རི་མོ་བ་ཞིག་གི་པིར་རྩལ་ལས་མཛེས་སྡུག་ལྡན་པའི་རི་ཀླུང་ཆུ་ཀླུང་དང་བྱ་བྱེའུ་སྲོག་ཆགས་སོགས་གསོན་ཉམས་དོད་པོའི་སྒོ་ནས་མི་རྣམས་ཀྱི་མཐོང་ལམ་དུ་མངོན་བཞིན་ཡོད། ཡིན་ན་ཡང་མཐོ་སྒང་བོད་ཁུལ་དུ་པ་སངས་དགའ་བ་ཞེས་འབོད་པའི་རི་མོ་བ་དེའི་སྨྱུག་འོག་གི་པིར་རྩལ་ནི་མང་ཚོགས་ཀྱི་རེ་བས་ཁེངས་པའི་འཚོ་བ་དང་མི་བརྒྱ་སེམས་གཅིག་གིས་དབུལ་ཐར་འགག་སྒྲོལ་གྱི་ཕྱུག་འགྱུར་ལམ་བུའི་སྟེང་དུ་སྐྱོད་བཞིན་པའི་ཆེས་རྒྱུན་ལྡན་གྱི་འཚོ་བའི་རི་མོ་ཡིན་ལ། མང་ཚོགས་ཀྱི་སེམས་སུ་བྲིས་ཤིང་སྙིང་ནས་བསྟོད་པའི་གཟུགས་མེད་མཛེས་རིས་ཀྱང་ཡིན་ནོ།།

   པ་སངས་དགའ་བས་ལོ་ན་བཅུ་བདུན་ལ་སོན་མ་ཐག་རི་མོ་འབྲི་སྦྱོང་གི་ལས་ལ་བརྩམས་ཤིང་། ལོ་ལྔའི་རིང་ལ་འབད་བརྩོན་ལྷོད་མེད་བྱས་མཐར་ཐང་གའི་ལྷ་རིས་དང་རི་ཆུའི་བཀོད་པ་སོགས་རྨང་གཞིའི་ལག་རྩལ་ཅུང་ལེགས་པོར་ཆགས་ཡོད་པར་མ་ཟད། དེ་སྔོན་ལོ་གསུམ་ལྷག་གི་རིང་ལ་ཞིང་འབྲོག་མང་ཚོགས་ཀྱི་ཁྱིམ་དུ་ཚོན་རྒྱན་རི་མོ་སོགས་ཀྱང་བྲིས་མྱོང་བ་རེད། རྗེས་སུ་ཁོ་རང་ལས་བསྐལ་བཟང་བ་ཞིག་ལ་མི་དམངས་ཉེན་རྟོག་པ་ཞིག་ཏུ་གྱུར་བ་དང་། དེ་ནས་པ་སངས་དགའ་བས་གོ་བདེ་རྟོགས་སླའི་སྐྱ་རིས་རི་མོ་བྲིས་ནས་ཏང་གི་སྲིད་ཇུས་དང་ཁྲིམས་སྲོལ་སོགས་དྲིལ་བསྒྲགས་བྱས་པ་དང་། ས་གནས་རང་གི་ཞིང་འབྲོག་མང་ཚོགས་ལ་དབུལ་ཐར་ཕྱུག་འགྱུར་གྱི་རྩིས་ཁྲ་གསལ་པོར་མཚོན་ཐུབ་པ་སོགས་ཀྱིས་ཉེན་རྟོག་པ་དང་མི་དམངས་བར་གྱི་བརྩེ་འདང་དེ་བས་ཟབ་པ་དང་མཐུན་སྦྱོར་གྱི་གསེར་ཟམ་ཞིག་ཀྱང་བཙུགས་པ་རེད། 2014ལོར་ཁོ་བོར་ཞིང་ཆེན་སྤྱི་བདེ་ཐིང་གི་གནོད་འགོག་རྒུད་སྐྱོབ་མི་སྒེར་གྱི་བྱས་རྗེས་རིམ་པ་གཉིས་པའི་གཟེངས་བསྟོད་ཐོབ་པ་དང་། 2017ལོར་དར་མདོ་གྲོང་ཁྱེར་གྱི་མེ་མདའ་དང་འབར་རྫས་བཅོས་སྒྲིག་བྱ་སྤྱོད་སྤེལ་བའི་ཁྲོད་དུ་བྱས་རྗེས་རིམ་པ་གསུམ་པའི་གཟེངས་བསྟོད་ཐོབ་པ་རེད།

    ས་མཐོ་གཡང་གཟར་ཅན་གྱི་བོད་ས་ཆའི་ས་ངོས་ཆགས་ཚུལ་གྱི་ཁྱད་ཆོས་དང་ས་བབ་ཀྱི་རྐྱེན་པས་ནམ་རྒྱུན་ཁོ་དང་ཁོའི་ལས་རོགས་རྣམས་ཀྱི་རང་འཁྲིའི་ལས་ཀ་སྟེ་ཉེས་ཅན་འཛིན་བཟུང་སོགས་ཀྱི་བྱ་སྤྱོད་སྤེལ་བ་དང་། ཚང་མར་ས་བབ་ལ་ཆ་རྒྱུས་མེད་པ་དང་འཛིན་བཟུང་ལས་ཀར་དཀའ་ངལ་ཆེན་པོ་བྱུང་ཞིང་གནས་ཚུལ་འཕེལ་མེད་དུ་ལུས་སྐབས། པ་སངས་དགའ་བས་མྱུར་དུ་དོགས་ཡོད་ཉེས་ཅན་འཛིན་བཟུང་བྱེད་ཐུབ་པའི་ཆེད་དུ། རང་ཉིད་ཀྱིས་རི་མོ་བྲི་ཤེས་པའི་དགེ་མཚན་བེད་སྤྱོད་བྱས་ནས་སྐྱ་རིས་རི་མོའི་ལག་རྩལ་ལས་མྱུར་དུ་ས་བབ་དང་ས་ངོས་ཆགས་ཚུལ་ལ་རྒྱུས་ལོན་འབྱུང་དུ་བཅུག་པ་དང་། དོགས་ཅན་གབ་སའི་ས་ཁོངས་ཀྱི་ས་ངོས་རི་མོ་བྲིས་པ་དང་། མི་དམངས་ཉེན་རྟོག་པའི་ས་བབ་ཆགས་ཚུལ་གྱི་དཔེ་རིས་ལ་གཞི་བཟུང་ནས་ཁག་བགོས་ཏེ་དོགས་ཡོད་ཉེས་ཅན་འཛིན་བཟུང་བྱས་པ་རེད། དེ་ལྟར་ཁོས་རང་ཉིད་ཀྱི་ལག་རྩལ་དེ་ཉེན་རྟོག་ལས་ཀའི་ཁྲོད་དུ་སྤྱད་ནས་གྱོད་དོན་རྩད་ཆོད་བྱེད་པར་ཕན་འབྲས་ཆེན་པོ་ཐོབ་པ་དང་། དུས་དེ་ནས་བཟུང་པ་སངས་དགའ་བས་རི་མོ་དང་ཉེན་རྟོག་ལས་ཀ་གཉིས་ཕན་ཚུན་ཟུང་འབྲེལ་བྱེད་དེ་ལས་ཀའི་བྱེད་ཐབས་གསར་པ་ཞིག་གཏོད་པ་རེད།

    མངའ་འོག་གི་བོད་རིགས་མང་ཚོགས་མང་ཆེ་བས་རྒྱ་ཡིག་དང་རྒྱ་སྐད་མི་ཤེས་པའི་རྐྱེན་གྱིས་པ་སངས་དགའ་བས་རི་མོའི་ལག་རྩལ་དེ་ཁྲིམས་ལུགས་ཁྱབ་གདལ་སློབ་གསོ་ཁྲོད་བེད་སྤྱོད་བཏང་ཞིང་། 2018ལོའི་ཟླ་བ10པར། དར་མདོ་གྲོང་ཁྱེར་སྤྱི་བདེ་ཅུས་ཀྱིས་འབྲེལ་གཏུག་རོགས་སྐྱོར་བྱ་ཡུལ་སྐྱ་གད་ཤང་དུ་དབུལ་ཐར་གནད་སྨིན་གྱི་ལས་ཀ་སྤེལ་སྐབས། གྲོང་ཁྱེར་ཡོངས་ཀྱི་ཁྱབ་ཁོངས་ནང་པ་སངས་དགའ་བ་དང་མང་ཚོགས་ལས་ཀར་ཉམས་མྱོང་ཡོད་པའི་ཉེན་རྟོག་པ10སྐོང་འཐེན་བྱས་པ་རེད། པ་སངས་དགའ་བས་ཕྱོགས་གཅིག་ལ་ས་བདེ་གྲོང་རྡལ་གྱི་མངག་གཏོང་ཁང་གི་རྒྱུན་ལྡན་གྱི་ལས་ཀའི་འགན་འཁུར་བ་དང་། ཕྱོགས་གཞན་ཞིག་ནས་སྐྱ་གད་ཤང་རྫ་རི་གྲོང་སྡེའི་དབུལ་ཐར་གནད་སྨིན་ལས་ཀར་འགན་འཁུར་བཞིན་ཡོད་པ་རེད། དེ་ནས་ཁོས་མང་ཚོགས་དབུལ་པོ་ལས་ཐར་དགོས་ན་ཐོག་མར་བསམ་བློའི་འདུ་ཤེས་ལ་བསྒྱུར་བཅོས་གཏང་དགོས་པའི་འགག་རྩ་ལ་དམིགས་ནས་སླར་ཡང་རང་གི་ཐུན་མིན་གྱི་ཡོན་ཏན་ཏེ་རི་མོ་བཀོལ་བའི་བྱེད་ཐབས་སྤྱད་དེ་ཞིང་འབྲོག་མང་ཚོགས་ལ་དབུལ་ཐར་ཕྱུག་འགྱུར་གྱི་འབྲེལ་ཡོད་སྲིད་ཇུས་དག་རི་མོར་བཀོད་པ་དང་། ཁོས་རྒྱལ་ཁབ་ཀྱི་འབྲེལ་ཡོད་བཅའ་ཁྲིམས་དང་ཁྲིམས་སྲོལ། མི་རིགས་སྲིད་ཇུས་དང་དམངས་ཕན་ལས་གཞི་སོགས་ཁོང་དུ་ཆུད་པར་བྱས་རྗེས། གོ་བདེ་ཞིང་རྟོགས་སླ་བའི་རི་མོའི་ལམ་ནས་མང་ཚོགས་ལ་གསལ་བཤད་དང་དྲིལ་བསྒྲགས་བྱས་པ་རེད།

    པ་སངས་དགའ་བས་མང་ཚོགས་དང་ཁ་བརྡ་ལབ་བཞིན་པའི་ཁྲོད་ཏང་གིས་མི་རིགས་ས་ཁུལ་གྱི་མི་དམངས་མང་ཚོགས་ལ་ཐུགས་ཁུར་གནང་ཚུལ་སྒྲོག་འགྲེལ་བྱས་པ་དང་སྦྲགས། ཏང་དྲིན་དྲན་པ་དང་ཁྲིམས་ལུགས་སྲུང་བ། འབྱོར་འབྲིང་བསྐྲུན་དགོས་པའི་བསམ་བློའི་ས་བོན་ཡང་མང་ཚོགས་ཀྱི་སེམས་སུ་བཏབ་པ་རེད། མང་ཚོགས་ཀྱིས་ཁོ་རང་ཁྱིམ་མི་ཞིག་གི་འདུ་ཤེས་བཟུང་ནས་བརྩི་བཀུར་བྱེད་ཅིང་ཕན་ཚུན་སྙིང་གཏམ་གླེང་བ་དང་། ཁོ་བོ་དང་རྫ་རི་གྲོང་སྡེའི་མང་ཚོགས་བར་ལ་ལས་དབང་གི་འབྲེལ་འདྲིས་ཟབ་མོ་ཞིག་ཆགས་པ་རེད།

     2017ལོའི་ཟླ་བ་དང་པོ་ནས་པ་སངས་དགའ་བས་རང་གི་ཆ་སྒྲིག་ཉེ་འཚོལ་གྱི་རོགས་སྐྱོར་བྱ་ཡུལ་རྫ་རི་གྲོང་སྡེའི་པད་མ་གཡུ་སྒྲོན་གྱི་ཁྱིམ་ཚང་ལ་རང་ནུས་ཅི་འཇོན་གྱིས་རོགས་རམ་བྱས་འོག་ཁྱིམ་ཚང་དེ2018ལོར་དབུལ་ཕོངས་ལས་ཐར་བ་རེད། དེ་སྔོན་པད་མ་གཡུ་སྒྲོན་གྱི་ཁང་པའི་ཟུར་ཞིག་གིས་ཆར་ཆུ་མི་ཁོག་པར་ཟགས་པའི་སྐབས་སུ། པ་སངས་དགའ་བས་མ་བསྐུལ་དང་བླངས་ཀྱིས་བྱེ་མ་དང་ཨར་འདམ་བཙལ་ནས་ཁང་པའི་ཆུ་ཟགས་སར་ཉམས་གསོ་བྱས་པ་རེད། པད་མ་གཡུ་སྒྲོན་གྱིས་ངའི་ཁྱིམ་ཚང་འདི་འདྲའི་དབུལ་ཕོངས་ཡིན་ཡང་ཁོས་ཞེ་ལོག་ནས་མ་བསྐྱུར་བར་ང་ལ་གང་ས་ཅི་ཐད་ནས་རོགས་རམ་ཚད་མེད་བྱས་པ་དང་། ཁོའི་བཀའ་དྲིན་ངའི་སེམས་སུ་ནམ་ཡང་ཉར་ཞིང་། ངས་ཀྱང་པ་སངས་དགའ་བ་རང་གི་གཅུང་པོ་ལྟར་དུ་སྙིང་ནས་བརྩི་བཞིན་ཡོད་ཅེས་བཤད་པ་རེད།

     རྫ་རི་གྲོང་སྡེའི་ཚེ་རིང་ལྷ་མོ་ནི་ཁེར་ལུས་རྒན་རྒོན་ཞིག་ཡིན། ཁོ་མོར་རིག་གནས་མེད་པའི་རྐྱེན་གྱིས་རྒྱལ་ཁབ་ཀྱི་གཟིགས་སྐྱོང་སྲིད་ཇུས་གང་དང་གང་ཡོད་པ་གཅིག་ཀྱང་མི་ཤེས་པ་རེད། པ་སངས་དགའ་བ་མོ་རང་གི་ཁྱིམ་དུ་སོང་ནས་སུན་སྣང་མེད་པར་རི་མོའི་སྟེང་ནས་གོ་སླ་པོས་ཏང་གི་དབུལ་སྐྱོར་སྲིད་ཇུས་གསལ་བཤད་བྱས་ཏེ། མོ་རང་གིས་སྨན་བཅོས་འགན་སྲུང་དང་རྩྭ་ཐང་སྐྱེ་ཁམས་ཀྱི་ཁ་གསབ་རོགས་དངུལ་སོགས་རྒྱལ་ཁབ་ཀྱི་གཟིགས་སྐྱོང་སྲིད་ཇུས་མང་པོ་ཞིག་ལོངས་སུ་སྤྱོད་བཞིན་ཡོད་པ་ཤེས་རྗེས། ཚེ་རིང་ལྷ་མོས་ང་ད་ལྟ་བཟའ་རྒྱུ་འཐུང་རྒྱུ་འབེལ་པོ་ཡོད་པ་ནི་ཏང་དང་རྒྱལ་ཁབ་ཀྱི་བཀའ་དྲིན་རེད་འདུག་ཅེས་བཤད་པ་རེད།

    པ་སངས་དགའ་བའི་སེམས་སུ་འགྱུར་མེད་ཀྱི་ཕུགས་འདུན་བཟང་པོ་ཞིག་ཡོད་པ་དེ་ནི་ཞིང་འབྲོག་མང་ཚོགས་ལ་རོགས་རམ་ཅི་ཐུབ་བྱས་ནས་དབུལ་ཐར་འགག་སྒྲོལ་གྱི་རྩིས་ཁྲ་གསལ་པོ་བཟོ་པ་དང་། 2020ལོར་འདི་གའི་མང་ཚོགས་ཀྱང་རྒྱལ་ཡོངས་དང་དུས་མཉམ་དུ་འབྱོར་འབྲིང་སྤྱི་ཚོགས་བསྐྲུན་ཐུབ་པར་རམ་འདེགས་བྱ་རྒྱུ་དེ་རེད།

    པ་སངས་དགའ་བས་སྨྱུ་གུ་བཟུང་ནས་མི་དམངས་ཀྱི་རེ་འདུན་དང་མང་ཚོགས་ཀྱི་རང་ལུས་བདེ་སྲུང་གི་རྒྱུས་ཤེས་བྲིས་ཤིང་། མང་ཚོགས་ཀྱི་སེམས་ལ་འཕྲོད་ཅིང་ཡིད་ལ་བབས་པའི་རི་མོའི་སྒྱུ་རྩལ་གྱི་ལམ་ནས་དམངས་འཚོའི་ལས་དོན་ལྷུར་ལེན་བྱེད་པ་དང་། མང་ཚོགས་དང་ཉེན་རྟོག་པའི་བར་ལ་མི་མངོན་པའི་སེམས་ཀྱི་ཟམ་ཆེན་ཞིག་བསྐྲུན་པས། ཁོ་ནི་གནོད་འགོག་རྒུད་སྐྱོབ་ཁྲོད་ཀྱི་དཔའ་བོ་དང་། འགན་འཁྲིའི་འདུ་ཤེས་ནམ་ཡང་བཅངས་པའི་མི་དམངས་ཉེན་རྟོག་པའི་འགོ་གཙོ་བཟང་པོ་ཞིག་ཡིན་ནོ།།