ཨ་གསར་མ་ཡིན་དུས་རྒྱུན་དུ༎

ཧ་ལམ་ལན་རེ་འགྲོ་འདོད་ལངས༎

ས་དམ་འཇང་གི་ཡུལ་གྲུ་འདིར༎

ཤ་ཉེ་སྤུན་མཆེད་མེད་ན་ཡང་༎

ལ་ལུང་ཀུན་པོ་ཉེ་བ་བཞིན༎

ར་བ་གངས་རིས་ཅུང་ཟད་བསྐོར༎

ཡ་ཐོག་རིང་མོའི་དུས་སུ་ལ༎

འ་ཅག་བོད་དང་འགྲོ་འོང་གདའ༎

ཟ་མ་བུད་མེད་དབང་ཆུང་ཞིང་༎

ཞ་ཞིར་གཅེས་པ་བོད་དང་མཚུངས༎

ཝ་ན་ཇི་བཞིན་སྔོ་ལྗང་ཅན༎

ཛ་ཡའི་བསྟན་པ་ཨེན་ཙམ་དར༎

ཚ་གྲང་ཤིན་ཏུ་སྙོམས་པ་ཡིས༎

ཙ་རིས་འགྲན་ཟླ་ག་ལ་འོང་༎

མ་ཕམ་གཡུ་མཚོའི་དོ་ཡ་ཞིག།

བ་ནེ་བུ་ནེའི་སྤྲིན་འོག་ཏུ༎

ཕ་ཀིར་ལ་ཧྲི་མཚོ་ཞེས་ཆགས༎

པ་སངས་སྤེན་པར་མཚོ་འགྲམ་སྐྱིད༎

ན་ཚོད་རྒན་གཞོན་དབྱེར་མེད་པའི༎

ད་ལྟའི་འཛམ་གླིང་ཡུལ་སྐོར་བ༎

ཐ་དད་བསམ་པ་མི་གཅིག་ཀྱང་༎

ཏཱ་ལི་ས་དམ་ལྷ་ཡི་ཡུལ༎

ཉ་ཤ་བྱ་ཤ་བྲོ་བ་ཆེ༎

ཇ་ཁང་ཆང་ཁང་ལྷག་པར་འབེལ༎

ཆ་ཆར་འགྲོ་བའི་གཞོན་ནུ་མཛེས༎

ཅ་ལག་ཁྱད་མཚར་ཀུན་ནི་འཛོམས༎

ང་ཅག་བོད་པ་མང་བོས་ཀྱང་༎

ག་ལེར་འཇང་ཡུལ་ས་དམ་དུ༎

ཁ་ནས་ལས་འཁྱུར་ཟེར་བཞིན་དུ༎

ཀ་མེད་ཁང་བ་ཉོ་མཁན་མང་༎

༢༠༡༨.༡༠.༡༩