སད་དང་མ་སད་མི་འདུག

སྒྲེན་པོ།（ཟི་ལིང）

སྔོན་འགྲོའི་དབྱངས།

རྨི་ལམ་རྨིས་དང་མ་རྨིས་ནི

ཤི་གསོན་གཉིས་ཀྱི་གོ་མཚམས་འབྱེད་མཁན་ཡིན་ན

ད་ནི་སད་དང་མ་སད་མི་འདུག

རྣམ་ཤེས་ཕུང་བོའི་ལྷུམས་སུ་ཞུགས་དང་མ་ཞུགས་མི་འདུག

ད་ནི་གཏན་དུ་གཟིམས་པར་མཛོད་ཅིག་དང

རྨི་ལམ་མེད་པའི་དུས་རབས་ཤིག་རིང་སྟབས་ཀྱིས་བསླེབ་ལ་ཉེ

གཅིག

འཆི་བ་དང་གསོན་པ་གཉིས་ཀྱི་བར་གྱང་དེའི་མིང་ལ

རྨི་ལམ་ཞེས་བསྙད་པ་ཡིན་ན

གདོད་ནས་རྨི་ལམ་རྨིས་མ་མྱོང་བའི་རྣམ་ཤེས་ཁེར་རྐྱང་དེ་ནི

ཚོགས་དྲུག་སྣང་བའི་ཁམས་ན

གར་འགྲོ་གར་གཏད་མེད་པའི་སྦྲང་མ་ཞིག་དང་འདྲ་བར

ཕྱད་ཕྱོད་ངང་དར་ཅིག་ལུས་ཏེ

སྣང་བ་དང་སྣང་བ་འཁྲུལ་སའི་འདྲེས་མདོ་ན

ཁ་རྔོག་རླུང་ལ་བསྐུར་བའི་རྟ་ཕོ་དང་འདྲ་བར

འགྱུ་བ་མི་བརྟན་པའི་སྤྲིན་ཚོམ་ལང་ལོང་གི་རྗེས་སུ

རྨིག་རྡུལ་གཏོར་གྱིན་ཡོད་ངེས

ཡང་ན་སྣང་ལ་མ་ངེས་པའི་བར་མ་དོ་རུ

བདུད་ཀྱི་ཆོ་འཕྲུལ་ཅི་དགར་སྟོན་པའི

སྒྱུ་མ་མཁན་ཞིག་དང་འདྲ་བར

རྨི་ལམ་དང་རྨི་ལམ་གྱི་ཁྱོན

ནམ་མཁའི་གར་ཁྱབ་ཀྱི་སར་མུར་བསྲིངས་ཀྱང

ནམ་མཁའ་སྟོང་བ་འདིའི་ཞལ་ངོ་མི་ཁེབས་པ་བདེན་ན

ད་ནི་རྨི་ལམ་རྨིས་དང་མ་རྨིས་མི་འདུག

གཉིས།

རྣམ་ཤེས་ཀྱིས་བེམ་ཀོག་འདི་ཉིད

ཕུང་བོ་ལྷག་མ་མེད་པའི་ཟད་ཤིང་བཞིན་དུ་ཅམ་གྱིས་བསྐྱུར་ནས

དུས་ཡུན་རིང་ཙམ་འགྱངས་པས་ལན་ནམ

གང་ལྟར

ད་ནི་མེས་པོ་ལྷ་ལམ་ལ་འདྲེན་བྱེད་ཀྱི་རྨུ་ཐག་དེ

འཕྲུལ་སྣང་གིས་བསླེས་པའི་འཇའ་ཡི་དཔྱངས་ཟམ་དེ

མཐོང་རེག་གི་ཡུལ་དུ་མ་གྱུར་པར་ཡུན་རིང་འགོར

ཡོབ་ཆེན་སིལ་སིལ་སྒུལ་བྱེད་ཀྱི

རྨོག་དར་ཁྲོག་ཁྲོག་སྒྲེང་བྱེད་ཀྱི

རླུང་གི་ཞབས་རྗེས

མེ་ཡི་ཕྱག་ཟུང

ས་གཞིའི་སྐྱི་གཉེར་གྱི་གསེབ་ན་མི་འདུག

རྡུལ་འཚུབ་ལང་ལོང་དང་འགྲོགས་ནས་ས་ཆེན་གྱི་སྒལ་གཞུང་ལ་བྲེས་མྱོང་བའི་རུ་དར

ཉི་ཟེར་ལམ་ལམ་དང་བསྡེབས་ནས་ས་ཆེན་གྱི་མིག་ཀོང་ལ་བསྐྱིལ་མྱོང་བའི

ཐབས་ཤེས་ཀྱི་མཚོ་མོ

མཐོང་ལམ་ན་མི་འདུག

ཐོས་ཡུལ་ན་མི་འདུག

གཅིག་བྱས་ན

ད་ནི་འཁྱམས་ནས་ཡུན་རིང་འགོར་བའི་རྣམ་ཤེས་ཀྱིས

རྡོག་ལམ་རྨང་ནས་བོར་ཡོད་ཀྱང་སྲིད

ཡང་ན་ཕྱིར་ལམ་མ་རྙེད་པར་གཡང་ལ་ལྕེབས་ཡོད་ཀྱང་སྲིད

གཏན་དུ་ལོག་མ་ཐུབ་པའི་རྣམ་ཤེས་ལྡོམ་པོ་དེས་ལན་ནམ

ནམ་མཁའ་པང་དུ་བཏབ་ནས་ས་ཆེན་གྱི་གདོང་ལ་བལྟས་ན

དབྱངས་གསལ་གྱི་ལྗང་མྱུག་འདེབས་སའི་ས་ཞིང་གཤིན་པོ་ཐང་རྒོད་དུ་གྱུར

ལྷ་ཚོགས་ཁྲུས་ལ་རོལ་སའི་རྫིང་བུ་བསྐམས་འདུག

རུས་པའི་ཧ་རུ་རྒྱུ་བའི་གཤིས་གྱོང་གི་ཁྲག་རྒྱུན་རྨང་ནས་བསླད་འདུག

བྱ་རྒོད་ཀྱི་གཤོག་ལྕག་བྲག་ལ་བརྡབས་པ་ཡ་རེ་ང

རྒྱ་སྟག་གི་ང་རོ་དབྱིངས་ལ་བཏབ་པ་དོན་རེ་ཆུང

གསུམ།

ཡང་གཅིག་བྱས་ན

མངོན་སུམ་གྱི་ཁྲོད་ནས་ཁོ་ཁ་སྐོམ་དྲགས་པས

གཉིད་དུ་ཞུགས་ཏེ་རྨི་ལམ་གྱི་ཁམས་སུ་སོང་ནས

སྐོམ་ཆུ་ཡིད་ཚིམ་པ་ཞིག་འཐུང་འདོད་ཀྱང

རྨི་ལམ་གྱི་བར་གྱང་སྔ་མོ་ནས་ཆོམ་ཉིལ་ལེར་འགྱེལ་ཟིན་པས

ཁོས་རྣམ་ཤེས་ཀྱི་གཤོག་ཟུང་གཡར་ནས

མྱུར་མོར་ལུས་པོ་ལས་ཕྱིར་བུད་དེ

མདོག་འགྱུར་ད་བྱིད་ཅིག་གི་ཁོག་ཏུ་འཕོ་བ་གྲོང་འཇུག་བྱས

ཁོས་གམ་གྱི་རྫ་སྣོད་ཅིག་ལས་ཆུ་ཧམ་འཐུང་བྱེད་ལ་བྲེལ་སྐབས

གློ་བུར་གར་ཡོང་མ་ངེས་པའི་མི་ཞིག་གིས

ཙབ་ཙུབ་ཀྱི་ཞེ་བློ་དང་བཅས

ཁོ་གནས་སའི་རྫ་མའི་ཁ་ལེབ་དམ་པོར་བརྒྱབ

དེ་ལྟར་ཁོའི་རྣམ་ཤེས

རྫ་བུམ་ནང་དུ་བཅུག་ནས་དབུགས་འཐུམ

ཕྱིར་ཕུང་བོའི་ཁོག་ཏུ་ཞུགས་བསམ་རུང

ཁ་ལེབ་བཅད་རྒྱས་བསྡམས་འདུག་པས་ན

རྣམ་ཤེས་གཏན་དུ་ལོག་རྒྱུ་མ་བྱུང

ཁོས་སྟེས་དབང་ཞིག་ལ་བསྒུག་རྒྱུ་ལས་འོས་མེད

འཇིག་རྟེན་འདིར་སྟེས་དབང་ག་ཙམ་ཡོད་དམ

རྫ་བུམ་གྱི་ཁེབས་གཅོད་ནམ་ཕྱེས་ན

དེ་དུས་ཁོ་ཐར་བའི་ཉིན་མོར་བརྩིས་ཆོག

དེ་ལྟར་ཁོ་གཏན་དུ་གཟིམས་སོང

ཡང་ན་གཏན་དུ་སད་ཐབས་མ་བྱུང

འུ་ཅག་གི་མེས་པོས

ས་ཆེན་ཨ་མའི་པང་བ་རུ

གངས་ཀྱི་སེང་གེ་སྲབ་མེད་བཞིན

གཡུ་རལ་གསིག་གིན་གསིག་གིན་ཅེ་སྤྱང་དང་འཐབ་མོ་བཀྱེ་མྱོང

རྫ་ཡི་འབྲོང་གཡག་དར་མ་བཞིན

རྭ་རྩེ་རྡོར་གྱིན་རྡོར་གྱིན་རིགས་རུས་ཀྱི་ཕ་ཁོངས་མ་རྒྱུད་བསྐྱེད་མྱོང

ནགས་ཀྱི་ཁུ་བྱུག་སྔོན་མོ་བཞིན

མགྲིན་པ་སེལ་གྱིན་སེལ་གྱིན་སྲིད་པའི་གླུ་ཆུང་ངག་ལ་བསྐྱིལ་མྱོང

འབྲོང་ལ་སྣ་ལོ་བཏུལ་ནས་སྒོ་ཟོག་ཏུ་བཀུག་མྱོང་བའི

རིགས་རྒྱུད་ཀྱི་རྣམ་ཤེས་ད་ཆ་གང་དུ་ཡོད

རྐྱང་ལ་ཁ་ལོ་བཏུལ་ནས་ཞོན་རྟ་རུ་བསྒྱུར་མྱོང་བའི

སྙིང་སྟོབས་ཀྱི་ས་བོན་དུས་འདིར་གང་དུ་སྦས་ཡོད

བཞི།

མེས་པོ་ང་ཚོ་དང་བྲལ་ནས་རིང་ཙམ་འགྱངས་ཀྱང

ཁོས་སྐར་ཁུང་ན་འུ་ཅག་ལ་མགོན་སྐྱོབ་གནང་གིན་ཡོད་ངེས

མེས་པོས་འུ་ཚོ་མགོན་མེད་སྐྱབས་མེད་ཀྱི

དྭ་ཕྲུག་བཞིན་དོར་མི་སྲིད་ནའང

འུ་ཚོས་མེས་པོ་བཞུགས་མྱོང་སའི་ཕ་ས་བསྐྱུར

མེས་པོའི་བླ་སྲོག་འཁོར་སའི་ཕ་གཞིས་བསྐྱུར

མེས་པོའི་རིང་གི་གོན་པ་ཆ་ལུགས་བསྒྱུར་ཐལ་ཆེ་བས

ད་ཆ་མེས་པོའི་རྣམ་ཤེས་དེང་མའི་ཕ་ཡུལ་ལ་འཁོར་ནའང

ད་ལྟའི་འུ་ཅག་གི་སྡོད་གནས་གསར་བ་འདི་རྙེད་ཐབས་བྲལ

ད་ལྟའི་འུ་ཅག་གི་གནས་སྟངས་མཐོང་ཐབས་བྲལ

ད་ལྟའི་འུ་ཅག་ལ་མགོན་སྐྱོབ་གནང་ཐབས་བྲལ

འུ་ཚོས་མེས་པོ་ལ་ཁྲེལ་མེད་བྱས་སོང

འུ་ཚོས་མེས་པོ་ལ་ཁོང་ཁྲོ་བསླངས་སོང

འུ་ཚོས་མེས་པོའི་ཞེ་བློ་གཏིང་ནས་ཆད་དུ་བཅུག་སོང

མེས་པོའི་དཔུང་དང་མགོན

སྐྱབས་དང་སྐྱོབ་པ་མེད་པའི་འུ་ཅག

རྣམ་ཤེས་ཀྱི་གཟུངས་འཛིན་མ་ཁུགས་པར

དུས་ཡུན་ག་ཙམ་ལ་གསོན་ཐུབ་བམ

མེས་པོའི་བླ་སྒུལ

མེས་པོའི་བརླ་བརྡུངས

མཚན་ཕྱེད་དུ

དེང་མའི་མཁར་ཤུལ་ཉུལ་ནས

ཕངས་སེམས་ཀྱི་མཆི་མ་ཕྲོམ་ཕྲོམ་གཏོར་མཁན་དེ་མེས་པོ་ཡིན་ངེས

ན་ཟུག་གི་རྐན་སྒྲ་ཐག་ཐག་འཆའ་བཞིན་པ་དེ་མེས་པོ་ཡིན་ངེས

ད་ནི་མེས་པོ་དང་ཕྱི་རབས་པའི་བར་གྱི

སྦྲེལ་ཐག་ཆད་ནས་ཧྲེང་ཧྲེང་བོར་ལུས་པའི

དུས་རབས་ཤིག་གི་མགོ་བརྩམས་བྱུང

ཡང་ན་མེས་པོ་ལྷ་ལམ་འགྲིམ་བྱེད་ཀྱི

རྨུ་ཐག་རྨང་ནས་ཆད་སོང

ཡང་ན་མེས་པོ་མི་ཡུལ་ལ་ལོག་བྱེད་ཀྱི

ཉི་ཐིག་རྩད་ནས་བོར་སོང

ལྔ།

དེང་གི་དུས་ནི

རྣམ་ཤེས་འཁོར་སའི་ཡུལ་དང

རྣམ་ཤེས་ཞུགས་སའི་གླགས་མེད་པའི

དུས་ཚིགས་ཤིག་ཏུ་འཁེལ་འདུག

ཡང་ཅིག་བྱས་ན

འཁྱམས་ཡུན་རིང་བའི་རྣམ་ཤེས་ཀྱིས

རྡོག་སྣེ་ཟིན་ནའང

ཕྱིར་ལམ་སྙེག་པའི་བར་གླགས་སུ

ཆར་ཞོད་ཆེན་པོ་ཞིག་དང་འཕྲད་པས

ཁོ་ཤོག་བུ་བཞིན་ཕྱི་རློན་ནང་བརྟོལ་བྱས

རྣམ་ཤེས་རྡོ་བ་ཡིན་མི་སྲིད

རྡོ་བ་ཆུ་ལ་སྦངས་ཀྱང་བངས་མི་སྲིད

བརླན་དང་འཕྲད་ན་ཚེ་སྲོག་འབྱུང་བ་བཞིན

གོད་ཆག་ཐེབས་པའི་རྣམ་ཤེས

སྐྱེ་དངོས་དང་རྩི་ཤིང་གཞན་པའི་ལྷུམས་སུ་ཞུགས་ཡོད་ཀྱང་སྲིད

གང་ལྟར

རྣམ་ཤེས་འཁོར་སའི་གངས་རི་ཙད་པས་བཞུས

བླ་སྲོག་བྲན་སའི་གཙང་པོ་སྐོམ་པས་གཟིར

དྲུག

ད་ནི་རྣམ་ཤེས་འཚོང་སའི་གར་སྟེགས་ཆེན་པོ་ཞིག་འབྱེད་ལ་ཉེ

རྟ་ལམ་མ་རྙེད་པའི་རྣམ་ཤེས

དུར་ལམ་མ་བསྙབས་པའི་རྣམ་ཤེས

དུར་ཡིག་མ་བརྐོས་པའི་རྣམ་ཤེས

སྐྱས་ལམ་བློས་མ་ཐོངས་པའི་རྣམ་ཤེས

ཞིང་ཚིགས་མ་བཀར་བའི་རྣམ་ཤེས

འཆི་ཁུངས་མ་མཐོང་བའི་རྣམ་ཤེས

འཆི་རྐྱེན་མ་རྟོགས་པའི་རྣམ་ཤེས

སྒོའི་ཕྱི་ཁྱམས་ལས་མ་ཐར་བའི་རྣམ་ཤེས

ལུས་རྟེན་མ་རྙེད་པའི་རྣམ་ཤེས

རྡོག་ལམ་བོར་བའི་རྣམ་ཤེས

རྣམ་ཤེས་ལྡོམ་པོའི་ཚོགས

གྲོག་ཚང་ཁའི་རྡོ་ལེབ་བླངས་རྗེས་ཀྱི

གྲོག་མ་མིག་མེད་ཀྱི་ཚོགས་དང་འདྲ་བར

གང་ལ་འདུར་འདོད་ཀྱི་བློས་ཡང་ཡང་བསྐུལ་ནའང

ཤར་ལྷོ་ནུབ་བྱང་གི་དབྱེ་མཚམས་མ་ངེས་པས

ཉོ་ཚོང་ཁྲོམ་ར་ན་རེངས་རེངས་པོར་ལུས་འདུག

ཡང་ན་གསོན་དུ་རེ་བའི་མིག་ཟུང

ཅེ་རེ་ལོང་བར་ཧད་འདུག

རྣམ་ཤེས་ཀྱང་ལུས་རྟེན་གྱི་ཁོག་ཏུ་བདེ་བར་ཞུགས་ས་མེད་ན

རྨི་ལམ་གྱི་རྩིག་གྱང་ཡང་ཆོམ་ཉིལ་ལེར་འགྱེལ་ཚར་ན

ད་ནི་སད་དང་མ་སད་མི་འདུག་ཨང

ཉིས་སྟོང་བཅོ་བརྒྱད་ལོའི་སྤྱི་ཟླ་བརྒྱད་པའི་ཚེས་གཉིས་ཉིན།

ཡུལ་ཟི་ལིང་གི་རང་ཁྱིམ་ནས་གྲུབ་པར་བྱས།

སྒྲེན་པོ། དངོས་མིང་ལ་བནྡེ་སྐྱབས། 1985ལོའི་ལོ་མཇུག་ཏུ་རེབ་གོང་བཙན་མོ་སྟག་ཡན་ཞེས་པའི་རོང་མ་འབྲོག་གི་རུ་སྡེ་ཆུང་ངུ་ཞིག་ནས་སྐྱེས། 2005ལོ་ནས2009ལོའི་བར་ནུབ་བྱང་མི་རིགས་སློབ་ཆེན་ནས་དངོས་གཞི་བཏོན། 2009ལོ་ནས2012ལོའི་བར་དུ་ནུབ་བྱང་མི་རིགས་སློབ་ཆེན་ནས་ཞིབ་འཇུག་སློབ་མ་བཏོན། བཀའ་དྲིན་གསུམ་ལྡན་གྱི་མཛུབ་སྟོན་དགེ་རྒན་བདུད་ལྷ་རྒྱལ་མཆོག་གི་དྲུང་ནས་བོད་ཀྱི་དེང་རབས་རྩོམ་རིག་གི་སྐོར་ལ་བག་ཆགས་ཙམ་བཞག་མྱོང་། ཉིས་སྟོང་བཅོ་ལྔ་ལོར་སྐབས་བརྒྱད་པའི་སྦྲང་ཆར་རྩོམ་རིག་བྱ་དགའ་ཐོབ། ཉིས་སྟོང་བཅུ་བདུན་ལོར《ཐེ་ཀོར་གྱི་སྙན་ངག་གཅེས་བསྡུས》ཞེས་པའི་བོད་འགྱུར་མ་ཀན་སུའུ་མི་རིགས་དཔེ་སྐྲུན་ཁང་ནས་པར་དུ་བསྐྲུན་ནས་བཀྲམ། ད་ལྟ་མཚོ་སྔོན་རྒྱང་སྒྲོག་བརྙན་འཕྲིན་ཁང་བོད་སྐད་རླུང་འཕྲིན་དུ་གསར་འགྱུར་ལོ་ཙཱ་དང་། གསར་འགྱུར་རྩོམ་སྒྲིག གསར་འགོད་པ་བཅས་ཀྱི་ལས་ཀ་གཉེར་མུས་ཡིན།