གླིང་གེ་སར་དུ་གྲགས་པ་ཡང་གནམ་ལྡེ་འོད་སྲུང་ནས་འདི་ཡབ་སྲས་ཀྱི་རིང་ལ་བྱུང་བར་མངོན་ནོ། རླང་གི་<རླངས་ཀྱི>ཨ་མེ<མེས>བྱང་ཆུབ་འདྲེ་བཀོལ་གྱི་སྦྱིན་བདག་གེ་སར་གྱིས་བྱས་ཤིང་། བྱང་ཆུབ་འདྲེ་བཀོལ་རང་ཉིད་གུ་རུ་པདྨའི་སྤྲུལ་བ་དང་། གེ་སར་ཁྲི་སྲོང་ལྡེའུ་བཙན་གྱི་སྤྲུལ་བར་ཁས་བླངས་ཤིང་། གེ་སར་ལོ་གྱ་བརྒྱད་ཐུབ་པའི་ལུང་བསྟན་མཛད་ཚུལ་རླངས་ཀྱི་པོ་ཏི་བསེ་རུར་ཡོད་པས་གེ་སར་ནམ་བྱུང་གི་དུས་དེས་ཤེས་པས་དེ་ལས་དུས་སྔ་བ་དང་ཕྱི་བར་མ་སེམས་ཤིག རྙིང་མ་ཁ་ཅིག་གིས་གེ་སར་མངའ་བདག་སྤྲུལ་བར་འདོད་པ་རླངས་ཀྱི་ཚིག་རིས་དང་མཐུན་རུང་བདག་གི་རྩ་བའི་བླ་མས་གེ་སར་སྐྱེས་བུ་རྡོ་རྗེ་ལེགས་པའི་རྣམ་འཕྲུལ་དུ་གསུང་བ་དོན་ལ་གནས་པར་ངེས་ཤིང་། དེ་བོད་ཁམས་བདེ་བའི་ཕྱིར་མངའ་བདག་ཁྲི་སྲོང་གི་བཀའ་ལུང་ངམ་སྨོན་ལམ་གྱི་མཐུས་རྡོར་ལེགས་ཀྱིས་མི་ཡི་སྲིད་པ་བཟུང་བར་བྱས་ན་འགལ་བ་ཅན་ཡང་མ་ཡིན་ནོ། །
