དབྱངས འདི་ལྟར་ཕྱོགས་བཞི་ནས་མཆེད་ཡོང་དུས
ངས་ཅི་ཞིག་གི་འབོད་པ་ཐོས་བྱུང
རྒྱང་རིང་དུ་བཞུད་ཟིན་པ་དེ་དག་དང
རྒྱང་རིང་ན་འོང་གིན་པ་དེ་དག
ད་དུང་ཉེ་གམ་དུ་སླེབས་ཡོད་པ་འདི་དག་གི
སྲ་ཞིང་མཉེན་པའི དྲོ་ཞིང་གྲང་བའི
དགོད་ཅིང་ངུ་བའི བརྟན་ཞིང་གཡོ་བའི
དབུགས་རྒྱུན་དྲག་པོ་ཞིག་ཚོར་ཡོང་གི
ཉོན་དང
སུ་ཞིག་གིས་གངས་ཀྱི་ཁོང་གསེང་ན་བསང་འབོད་བྱེད་ཀྱིན་འདུག
སུ་ཞིག་གིས་སྤང་གི་གཞི་དཀྱིལ་ན་རྫི་གླུ་ལེན་གྱིན་འདུག
སུ་ཞིག་གིས་ཆུ་བོའི་འགྲམ་ངོགས་ན་མཛའ་གཞས་གྱེར་གྱིན་འདུག
ཡང་སུ་ཞིག་གིས་རང་སེམས་ཀྱི་ཁུད་དུ་རོལ་དབྱངས་འགུགས་ཀྱིན་འདུག
འདི་དག་སུ་ཞིག་རེད ཁྱེད་རེད་དམ་ང་རེད
ཡང་ན་ཐང་ཆེན་གྱི་དཀྱེལ་རྒྱ་ཁོག་ལ་བཅུག་པའི་འབྲོག་པ་དེ་རེད
ཡང་ན་འབྲུ་དྲུག་གི་བང་མཛོད་ལག་ལ་བཟུང་བའི་ཞིང་བ་དེ་རེད
ཡང་ན་དབྱངས་གསལ་གྱི་སྦྱོར་ཀློག་ངག་ལ་སྐྱོར་བའི་སློབ་བུ་དེ་རེད
ད་དུང་ཉོན་སྡོད་དང དབྱངས་དེ་མུ་མཐུད་དུ་གྲག་འོང་གིན་འདུག
སྦྲ་ནག་གི་གོང་ཁ་ལས་འཕོས་པའི་དུད་ཞགས་དེ་དང
དུད་ཞགས་དེས་བསྐྱེད་ཅིང་གསོས་པའི་དམར་སྨུག་གི་ངོ་གདོང་དེ་དག
ངོ་གདོང་དེ་དག་ལ་འཁྱུད་པའི་འཛུམ་མདངས་དང་མིག་ཆུ་དེ་དག
ཁྱེད་ཀྱིས་གནས་གང་རུང་ནས་ཐོས་ཡོང་གིན་མི་འདུག་གམ
དེ་ནི་བགྲེས་སོང་ཞིག་གི་འགྲོ་དྲུག་སྒོམ་པའི་གསོལ་འདེབས་དེ་ཨེ་རེད
དེ་ནི་ཕོ་གསར་ཞིག་གི་དཔའ་སྤོབས་བཏེགས་པའི་ཀི་རྒྱངས་དེ་ཨེ་རེད
དེ་ནི་སྨན་ཆུང་ཞིག་གི་དུངས་སེམས་བསྣམས་པའི་བག་ངུ་དེ་ཨེ་རེད
དེ་ནི་བྱིས་པ་ཞིག་གི་རྩེད་ར་བསྒྲིགས་པའི་དགའ་འབོད་དེ་ཨེ་རེད
དེ་ནི་ཅིས་ཀྱང་ཡིན་དགོས་ཏེ དབྱངས་དེ་ཐོག་མར
ཕ་མེས་གང་ཞིག་གི་རལ་བའི་ཚི་དྲེག་ལས་མཆེད་དེ
ནམ་མཁའི་ངོས་ལ་ཤེས་རིག་གི་འཇའ་རིས་ཤིག་ཕབས་ཤིང
ས་གཞིའི་སྟེང་ལ་བློ་གྲོས་ཀྱི་ཕ་མཁར་ཞིག་བརྩིགས་དུས
འུ་ཅག་གི་རྒྱུད་ལ་སེར་པོ་གསེར་ལས་དཀོན་ཞིང
དཀར་པོ་དུང་ལས་དཀར་བའི་ཕ་ནོམ་ཞིག་བཞག་ཡོད་པ་རེད་ཨང
ང་ཚོ་ལ་དབྱངས་ཀྱི་ནང་བཅུད་དེ་ཡོད་སོང་བས
གྲང་ངར་གྱི་མདུན་དུ་དཔུང་རྗེན་ལ་སྡོད་པའི་བཟོད་བསྲན་དེ་གོམས་ཡོད
ང་ཚོ་ལ་དབྱངས་ཀྱི་ནང་བཅུད་དེ་ཡོད་སོང་བས
དཀའ་སྡུག་གི་མདུན་དུ་མིག་ཆུ་མེད་པའི་གཤིས་ཀ་དེ་འབྱོར་ཡོད
ང་ཚོ་ལ་དབྱངས་ཀྱི་ནང་བཅུད་དེ་ཡོད་སོང་བས
འགྲོ་དྲུག་མ་རུ་སྒོམ་པའི་བྱམས་སེམས་དེ་འཁྲུངས་ཡོད
ཨ
འདི་ནི་ནམ་མཁའི་རྒྱ་ཁྱོན་གྱིས་གཞལ་མི་ཐུབ་པའི་དབྱངས་དེ་ཡིན
འདི་ནི་ས་གཞིའི་འདེགས་ཤུགས་ཀྱིས་ཐེག་མི་ཐུབ་པའི་དབྱངས་དེ་ཡིན
འདི་ནི་འུ་ཅག་གི་ཤ་དང་རུས་པའི་གསེང་ན རྩ་དང་ཁྲག་གི་ལམ་ན
སྙིང་དང་གློ་བའི་ངོས་ན་ནུར་ནུར་དུ་མཆེད་པའི་དབྱངས་དེ་ཡིན
དབྱངས་འདི་མ་ཆད་ཚེ ང་ཚོས་ད་དུང་མགོ་བོ་དགྱེ་ནས་མཁའ་དབྱིངས་ལ་བལྟ་ཆོག
དབྱངས་འདི་མ་འགགས་ཚེ ང་ཚོས་ད་དུང་རྒྱང་རིང་གི་ལམ་སྣེ་འཚོལ་ཆོག
དབྱངས་འདི་མ་བོར་ཚེ ང་ཚོས་ད་དུང་སང་ཉིན་གྱི་སྒོ་མོ་ཕྱེ་ཆོག
དབྱངས་འདི་མ་ཡལ་ཚེ ང་ཚོས་ད་དུང་རང་ཉིད་ཀྱི་རྩ་བ་རྙེད་ཆོག
ཡིན་ན་ཡང དབྱངས་འདི་ལ་བདག་པོ་རྒྱག་མཁན་ག་ཚོད་ཡོད
ནམ་མཁའ་མཐོངས་ཆེ་ཡང་བྱ་རྒོད་ཤུགས་ཀྱིས་འཕུར་བའི་གཤོག་སྒྲ་དེ་མེད་པ་ཅི་རེད
ས་གཞི་ཁོད་སྙོམས་ཀྱང་རྟ་མཆོག་བང་གིས་རྒྱུག་པའི་རྨིག་སྒྲ་དེ་མེད་པ་ཅི་རེད
མི་སེམས་གཏིང་ཟབ་ཀྱང་གཉུག་མའི་སེམས་གཤིས་ཁྱེར་བའི་དབྱངས་རྟ་དེ་མེད་པ་ཅི་རེད
འོན་ཀྱང དེ་རིང་ངས་ད་དུང་ཕྱོགས་བཞི་ན་གྲག་གིན་པའི
དབྱངས་འདིའི་ཁུད་དུ་མིག་ཆུ་རྡོག་གཅིག
འདི་ལྟར་འཕང་ཨེ་ཆོག
