ཐུན་མོང་ཐོག་སྤྱོད་གཙང་གཞུང་དྲང་གི་དྲ་རྒྱའི་བར་སྟོང་བཏོད་དེ་ལྟ་སྐུལ་དོ་དམ་གྱི་འགན་འཁྲི་ལག་བསྟར་ནན་མོ་བྱ་ཆེད། ཟླ1པོའི་ཚེས8ཉིན་མཚོ་ལྷོ་ཁུལ་གསེར་ཆེན་རྫོང་སྤྱི་བདེ་ཅུས་ཀྱིས་ཁུལ་དྲ་འཕྲིན་གཞུང་ལས་ཁང་དང་། ཁུལ་ཨུའི་དྲིལ་བསྒྲགས་པུའུ། རྫོང་ཨུའི་དྲིལ་བསྒྲགས་པུའུ། རྫོང་རིག་གནས་ཁྲིམས་འཛིན་རུ་ཆེན་སོགས་སྡེ་ཁག་དང་མཉམ་འབྲེལ་ཐོག་ཁུལ་ཡོངས་སུ་མགྱོགས་འཕྲིནappཡིས་སྤྱི་ཚོགས་ལ་ཤུགས་རྐྱེན་ཐེབས་ཤུགས་ཅུང་ཆེ་ཞིང་ཐ་ཤལ་དང་ཆགས་སྲེད་ཆ་འཕྲིན་གྱི་ཐད་གཏོང་ཞབས་ཞུ་མཁོ་འདོན་བྱེད་མཁན་ལ་ཁ་ཏ་སློབ་གསོ་བཏང་།
འབྲེལ་ཡོད་སྡེ་ཁག་གི་འགན་འཁུར་བས“རྟ་མགྲིན”དང “ཧུའུ་ཙི་ཀི” “མཚོ་སྔོན་བསྟན་མཚོ”སོགས་རྒྱབ་སྐྱོར་མཁན་ཅུང་མང་བའི་དྲ་དཔོན་འགས་སྒྲིག་འགལ་ངང་བསྒྱུར་སྒྲིག་དང་ཁྱབ་བསྒྲགས། བརྒྱུད་སྤེལ་བཅས་བྱས་པའི་མ་རབས་ཐ་ཤལ་གྱི་བརྙན་ཐུང་དང་ནོར་འཁྲུལ་གྱི་རིན་ཐང་ལྟ་ཕྱོགས་བརྒྱུད་སྤྲོད་བྱས་པའི་དོན་དངོས་ལ་སློབ་གསོ་ཁྲིད་སྟོན་བྱས་པར་མ་ཟད། 《སྦྲེལ་དྲ་གསར་འགྱུར་ཆ་འཕྲིན་ཞབས་ཞུའི་དོ་དམ་གཏན་འབེབས》དང《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དྲ་རྒྱའི་བདེ་འཇགས་བཅའ་ཁྲིམས》དང་། 《སྦྲེལ་དྲ་ཆ་འཕྲིན་ཞབས་ཞུའི་དོ་དམ་བྱ་ཐབས》《སྦྲེལ་དྲ་ཐད་གཏོང་ཞབས་ཞུའི་དོ་དམ་གཏན་འབེབས》སོགས་བཅའ་ཁྲིམས་ཀྱི་ཁྲིམས་སྲོལ་དང་དེ་བཞིན་དོ་དམ་གཏན་འབེབས་ལ་སློབ་སྦྱོང་ནན་ཏན་བྱས་ཏེ། སྦྲེལ་དྲ་ཆ་འཕྲིན་ཞབས་ཞུའི་བརྒྱུད་རིམ་ནང་བཅའ་ཁྲིམས་ཀྱི་དམར་ཐིག་དང་ཀུན་སྤྱོད་ཀྱི་མཐའ་ཚད་ནན་སྲུང་། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་དར་སྤེལ། ཡར་ཐོན་དགེ་སྒྲུབ་ཀྱི་དྲ་རྒྱའི་རིག་གནས་སྐྱེད་སྲིང་བྱ་དགོས་པའི་བླང་བྱ་བཏོན་པ་རེད།
རྫོང་དཔོན་གཞོན་པའམ་སྤྱི་བདེ་ཅུས་ཀྱི་ཅུས་ཀྲང་སི་ཁྲིན་ཁའེ་ཡིས་ཁ་ཏ་སློབ་གསོ་གནང་སྐབས། ཐད་གཏོང་ཞབས་ཞུ་མཁོ་འདོན་བྱེད་མཁན་གྱིས་རྗེས་ཕྱོགས་ཐད་གཏོང་བྱེད་པའི་ཁྲོད་ངེས་པར་དུ་བཅའ་ཁྲིམས་དང་ཁྲིམས་སྲོལ་ལ་བརྩི་སྲུང་ནན་མོ་ཞུ་དགོས་པ་དང་། རྒྱལ་ཁབ་ཀྱི་ཁེ་ཕན་དང་སྤྱི་དམངས་ཀྱི་ཁེ་ཕན་ལ་སྲུང་སྐྱོབ་བྱེད་པ། ཡང་དག་པའི་ལམ་ཕྱོགས་མཐའ་འཁྱོངས་བཅས་བྱས་ཏེ་རྒྱ་ཆེའི་དྲ་དམངས་མང་ཚོགས་ལ་སྤྱོད་གཙང་གཞུང་དྲང་གི་དྲ་རྒྱའི་བར་སྟོང་མཁོ་འདོན་བྱ་དགོས་པ་དང་། ཐད་གཏོང་ཞབས་ཞུ་མཁོ་འདོན་བྱེད་མཁན་གྱི་ཁྲིམས་འགལ་སྒྲིག་འགལ་གྱི་གནས་ཚུལ་ཤེས་རྟོགས་བྱུང་ཚེ་ཁྲིམས་ལྟར་འབྲེལ་ཡོད་ཁྲིམས་འཛིན་གྱི་གོ་རིམ་ལག་བསྟར་བྱ་རྒྱུ་ཡིན་ཞིང་། གནས་ཚུལ་ཚབས་ཆེ་བའི་རིགས་ཏེ་བཅའ་ཁྲིམས་ལས་འགལ་ཚེ་ཁྲིམས་ལྟར་བཅའ་ཁྲིམས་ཀྱི་འགན་འཁྲི་བདའ་འདེད་གཏང་རྒྱུ་ཡིན་ཞེས་ནན་བཤད་གནང་། རྫོང་སྤྱི་བདེ་ཅུས་ཀྱིས་ཁྲིམས་ལྟར་ཐེངས་འདིར་ཁ་ཏ་སློབ་གསོ་བཏང་བའི་དྲ་དཔོན་དག་ལ་ཐོ་འགོད་བྱས་པ་དང་སྦྲེལ་དྲ་ཐད་གཏོང་ཞབས་ཞུའི་འགན་འཁྲིའི་ཡི་གེར་མིང་རྟགས་བཀོད་པ་རེད།
