འབྲོག་པ་ཕྱུག་ལོ་སྦྲ་སྒོར་བུད་དེ་གསེར་ཆུའི་ཁ་དོག་ལ་ལྟ་བཞིན་ཤུགས་རིང་ལན་འགའ་བྱས།

        ཆར་ཞོད་ཆེ་བའི་དབྱར་དུས་འདིར། གསེར་ཆུ་ནི་རབ་ཏུ་བྲུག་སྟེ་ཁ་དོག་ཁམ་ནག་ཏུ་གྱུར་ལ། རླབས་ཀྱི་ཟེགས་མ་དགུང་ལ་གཏོར་བཞིན་གསེར་ཁོག་ཏུ་རྔམ་སྟབས་ཀྱིས་བཞུར་གྱིན་འདུག

        ཆར་བ་ཤག་ཤག་ཏུ་འབབ་ཀྱིན་ཡོད་མོད། ཕྱུག་ལོས་ཆར་ལྭ་ལྗང་གུ་དེ་མགོ་ལ་འཐེན་ཞོར་ཡང་བསྐྱར་སྦྲ་སྒོ་ནས་ཁ་ཕྱིར་འཁོར་ཏེ། གསེར་ཆུའི་ཕ་རོལ་གྱི་བཀྲ་ཤིས་ལུང་པའི་ཤར་ངོས་སུ་རྩྭ་ལ་རོལ་བཞིན་པའི་ཁོང་ཚང་གི་ནོར་ཁྱུ་ལ་ལྟ་ཙམ་བྱས།

        ཆར་ཞོད་ཆེ་བའི་ལོ་འདི་དག་གི་རིང་ལ། ཕྱུག་ལོས་ད་བར་གསེར་ཆུའི་ཕ་རོལ་གྱི་དགུན་སའི་ནང་གི་ནོར་ཁྱུ་དག་ཐེངས་ག་ཚོད་ཅིག་ལ་དབྱར་སར་བདས་པ་ཁོ་རང་གིས་ཀྱང་རྩིས་ལ་མི་ཐེབས།

        ཁོ་རྟག་པར་གསེར་ཆུ་ལ་རྐང་བགྲོད་བྱས་པས་ཁོའི་སྒྱིད་པར་སེར་ག་གས་འདུག་ལ། རྐང་ལག་ལ་ཆུ་སེར་གྱི་ནད་ཀྱིས་ཟིན་ཡོད་པ་མ་ཟད། ཕྱུག་ལོའི་ཆུང་མ་གཡང་འཛོམས་ལའང་ཆུ་སེར་གྱི་ནད་ཡོད་པས་ཁོང་བཟའ་ཚང་གང་བོས་རེ་བ་ཆེ་ཤོས་ནི་གསེར་ཆུ་ལ་ཟམ་པ་ཞིག་འཕེན་ཐུབ་པ་དེ་ཡིན།

        སྟབས་ལེགས་པ་ཞིག་ལ། ཉེ་ལམ་ཡུལ་ཚོ་སྲིད་གཞུང་གིས་ཁོ་ཚང་གི་རུ་ཐད་ཀྱི་གསེར་ཆུ་ལ་ཟམ་པ་ཞིག་འཕེན་པར་ཐག་བཅད།

        ཟམ་པ་འཕེན་མཁན་གྱི་གླ་པ་དག་དུས་ལྟར་བསླེབས་བྱུང་། ལས་ཀ་བ་དག་ནི་རྒྱ་མི་འགའ་ཡིན་ལ། དེའི་ནང་དུ་ཀྲང་ཅི་ཧྭ་ཟེར་བའི་འགོ་བ་ཞིག་ཡོད།

        ཕྱུག་ལོས་ཟམ་པ་ལས་མཁན་ཚོར་དམིགས་བསལ་གྱིས་གཟིགས་སྐྱོང་གནང་བཞིན་འདུག གསེར་ཆུ་ལ་ཟམ་པ་འཕངས་ན་སྤྱིར་གསེར་གཞོང་སྡེ་བ་ལ་ཕན་པ་དང་། སྒོས་སུ་འབྲོག་པ་ཕྱུག་ལོར་དེ་བས་ཀྱང་ཁེ་ཕན་ཆེ་བ་མ་ཟད། ད་ནི་ནོར་ཁྱུ་དག་གསེར་ཆུའི་ཕ་རོལ་དུ་སོང་ཡང་ཆུ་ལ་རྐང་བགྲོད་མི་དགོས་པར་ཟམ་སྟེང་ནས་འགྲོ་ཐུབ་པ་དང་། ཆུ་ལ་ཟམ་པ་འཕེན་པ་ནི་གྲུབ་ཐོབ་ཐང་སྟོང་རྒྱལ་པོའི་མཛད་འཕྲིན་བསྐྱངས་པ་ཡིན་པས་ཕྱུག་ལོས་སེམས་གཏིང་ནས་ལས་ཀ་འདི་ལ་རྒྱབ་སྐྱོར་བྱེད་ཀྱིན་ཡོད།

        ཆར་བའི་ཁྲོད་དུ། ཕྱུག་ལོས་ཟམ་པ་ལས་མཁན་ཚོར་འོ་མ་བསྐྱལ་ནས་ཡོང་།

        གསེར་ཆུའི་ཟམ་ཁ་ནས་ཁོ་འགོ་བ་ཀྲང་ཅི་ཧྭ་ཟེར་བ་ལ་འཕྲད་དུས། ཤག་པོ་རྙིང་བ་ཞིག་ལ་ཐུག་པ་ནང་བཞིན་ལག་མགོར་འཇུས་ནས“ཁྱོད་བདེ་མོ་ཡིན་ནམ། ཁྱོད་ཚོས་དཀའ་ལས་མྱངས་སོང་། དཀའ་ཚེགས་ཅི་ཞིག་ཡོད་ན་ང་ལ་གསུང་རོགས”ཞེས་ཞུ་བ་བྱས།

        ཀྲང་ཅི་ཧྭ་ཟེར་བའི་རྒྱ་རྒན་འདི་ནི་ད་བར་བོད་ཁུལ་ནས་ཡུན་རིང་བསྡད་པས་བོད་སྐད་འཆད་མཁས་ལ། ཁོས་ཀྱང་ཕྱུག་ལོ་ལ་དགའ་བའི་ཉམས་ཀྱིས་ལག་འཇུ་བྱེད་བཞིན“ཡ་ཡ། ཁྱོད་སེམས་བདེ་མོ་བྱོས་དང་། ང་ཚོའི་གསེར་ཆུའི་ཟམ་པ་གང་མྱུར་གྱིས་ལེགས་གྲུབ་བྱེད་ངེས། ཟམ་པ་ལས་ཚར་དུས། ང་ཕ་ཡུལ་ཕན་ཀྲི་ཧྭ་ལ་ཐེངས་གཅིག་ལོག་དགོས། དེ་དུས་ཁྱོད་ཀྱིས་ང་ལ་མར་ཡག་པོ་ཞིག་གྲ་སྒྲིག་དགོས”ཞེས་བཤད།

        “ཁྱོད་སེམས་བདེ་མོ་བྱོས་དང་། ང་འབྲོག་རྒན་ལ་ཡོད་པ་དེ་མར་རེད།”

        “ནང་དུ་ལོག་ཁར། ངས་མར་རྒྱ་མ་བཅུ་ལྷག་ཉོས་ནས་ཁྱིམ་མི་དག་ལ་ལེགས་སྐྱེས་སུ་སྦྱིན་དགོས། ཁོང་ཚོ་ད་བར་བོད་ཀྱི་ཤ་མར་ལ་ཧ་ཅང་དགའ།”

        “ཡག་པོ་རེད། ཁྱོད་ཀྱིས་ཟམ་པ་བརྟན་པོ་ཞིག་ལོས་དང་། ངས་ཁྱོད་ལ་མར་རྡོག་ཆེན་པོ་ཞིག་གི་བྱ་དགའ་སྟེར་ངེས།”

        “བཀའ་དྲིན་ཆེ།”

        ནམ་རྒྱུན་འབྲོག་པ་ཕྱུག་ལོ་དང་རྒྱ་རྒན་ཀྲང་ཅི་ཧྭ་གཉིས་ཀྱིས་ཁ་བརྡ་གང་མང་ཞིག་བྱེད་བཞིན་དུས་ཚོད་ནི་གང་ཞིག་ལ་སོང་བ་སུས་ཀྱང་མི་ཤེས།

        ཟླ་བ་གཅིག་ལྷག་འགོར་སོང་། གསེར་ཆུའི་ཟམ་པ་དེ་རིམ་གྱིས་ལེགས་གྲུབ་བྱུང་།

        ཀྲང་ཅི་ཧྭའི་གདོང་ལ་རྒྱལ་ཁའི་འཛུམ་ཆུང་ཞིག་བསྡུས་ནས་ཡུལ་ཚོ་སྲིད་གཞུང་ལ་ཟམ་པ་ངོས་ལེན་བྱེད་པར་སྐུལ་བར་སོང་།

        ཉིན་དེར། ཆར་བ་ནི་ཆུ་ཟོ་ཁ་སྦུབ་པ་བཞིན་ཤུགས་ཀྱིས་འབབ་བཞིན་འདུག

        ཕྱུག་ལོས་མར་རྡོག་ཆེན་པོ་ཞིག་འགྱིག་ཁུག་ཏུ་བཅུག་ནས་ཀྲང་ཅི་ཧྭ་ལ་བལྟ་བར་ཡོང་།

        གསེར་ཆུའི་ཟམ་སྟེང་དུ་བསླེབས་དུས། ཕྱུག་ལོས་ད་གཟོད་རང་གི་ངོ་ཤེས་བཟང་པོ་དེ་འཁོར་བགེགས་བྱུང་ནས་ཚེ་ལས་འདས་པའི་གཏམ་ངན་གོ་ལ། སེམས་སུ་བཟོད་གླགས་བྲལ་བའི་སྡུག་བསྔལ་ཞིག་སྐྱེས་པ་དང་། གོམ་ཁ་འབྲོང་དགོན་པར་བསྒྱུར།

        སྤྲུལ་སྐུ་ཐོག་རྒོད་ཚང་གི་གཟིམ་ཤག་ནང་ཁུ་སིམ་མེར་འདུག

        ཕྱུག་ལོས་འགྱིག་ཁུག་གིས་གཅུད་པའི་མར་དང་། ད་དུང་སྒོར་བརྒྱ་བླངས་ནས“ཀྲང་ཅི་ཧྭའི་རྣམ་ཤེས་བདེ་བ་ཅན་དུ་འདྲེན་རོགས”ཞེས་ཁ་བཏགས་དཀར་པོ་ཡུག་གཅིག་བཅས་སྤྲུལ་སྐུ་ཐོག་རྒོད་ཚང་གི་མདུན་ཅོག་ཐོག་ཏུ་བཞག

        སྤྲུལ་སྐུ་ཐོག་རྒོད་ཚང་གིས་ཡུན་རིང་ཞིག་ལ་སྤྱན་ཟུང་བཙུམས་ནས་བཞུགས་པ་དང་། དེ་ནས་སླར་ཡང་མདུན་གྱི་ཁ་བཏགས་དཀར་པོ་དེ་ཕྱུག་ལོའི་མགུལ་དུ་སྒྲོན་ནས“ཡ་ཡ། རྒྱ་རྒན་དེ་སེམས་བཟང་ཞིག་རེད། བསམ་པ་བཟང་ན་ས་དང་ལམ་ཡང་བཟང་། མི་རིང་བར་མི་ལུས་བཟང་པོ་ཞིག་རྙེད་རྒྱུ་རེད”ཅེས་གསུངས།

        “ལགས་སོ། བཀའ་དྲིན་ཆེ།”ཕྱུག་ལོ་འབྲོག་དགོན་པ་ནས་ཕྱིར་ཐོན་དུས་ཉི་མ་ཡང་ནུབ་རིར་བཞུད་ལ་ཉེ་བ་དང་། གསེར་ཆུ་སྔོན་མོས་ཀྱང་གྲིབ་ནག་གི་ལྭ་བ་ཞིག་གྱོན་ནས་མདུན་ཕྱོགས་སུ་རྔམ་སྟབས་ཀྱིས་བཞུར་གྱིན་འདུག

        ཕྱུག་ལོ་གསེར་ཆུའི་ཟམ་པ་བརྒྱུད་ནས་ཁྱིམ་དུ་ལོག

        ཟམ་སྟེང་དུ་འགྲོ་དུས་ཁོས་ཀྲང་ཅི་ཧྭ་ཟེར་བའི་རྒྱ་རྒན་དེ་དྲན་ལ། རྒྱ་རྒན་མཐོ་རིས་པོས་ནམ་རྒྱུན“ཟམ་པ་ལས་ཚར་དུས། ངས་མར་ཁྱེར་ནས་ཁྱིམ་མི་ལ་བལྟ་རུ་འགྲོ་དགོས”ཟེར་བའི་སྐད་ཆ་དེ་གཟུགས་མེད་ཀྱི་རླུང་བུས་ཁྱེར་ནས་ཕྱུག་ལོའི་རྣ་ལམ་དུ་བསྐྱལ།

        དེ་དུས། ཕྱུག་ལོ་གདོང་ལ་སྐྱོ་བའི་ཉམས་ཤིག་བྱུང་ལ། ཁ་ནས“ཨོཾ་མ་ཎི་པདྨེ་ཧཱུྃཾ”ཞེས་ཤུབ་ཤུབ་ཏུ་ཟློ་བཞིན་ཁོ་བོས་གནམ་གྱིས་མི་ཐེག་པའི་ཉེས་པ་ཞིག་བསགས་པ་ནང་བཞིན་གསེར་ཆུའི་ཟམ་སྟེང་ནས་གོམ་པ་ལྗིད་ཏིག་ཏིག་སྤོ་བཞིན་སོང་།

        ལོ་གཅིག་འགོར་སོང་། ཕྱུག་ལོ་ཚང་ལ་བུ་ཞིག་སྐྱེས་པ་དང་། བུ་དེ་ནི་གཡུ་འབྲུག་གི་ངར་སྐད་ལྷང་ལྷང་སྒྲོགས་པའི་མཚན་མོ་ཞིག་ལ་སྐྱེས་བྱུང་།

        སྔར་ལོ་ལས་ཀྱང་ཆར་ཆུ་མོད་པའི་དབྱར་དུས་འདིར། ཕྱུག་ལོའི་ལུས་སེམས་གཉིས་ཀ་བདེ་བ་བསམ་གྱིས་མི་ཁྱབ་པ་ཞིག་གིས་ཁེངས་ནས་ཡོད།

        ཁོའི་སེམས་སུ་ད་ནི་ཆར་ཆུ་ཇི་ལྟར་མོད་ཀྱང་གསེར་ཆུ་ལ་རྐང་བགྲོད་མི་དགོས་པ་དང་། ཡུན་རིང་ཞིག་ལ་རེ་སྒུག་བྱས་པའི་བུ་ཞིག་ཀྱང་འདོད་པ་ནང་བཞིན་སྐྱེས་བྱུང་བས་དེ་ནི་རང་ཉིད་དཀོན་ཅོག་གསུམ་ལ་རྩེ་གཅིག་གིས་དད་པ་ཆེ་བ་དང་། མི་ཚེ་གང་ལ་རྒྱུ་འབྲས་ཐེངས་གཅིག་ཀྱང་བསྣོག་པ་མི་དྲན་པས་བསླུ་མེད་ཀྱི་འབྲས་བུ་རེད་བསམས།

        མཚམས་རེར། ཁོ་ཚང་གི་ནོར་ནག་འགའ་རེ་གསེར་ཆུའི་ཕ་རོལ་དུ་བུད་སོང་ཡང་། ཕྱུག་ལོས་གདོང་ལ་འཛུམ་ཆུང་ཞིག་བསྡུས་ནས་གསེར་ཆུའི་ཟམ་པ་བརྒྱུད་དེ་ཕྱུགས་རྣམས་ལྷས་ལ་འདེད་པར་གོམས་འདུག་ལ། ཁོ་ལ་མཚོན་ན། ཞོགས་པའི་ཉི་འོད་དང་དགོང་ཁའི་མཚམས་སྤྲིན་གྱི་འོག་ཏུ་འདི་ནི་བརྗོད་ཐབས་བྲལ་བའི་བདེ་སྐྱིད་ཅིག་རེད།

        བསིལ་རླུང་འཇམ་པོ་ཞིག་ལྷོད་ཀྱིས་ལྡང་ནས་སྦྲ་ཡི་ཡ་ཕུག་ན་བྱ་རྒོད་ཀྱི་གཤོག་ཟུང་བརྐྱངས་འདྲའི་མ་ཎིའི་ཕུག་དར་དེ་ཡང་ལྷབ་ལྷུབ་ཏུ་གཡུག་བྱུང་།

        ཕྱུག་ལོ་མར་སྒྱེད་འགྲམ་དུ་ལྷོད་ཤིག་གེར་བསྡད་ལ། བྱིས་པ་ཆུང་ཆུང་དེ་ལག་ཏུ་བཟུང་ནས་ཆུང་མ་གཡང་འཛོམས་ལ། བུ་ཆུང་འདི་ནི་གཡུ་འབྲུག་ལྷང་ལྷང་གྲགས་པའི་མཚན་མོ་ཞིག་ལ་སྐྱེས་པ་ན། ཁོས་མིང་ལ“གཡུ་འབྲུག”ཅེས་བཏགས་པ་ཡིན་ཞེས་ལབ།

        ཆུང་མས་ཁྱིམ་ལས་ལས་བཞིན་མི་འཐད་པའི་ཉམས་ཀྱིས“ད་ནི་འདི་འདྲའི་དོན་དག་གལ་ཆེན་དག་ཀྱང་ཁྱོད་ཀྱིས་སྤྲུལ་སྐུ་ཐོག་རྒོད་ཚང་ལ་མི་ཞུ་བར་རང་སྣང་གང་ཤར་བྱེད་ཀྱིན་འདུག”ཟེར།

        ཕྱུག་ལོས་སླར་ཡང་སྒམ་བརླིང་གི་ཉམས་ཀྱིས“ད་ནི་ཉིན་བཟང་སྐལ་བཟང་ཞིག་ལ། སྤྲུལ་སྐུ་ཐོག་རྒོད་ཀྱི་མདུན་དུ་སོང་ནས་བུ་ཆུང་འདི་ཚེ་སྐྱབས་སྲོག་སྐྱབས་ཞུ་རྒྱུ་ཡིན། དེ་དུས་འབྲི་མོ་སེ་ར་མ་ཡང་སྦྱིན་དགོས”ཞེས་གྲོས་ཐག་བཅད།

        ཆུང་མ་གཡང་འཛོམས་ལ་ཅི་ཡང་བཤད་རྒྱུ་མེད་པར་ཕྱུག་ལོར་འོ་ཇ་གང་བླུགས་ནས་སླར་ཡང་ཁྱིམ་ལས་ནང་དུ་མགོ་འཁོར་ནས་བསྡད།

        ཡ་མཚན་པ་ཞིག་ལ། གཡུ་འབྲུག་ཟེར་བའི་བྱིས་པ་འདི་ལོ་གཅིག་དང་ཟླ་བ་ཁ་ཤས་ལོན་དུས། ཁོའི་མི་ཚེ་འདིའི་སྟེང་གི་ཆེས་ཐོག་མའི་སྐད་ཆ་བཤད་བྱུང་ལ། དེ་ནི་ཕལ་བའི་དུད་ཁྱིམ་གྱི་བྱིས་པ་ཚོ་དང་མི་འདྲ་བར་ཐོག་མར“ཨ་ཕ”དང་། ཡང་ན“ཨ་མ”སོགས་མི་ལབ་པར་ཁ་གདངས་ནས་ཨ་ཕ་ཕྱུག་ལོ་ལ་ལྟ་བཞིན“མར”ཟེར།

        དང་ཐོག་ཕྱུག་ལོ་བཟའ་ཟླ་གཉིས་ཀྱིས་དོན་འདིར་དོ་སྣང་མ་བྱས་ལ། རྗེས་སུ་གཡུ་འབྲུག་ཟེར་བའི་བྱིས་པ་འདིས་ནམ་རྒྱུན་ཁ་ནས“མར”ཞེས་འབོད་པ་དང་། རྗེས་ནས་རིམ་གྱིས་ནར་སོན་པ་དང་ཁོས་དང་ཐོག་བཤད་པའི་སྐད་ཆ་དེ་རིམ་གྱིས་ཁ་ཇེ་གསལ་དུ་བཏང་ནས་ཨ་ཕ་ཕྱུག་ལོར་ལྟ་བཞིན“ང་ལ་མར་དགོས”ཟེར།

        ཕྱུག་ལོས་དང་ཐོག་ཅི་བྱ་འདི་བྱ་མེད་པར་བུ་ཆུང་གི་ཁ་ནང་དུ་མར་ཅུང་ཙམ་རེ་བཅུག་ནས་མགོ་བསྐོར་ཐབས་བྱས་ཀྱང་། སེམས་སུ་རང་གི་བུ་ཆུང་གི་རྒྱུན་ལྡན་མིན་པའི་སྐད་ཆ་དེ་ལ་བསམ་བློ་བཏང་རུང་རང་སེམས་མགུ་བའི་ལན་ཞིག་གཏན་ནས་མ་རྙེད།

        མཚན་མོ་དེར། ཕྱུག་ལོས་རྨི་ལམ་རབ་རིབ་ཅིག་རྨིས་ནས་གཉིད་དུ་ཡུལ་སོང་།

        རྨི་ལམ་དུ་ཁོ་རང་འབྲོང་དགོན་པའི་ནང་དུ་སྤྲུལ་སྐུ་ཐོག་རྒོད་འཚོལ་དུ་ཕྱིན།

        ཨ་ཙི། དོ་ནུབ་ནི་དགའ་ལྡན་ལྔ་མཆོད་ཀྱི་དུས་ཆེན་མ་ཡིན་ནམ། འབྲོང་དགོན་པ་ཧྲིལ་བོར་ཉི་མ་ཤར་བ་ནང་བཞིན་གསེར་མདོག་གི་མཆོད་མེའི་འོད་ཟེར་ལམ་ལམ་བྱེད་པ་དང་། མཆོད་མེའི་འོད་ཅིག་གསེར་ཆུ་ཟམ་པའི་སྟེང་དུ་འཕྲོས་ནས་ལྡོག་འོད་ལམ་ལམ་བྱེད། སྐབས་དེར་ཁོའི་མགུལ་དུ་སྤྲུལ་སྐུ་ཐོག་རྒོད་ཚང་གིས་གནངས་བའི་ཁ་བཏགས་དཀར་པོ་ཡུག་ཅིག་དཀར་ལམ་ལམ་བསིལ་རླུང་གིས་ལྷབ་ལྷུབ་གཡོ་བ་མཐོང་།