ལོ་དེའི་དབྱར་ཁར། གནམ་གཤིས་སྐམ་ཤས་ཆེ་ལ། མཚམས་རེར་ཙད་པས་གཙེས་ཏེ་ཡིད་མུག་མུག་པོར་གཏོང་བར་བྱེད། ནད་གཞི་ཅུང་ཡང་བའི་ནད་པ་ཁ་ཤས་ཀྱིས་སྨན་ཁང་གི་སྤྱི་གླིང་དུ་བསྡད་དེ་ངལ་གསོ་བྱེད་པའམ། ཉི་འབྲུ་རེ་ཟོས་ནས་ཉི་མ་ཕུད་ཐབས་བྱེད་ཀྱིན་ཡོད། ཁོ་ཚོས་སྤྱི་གླིང་གི་སྡོང་ལོའི་གྲིབ་བསིལ་འོག་ཏུ་བསྡད་དེ་རང་ཉིད་ཀྱི་ཁམས་དང་བསྟུན་པའི་ལབ་གླེང་བྱེད་པ་དང་། བྱ་སྒྲོའི་སྤོ་ལོ་རྩེ་བ་དང་། མིག་མངས་རྩེ་བ་སོགས་རང་རང་གི་དགའ་ཕྱོགས་དང་བསྟུན་པའི་རོལ་རྩེད་ལ་གཡེང་ནས་ངལ་གསོ་བྱེད། དེ་དག་ལས་ནད་པ་མང་ཆེ་ཤོས་ནི་ནད་པའི་ཁྱིམ་མི་དང་གཞན་དག་རེད།

སྨན་ཁང་ཀ་བའི་ནད་ཁང་ཨང་བཅུ་བདུན་པར་ནད་གཞིའི་གནས་ཚུལ་ཧ་ཅང་སྡུག་པའི་ནད་པ་གཉིས་བསྡད་ཡོད། ཁོ་རང་གཉིས་ཀའི་ནད་ཀྱི་གནས་ཚུལ་ཧ་ཅང་ལྕི་བའི་ཁར་ནད་བཅོས་བྱེད་སྐབས་ཀྱི་བརྒྱུད་རིམ་ཡང་རྙོག་འཛིང་ཅན་དུ་སྣང་། དེ་མིན་ནད་ཁང་གི་གཞི་རྒྱ་ཆུང་དྲགས་པས་ཉལ་ཁྲི་གཉིས་མ་གཏོགས་མི་ཤོང་། ནད་པ་དེ་གཉིས་ཀ་སྡོད་སའི་ནད་ཁང་ཨང་བཅུ་བདུན་པ་དེར་སྨན་ཁང་གི་བཟོ་བཀོད་ལྟར་སྒོ་གཅིག་དང་སྒེའུ་ཁུང་གཅིག་མ་གཏོགས་མེད་ལ། སྒོ་ནི་སྨན་ཁང་གི་བར་ཁྱིམ་ལ་ཕྱོགས་ཤིང་། སྒེའུ་ཁུང་ཁོ་ན་བརྒྱུད་ནས་ད་གཟོད་ཕྱིའི་འཇིག་རྟེན་ལ་མིག་གཡེང་བྱེད་རྒྱུ་ལས་ཐབས་གཞན་མེད།

སྒེའུ་ཁུང་དང་ཉེ་བར་བཅར་བའི་ནད་པས་ནད་བཅོས་ཀྱི་གནས་ཚུལ་དང་བསྟུན་ནས་ལུས་པོ་དགྱེ་དགྱེ་བྱས་ཏེ་ཆུ་ཚོད་གཅིག་གི་རིང་ལ་ཁམས་གཡེང་བྱས་ཆོག ཏག་ཏག་ཉིན་གཅིག་གི་དུས་ཚོད་གཅིག་སྤྱད་ནས་ཕྱིའི་འཇིག་རྟེན་ལ་ལྟད་མོ་བལྟས་ཆོག་པ་རེད།

ནད་པ་གཞན་པ་དེ་ནི་ནད་གཞིའི་གནས་ཚུལ་ལྟར་ཉིན་མཚན་དུས་དྲུག་ཏུ་ཉལ་ནས་འདུག་པ་ལས་ཡར་དགྱེ་མི་ཆོག་ལ། ནད་པ་འདི་གཉིས་ཀར་ལྷིང་འཇགས་ཀྱི་སྒོ་ནས་ནད་བཅོས་བྱས་པ་ལས། ཟང་ཟིང་དང་འུར་སྒྲ་སོགས་གཏན་ནས་ཡོད་མི་ཆོག དེ་ནི་སྨན་པས་བཏོན་པའི་སྒྲིག་ལམ་དང་མཉམ་འཇོག་བྱ་དགོས་ས་དེའོ།། ཆེས་ཡིད་སྐྱོ་བ་ཞིག་ལ་ནད་པ་དེ་གཉིས་ཀས་ཚགས་པར་ལྟ་མི་ཆོག་པར་མ་ཟད། རླུང་འཕྲིན་ལ་ཉན་པ་དང་བརྙན་འཕྲིན་ལ་ལྟ་བ་སོགས་ཀྱི་བྱ་སྤྱོད་ནི་དེ་བས་ཀྱང་སྤེལ་ཆོག་གི་མ་རེད། ནད་ཁང་དེར་ཁོ་རང་གཉིས་མ་གཏོགས། ཁྱིམ་མི་དང་ཉེ་འབྲེལ་སོགས་གང་ཡང་མ་མཆིས།

དུས་རྒྱུན་ནད་པ་གཉིས་ཀྱིས་ཨ་སྔོན་གནམ་མཁའི་སྐོར་ལབ་གླེང་བྱེད། ལབ་གླེང་ཐེངས་རེར་ཕལ་ཆེར་ཆུ་ཚོད་ཁ་ཤས་འགོར། ཡང་མཚམས་མཚམས་སུ་ནད་པ་དེ་གཉིས་ཀས་རང་ཁྱིམ་གྱི་ཆུང་མ་དང་། རང་ཉིད་ཀྱི་བྱ་བ། རང་ཉིད་ཀྱི་བརྩེ་དུང་དང་ཕུགས་བསམ། འདས་སོང་གི་ལོ་ཟླ་ལ་ཕྱིར་དྲན་བྱས་པ་སོགས་ཕན་ཚུན་གྱི་ལབ་གླེང་ནི་རྒྱུན་མི་ཆད། ཁོ་རང་གཉིས་པོ་སྨན་ཁང་ཀ་བའི་ཁང་མིག་ཅིག་ཏུ་བསྡད་དེ་མིའི་རིགས་ཀྱི་བདེ་ཐང་དང་མདུན་ལམ། བདེ་སྐྱིད་དང་སྡུག་བསྔལ་སོགས་སེམས་ལ་གང་དྲན་དང་ཡིད་ལ་གང་ཤར་བརྗོད་ཀྱིན་ཡོད།

ཉི་མ་གཅིག ཉི་མ་གཉིས། ཉི་མ་གསུམ། ཉི་མ་མང་བོ་མང་བོ་ཞིག་འདས་རྗེས་ཀྱི་ཉིན་ཞིག་ལ། དུས་ཚོད་ཀྱི་སྐར་མདའ་དེ་སྐར་ཆའི་སྟེང་ནས་རིམ་གྱིས་སྐར་མའི་མདའ་དང་། དེ་ནས་གཅིག་གཅིག་གཉིས་གཉིས་བྱས་ཏེ་ཆུ་ཚོད་ཀྱི་མདའི་ཐོག་ཏུ་བབས་བྱུང་། རིང་ལ་ཐུང་བའི་ཉི་མ་གཅིག་མཇུག་རྫོགས་ལ་ཉེ་དུས། དགུང་ཕྱི་དྲོའི་ཉི་ཐིག་སྨན་ཁང་ཀ་བའི་ནད་ཁང་ཨང་བཅུ་བདུན་པར་འཕྲོས་བྱུང་། ཏག་ཏག་ཕྱི་དྲོའི་དུས་ཚོད་དེར་སླེབས། སྒེའུ་ཁུང་གི་གམ་དུ་ཡོད་པའི་ནད་པ་དེ་ཡར་དགྱེ་སྟེ་ཕྱི་རོལ་གྱི་ཡུལ་ལྗོངས་ལ་ཁམས་གཡེང་བྱེད་པའི་དུས་སུ་རན། ཁོས་རང་གི་མཐོང་ལམ་དུ་མངོན་པའི་སྒེའུ་ཁུང་ཕྱི་རོལ་གྱི་བྱེད་སྒོ་སྣ་ཚོགས་གམ་གྱི་ནད་པ་དེར་ལབ། འདི་ལྟར་ཉི་མ་རེ་རེ་དང་། ཟླ་བ་རེ་རེ། ཐ་ན་ལོ་རེ་རེ་བཞིན་བགྲང་བྱ་ཁ་ཤས་འགོར་དུས། ག་ལེར་ལེར། དུས་ཡུན་ཆུ་ཚོད་གཅིག་གི་རིང་ལ་ལོངས་སུ་སྤྱད་པའི་ཕྱི་རོལ་གྱི་འཇིག་རྟེན་ནི་ནད་ཁང་ཨང་བཅུ་བདུན་པའི་འཚོ་བའི་ནང་དོན་ཆ་ཚང་དུ་གྱུར།

ནད་ཁང་གི་སྒེའུ་ཁུང་ཉེ་སར་སྤྱི་གླིང་ཞིག་ཡོད། སྤྱི་གླིང་དུ་མཚོ་ཆུང་ཞིག་ཀྱང་སྐྱིལ་ཡོད། མཚོ་ངོགས་སུ་རི་སྐྱེས་བྱ་གག་དང་ངུར་བ། ད་དུང་མིང་མི་ཤེས་པའི་བྱ་རིགས་སྣ་ཚོགས་ཁྱུ་དང་ཁྱུ་བྱས་ནས་བག་ཡངས་སུ་རྒྱུ། བྱིས་པ་བསམ་མེད་སྐོར་ཞིག་གིས་བག་ལེབ་མཚོ་ནང་དུ་གཡུགས་ནས་ཆུ་བྱར་གཟན་ཆས་སྟེར་གྱིན་གདའ། བྱིས་པ་ལ་ལ་མཚོ་ངོགས་སུ་གཡེང་ནས་ཆུ་རྐྱལ་བཏེག་པ་དང་། བྱིས་པ་ལ་ལས་ཉ་འཛིན་པ་དང་། བྱིས་པ་ལ་ལས་མཚོ་འགྲམ་གྱི་རྡེའུ་ཟེགས་བཏུས་ནས་རྩེད་མོར་གཡེང་བ། དེ་དང་ཐག་མི་རིང་བའི་སར་གསོམ་ཤིང་དང་། རྒྱ་ལྕང་། དབྱར་སྡོང་སོགས་ལྗོན་ཤིང་སྣ་ཚོགས་བཙུགས་ཡོད། ལྗོན་ཤིང་གི་གྲིབ་བསིལ་འོག་ཏུ་གཞོན་ནུ་ཕོ་མོ་གཉིས་ཀྱིས་དུང་སེམས་ཀྱི་མཆུ་འདབ་སྦྱོར་བ་དང་། དགའ་བདེའི་དཔལ་ལ་རོལ་བཞིན་གནས་དེ་རུ་འཆམ་འཆམ་དུ་འགྲོ་བཞིན་མཆིས།

སྤྱི་གླིང་དུ་མེ་ཏོག་རྣམ་པར་བཞད་ཅིང་། དེ་ལས་གཙོར་ཆེ་ཤོས་ནི་རྒྱ་སེ་མེ་ཏོག་དང་ཆུ་སྐྱེས་པད་མ་རེད། ཁ་དོག་སྣ་ཚོགས་འཛིན་པའི་འགྱིག་བཟོས་མེ་ཏོག་དང་། འགྱིག་བཟོས་རྩེད་ཆས་སོགས་ལྟ་བས་ཆོག་མི་ཤེས་པ་ཞིག་ཏུ་སྣང་། དེ་དག་ལས་ཆེས་ཡིད་གར་འོང་བའི་མེ་ཏོག་པདྨ་ནི་བྱིས་པ་ཚོའི་ལག་ཆུང་གིས་སྒུལ་ཙམ་སྒུལ་ཙམ་བྱེད། སྤྱི་གླིང་གི་ཕྱོགས་གཅིག་ཏུ་བྱ་སྒྲོའི་སྤོ་ལོ་དང་ཕང་ཕིང་སྤོ་ལོ་རྩེད་སའི་ར་བ་ཆུང་ཆུང་ཞིག་མཆིས། སྐབས་ལན་རེར་གནས་དེར་མི་མང་བོར་འདུས་ནས་འགྲན་སྡུར་ལ་ལྟ་བཞིན་འདུག ཛ་དྲག་ཆེ་བའི་འགྲན་སྡུར་རེ་རེ་ལས་ཆེས་ངོ་མཚར་བའི་ལྟད་མོ་རེ་རེ་མཐོང་གིན་པ་འདྲ། ནད་གཞི་ཡང་མོ་ཅན་གྱི་ནད་པ་ཁ་ཤས་གནས་དེར་བསྡད་དེ་ཉིན་གཅིག་གི་ཉི་མ་འཁྱོལ་ཐབས་བྱེད་ཀྱིན་གདའ། སྤྱི་གླིང་གི་ནང་ལོགས་སུ་སྤང་ཐང་ཆུང་ཆུང་ཞིག་ཀྱང་ཡོད། དེ་ནི་སྤྱི་གླིང་ནང་གི་ཚོང་ཁང་དང་ཐག་ཉེ་བོ་ཡོད་པས་འུར་ཟིང་ཆེ་ཚུལ། བྱིས་པ་ཚོས་འཁྱགས་ཞོ་དང་དབུགས་ལྒང་ཉོ་བཞིན་པ་དང་། ཨ་མྱེས་རྒད་པོ་ཞིག་གིས་ཉ་ཤ་བསྲེགས་མ་ཞིག་ཉོ་བཞིན་པ། ཟེར་གཡོལ་ཤེལ་མིག་གྱོན་པའི་ཨ་ཅག་ཅིག་གིས་ལག་ཁུག་དམར་བོ་སྙིང་རྗེ་བོ་ཞིག་ཉོས་ཚུལ། དེ་མིན་ལ་ལས་ཉི་འབྲུ་དང་ལ་ལས་ཆང་བ་ལི་དང་ཚ་ལུ་མ་སོགས་བཟའ་བཏུང་ཅི་རིགས་ཉོ་བཞིན་པའི་ཚུལ། བྱིས་པ་ཞིག་རྒྱུགས་ནས་འཁྱགས་ཞོ་སར་ལྷུང་བ་དང་། སར་ལྷུང་བའི་འཁྱགས་ཞོ་དེ་ཧྭ་པས་ལྡག་ནས་བུད་སོང་ཚུལ། གཞོན་ནུ་མའི་སྒེག་ཉམས་དང་ཛ་དྲག་ཆེ་བའི་སྤོ་ལོ་འགྲན་བསྡུར་སོགས་ཆེས་གསོན་ཉམས་ལྡན་པའི་སྒོ་ནས་གམ་དུ་སྡོད་མཁན་གྱི་ནད་པ་དེར་ལབ།

མཐོང་ལམ་གྱི་འཇིག་རྟེན། བདེ་ཐང་ངང་ནར་སོན་གྱིན་པའི་བྱིས་པ་བསམ་མེད། རང་དབང་གིས་འཚོ་བའི་ཕར་འགྲོ་ཚུར་འོང་གི་ལམ་འགྲོ་བ། ལུས་རྩལ་སྦྱོང་མཁན་དང་འཁྱགས་ཞོ་ཉོ་མཁན། ད་དུང་ལྟད་མོ་བ་དང་འགྲན་རྩོད་པ། ཆེས་ཡིད་དུ་འོང་པའི་འཇིག་རྟེན་ཞིག་ཨང་། ཡར་དགྱེ་མི་ཐུབ་པའི་ནད་པས་ཉན་ཐེངས་རེར་ཆེས་བདེ་སྐྱིད་ལྡན་པ་ཞིག་ཨང་། ཁོས་རང་དབང་མེད་པར་རང་ཉིད་ཀྱང་སྒེའུ་ཁུང་གི་གམ་དུ་བསྡད་དེ་ཕྱི་རོལ་གྱི་འཇིག་རྟེན་མཐོང་རྒྱུ་བྱུང་ན་བསམ། ཅིའི་ཕྱིར་རང་ཉིད་སྒེའུ་ཁུང་གི་གམ་དུ་སྡོད་མཁན་དེ་མ་ཡིན་ནམ་ཞེས་རང་གིས་རང་ལ་འཁང་ར་བྱེད་བཞིན་ལུས།

ཉིན་ཞིག་གི་ཕྱི་དྲོར། ཨེ་མ། མཚར་རོ། ཨ་ཨ་་་ཡག་པོ་རེད་ཅེས་སྒེའུ་ཁུང་གམ་དུ་སྡོད་མཁན་གྱི་ནད་པས་ཕྱི་རོལ་གྱི་སྤོ་ལོ་རྩེད་མཁན་ཞིག་བརྗོད་བྱུང་། སྒེའུ་ཁུང་གི་གམ་དུ་སྡོད་མཁན་གྱི་ནད་པ་དེས་རང་གི་མཐོང་ལམ་གྱི་བྱ་དངོས་དག་ནད་པ་གཞན་དེར་ལབ་རྗེས། ནད་པ་གཞན་དེ་ནི་མིག་མདངས་མི་ལེགས་ཤིང་། སྙིང་གི་འཕར་ལྡིང་དང་ཁྲག་གི་འཁོར་རྒྱུག་སོགས་ཚད་མཐོ་རུ་ཕྱིན་ཏེ། རླུང་ཁམས་ཀྱི་ཚོར་བ་དྲག་པོས་ལུས་ཀྱི་བ་སྤུ་རེ་རེར་གཟེང་བར་བྱེད། དེ་ནས་བཟུང་། ནད་ཁང་ཨང་བཅུ་བདུན་པར་སྡོད་མཁན་གྱི་ནད་པ་ཅིག་ཤོས་དེར་སྡུག་བསྔལ་དང་ཞེ་སྡང་དྲག་ཏུ་སྐྱེས། ཁོས་ཉིན་མཚན་དབྱེར་མེད་དུ་སྒེའུ་ཁུང་གི་གམ་དུ་སྡོད་མཁན་དེར་ཕྲག་དོག་བྱེད། རིམ་བཞིན་མཚན་མོར་གཉིད་མི་ཁུགས་ཤིང་ཉིན་དཀར་ཟས་ཟ་མི་ཐུབ་པར་གྱུར། མཐར་ནད་གཞི་ཇེ་སྡུག་ནས་ཇེ་སྡུག་ཏུ་གྱུར། གམ་གྱི་ནད་པ་དེའང་ལུས་སེམས་བདེ་རུ་འབབ་ཏུ་མ་བཅུག

ཉིན་ཞིག་གི་དགོང་མོར། ནད་ཁང་གི་བར་ཁྱིམ་དང་ཁ་གཏད་དུ་ཡོད་པའི་ནད་པ་དེས་སེམས་ཚེགས་ཆེན་པོས་སྨན་ཁང་གི་གནམ་གཅལ་ལ་ཅེར་ནས་བསྡད། ཡིད་ཕངས་པ་ཞིག་ལ། ནད་ཁང་ཨང་བཅུ་བདུན་པ་ནི་སྔར་ལས་ལྷིང་འཇགས་སེ། གཅིག་སེམས་གཅིག་ལ་ཁེན་ནས་ཡིད་ཀྱི་དྲན་ཚོར་མི་བརྗོད་པའི་ཁར། ག་དུས་ཤིག་ལ་རང་ཉིད་སྨན་ཁང་ནས་སྒོར་འབུད་རྒྱུ་ཁོ་ནར་རེ་སྒུག་བྱས། སྐབས་དེར། ཁོའི་འདུག་གྲོགས་ནད་པ་དེས་ལུ་མགོ་བརྩམས་བྱུང་། དབུགས་ཀྱི་རྒྱུ་བས་གློ་བའི་འཕར་ལྡིང་བསྒག་པ་དང་། ཁོས་ལག་པ་འདར་བཞིན་དུ་ནད་པ་གཞན་དེར་ལག་བརྡ་ཞིག་བསྟན་མོད། ནད་པ་གཞན་དེས་ནི་འགུལ་ཙམ་ཡང་མི་བྱེད་པར་འགྱིང་ནས་བསྡད། སེམས་སུ་ཅིའི་ཕྱིར་རང་ཉིད་སྒེའུ་ཁུང་གི་གམ་དུ་སྡོད་མཁན་དེ་མ་ཡིན་ནམ་ཞེས་གནམ་རྒན་མར་ལེ་བདའ་བྱེད་བཞིན་པ་འདྲ་བར་གནམ་ལ་མཛུབ་མོ་ཀེར་ཀེར་བྱེད། ཁོས་མ་རུང་བའི་ཉམས་ཤིག་རུས་གཟེར་རྒྱག་འདྲའི་གློ་ལུ་དེས་མཚན་ལམ་གྱི་སྨག་རིམ་དང་ལྷིང་འཇགས་གཏོར། ལུ་ཐེངས་གཅིག ལུ་ཐེངས་གཉིས། ལུ་ཐེངས་གསུམ། རིམ་གྱིས་ལུ་ཐེངས་ཇེ་མང་དང་འགྲོས་ཚད་ཇེ་མགྱོགས་སུ་སོང་། དེ་དང་བསྟུན་ནས་ངོ་མདོག་ཡང་དམར་པོར་གྱུར། ཁོས་མ་ཁར་སོ་བཏབ་ནས་བསྲན་ཅི་ཐུབ་བྱེད་མོད། གློ་ལུ་དེ་ཇེ་བཙན་ནས་ཇེ་བཙན་དུ་སོང་སྟེ་མཐར་དབུགས་འཚང་བྱུང་། དབུགས་ཀྱི་རྒྱུ་བ་འགག ལག་པ་དང་རྐང་པ། རེ་རེ་བཞིན་འཁྱགས་པར་གྱུར། ནད་པ་གཞན་དེས་སྔར་བཞིན་སྨན་ཁང་གི་གནམ་གཅལ་ལ་བལྟས་ནས་བསྡད་འདུག ཕལ་ཆེར་ཁོས་ཅི་ཡང་ཚོར་གྱིན་མེད་པ་འདྲ།

ཉིན་གཉིས་པའི་ནངས་མོར། ནད་གཡོག་མ་ཚོས་གནམ་ཁབ་དམ་བེ་རེ་རེ་ནད་ཁང་སོ་སོར་བསྐྱལ་མོད། ནད་ཁང་ཨང་བཅུ་བདུན་པར་གྲག་འགུལ་ཅི་ཡང་མེད་པར་ལྷིང་འཇགས་སེ། ནད་གཡོག་མས་ཡང་ཟོར་གྱིས་ནད་ཁང་གི་སྒོ་ཕྱེས་ཏེ་ནད་པར་ཁམས་བདེ་ཞིག་ཞུས་ཀྱང་ཨ་ལན་སྟེར་མཁན་མ་བྱུང་། མོས་སྒེའུ་ཁུང་གི་གམ་དུ་སྡོད་མཁན་གྱི་ནད་པ་དེས་ཨ་ལན་མི་སྟེར་བ་ཅི་ཡིན་སྙམ་སྟེ་ནང་དུ་ཕྱིན་པ་ན། ཁོའི་ལུས་ཧྲིལ་བོ་འཁྱགས་པར་གྱུར་ཏེ་སྙིང་གི་འཕར་ལྡིང་ཡང་མཚམས་བཞག་འདུག ནད་གཡོག་མས་ནད་པའི་དབུགས་ཀྱི་རྒྱུ་བ་སྔ་མོ་ནས་འགག་ཟིན་པ་ཤེས་མ་ཉིད། ཁ་རོག་ཁ་རོག་གེར་བེམ་པོ་བཀྱགས་ནས་ནད་ཁང་ལས་བུད་སོང་། ཕལ་ཆེར་འཇིགས་སྐྲག་ཅི་ཡང་མེད་པ་འདྲ། བབ་ཆགས་ལ་འགྲོས་མཉམ་པའི་གོམ་སྟབས་རེ་རེ་མདུན་ནས་མདུན་དུ་སྤོས། ག་ལེ་ག་ལེར་མདུན་ནས་མདུན་དུ་སྤོས།

ཉིན་དེའི་ཕྱི་ཉིན་ནས་བཟུང་། སྒེའུ་ཁུང་གམ་གྱི་ནད་ཁྲི་དེ་སྟོང་བར་ལུས། ནད་པ་གཞན་དེའི་སེམས་སུ་ད་ནི་རང་ཉིད་ཁོ་ནས་ལོངས་སུ་སྤྱད་པས་ཆོག་སྙམ་སྟེ། ནད་གཡོག་མར་རང་ཉིད་སྒེའུ་ཁུང་གམ་གྱི་ཉལ་ཁྲི་དེའི་སྒང་ལ་སྤོར་རྒྱུའི་རེ་བ་བྱེད། ནད་གཡོག་མས་ཀྱང་སྒོ་འགྲམ་དུ་སྡོད་མཁན་གྱི་ནད་པ་གཞི་ནས་སྒེའུ་ཁུང་དང་ཉེ་བའི་ནད་ཁྲིའི་སྟེང་དུ་གནས་སྤོར་དུ་བཅུག

ས་སྲོད་ཀྱི་མཚམས་སུ། སྨན་ཁང་ཀ་བའི་ནད་པ་ཚོར་སྨན་བཅོས་མཚམས་འཇོག་ལ་ཉེ། ནད་ཁང་གི་དྲ་ཡོལ་ཀྱང་ཕྱེས་མེད། ནད་ཁང་ཨང་བཅུ་བདུན་པའི་གློག་སྒྲོན་བཀར་མེད་ལ། ནད་ཁང་གི་སྒོ་གསེང་ནས་ལྡང་ཡོང་བའི་རླུང་བུ་འཇམ་པོ་ཞིག་གི་འགྲོས་དང་བསྡོངས་ནས་སྨན་དྲི་ཐུ་ལུ་ལུ། ནད་ཁང་གི་སྒེའུ་ཁུང་ལས་ནུབ་ཁའི་ཉི་ཐིག་ཅིག་འཕྲོས་ཏེ་ནད་པའི་སྐྲ་གསེང་ནས་འོད་ལམ་ལམ་བྱེད། སྨན་པ་ནད་ཁང་ལས་སྒོར་བུད་མ་ཐག་ནད་པས་སྡུག་བསྔལ་ཆེན་པོས་འཕག་འཚག་བྱེད་ཅིང་། ལག་པ་ཡ་གཅིག་ལ་ཁེན་ནས་ཡར་དགྱེ་ཅི་ཐུབ་བྱེད། ཁ་ནས་དབུགས་འཚང་ཞིང་ལུས་པོ་འདར་ཞོར་སྒེའུ་ཁུང་ལས་ཕྱི་རོལ་གྱི་འཇིག་རྟེན་ལ་བལྟས། ཏག་ཏག་སྐབས་དེར་ཁོའི་མཐོང་ལམ་དུ་མངོན་པ་ནི་དཀར་སང་ངེར་ཡོད་པའི་གྱང་ངོས་ཤིག་རེད།

“ཨ་རོག སྨན་པ། སྟོང་ཉིད་སྒྲོལ་མ། ”ཁོས་ཞེ་སྡང་གིས་བོས་མོད། སྨན་པས་ལས་ཚོགས་གྲོལ་ནས་ཁྱིམ་དུ་ལོག་སོང་།

“ཨ་རོག ནད་གཡོག་མ། བདེ་སྐྱིད་འཚོ།” ཁོས་སྡུག་བསྔལ་ཆེན་པོས་བོས་མ་ཉིད། ནད་གཡོག་མས་ག་ལེར་སྒོ་ཕྱེས་བྱུང་།

“ཨ་མ། དུག་སྦྲང་ཞིག ཨ་ཚ་ཚ།”ཞེས་བདེ་སྐྱིད་འཚོ་ཟེར་བའི་ནད་གཡོག་མ་དེས་སྐད་ཅོར་རྒྱག་བཞིན་ཕྱིར་སྒོར་བྲོས།

“ནད་ཁང་ཨང་བཅུ་བདུན་པའི་ནང་དུ་དུག་སྦྲང་ཞིག་ཡེ་་་་”

ནད་ཁང་གི་བར་ཁྱིམ་གྱི་སྒྲོན་འོད་ལས་མཐའ་འཁོར་གྱི་བྱ་དངོས་དག་ཇེ་ཆེ་ནས་ཇེ་ཆེར་བཏང་ཞིང་། མག་མོག་ནས་ཇེ་གསལ་ནས་ཇེ་གསལ་དུ་སྣང་། ཕྱགས་མ་དང་གད་སྙིགས་བླུགས་སའི་སློ་མ། ཚ་དེམ་དང་སྒམ་ཆུང་། སྨན་ཐོ་དང་གློག་དྲིལ། འགྱིག་དམ་ཁ་ཤས་དང་དྲ་ཡོལ། རེ་རེ་བཞིན་སྒྲོན་འོད་ཀྱི་གྲིབ་གཟུགས་ལས་ཆེ་ནས་ཆེ་རུ་གྱུར། ཇེ་གསལ་ནས་ཇེ་གསལ་རེད།