ཁྱེད་རང་ལམ་ལ་ཆས་དུས
ངའི་སེམས་སུ་གྱེས་གདུང་གི་རི་རབ་ཉིལ་བྱུང
རྡུལ་སྨུག་ཁད་ཅིག་ལ་འཐིབས་ནས
ཡ་ཆུང་གི་བྱང་ཁོག་ཡུན་གྱིས་བསྒྲིབས
ཆུ་མོས་ངུ་སྐད་སྒྲོག་ཅིང རྡོ་བའི་མིག་ཆུ་ཤམ་ཤུམ
བགྲང་བྱ་གཉིས་མཚར་སྡུག་གི་རྨི་ལམ་ཁྲོད་བཞུད་སོང
བགྲང་བྱ་གཉིས་འཁྲེང་སེམས་དང་རེ་བཞག་ངང་ཚར་སོང
བགྲང་བྱ་གཉིས ཆུ་ཚོད་སྐར་ཆ་གཉིས
བགྲང་བྱ་གཉིས སྐར་ཆའི་ཡང་ཆ་གཉིས
གློ་བུར་དུ ཁྱེད་ཉིད་ལྷོ་བཞུད་ཁྲུང་ཁྲུང་དང་བསྡོངས་ནས
ངའི་ཡིད་སེམས་ཀྱི་དབྱར་གཞུང་ལ་ཕྱི་མིག་བཞག
ཁྱེད་ཉིད་ཐོ་རེངས་སྐར་ཆེན་དང་འགྲོགས་པས
ངའི་མཚར་སྡུག་གི་རྨི་ལམ་སིལ་བུར་གཏོར
ད་ནི ངའི་ཁོར་ཡུག་ཡོད་ཚད་ཡ་ང་བའི་མྱ་ངམ་བྱེ་ཐང་ཡིན
ངའི་ཡིད་སེམས་མཐའ་དག་མ་མེད་པའི་ཤེའུ་ཆུང་ཁེར་འགྲོ་ཡིན
ཁྱེད་ཉིད་རྒྱང་དུ་ཆས་རྗེས དགུན་གསུམ་བུ་ཡུག་རྒྱ་སྟག་བཞིན་འཚུབ་པའམ
དབྱར་གསུམ་ཚ་གདུང་མེ་དཔུང་བཞིན་འབར་དུས
བདག་སེམས་བདེ་ལ་འབབ་པའི་གོ་སྐབས་མ་མཆིས
དབྱར་དགུན་སྟོན་དཔྱིད་མེད་པར
ཉི་མ་སུམ་བརྒྱ་དྲུག་ཅུར སེམས་ཁྲལ་རྦ་རླབས་སུ་འཁྲུལ་ནས་ནམ་ཡང་འཇགས་མ་ཐུབ
ཁྱེད་རང་ལམ་ལ་ཆས་དུས ངའི་འགྲོ་འདུག་གོམ་ཁ་ཁྱར་ཁྱོར སྨྲ་བརྗོད་ཚིག་འགྲོས་ལྡབ་ལྡིབ
ཨ… …ཁ་སང་གི་ཡིད་འོང་གཏམ་རྒྱུད
དེ་རིང་གི་དམྱལ་བའི་སེམས་ཁམས
སང་ཉིན་གྱི… …
གང་ལྟར ས་འབའ་ཡུལ་མེ་ཏོག་ལུང་བར
རྨིག་བཞི་རྟ་ཕོས་མི་ཆོད་ཀྱང
ངའི་སེམས་པས་ཉིན་སྐོར་མཚན་སྐོར་རྒྱག་ངེས
