ།།

རྔམ་གནག་གཡོ་སྒྱུའི་ཡིད་ལྡན་དག་གིས་གཟེངས་པའི་རུས་པ་འཇོམས་པར་བྱས།།

ཤ་དང་ཁྲག་གི་རོ་ལ་མྱངས་ནས་ཁྱེད་རང་ཟོས་ཤིང་ཁྱེད་རང་འཐུང་།།

ཀོ་དང་རྩིད་པའི་ཁུད་ལ་ཉལ་ཏེ་ཀྱལ་ཀའི་གཏམ་གྱིས་བར་སྣང་གཏུབས།།

ད་ནི་ཁྱེད་ཀྱི་རྨིག་རྗེས་ཙམ་ཡང་མཐོ་སྒང་འདི་རུ་རྙེད་དཀའ་བས།།

མ་འོངས་རྗེས་དྲན་བསྟི་བའི་གནས་སུ་ཁྱེད་རང་ལན་གཅིག་མཇལ་བར་ངེས།།