གནམ་ལོ་ཕག་གིས་ཚེས་པས་བསྐལ་བ་ཡག་སོང་།།

ཉི་ཟླ་གཟའ་སྐར་འཛོམས་པས་དུས་ཚོད་འགྲིག་སོང་།།

ཕུ་ནུ་དགའ་བས་གསེར་སྐྱེམས་ཞལ་གྱིས་བཞེས་སོང་།།

གནམ་ལོ་འདི་ལ་གཡང་གི་མཚོ་མོ་འཁྱིལ་ཤོག།

ཚེས་གཅིག་ཚེས་གཉིས་ཉི་མ་ནུབ་ཏུ་བཞུད་དེ།།

ཚེས་གསུམ་ཚེས་བཞིའི་སྐར་ཚོགས་མཁའ་ནས་ཡལ་བས།།

ཚེས་ལྔ་ཚེས་དྲུག་སེམས་ཀྱི་མགྲོན་ལ་བསུས་ནས།།

ཚིག་གི་སྡེར་ག་ཡིད་ཀྱི་མཆོད་པར་བཤམས་ཆོག།

ཨ་ལ་ཐ་ལའི་དབྱངས་རྟ་ངག་ལ་འགུག་མཁན།།

བགྲེས་པོ་བགྲེས་མོའི་སྐུ་ལུས་གངས་ཀྱི་རི་བོ།།

དུས་ཀྱི་ཚད་པས་མ་ཞུ་སྔར་བཞིན་བརྟན་ན།།

རྡོག་བྲོ་ལྡེམ་ལྡེམ་སྔོན་མོ་སྤང་ནས་འཁྲབ་ཆོག།

ཨ་ཡང་ལ་མོ་དབྱངས་ཀྱི་རྟ་ལ་བསྐྱོན་མཁན།།

སྟག་ཤར་སྨན་ཤར་སྣང་བའི་ཉི་ཟེར་རྣོན་པོ།།

ངམ་ནག་སྤྲིན་པས་མ་བསྒྲིབ་སྔར་བཞིན་གསལ་ན།།

དགུ་སེང་དྲུག་འགྱུར་ངག་གི་རི་ནས་ཕབ་ཆོག།

ཀྱ་ཙེ་གོམ་ཙེ་བྱིས་བློའི་ནམ་མཁར་སྤུར་མཁན།།

ལོ་ཆུང་མེ་ཏོག་རྒུམ་པའི་ཨ་ལོའི་ཚོགས་ལ།།

དུས་ཀྱིས་མནོལ་གྲིབ་མ་ཕོག་གཙང་ངེར་གནས་ན།།

ཀ་ཁའི་མགུལ་རྒྱན་ལྷག་བསམ་ཚིག་གིས་བསླེ་ཆོག།

གངས་རིའི་ཁ་དོག་མ་ནོག་དར་དཀར་ཤ་ལེར།།

འཚོ་བའི་སྤང་དུ་ལྷང་ངེར་གྱེན་དུ་འཕགས་ན།།

འུ་ཅག་མཛའ་མཐུན་ཉ་མོ་མཚོ་ལ་འཁྱུག་ནས།།

དབྱངས་གསལ་སྡེབ་སྦྱོར་མགྲིན་པའི་རྒྱན་དུ་བཏགས་ཆོག།

ལྔ་ཟུང་རིག་པའི་སྣ་ཚོགས་ལྡུམ་རའི་དབུས་སུ།།

སྐལ་ལྡན་སློབ་ཚོགས་བུང་བའི་ཚུལ་དུ་ལྡིང་སྟེ།།

རང་རང་ནུས་པའི་སྣོད་ལ་བཅུ་བསྐལ་བྱུང་ན།།

ང་ཚོའི་བསོད་ནམས་ལེགས་ཚོགས་ཞིང་ལ་བཏབ་ཆོག།

གན་དང་གན་ཞེས་མཛུབ་མོ་ཀེར་ན་ཆོག་ཀྱང་།།

འདི་དང་འདི་ཞེས་རྒྱུ་མ་ཐུར་འདེད་གལ་ཆེ།།

གན་དང་འདི་གཉིས་ལུས་དང་གྲིབ་མར་གཏོགས་པས།།

ང་ཚོས་ཉི་གྲིབ་རྒྱུ་དང་སྤུན་དུ་འཐག་ཆོག།

རིགས་ཀྱི་སྲོག་དབང་སློབ་གསོའི་རིལ་བུས་གསོ་དགོས།།

རང་གི་འབྱུང་བཞི་ཀུན་རྟོག་མཚོ་མོས་བཀྲུ་དགོས།།

ཕྱི་གཙང་ནང་གཙང་རི་བོའི་ཟོམ་དུ་འཛེག་ན།།

དྲན་ཤེས་དབུ་རྨོག་ཉི་ཟླའི་འོད་ཀྱིས་སྤྲས་ཆོག།

སེམས་ཀྱི་ནང་ཁྲོལ་དག་པ་རླུང་ལ་གཡེང་སྟེ།།

གཟུར་གནས་མཛུབ་མོས་རེ་རེར་བགྲང་རྒྱུ་བྱུང་ན།།

གོམ་ཆུང་ལེབ་མོ་འདམ་གྱི་མཚོ་ལས་ཕྱུང་ནས།།

གངས་དཀར་དྲན་པའི་གཞི་ལ་ཐམ་གར་དཔར་ཆོག།

ཉི་མའི་བཞིན་གྱི་ཚ་བ་སྐྱོན་དུ་བགྲང་ནས།།

ཟླ་བའི་ངོས་ཀྱི་རི་བོང་གདོན་དུ་བལྟས་ནས།།

སྐར་འོད་ཕྲ་མོས་འཇིག་རྟེན་གསལ་བར་འདོད་པ།།

ཕག་ལོའི་དགོངས་པར་འགལ་ཡོད་ང་ཚོར་མི་མཁོ།།

ཁ་སང་རྒྱང་ལ་བཞུད་སོང་ང་ཚོས་མི་ཟིན།།

སང་ཉིན་ཇི་ལྟར་སླེབས་མིན་ཚོད་དཔག་མི་ཐུབ།།

དེ་རིང་ལག་པའི་རི་མོ་མིག་ཏུ་ལྷམ་འདུག།

ཚོད་བགམ་མ་ཡིན་མངོན་སུམ་ཐིག་ལ་བཏབ་ཆོག།

དུས་ཀྱི་ལྡེབས་ལ་འབྱར་བའི་ཐ་སྙད་སྐྱུར་པོ།།

ངག་གི་སུལ་དུ་འཚང་བའི་མྱི་ཁའི་རུལ་དྲི།།

གློ་མཆིན་ཚལ་གྱི་ཕྱོགས་ཞེན་ཕྱེ་ལེབ་ཁྲ་བོ།།

མིག་གི་ལིང་ཏོག་བཞིན་དུ་ལག་པས་ཕྱི་དགོས།།

དྭངས་གཙང་སེམས་ཀྱི་ཉི་མ་མཁའ་ལ་དྲངས་ཏེ།།

དོན་འགྲུབ་སྐར་མའི་དཔུང་ཚོགས་ཕྲག་པར་གཟར་ནས།།

གདོང་གི་པདྨོའི་ཚལ་གྱི་ཐལ་རྡུལ་ཕྱི་བཞིན།།

ང་ཚོས་མིག་ཟུང་གངས་ཀྱི་མདངས་ལ་ཅེར་འགྲོ།།