ཀྲུང་གོའི་བོད་ལྗོངས་དྲ་བའི་འཕྲིན། ཟླ2པའི་ཚེས25ཉིན་གྱི་སྔ་དྲོ། སུའུ་ལི་ཧྲི་དང་ལེ་ཀྲི་ཏུན་ཧྲི་ཏེང་ཀུང་རྒྱལ་ཁབ་ཏུ་བཅའ་སྡོད་བྱས་པའི་ཀྲུང་གོའི་སྤྱི་ཁྱབ་ལས་ཚབ་ཁང་གིས་ས་གནས་དེ་གའི་སྤུན་ཟླ་རྩ་འཛུགས་བྱས་ནས་ཉོ་སྒྲུབ་བྱས་པའི་རིམས་འགོག་ཞལ་འདེབས་དངོས་ཟོག་དེ་བོད་རང་སྐྱོང་ལྗོངས་འཕྲོད་བསྟེན་བདེ་ཐང་ཨུ་ཡོན་ལྷན་ཁང་ལ་བདེ་བླག་ངང་སྐྱེལ་འདྲེན་བྱས་ནས་ཐོན་ཡོད་ཅིང་། དངོས་ཟོག་ཁག་དེའི་ནང་ཕྱི་ནད་ཚན་ཁག་གི་ཁ་ཐུམ་16200དང་། ཐེངས་གཅིག་རང་བཞིན་གྱི་འོ་སྤྱིན་ལག་ཤུབས་4500ཡོད་པ་དང་དངོས་ཟོག་རིན་ཐང་མི་དམངས་ཤོག་སྒོར་30088ཡིན་པ་རེད།
འདི་ནི་ལྷ་སའི་རྒྱལ་འགག་ལས་དོན་མི་སྣས་འགག་སྒོའི་འབྲེལ་ཡོད་ཀྱི་འགྲོ་ལུགས་བསྒྲུབ་པར་མཛུབ་སྟོན་གནང་བའི་རྣམ་པ་རེད།
རིམས་ནད་སྔོན་འགོག་ཚོད་འཛིན་གྱི་ཞལ་འདེབས་དངོས་ཟོག་མགྱོགས་མྱུར་ངང་འགག་སྒོ་ལས་བརྒལ་བའི་ལས་དོན་ཡག་པོར་སྒྲུབ་ཆེད། བོད་རང་སྐྱོང་ལྗོངས་ཀྱིས་རིམས་ནད་སྔོན་འགོག་ཚོད་འཛིན་གྱི་བརྡ་ལན་རིམ་པ་དང་པོའི་འགོ་བཙུགས་རྗེས། ལྷ་སའི་རྒྱལ་འགག་ཁོངས་གཏོགས་ཀྱི་བར་སྐོར་རྒྱལ་འགག་གིས་དེ་མ་ཉིད་དུ་རང་སྐྱོང་ལྗོངས་ཀྱིས་དམིགས་འཛུགས་བྱས་པའི་ཞལ་འདེབས་ལེན་མཁན་ཚན་པར་འབྲེལ་མཐུད་བྱས་ཤིང་། དེས་རྒྱལ་འགག་གི་གནས་སྐབས་ཐོ་འགོད་འགྲོ་ལུགས་མགྱོགས་མྱུར་ངང་བསྒྲུབ་པར་མཛུབ་སྟོན་དང་རོགས་རམ་བྱས་ཤིང་། དངོས་ཟོག་ཁག་དེའི་དངོས་ཟོག་ཚོགས་ཆུང་ལེགས་གྲུབ་ཟིན་པ་ཤེས་རྗེས། རྒྱལ་འགག་དེས་འཕྲལ་མར་ཆེད་བསྐོས་མི་སྣ་དམིགས་འཛུགས་བྱས་ནས། བརྒྱུད་རིམ་ཧྲིལ་པོར་འབྲེལ་གཏུག་རྗེས་འདེད་བྱས་པ་དང་། དངོས་ཟོག་དངོས་སུ་སྐྱེལ་འདྲེན་བྱེད་འགོ་མ་ཚུགས་གོང་རང་སྐྱོང་ལྗོངས་ནང་ཁུལ་གྱི་ཆེད་ལས་སྒོ་ཁྲལ་གནས་ཞུའི་ལས་ཁུངས་ལ་མཐུན་སྦྱོར་བྱས་ནས། དེར་ཁྲལ་འཇལ་མི་དགོས་པའི་ངོ་སྤྲོད་ཡི་གེ་རེ་ཞུས་བླངས་ཏེ། འབྲེལ་ཡོད་འགྲོ་ལུགས་དེ་དངོས་ཟོག་མ་འབྱོར་གོང་དུ་མཇུག་འགྲིལ་ཐུབ་པ་བྱས་ཡོད།
ཟླ2པའི་ཚེས22ཉིན་ནི་བོད་ཀྱི་ལོ་སར་གྱི་ “དགུ་ཐུག་ཉིན་མོར”ཁེལ་ཡོད་ཅིང་། དངོས་ཟོག་རྒྱལ་མཚམས་ཕྱི་ནས་སྐྱེལ་འདྲེན་བྱེད་པའི་འགོ་བརྩམས་པ་རེད། སྔོན་རྩིས་བྱས་པའི་རྒྱལ་སྤྱིའི་མཁའ་འགྲུལ་ཤང་ཀང་དུ་སླེབས་པའི་དུས་ཚོད་ནི་ཉིན་གཉིས་པའི་ཐོ་རེངས་ཀྱི་དུས་སུ་ཡིན་པའི་དབང་གིས། དངོས་ཟོག “དུས་འགྱངས་སྤུ་ཙམ་ཡང་བྱས་མེད”པའི་སྒོ་ནས་རྒྱལ་འགག་ལས་བརྒལ་བར་འགན་ལེན་བྱེད་ཆེད། འགག་སྒོ་དེས་ཆེད་མི་དམིགས་འཛུགས་བྱས་ནས་མཚན་གང་བོར་ལས་སྲུང་བྱས་ཏེ་ཆ་འཕྲིན་མ་ལག་གིས་སྐྱེལ་འདྲེན་བྱེད་མཁན་གྱིས་བསྐུར་ཡོང་བའི་དངོས་ཟོག་ཐོ་ཡིག་གི་ཆ་འཕྲིན་འཕྲལ་མ་ཉིད་དུ་ངོས་ལེན་དང་། སྒོ་ཁྲལ་གནས་ཞུའི་ལས་ཁུངས་ལ་འབྲེལ་བ་བྱས་ནས་སྙན་ཞུའི་ཆ་འཕྲིན་དུས་ཐོག་ཏུ་བསྐུར་ཐུབ་པ་བྱས།
འདི་ནི་ལྷ་ས་རྒྱལ་འགག་ལས་ཁུངས་ཀྱིས་ནང་འདྲེན་རིམས་འགོག་དངོས་ཟོག་མགྱོགས་མྱུར་ངང་འགག་སྒྲོལ་བྱེད་པར་བཙུགས་པའི་ཆེད་སྤྱོད་སྒེའུ་ཁུང་རེད།
ཟླ་2པའི་ཚེས་23ཉིན་གྱི་བོད་ཀྱི་ལོ་སར་གྱི་སྔ་ནུབ་ཏུ། ཆ་འཕྲིན་མ་ལག་གིས་རང་འགུལ་ངང་གཏོང་བའི་བརྒྱུད་རིམ་ལ་དོན་རྐྱེན་བྱུང་བར་སྔོན་འགོག་བྱེད་ཆེད། རྒྱལ་འགག་འདིའི་ཏང་ཡོན་ལས་སྒོའི་རྐང་འཛིན་པས་རང་འགུལ་ངང་ནང་མི་མཉམ་འཛོམས་ཀྱི་དུས་ཚོད་དོར་ནས་སྒོ་ཁྲལ་གནས་ཞུའི་ཚོམས་ཆེན་དུ་མཚན་གུང་བར་ལས་རེས་བྱས་ཤིང་། དེའི་རིང་ཤར་རྒྱ་མཚོའི་ངོགས་སུ་གནས་པའི་ཧྲང་ཧའེ་ཆེད་ལས་སྒོ་ཁྲལ་གནས་ཞུའི་ལས་ཚབ་ཀུང་སིས་ཀྱང་རོགས་སྐྱོར་གྱི་ལག་པ་བསྲིངས་ནས་རང་འགུལ་ངང་དངོས་ཟོག་འདི་དབོར་འདྲེན་བྱེད་མཁན་ལ་འབྲེལ་བ་བྱེད་རོགས་བྱས་ཏེ། འབྲེལ་ཡོད་དངོས་ཟོག་དེ་རྒྱལ་ནང་གི་ལམ་དུམ་བར་དུ་ཐོན་པའི་སྐྱེལ་འདྲེན་གྱི་གནས་ཚུལ་བཅོས་སྒྲིག་ལ་ངོས་ལེན་བྱས་པར་མ་ཟད། རིན་མེད་ངང་དངོས་ཟོག་འདིར་སྙན་ཞུའི་གཞོགས་འདེགས་ཀྱང་བྱས་པ་རེད།
ཟླ་2པའི་ཚེས་24ཉིན་ཏེ་བོད་ཀྱི་ལོ་སར་ཚེས་གཅིག་ཉིན་གྱི་ཐོ་རེངས་སུ། སྤུན་ཟླའི་གཅེས་སེམས་མཚོན་པའི་གནམ་གྲུ་དེ་ཁྲེང་ཏུའུ་ཧྲོང་ལིའུ་རྒྱལ་སྤྱིའི་གནམ་ཐང་དུ་འབྱོར་ཞིང་། ཆ་འཕྲིན་མ་ལག་གིས་འགྲོ་འོང་བྱེད་པའི་ཆ་འཕྲིན་བདེ་ལེགས་ངང་བཏང་སྟེ་དངོས་ཟོག་དེས་དངོས་གནས“དུས་འགྱངས་སྤུ་ཙམ་ཡང་མེད”པའི་འགག་སྒོ་སྒྲོལ་བའི་རིམ་པ་ལེགས་འགྲུབ་བྱུང་བ་རེད།
འདི་ནི་ལྷ་སའི་རྒྱལ་འགག་ལས་དོན་མི་སྣས་ས་གནས་དངོས་སུ་འབྲེལ་ཡོད་ཀྱི་འགྲོ་ལུགས་བསྒྲུབ་པར་མཛུབ་སྟོན་གནང་བའི་རྣམ་པ་རེད།
རིམས་ནད་ཐོན་པ་ནས་བཟུང་། ལྷ་སའི་རྒྱལ་འགག་ཁོངས་གཏོགས་ཀྱི་བར་སྐོར་རྒྱལ་འགག་གིས་ཐོག་མཐའ་བར་གསུམ་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཏོག་དབྱིབས་ནད་གསར་པའི་གློ་ཚད་སྔོན་འགོག་ཚོད་འཛིན་གྱི་ལས་དོན་ཡག་པོ་བསྒྲུབ་རྒྱུའི་སྐོར་གྱི་མཛུབ་སྟོན་གལ་ཆེན་གྱི་དགོངས་དོན་གཞིར་བཟུང་སྟེ། རྒྱལ་འགག་སྤྱི་ཁྱབ་ལས་ཁུངས་དང་ལྷ་སའི་རྒྱལ་འགག་གི་ལས་དོན་གྱི་བཀོད་སྒྲིག་དོན་འཁྱོལ་ནན་པོ་བྱས་ནས། འཕྲལ་དུ་རིམས་ནད་སྔོན་འགོག་ཚོད་འཛིན་གྱི་དངོས་ཟོག་མགྱོགས་མྱུར་ངང་འགག་སྒྲོལ་བྱེད་པའི་ཇུས་གཞི་བཟོས་ཏེ། རིམ་པ་སོ་སོའི་འགན་འཁྲིའི་ལས་བགོས་དང་འགན་འཁུར་བ་གཏན་ཁེལ་ཁ་གསལ་བྱས་ཡོད་པ་དང་། ལས་སྒོ་སྤེལ་བའི་ཡུལ་དངོས་སུ་ནང་འདྲེན་བྱེད་པའི་རིམས་ནད་སྔོན་འགོག་ཚོད་འཛིན་གྱི་དངོས་ཟོག་འགག་སྒྲོལ་གྱི་ཆེད་དོན་བདག་སྤྲོད་སྒེའུ་ཁུང་བཙུགས་ནས། “ལྗང་མདོག་བགྲོད་ལམ”བཏོད་དེ་སྤུས་ལེགས་ལ་མྱུར་བའི་འགག་སྒྲོལ་ཞབས་ཞུ་མཁོ་འདོན་བྱས་ཤིང་། ཟླ་2པའི་ཚེས་26ཉིན་བར་རྒྱལ་འགག་དེས་རིམ་རྩིས་བྱས་ན་རིམས་ནད་སྔོན་འགོག་ཚོད་འཛིན་གྱི་དངོས་ཟོག་ཁྲི་11ལྷག་ཙམ་ཞིབ་བཤེར་བྱས་པ་རེད།
