བྱིས་པའི་བདེ་སྲུང་སྒོ་བསྟེན་སྨན་ཁང་ནང་། ཕྲུ་གུས་སྐད་ཆ་མི་ཤོད་པ་དང་སྐད་ཆ་ཤོད་ཁག་པ་སོགས་ཀྱི་སྐོར་བསྟེན་མཁན་གྱི་ཕྲུ་གུ་མང་དུ་འགྲོ་བཞིན་ཡོད། སྨན་པ་བསྟེན་པའི་བརྒྱུད་རིམ་ཁྲོད་སྨན་པས་ཁྱིམ་བདག་ལ་དུས་རྒྱུན་ཕྲུ་གུས་བརྙན་འཕྲིན་དང་ཁ་པར་ལྟ་བའི་དུས་ཚོད་རིང་མིན་སྐད་ཆ་འདྲི་སྐབས་ཁྱིམ་བདག་མང་པོས་འཕྱུག་པ་མེད་པའི་ཐོག་ནས་རང་གི་ཕྲུ་གུས་ཁ་པར་དང་བརྙན་འཕྲིན་ལྟ་རྒྱུར་དགའ་པོ་ཡོད་ཚུལ་དང་ཁ་པར་དེ་བས་སྤྱོད་མཁས་ཚུལ་གླེང་བ་མ་ཟད། ཁ་པར་ལ་དབྱིངས་ཚུད་སྐབས་སྐད་ག་ཚོད་བཏང་ཡང་ཁ་ཡ་བྱེད་ཀྱི་མིན་འདུག་ཅེས་ཤོད་ཀྱི་ཡོད། དོན་དངོས་སུ་ཕྲུ་གུ་འདི་དག་སྐད་ཆ་མི་ཤོད་པའམ་སྐད་ཆ་ཤོད་ཁག་པོ་ཁོ་ན་མིན་པར་ཕྲུ་གུའི་བསམ་ཤེས་ནུས་པ་དང་སྟངས་འཛིན་ནུས་པ་སོགས་ཐད་ལ་ཡང་སྐྱོན་ཆེན་པོ་བཟོ་ཡི་ཡོད།
ཁ་པར་སོགས་གློག་རྡུལ་ཐོན་རྫས་ཀྱིས་ཕྲུ་གུར་གནོད་པ་གང་དག་ཡོད་དམ།
རུས་པ་འཚར་བར་ཤུགས་རྐྱེན་བཟོ་བ།
ཕྲུ་གུའི་གཟུགས་པོའི་རུས་པ་འཚར་ལོངས་ཡོང་དང་ཡོང་བཞིན་པའི་དུས་ཡིན་པ་དང་། ཕྲུ་གུ་མང་པོས་ཁ་པར་ལྟ་སྐབས་མགོ་བོ་སྒུར་ནས་རྩེད་པ་དང་། འབོལ་ཁྲིའི་སྟེང་ཉལ་ནས་རྩེད་པ། ཡང་ན་གཟུགས་པོ་ཀྱོག་ཀྱོག་བྱས་ནས་རྩེད་པ་སོགས་བྱེད་ཀྱི་ཡོད། སྡོད་སྟངས་དེ་དག་གིས་ཕྲུ་གུའི་མཇིང་པ་དང་ཕྲག་པ། སྒལ་ཚིགས་སོགས་འཚར་ལོངས་ཡོང་བར་ཤུགས་རྐྱེན་བཟོ་ཡི་ཡོད།
ཕྲུ་གུའི་མིག་ཤེད་ཉམས་པ།
བྱིས་པའི་དུས་མིག་ཤེད་འཚར་ལོངས་འཐུས་ཚང་དང་མིག་ཤེད་བརྟན་པོ་མེད་པའི་དུས་སུ་གནས་ཡོད་པས་མིག་ཤེད་དབང་པོའི་སྙོམ་སྒྲིག་ནུས་པ་ཧ་ཅང་ཞན་པོ་ཡོད། ཁ་པར་མིག་དང་ཐག་ཉེ་བ་དང་དུས་ཚོད་རིང་པོ་བེད་སྤྱོད་བྱས་ཚེ་ཕྲུ་གུའི་མིག་ལ་གནོད་པ་ཆེན་པོ་ཡོད་པ་མ་ཟད་རྒྱང་སྒྲིབ་ཀྱི་ནད་ཕོག་གི་ཡོད། སྐབས་འགར་ད་དུང་ཟུག་གཟེར་རྒྱག་པའི་ནད་རྟགས་ཐོན་སྲིད། དཔེར་ན། དུས་ཚོད་རིང་པོ་བརྙན་ཤེལ་ལ་བལྟས་པའི་རྐྱེན་གྱིས་ཕྲུ་གུའི་མིག་གི་མིག་འབྲས་སྐྱི་མོར་གནོད་འཚེ་བཟོ་ཡི་ཡོད།
རང་གཅུན་གྱི་ནུས་པ་ཤོར་བ།
ཕྲུ་གུའི་རང་གཅུན་གྱི་ནུས་པ་ཞན་པས། ཁ་པར་གྱིས་ཕྲུ་གུའི་རང་གཅུན་ནུས་པར་ཤུགས་རྐྱེན་ཐེབས་ཏེ་ཕྲུ་གུས་གཉིད་ཉལ་བ་དང་ཁ་ལག་ཟ་བ་སོགས་ཀྱི་དུས་ཚོད་འཕྲོ་བརླག་གཏོང་གི་ཡོད་ལ། འཚོ་བའི་གོམས་གཤིས་ལ་རིམ་བཞིན་འགྱུར་ལྡོག་འགྲོ་གི་ཡོད།
གཤིས་ཀར་ཤུགས་རྐྱེན་ཐེབས་པ།
ཡུན་རིང་ཁ་པར་ལ་མགོ་འཁོར་ནས་ཕ་མ་བུ་ཕྲུག་དབར་དང་ན་མཉམ་གྱི་ཕྲུ་གུ་གཞན་དབར་གླེང་མོལ་བྱ་རྒྱུ་ཉུང་དུ་ཕྱིན་ནས་གཞན་དང་ཁ་བརྡ་བྱེད་མི་འདོད་པའམ་མི་དང་མིའི་དབར་འབྲེལ་འདྲིས་བྱེད་པའི་ནུས་པ་རིམ་བཞིན་ཞན་དུ་འགྲོ་གི་ཡོད།
སེམས་ཁམས་ལ་ཤུགས་རྐྱེན་ཐེབས་པ།
ཁ་པར་གྱིས་བསྐྲུན་པའི་འཁྲུལ་སྣང་གི་འཇིག་རྟེན་ལ་ཡུན་རིང་མགོ་གཡེངས་པས་ཕྲུ་གུའི་སེམས་ཁམས་འཚར་ལོངས་ལ་ཤུགས་རྐྱེན་ཐེབས་ཀྱི་ཡོད། ཞིབ་འཇུག་ལས་ཤེས་རྟོགས་བྱུང་བར། ཁ་པར་ལ་དབྱིངས་ཞུགས་མཁན་ཕྲུ་གུ་རྣམས་ན་མཉམ་གྱི་ཕྲུ་གུ་གཞན་ལས་སེམས་ཁམས་མི་བདེ་བ་དང་གཉིད་ཡག་པོ་མི་ཁུག་པ། རླུང་ལངས་བ་སོགས་དེ་བས་ཚབས་ཆེ་བ་ཡོད།
ཕྲུ་གུ་ཞིག་འཕྲོ་བརླག་གཏོང་འདོད་ན། ཁ་པར་གཅིག་སྤྲད་ན་འགྲིག སྐད་ཆ་འདི་ནི་སྒྲོ་འདོགས་དང་འཇིགས་སྐུལ་བྱས་པ་ཞིག་གཏན་ནས་མིན། གློག་རྡུལ་ཐོན་རྫས་ཀྱིས་ཕྲུ་གུར་གནོད་པ་ཆེན་པོ་འདི་འདྲ་ཡོད་དུས་ང་ཚོས་ཇི་འདྲ་བྱེད་དགོས་སམ་ཞེ་ན།
ཁ་པར་ལྟ་ཡུན་ཐུང་དུ་གཏོང་བ།
གལ་ཏེ་ཕྲུ་གུའི་ཕ་མས་རྟག་པར་ཁ་པར་བརྩེས་ནས་ཕྲུ་གུར་ཁ་པར་རྩེས་མི་ཆོག་ཟེར་ན། ཕྲུ་གུས་ཕ་མའི་ཁ་ལ་ཉན་སྲིད་དམ།
ཕྲུ་གུ་དང་མཉམ་དུ་རྩེད་མོར་རོལ་བ།
ཕ་མ་མང་པོས་རང་གི་ཕྲུ་གུ་དང་འགྲོགས་སྐབས་ཕན་ཚུན་མཉམ་འགུལ་དང་། ཕན་ཚུན་གཏམ་གླེང་། དེ་བཞིན་ཕྲུ་གུར་བསྟོད་བསྔགས་དང་མཉམ་དུ་དོན་སྙིང་ལྡན་པའི་རྩེད་མོ་རྩེད་པའི་གོམས་གཤིས་མེད། དེས་ན་ཕ་མས་ཉིན་རེར་ཕྲུ་གུ་དང་མཉམ་དུ་སྐར་མ་30ཙམ་ནང་ཕྲུ་གུས་དགའ་པོ་བྱེད་པའི་དོན་སྙིང་ལྡན་པའི་རྩེད་མོ་རྩེ་བ་དང་ཕན་ཚུན་སྒྲུང་གཏམ་ཤོད་པ་སོགས་བྱེད་དགོས།
ཁ་པར་ལྟ་ཡུན་ལ་ཚོད་འཛིན་བྱེད་པ།
ང་ཚོའི་བསམ་འཆར་ལ། ལོ་གཉིས་ལ་མ་སོན་པའི་ཕྲུ་གུར་ཁ་པར་སོགས་ལྟ་རུ་བཅུག་རྒྱུ་མེད་ལ་སློབ་ལོ་མ་ལོན་གོང་གི་ཕྲུ་གུས་ཉིན་ལྟར་ཀློག་ཀླད་རྩེད་པ་དང་ཁ་པར་ལྟ་བའི་དུས་ཚོད་ཆུ་ཚོད་གཅིག་ལས་འགལ་རྒྱུ་མེད། ཕ་མ་དང་ཕྲུ་གུས་དཔེར་ན་ཉིན་རེར་ཆུ་ཚོད་ག་ཚོད་ཁ་པར་རམ་བརྙན་འཕྲིན་ལྟ་བ་དང་ཆུ་ཚོད་ག་ཚོད་བལྟས་རྗེས་ངལ་གསོ་རྒྱག་དགོས་པ་ཁ་ཆད་བྱེད་དགོས་པ་མ་ཟད། ཁ་བཤད་ལག་བསྟར་བྱ་དགོས།
གཞན་དང་རྩེད་མོ་རྩེ་བ།
ཕ་མས་ཁྱིམ་དུ་བྱིས་པའི་རྩེད་ཆས་མང་ཙམ་གྲ་སྒྲིག་བྱེད་དགོས་པ་དང་། ལྷག་པར་དུ་ཕྲུ་གུ་མང་པོས་མཉམ་དུ་རྩེད་ཆོག་པའི་རྩེད་ཆས་དཔེར་ན། ཤིང་དུམ་དང་། ཤེས་བྱ་ཀུན་འདུས་དཔེ་དེབ། རི་མོ་བསྒྲིགས་རྒྱུ་སོགས་གྲ་སྒྲིག་བྱས་ཏེ་ཕྲུ་གུ་གཞན་དང་མཉམ་དུ་རྩེད་མོ་རྩེ་རྒྱུར་སྐུལ་ལྕག་བྱེད་དགོས།
རོལ་རྩེད་གཞན་གྱིས་ཁ་པར་གྱི་ཚབ་བྱེད་པ།
དཔེར་ན། ཕ་མས་རྒྱུན་དུ་རང་གི་ཕྲུ་གུ་དང་མཉམ་དུ་ཁོང་ཚོས་དགའ་པོ་བྱེད་པའི་དཔེ་དེབ་ལྟ་བ་དང་། རོལ་རྩེད་ལ་རོལ་བ། ཡང་ན་ཕྲུ་གུ་ཁྲིད་ནས་འཆམ་འཆམ་དུ་འགྲོ་བ། གཞན་ཡང་ཕྲུ་གུས་དགའ་པོ་བྱེད་པའི་སྒྲུང་ཤོད་པ་སོགས་བྱེད་དགོས།
