ཁྱེད་ཀྱིས་བདག་ལ་བཅངས་པའི་ལྷད་མེད་ཆགས་ཞེན་དེ་ནི
གཞན་སུ་དང་གང་གིས་ཀྱང་ཚོར་བ་མིན་པར
ལུས་ཀྱི་སྤུ་ལོང་བྱེ་བའི་མགོ་རྟིང་ལ
ཉེ་བར་འཁྱུད་པའི་དཔྱིད་ཀྱི་རླུང་བུ་ཇི་བཞིན
བདག་གི་འདོད་ཞེན་གྱི་ཚོར་རྟོག་གིས་ཅི་ཡང་རྟོགས་ནུས
ཁྱེད་ཀྱིས་བདག་ལ་བཅངས་པའི་མི་ཕྱེད་བརྩེ་ཞེན་དེ་ནི
གཞན་སུ་དང་གང་གིས་ཀྱང་ཚོར་བ་མིན་པར
ངང་བ་དཀར་མོའི་འཇམ་མཉེན་གཤོག་སྟེང་དུ
ཉི་འོད་ཀྱིས་སྒྱུར་བའི་མཚར་སྡུག་རྐང་སྟབས་ཇི་བཞིན
བདག་གི་དུངས་ཞེན་གྱི་ཤེས་ཚོར་གྱིས་ཅི་ཡང་གོའོ
བདག་འདུ་འཛི་ཆེན་མོའི་བབ་ཅོལ་ལ་བྱོལ་ཏེ
རང་བྱུང་སྐྱེད་ཚལ་དུ་གཅིག་པུར་སྡོད་ཚེ
བསུང་ངད་འཐུལ་བའི་འདབ་སྟོང་གི་དམར་མདངས་ལས
ཁྱེད་ཉིད་ཀྱི་མཆུ་སྒྲོས་ཀྱི་ངག་ཚིག་ཅི་ཡང་ཐོས་བྱུང
ཚོགས་ཀྱི་དབུས་སུའམ་ལམ་གྱི་གཞི་མདོ་རུ
གཞན་དང་ལྷན་དུ་ཁྱེད་ཉིད་ལ་འཕྲད་པས་ན
གཞན་སུ་དང་གང་གིས་ཀྱང་མཐོང་བ་མིན་པར
བདག་གིས་ཁྱེད་ཀྱི་སོ་འཛུམ་དང་མིག་རྫིའི་འོག་རོལ་ཏུ
མཛེས་རྒུར་སྦ་བའི་འདོད་ཞེན་གྱི་མེ་སོན་དེ་ཉིད
བདག་གི་ཆེད་དུ་ནམ་ཞར་འཛིན་པ་མངོན་པར་མཐོང་བྱུང
ང་ཚོ་ཤིན་ཏུ་འཁྲེང་གིན་ཕན་ཚུན་གྱེས་པས་ན
གཞན་སུ་དང་གང་གིས་ཀྱང་ཚོར་བ་མིན་པར
བདག་གིས་ཁྱེད་ཀྱི་མིག་ཟུར་དང་ཉེ་བར་འགྲོགས་པའི་རྣ་ལམ་དུ
ཞེན་ཆགས་ཀྱི་བསིལ་འཇམ་རླུང་བུས་སྐྱོད་ཀྱིན་པའི
གནག་སྣུམ་མཉེན་པའི་སྐྲ་ལོ་ཡི་འཁྲིལ་བག་གིས
གྱེས་བྲལ་གྱི་གདུང་དབྱངས་ཤུབ་བུར་འཐེན་པ་ཐོས་བྱུང་ངོ
༢༠༡༥.༤.༦
