མཚན་མོ་དེར
ཨ་མའི་ནུབ་ཇའི་བྲོ་བ་མྱོང་ཞོར
ཨ་ཕའི་གོ་འདབས་ཀྱི་གཏམ་རྒྱུད་ལ་ཉན་དུས
ངས་སྒྲོན་མེ་ཡུན་གྱིས་འབར་ནས་དལ་གྱིས་མ་གཟིམ་ན་འདོད
ཐབ་ཀྱི་མེ་ཕུང་དེ་སྒྲོན་མེ་ལས་གསལ་ནའང
འཛུམ་དཀར་གྱི་འོད་ཕུང་ཕྲ་མོ
སྦྲ་ནང་གི་ནང་མི་ཚོའི་ངོ་གདོང་ལ་ཕོག་དུས
ངས་སྒྲོན་མེ་ཤུགས་ཀྱིས་འབར་ནས་ཡུན་གྱིས་མ་གཟིམ་ན་འདོད
མཚན་མོ་དེར
སྦྲ་ནག་གི་འཚོ་བ་སེམས་ལ་རུམ་ནས
སྦྲ་ནང་ལ་འཕྲོས་པའི་སྒྲོན་མེ་དེ་དྲན་ན
མེ་ལྕེ་ཆུང་ངུས་ནགས་ཚལ་ཆེན་པོ་སྦར་བའང་ཤེས་འོང
མཚན་མོ་དེར
རྩྭ་ཐང་དྲན་དྲགས་པས
སྦྲ་ནག་མཁོ་དྲགས་པས
སྒྲོན་མེ་གཅིག་པུར་བསྙེས་ནས་འབར་ན་འདོད
